1, 2. (a) Anong patanid an nakapagligtas na nin dakul na buhay? (Hilingon an ritrato sa itaas.) (b) Igwa nin anong paggiya an mga lingkod nin Diyos na makakapagligtas kan saindang buhay?

“STOP, LOOK, LISTEN.” Dakul na buhay na an nailigtas kan mga tataramon na iyan. Labing 100 na taon na an nakaagi, darakulang karatula kaiyan an ibinugtak sa mga krosing nin riles sa North America. Taano? Para dai magbalyo sa riles an mga lunadan sa salang pagkakataon asin mabangga kan marikas na nagdadangadang na tren. Iyo, an pagtao nin atensiyon sa patanid na iyan nakapagligtas nin buhay.

² Mas urog pa an ginigibo ni Jehova kisa sa pagbugtak sana nin mga karatulang nagtatao nin patanid. Siya mismo garo nakatindog sa inutan kan saiyang banwaan asin itinutukdo sa sainda an dalan pasiring sa buhay na daing katapusan, na harayo sa mga peligro. Urog pa diyan, siya garo mamumuton na pastor na ginigiyahan asin pinapatanidan an saiyang mga karnero tanganing makalikay sa peligrosong mga dalan.—Basahon an Isaias 30:20, 21.

3. Paano namugtak sa dalan pasiring sa kagadanan an bilog na katawuhan?

³ Puon pa sa kapinunan kan kasaysayan nin tawo, nagtatao na si Jehova  nin espesipikong mga instruksiyon o pagbuot. Halimbawa, sa hardin nin Eden, nagtao si Jehova nin malinaw na instruksiyon na magiya sa mga tawo pasiring sa buhay na daing katapusan asin sa kaugmahan. (Gen. 2:15-17) Kun nagkuyog si Adan asin Eva sa pagbuot nin Diyos, dai kutana sinda nagkaigwa nin buhay na pano nin kulog asin nagadan na mayo nin paglaom. Pero imbes na magkuyog, nagdangog si Eva sa boses na garo baga hali sa sarong halas. Dangan, nagdangog man si Adan sa saiyang agom, sa boses nin sarong mortal na tawo. Pareho nindang tinalikdan an mamumuton na paggiya kan saindang Ama. Bilang resulta, an bilog na katawuhan namugtak sa peligrosong dalan—dalan pasiring sa kagadanan.

4. (a) Taano ta kinaipuhan an bagong mga pagbuot pagkatapos kan Baha? (b) Paano mahihiling sa bagong mga pagbuot an pagmansay nin Diyos?

⁴ Kan panahon ni Noe, nagtao an Diyos nin mga instruksiyon na nakapagligtas nin buhay. Pagkatapos kan Baha, espesipikong ipinagbawal ni Jehova sa mga tawo an pagkakan o pag-inom nin dugo. Taano? Huling magbabago an kamugtakan. Itutugot na ni Jehova na magin kakanon kan mga tawo an karne nin mga hayop. Kaya, kinaipuhan an bagong pagbuot: “Solamente an laman na igwa kan buhay kaiyan—an dugo kaiyan—dai nindo pagkakanon.” (Gen. 9:1-4, NW) Malinaw na mahihiling sa bagong pagbuot na ini kun ano an pagmansay ni Jehova dapit sa sarong bagay na sadiri niya, an buhay. Huling siya an Kaglalang asin Kagtao nin Buhay, siya an may deretso na magtao nin mga pagbuot dapit sa buhay. Halimbawa, ipinagbuot man niya sa mga tawo na dai manggadan nin kapwa. Para sa Diyos, sagrado an buhay saka dugo, asin papanimbagon niya an siisay man na nagbabalga sa mga pagbuot niya dapit sa mga iyan.—Gen. 9:5, 6.

5. Ano an pag-uulayan niyato ngunyan, asin taano?

⁵ Pag-ulayan niyato an pira sanang halimbawa kun paano padagos na giniyahan nin Diyos an saiyang mga lingkod sa laog nin dakul na siglo. Papakusugon kaini an satong determinasyon na magsunod sa paggiya ni Jehova pasiring sa bagong kinaban.

6. Taano ta kinaipuhan na tawan nin Diyos an mga Israelita nin mga katugunan paagi ki Moises, asin ano an dapat na magin paggawi ninda?

