1. Puon pa sa kapinunan, ano na an mahihiling sa mga gibo nin Diyos?

SA KAPINUNAN pa sana kan paglalang, mahihiling na an pagkasararo. Bilang personipikasyon nin kadunungan, an inot na linalang nin Diyos nagsabi: ‘Kataid ako [ni Jehova] kaidto bilang ekspertong trabahador. Sa sako siya nangurugnang nauugma aroaldaw.’ (Tal. 8:30, NW) Iyo, nakikooperar an Aki sa saiyang Ama sa paggibo kan manlain-lain na linalang. Mahihiling man sa mga gibo nin Diyos an pakikikooperar. Nahiling ta an kuwalidad na ini sa paggibo kan arka kan panahon ni Noe; sa pagtugdok, pagbaklas, asin paglipat kan tabernakulo mantang nagbabaklay an banwaan nin Diyos sa kaawagan; asin dawa sa pagkanta saka pagtugtog nin musika para umawon si Jehova sa saiyang templo. Nagibo ninda an gabos na ini huling nakikooperar sinda sa lambang saro.—Gen. 6:14-16, 22; Bil. 4:4-32; 1 Cron. 25:1-8.

2. (a) Ano an risang-risa sa inot na Kristiyanong kongregasyon? (b) Anong mga hapot an pag-uulayan niyato?

² Risang-risa man an pakikikooperar sa Kristiyanong kongregasyon kan inot na siglo sa irarom kan payo kaini na si Jesu-Cristo. Sinabi ni apostol Pablo na dawa ngani igwang ‘manlain-lain na balaog’ asin  nakikikabtang sa ‘manlain-lain na paglilingkod’ saka may ‘manlain-lain na gibo’ an lambang linahidan na mga Kristiyano, gabos sinda kabtang nin “saro sanang hawak.” (Basahon an 1 Corinto 12:4-6, 12.) Pero kumusta man kita ngunyan? Paano kita makikikooperar sa lambang saro sa paghuhulit kan maugmang bareta, sa kongregasyon, asin sa pamilya?

3. Ano an nahiling ni apostol Juan sa sarong bisyon?

³ Sa pagtatapos kan inot na siglo C.E., nahiling ni apostol Juan sa sarong bisyon an pitong anghel na an lambang saro nagpatanog nin trumpeta. Kan patanugon kan ikalimang anghel an saiyang trumpeta, nahiling ni Juan an ‘sarong bituon’ na nahulog sa daga hali sa langit. May kapot na liyabe an ‘bituon’ asin binukasan niya kaiyan an pinto pasiring sa kairaruman. Mahibog na aso an nagluwas, dangan hali sa aso luminuwas an sarong mahibog na panganuron nin mga duron. Imbes na mga pananom, ‘mga tawo na [mayo] kan [tatak] nin Diyos sa saindang angog’ an inatake kan simbolikong mga duron. (Kap. 9:1-4) Siguradong aram ni Juan kun gurano kagrabeng danyos an puwedeng gibuhon nin sarong mahibog na panganuron nin mga duron. Bakong kan panahon ni Moises dinamat nin mga duron an suanoy na Ehipto? (Ex. 10:12-15) An piguratibong mga duron na nahiling ni Juan angay na nagrerepresentar sa linahidan na mga Kristiyano na nagbabalangibog kan mapuwersang mga mensahe nin paghukom ni Jehova. Asin minilyon na may daganon na paglaom an uminiba na sa sainda ngunyan. Kaya napaluya kan satong sararong paghuhulit an impluwensiya ni Satanas asin kan saiyang pambilog na kinaban na imperyo nin palsong relihiyon.

4. Anong asignasyon an kaipuhan gibuhon kan mga lingkod nin Diyos, asin sa anong paagi sana ninda magigibo iyan?

⁴ Dakulaon an asignasyon kan mga lingkod ni Jehova—ihulit an ‘maugmang bareta’ sa bilog na kinaban bago umabot an katapusan kan sistemang ini. (Mat. 24:14; 28:19, 20, NW) Kaiba digdi an pag-agda sa mga “napapaha” na uminom kan “tubig nin buhay na daing bayad.” (Kap. 22:17) Bilang mga miyembro kan Kristiyanong kongregasyon, paano ta mapangganang magigibo ini? Paagi sana sa ‘pagkakauruyon asin pakikikooperar’ sa lambang saro—Efe. 4:16, NW.

5, 6. Anong mga aktibidad an may pagkasararo niyatong ginigibo?