⁶ Kinaipuhan kan panahon ni Moises an malinaw na mga giya mapadapit sa tamang paggawi asin pagsamba. Taano? Huling nagbago giraray an kamugtakan. Sa laog nin labing duwang siglo, namuhay an mga Israelita bilang mga uripon sa Ehipto na diyan lakop an pagsamba sa gadan, paggamit nin mga idolo, asin iba pang paniniwala saka kaugalian na naglalapastangan sa Diyos. Kan makabutas an banwaan nin Diyos sa pang-aapi kan Ehipto, kinaipuhan an bagong mga pagbuot. Mamumuhay na an banwaan nin Diyos bako bilang mga bihag, kundi bilang sarong talingkas na nasyon na an sinusunod iyo sana an Katugunan ni Jehova. Sigun sa mga reperensiya, an Hebreong tataramon para sa “katugunan” konektado sa sarong tataramon na nangangahulugan na “pagbutan, giyahan, instruksiyunan.” An Katugunan ni Moises nagin garo nagpoprotektar na lanob sa mga Israelita laban sa imoralidad asin palsong pagsamba kan mga nasyon na nakapalibot sa sainda. Pag nagdangog sa Diyos an mga Israelita, bendisyon niya an aakuon ninda. Pag binaliwala ninda siya, sasaparon ninda an mararaot na resulta.—Basahon an Deuteronomio 28:1, 2, 15.

7. (a) Ipaliwanag an saro pang dahilan kun taano ta nagtao si Jehova nin bagong mga pagbuot sa saiyang banwaan. (b) Paano nagserbing sarong tagagiya sa Israel an Katugunan?

⁷ May saro pang dahilan kun taano ta kinaipuhan an bagong mga pagbuot. Inandam kan Katugunan an mga Israelita para sa sarong mahalagang kautuban kan katuyuhan ni Jehova, an pag-abot kan Mesiyas, si Jesu-Cristo. Ipinagirumdom kan Katugunan sa mga Israelita na bako sindang perpekto. Tinabangan man sinda kaini na masabutan na kaipuhan ninda nin pantubos, sarong perpektong atang na lubos na makakahali kan mga kasalan ninda. (Gal. 3:19; Heb. 10:1-10) Dugang pa, naingatan kan Katugunan an linahi na gigikanan kan Mesiyas asin nakatabang iyan sa mga Israelita na mamidbid ninda siya oras na mag-abot siya. Iyo, an Katugunan nagserbing sarong temporaryong  paratukdo, o “tagagiya,” pasiring ki Cristo.—Gal. 3:23, 24, NW.

8. Taano ta dapat kitang magpagiya sa mga prinsipyo na nasa Katugunan ni Moises?

⁸ Bilang mga Kristiyano, makikinabang man kita sa mga pagbuot na yaon sa Katugunan na itinao kaidto sa nasyon nin Israel. Paano? Arog kan nakasurat na “STOP” asin “LOOK” sa karatula sa mga krosing nin riles, puwede kitang magpundo asin maghiling sa mga prinsipyo na nasa likod kan Katugunan. Dawa ngani dai na kita sakop kan mga katugunan na idto, puwede tang mansayon an dakul sa mga iyan bilang mapagtitiwalaan na mga giya sa satong buhay aroaldaw asin sa pagsamba niyato sa satong banal na Diyos, si Jehova. Ipinasurat niya sa Bibliya an mga katugunan na idto tanganing makanuod kita sa mga iyan, magiyahan kan mga prinsipyo, asin mapahalagahan an halangkaw na pamantayan sa moral na itinao sa mga Kristiyano na mas urog pa sa Katugunan. Asin arog kan saro pang nakasurat sa karatula na “LISTEN,” dapat kitang magdangog sa sinabi ni Jesus: “Nadangog nindong sinabi: ‘Dai ka magsambay.’ Alagad sinasabi ko sa saindo na an siisay man na nagpaparahiling sa sarong babayi asin nagkakaigwa nin imoral na pagmawot sa saiya nakakakomiter na sa puso niya nin pagsambay sa babaying iyan.” Kaya, bako sanang pagsambay an dapat niyatong likayan kundi pati an imoral na mga kaisipan asin pagmawot.—Mat. 5:27, 28, NW.

9. Kinaipuhan an bagong mga pagbuot hali sa Diyos huli sa anong bagong kamugtakan?

⁹ Kan uminabot si Jesus bilang Mesiyas, kinaipuhan an bagong mga pagbuot hali ki Jehova asin an paghayag nin urog pang detalye dapit sa Saiyang katuyuhan. Taano? Huling, sa giraray, nagbago an kamugtakan. Kan 33 C.E., isinikwal ni Jehova an nasyon nin Israel asin pinili an Kristiyanong kongregasyon bilang saiyang inuuyunan na banwaan.

10. Taano ta tinawan an Kristiyanong kongregasyon nin bagong katugunan, asin ano an pagkakalain kaini sa itinao sa mga Israelita?

¹⁰ Kan inot na siglo, tinawan an banwaan nin Diyos, an bagong maestablisar na Kristiyanong kongregasyon, nin bagong mga instruksiyon dapit sa pagsamba asin paggawi. An maimbod na mga lingkod na ini nin Diyos nagin sakop na nin sarong bagong tipan. An Katugunan ni Moises itinao sa saro sanang nasyon—an Israel sa laman. Pero, an espirituwal na Israel magigin kompuwesto nin mga tawo hali sa dakul na nasyon asin kultura. Tunay nanggad, “an Diyos mayong pinapalain, kundi sa lambang nasyon an tawong natatakot sa saiya asin naggigibo nin matanos saiyang inaako.” (Gibo 10:34, 35, NW) Kan nakaistar an nasyon nin Israel sa Dagang Panuga, an Katugunan ni Moises an naggiya sa sainda paagi sa mga pagbuot na nakasurat sa gapo. Pero para sa espirituwal na Israel, an itinao sa sainda iyo ‘an katugunan ni Cristo’ na sa pangkagabsan nakabasar sa mga prinsipyong nakasurat sa saindang puso. ‘An katugunan ni Cristo’ an magiya sa mga Kristiyano para sa saindang kapakinabangan sain man sinda nakaistar.—Gal. 6:2.

11. Mapadapit sa anong duwang bagay sa buhay nin Kristiyano an ‘katugunan ni Cristo’?

¹¹ Makikinabang na marhay an espirituwal na Israel sa paggiya nin Diyos paagi sa saiyang Aki. Bago establisaron an bagong tipan, nagtao si Jesus nin duwang mahalagang pagbuot. An saro mapadapit sa gibuhon na paghuhulit. An saro pa mapadapit sa dapat na magin paggawi nin mga Kristiyano asin kun paano ninda dapat trataron an lambang saro. An mga pagbuot na ini para sa gabos na Kristiyano; kaya aplikado an mga ini sa gabos na tunay na parasamba ngunyan, sa langit man o sa daga an saindang paglaom.

12. Ano an nagin mga pagbabago sa gibuhon na paghuhulit?

¹² Pag-isipan an paghuhulit kan maugmang bareta na ipinapagibo ni Jesus sa saiyang mga parasunod. Bago an pamamaagi asin hiwas kan paghuhulit na ini. Kan mas nainot na mga siglo, an mga tawo kan mga nasyon kaipuhan na magduman sa Israel para makapaglingkod ki Jehova. (1 Ha. 8:41-43) Pero mababago iyan huli sa pagbuot ni Jesus na mahihiling ta sa Mateo 28:19, 20. (Basahon.) Sinabi ni Jesus sa saiyang mga disipulo na sinda an ‘magduman’ sa gabos na tawo. Inot na nahiling kan  Pentecostes 33 C.E. an patunay sa pagbabagong ini sa pamamaagi ni Jehova—an paghuhulit kan maugmang bareta sa bilog na kinaban. Kan aldaw na iyan, pinano niya kan saiyang banal na espiritu an mga 120 miyembro kan bagong kongregasyon tanganing milagroso sindang makapagtaram nin lain-lain na lengguwahe asin makapaghulit sa mga Judio saka proselita. (Gui. 2:4-11) Pagkatapos, pinahiwas an teritoryo; iiniba na sa mga huhulitan an mga Samaritano. Dangan kan 36 C.E., mas pinahiwas pa an teritoryo kan iiniba na an bakong turing mga Hentil sa mga papaabutan kan mensahe. Masasabi niyato na an teritoryo na dating garo “danaw-danaw” nin mga Judio nagin nang “kadagatan” nin mga tawo.

13, 14. (a) Ano an kalabot sa ‘bagong tugon’ ni Jesus? (b) Ano an manunudan niyato sa halimbawa ni Jesus?

¹³ Nagtao man si Jesus nin ‘sarong bagong tugon’ dapit sa kun paano niyato tatrataron an satong mga kapagtubod. (Basahon an Juan 13:34, 35.) Kalabot sa tugon na iyan bako sana an pagpahiling niyato nin pagkamuot sa sainda aroaldaw, kundi dapat man kitang magin andam na magadan para sa sainda. Sarong bagay iyan na mayo sa Katugunan ni Moises.—Mat. 22:39; 1 Juan 3:16.

¹⁴ Ipinahiling ni Jesus an pinakanangungurog na halimbawa kan siring na bakong makasadiring pagkamuot. Namutan niyang marhay an saiyang mga disipulo, kaya andam siyang magadan para sa sainda. Asin linalauman niya na arog man kaiyan an gigibuhon kan gabos niyang parasunod, kaiba kita. Kaya dapat na andam man kitang magtagal nin mga kasakitan asin magadan pa ngani para sa satong mga tugang.—1 Tes. 2:8.

15, 16. Ano an mga pagbabago sa mga kamugtakan niyato ngunyan, asin paano kita ginigiyahan nin Diyos?