⁵ Tanganing maipaabot sa pinakadakul na tawo an maugmang bareta kan Kahadian, kaipuhan niyatong gibuhon sa organisadong paagi an satong paghuhulit. Iyan an dahilan kun taano ta nakakaresibi kita nin mga instruksiyon. An mga instruksiyon na ini na itinatao paagi sa mga kongregasyon sa bilog na daga nakakatabang sa sato na magkasararo sa gibuhon na ini. Pagkatapos tang magtiripon bago maglingkod sa langtad, minaluwas kita tanganing ipakipag-ulay sa mga tawo an maugmang bareta kan Kahadian. Paagi sa satong pakikipag-ulay asin sa minilyon na kopya nin mga publikasyon na basado sa Bibliya, naipapalakop niyato an mensahe. Kun may instruksiyon na makikabtang sa espesyal na kampanya nin paghuhulit, naghihinguwa ka daw na makapagpartisipar diyan? Kun makikikabtang ka, nakikiiba ka sa minilyon na iba pa na nagkakasararong naghuhulit kan mensahe kan “anghel na naglalayog sa kaitaasan.”—Kap. 14:6, An Marahay na Bareta Biblia.

⁶ Nakakaugma nanggad na mabasa sa Yearbook an pinagsarong mga resulta kan satong paghuhulit! Isipa man kun paano kita nagkakasararo sa bilog na kinaban sa pagdistribwir nin mga imbitasyon para sa satong pangrehiyon, espesyal, asin internasyonal na mga kumbensiyon. Pararehong impormasyon an nadadangog niyato gabos sa mga pagtiripon na ini. An mga pahayag diyan, drama, asin demonstrasyon, parati kitang dinadagka na paglingkudan an Diyos sa bilog niyatong makakaya. Pinagsasararo man kita sa bilog na kinaban kan paggirumdom niyato sa kagadanan ni Jesus. Bilang pasasalamat ta sa daing kapantay na kabuutan nin Diyos asin bilang pagkuyog ta sa instruksiyon ni Jesus, taon-taon kitang nagtitiripon para sa Memoryal, pagkasulnop kan saldang pag Nisan 14. (1 Cor. 11:23-26) Asin bako sanang bawtisadong  mga Saksi an puwedeng mag-atender diyan. Mga pirang semana bago an Memoryal, kinokobrehan ta, sagkod na posible, an gabos na teritoryo kan satong kongregasyon para imbitaran an mga tawo na umiba sa sato sa mahalagang okasyon na iyan.

7. Ano an nagigibo niyato huli sa satong pagtatarabangan?

⁷ Dai kayang gumibo nin dakulang danyos an nagsosolong duron. Sa kaagid na paagi, kun solo sana kitang maghihinguwa, dai ta kayang hulitan an gabos na tawo. Pero paagi sa pagtatarabangan, nagigibo niyatong ipamidbid sa minilyon na tawo an saro na maninigo sa gabos na pag-umaw asin onra, si Jehova! Pero, igwa pa nin ibang paagi na an satong pakikikooperar nakakakontribwir sa pagkasararo kan banwaan nin Diyos.

8, 9. (a) Anong halimbawa an ginamit ni Pablo para itukdo sa mga Kristiyano na danay na magkasararo? (b) Paano kita puwedeng makikooperar sa kongregasyon?

⁸ Sa saiyang surat sa mga taga Efeso, sinabi ni Pablo kun paano inoorganisar an kongregasyon, asin kun taano ta kaipuhan kan gabos sa kongregasyon na ‘magtalubo sa gabos na bagay.’ (Basahon an Efeso 4:15, 16. ^[1]) Ano an makakatabang sa lambang saro sa sato na magibo an pasuhan na iyan? Ginamit ni Pablo bilang halimbawa an hawak nin tawo tanganing ipaliwanag na an lambang Kristiyano makakatabang na mapagdanay an pagkasararo kan kongregasyon sa irarom kan payo kaiyan na si Jesu-Cristo. Sinabi niya na an gabos na parte kan hawak nakikikooperar paagi sa ‘kada sugpunan kaiyan na nagtatao kan ano man na kinakaipuhan.’ Paano an lambang saro sa sato, hoben man o gurang, makusog o maluya, makakatabang sa pagkasararo asin sa pagpakusog sa espirituwalidad kan kongregasyon?

⁹ An panginot na paagi iyo na magpasakop kita asin igalang an mga inasignaran ni Jesus na magtao nin paggiya sa kongregasyon, an mga elder. (Heb. 13:7, 17) Tibaad bako ining pirming pasil gibuhon. Pero, puwede kitang humagad nin tabang ki Jehova. Matatabangan kita kan saiyang banal na espiritu na bilog na pusong magsunod sa mga areglo kan kongregasyon. Kaya kun may pagkakataon na garo habo niyatong magsunod sa itinaong instruksiyon, dapat tang hurop-hurupon kun paano makakakontribwir sa pagkasararo kan kongregasyon an satong mapakumbabang pakikikooperar. Dugang pa, an pakikikooperar sa siring na mga bagay siyertong makakatabang sa sato gabos na mapakusog an pagkamuot ta sa lambang saro.

10. Paano nakakatabang an mga ministeryal na lingkod sa pagkasararo kan kongregasyon? (Hilingon an ritrato sa kapinunan kan artikulo.)

¹⁰ Dakula man an naitatabang kan mga ministeryal na lingkod sa pagkasararo kan kongregasyon. An mga brother na ini, ano man an saindang edad, mapagsakripisyong naglilingkod para sa kapakinabangan kan gabos. Halimbawa, nagtatabang sinda sa mga elder na masiguradong igwa kita nin igong suplay nin mga publikasyon na magagamit sa ministeryo. Dugang pa, sinda an parating nag-aasikaso sa regular na paglinig saka pagmentenar kan Kingdom Hall, asin sinda man an nag-iistimar sa mga bisita na nag-aatender sa satong mga pagtiripon. Kun nakikikooperar kita sa sainda, nakakakontribwir kita sa pagigin organisado kan kongregasyon.—Ikumparar an Guibo 6:3-6.

11. Paano makakatabang an mga hoben sa pagkasararo kan kongregasyon?

¹¹ May mga elder na dakul na taon nang nag-aasikaso sa mga paninimbagan sa kongregasyon. Pero huling nagkakaedad na sinda, tibaad limitado na an nagigibo ninda, kaya kinaipuhan an mga pagbabago. Dakula an maitatabang kan hoben pang mga brother. Dawa mayo pa sindang gayong eksperyensiya, kun sasanayon sinda, makakatabang sinda sa pag-asikaso nin dugang pang mga paninimbagan sa kongregasyon. Marahayon nanggad kun an mga ministeryal na lingkod naghihinguwang makuwalipikar na magin elder! (1 Tim. 3:1, 10) An ibang hoben na mga elder guminibo nin urog pang pag-uswag sagkod na magin kuwalipikado sindang maglingkod bilang paraataman nin sirkito, na nagtatabang sa mga tugang sa dakul na kongregasyon. Bako  daw na nagpapasalamat kita sa gikan sa buot na paglilingkod kan satong hoben na mga tugang?—Basahon an Salmo 110:3; Parahulit 12:1.

12, 13. Ano an makakatabang sa gabos na miyembro kan pamilya na makikooperar sa lambang saro?

¹² Paano ta matatabangan an mga miyembro kan satong pamilya na makikooperar sa lambang saro? Nahiling kan dakul na an pagkaigwa nin Pampamilyang Pagsamba kada semana nakakatabang para mas mapakusog an relasyon kan mga hoben asin may edad na. Sa maugmang panahon na ini nin Pampamilyang Pagsamba, nakapokus kita sa espirituwal na mga bagay, asin nakakakontribwir iyan sa pagkasararo kan pamilya. An pagpraktis sa mga sasabihon sa ministeryo makakatabang sa pamilya na magin mas andam asin epektibo sa paghuhulit. Asin pag nadadangog ninda an lambang miyembro na nagkokomento dapit sa Tataramon nin Diyos asin nahihiling ninda na gabos sinda namumutan si Jehova saka gustong gibuhon an kabutan niya, mas napaparani sinda sa lambang saro.

¹³ Ano man an puwedeng gibuhon kan agom na lalaki asin kan agom na babayi tanganing makikooperar sinda sa lambang saro asin makapagtao nin kaumawan ki Jehova? Kun an mag-agom parehong maimbod na lingkod ni Jehova, magigin maugma asin magkakasaro sinda. Dapat man nindang ipahiling an pagkamuot sa lambang saro, arog kan ginibo ni Abraham saka Sara, Isaac saka Rebeca, asin Elkana saka Hana. (Gen. 26:8; 1 Sam. 1:5, 8; 1 Ped. 3:5, 6) Kun gigibuhon iyan kan mag-agom, magkakasaro sinda asin mas mapaparani sinda sa saindang Ama sa langit.—Basahon an Parahulit 4:12.

14. Kun dai naglilingkod ki Jehova an saimong agom, ano an puwede mong gibuhon para magdanay na makusog an saindong relasyon?