¹⁵ Ninombrahan ni Jesus “an maimbod asin mapagmansay na uripon” tanganing magtao sa saiyang mga parasunod nin espirituwal na kakanon sa tamang panahon. (Mat. 24:45-47, NW) Kaiba sa kakanon na ini an mahalagang mga instruksiyon para sa mga pagbabago sa kamugtakan kan mga lingkod nin Diyos.

¹⁶ Nabubuhay kita sa panahon na inaapod kan Bibliya na ‘huring mga aldaw,’ asin nagdadangadang na an dakulang kahurasaan na dai pang kaagid na nangyari kasuarin man. (2 Tim. 3:1; Mar. 13:19) Dugang pa, pinalayas si Satanas saka an saiyang mga demonyo sa langit asin ihinulog digdi sa daga, na nagresulta sa grabeng pagsakit kan katawuhan. (Kap. 12:9, 12) Asin isinugo man kitang isagibo an sarong makasaysayan asin daing kaagid na kampanya nin paghuhulit sa mas dakul na tawo saka lengguwahe sa bilog na kinaban na dai pa nuarin man nangyari!

17, 18. Ano an dapat niyatong gibuhon kun dapit sa itinataong mga paggiya nin Diyos?

¹⁷ Dakul na kasangkapan an itinatao kan organisasyon nin Diyos tanganing tabangan kita sa satong paghuhulit. Ginagamit mo daw iyan? Alerto ka daw sa mga instruksiyon na itinatao sa satong mga pagtiripon sa kun paano gagamiton an mga kasangkapan na ini sa pinakaepektibong paagi? Ibinibilang mo daw na paggiya hali sa Diyos an mga instruksiyon na iyan?

¹⁸ Iyo, tanganing padagos na akuon an bendisyon nin Diyos, kaipuhan niyatong magtao nin atensiyon sa mga paggiya na itinatao sa sato paagi sa Kristiyanong kongregasyon. Kun magigin makinuyog kita ngunyan, mas magigin pasil para sa sato na magkuyog sa mga paggiya sa panahon kan ‘dakulang kahurasaan,’ na diyan hahalion an bilog na maraot na sistema ni Satanas. (Mat. 24:21) Pagkatapos kaiyan, kakaipuhanon niyato an bagong mga instruksiyon para sa pamumuhay ta sa matanos na bagong kinaban na lubos nang talingkas sa ano man na impluwensiya ni Satanas.

19, 20. Anong mga rolyo an bibikladon, asin ano an magigin resulta kaiyan?

¹⁹ Kan panahon ni Moises, kinaipuhan kan nasyon nin Israel an bagong mga pagbuot, kaya itinao nin Diyos an Katugunan. Kan huri, itinao man nin Diyos sa Kristiyanong kongregasyon ‘an katugunan ni Cristo.’ Kaagid kaiyan, sinasabi sa sato kan Bibliya na sa bagong kinaban may mga rolyo na bibikladon tanganing magtao sa sato nin mga paggiya para sa pamumuhay niyato diyan. (Basahon  an Kapahayagan 20:12. ^[1]) Posibleng marhay na ipapaliwanag sa mga rolyong ini an mga kahagadan ni Jehova para sa katawuhan sa panahon na iyan. Paagi sa pag-adal sa mga ini, maaaraman kan gabos na tawo, kaiba na an mga binuhay liwat, kun ano an kabutan nin Diyos para sa sainda. Siyertong matatabangan kita kan mga rolyong ini na mas masabutan an kaisipan ni Jehova. Huling ginigiyahan kan urog na pakasabot sa ipinasabong na Tataramon nin Diyos asin sa mga ihahayag sa bagong mga rolyo, siyertong mamumuton, magalang, asin may dignidad na tatrataron kan mga nakaistar sa Paraiso an saindang kapwa. (Isa. 26:9) Imahinara kun gurano kadakul na bagay an manunudan asin itutukdo niyato sa iba sa irarom kan paggiya kan Hadi, si Jesu-Cristo!

²⁰ Buhay na daing katapusan an naghahalat sa mga magigin makinuyog sa “mga bagay na nakasurat sa mga rolyo.” An mga magdadanay na maimbod sa Diyos sa panahon kan pangultimong pagbalo pagdadanayon ni Jehova na nakasurat an saindang mga pangaran sa “rolyo nin buhay.” Puwede nanggad kitang mag-ako nin buhay na daing katapusan! Kaya arog kan karatulang “STOP, LOOK, LISTEN,” kaipuhan tang magpundo tanganing pag-adalan an Tataramon nin Diyos, maghiling tanganing sabuton an kahulugan kaiyan para sa sato, asin magdangog sa paggiya nin Diyos ngunyan. Kun gigibuhon niyato iyan, makakaligtas kita sa dakulang kahurasaan asin padagos na makakanuod sagkod lamang dapit sa satong madunong sa gabos asin mamumuton na Diyos, si Jehova.—Par. 3:11; Roma 11:33.