¹⁴ Dai dapat pagtugutan nin mga Kristiyano na masakalan sinda na bakong timbang kaiba nin mga dai nagtutubod. (2 Cor. 6:14) Pero paano an mga tugang niyato na bakong kapagtubod an agom? An iba sa sainda nanudan an katotoohan kan sinda may agom na, asin dai nagin Saksi an agom ninda. Sa arog kaining sitwasyon, makakatabang an pag-aplikar sa mga prinsipyo sa Bibliya tanganing magkaigwa nin pagkakauruyon sa pamilya. Kaipuhan digdi an pakikikooperar sagkod sa pinakamapupuwede na dai nakikikompromiso. Bako ining pasil, pero isipon an magigin marahay na resulta kaiyan. Puwede man na magin masakit an pag-aplikar sa mga prinsipyo sa Bibliya kun an agom na Saksi napaparayo na sa kongregasyon. Nangyari ini sa sarong sister na si Mary. Siya asin an agom niyang si David, magkaibanan na naglingkod ki Jehova. Pero, nagpundo si David sa pag-atender sa mga pagtiripon. Padagos na nag-atender si Mary sa mga pagtiripon saka kumbensiyon asin nagmaigot na iaplikar sa saindang harong an mga prinsipyo sa Bibliya, kaiba na an pagtukdo sa saindang anom na aki manungod ki Jehova. Kan magdakula na an mga aki asin dai na ninda sinda kaibanan sa harong, namatian ni Mary na nagsosolo na sana siya. Pero, pinunan nang basahon ni David an mga magasin na iwinawalat ni Mary sa saiya. Pag-abot nin panahon, nag-atender na giraray siya sa nagkapirang mga pagtiripon. Pirmi siyang irinereserba nin tukawan kan saiyang sais anyos na makuapong lalaki. Pag dai nag-atender si David, sasabihon sa saiya kan makuapo niya, “Hinalat taka Lolo sa pagtiripon kasubago.” Pakalihis nin mga 25 taon, maugma na giraray na naglilingkod ki Jehova si David, asin maugma man si Mary huling magkaibanan na giraray sinda sa paglilingkod.

15. Paano matatabangan kan mas may edad nang mga mag-agom an mas hoben na mga mag-agom?

¹⁵ Pinupuntirya ngunyan ni Satanas an mga pamilya. Kaya mahalagang marhay na papagdanayon kan mag-agom na naglilingkod ki Jehova an marahay na pakikikooperar sa lambang saro. Gurano man kamo kahaloy nang mag-agom, pag-isipan kun ano an puwede mong sabihon o gibuhon tanganing mapakusog an saindong relasyon. Puwede pa nganing tabangan kan mas may edad nang mga mag-agom an mas hoben na mga mag-agom sa bagay na ini. Puwede nindang imbitaran an sarong hoben na mag-agom na umiba sa saindang  pampamilyang pagsamba. Mantang kaiba ninda sinda, mahihiling ninda na mahalaga an pagkamuot asin pagkauruyon gurano man kahaloy nang mag-agom.—Tito 2:3-7.

16, 17. Anong mga bendisyon an naghahalat sa nagkakasararong mga lingkod nin Diyos?

¹⁶ Imahinara an mga Israelita kan mga panahon kan Bibliya na nag-uumaw ki Jehova sa saiyang templo sa Jerusalem sa panahon nin sarong kapiyestahan. Kinaipuhan nindang mag-andam para sa pagbaklay, asikasuhon an pangangaipo kan lambang saro mantang nasa dalan, asin pagkatapos, sararong magsamba sa templo. An gabos na ini nangangaipo nin pakikikooperar. (Luc. 2:41-44) Sa ngunyan, mantang padagos kitang nagbabaklay pasiring sa bagong kinaban, kaipuhan man niyatong magdanay na nagkakasararo asin gibuhon an bilog niyatong makakaya tanganing makikooperar sa lambang saro. May naiisip ka daw na mga paagi para mas lalo pang magibo ini?

¹⁷ Isip-isipon an mga bendisyon na naghahalat sa sato! Binayaan ta na an dai pagkasararo asin kariribukan na lakop ngunyan sa presenteng sistemang ini nin mga bagay. Nahihiling na niyatong nauutob ngunyan an hula ni Isaias asin Miqueas—nagkakasararong nagtutukad sa “bukid ni Jehova” an saiyang mga lingkod. (Isa. 2:2-4; basahon an Miqueas 4:2-4.) Iyo, halangkawon na an satong paagi nin pagsamba sa huring mga aldaw na ini. Asin magigin maugma pa kitang marhay pag nabubuhay na kita sa panahon na diyan an gabos na tawo nagkakasararo asin nakikikooperar sa lambang saro sa pagsamba ki Jehova!