Talagang pinakusog ni Jehova an entusiyastikong mga parahulit na ini. Durante kan taon na iyan, an 225 mga colporteur, o payunir, nagin nang 350. Asin sa inot na pagkakataon, labing 8,000 na class worker, o mga parahayag an nagsumitir sa headquarters kan saindang report sa paglilingkod sa langtad. Binendisyunan nanggad sinda ni Jehova.

Kan Marso 21, 1920, si Joseph F. Rutherford, na kan panahon na iyan iyo an nanginginot sa mga Estudyante sa Bibliya, ipinahayag an temang “An Minilyon na Nabubuhay Ngunyan Dai Na Nuarin Man Magagadan.” Ginibo kan mga Estudyante sa Bibliya an gabos na makakaya ninda para imbitaran an mga interesado na mag-atender sa okasyon na ini. Inarkila ninda an saro sa pinakadakulang teatro sa New York City asin nagdistribwir nin mga 320,000 na imbitasyon.

Mas dakul kisa sa inaasahan kan mga Estudyante sa Bibliya an nag-abot. An kapasidad kan teatro 5,000 katawo sana, kaya dai na pinalaog an mga 7,000 pa na nagduman. Inapod iyan kan The Watch Tower na “saro sa pinakamapangganang mga pagtiripon na isinagibo kan International Bible Students kasuarin man.”

Nagin midbid an mga Estudyante sa Bibliya huli sa pagbalangibog na “an minilyon na nabubuhay ngunyan dai na nuarin man magagadan.” Kan panahon na iyan, dai ninda nasasabutan na an mensahe kan Kahadian kaipuhan na ibalangibog sa kadakul pang lugar asin na magpapadagos iyan sa haloy-haloy pang panahon. Dawa arog kaiyan, pambihira nanggad an saindang kaigutan. Si Ida Olmstead, na nagpuon na mag-atender sa mga pagtiripon kan 1902, nagsabi, “Aram mi na may nakatagamang darakulang bendisyon para sa katawuhan, asin sinasabi mi talaga an maugmang baretang ini sa lambang manumpungan mi sa ministeryo.”

Para masigurado na igwang suplay nin espirituwal na kakanon, nagpuon na mag-imprenta nin nagkapirang literatura an mga tugang mismo sa Bethel. Nagbakal sinda nin pang-imprenta asin ininstalar iyan sa sarong arkiladong edipisyo na nasa 35 Myrtle Avenue, Brooklyn, New York, na harani lang sa Bethel.

Kan Enero 1920, nagpuon na maglingkod sa Bethel si Leo Pelle asin Walter Kessler. “Pag-abot mi,” an sabi ni Walter, “hiniling kami kan paraataman  kan imprentahan dangan nagsabi, ‘Igwa pa kamong saro may kabangang oras bago magpangudto.’ Ipinasakat niya samo an mga karton nin libro hali sa basement.”

Inistorya ni Leo an nangyari kan suminunod na aldaw: “Trabaho mi na linigon an mga lanob sa inot na eskalon kan edipisyo. Iyan an pinakamaating trabaho na ginibo ko. Pero gibuhon iyan kan Kagurangnan, kaya mahalaga nanggad iyan.”

Sa laog sana nin pirang semana, iniimprenta na an The Watch Tower kan maigot na boluntaryong mga ministro. Sisenta mil na kopya kan Pebrero 1, 1920, na isyu kan The Watch Tower an inimprenta sa flatbed press sa ikaduwang eskalon. Sa basement pig-set up kan mga brother an pang-imprenta na inapod nindang Battleship. Prinodusir na man an The Golden Age puon sa Abril 14, 1920 na isyu kaiyan. Mayong duda na binendisyunan ni Jehova an mga paghihinguwa kan mga boluntaryong iyan.

Sa giraray, naghuhulit nin may kaigutan asin pagkasararo an mga lingkod ni Jehova. Minsan siring, may mga Estudyante sa Bibliya na nagbaya sa organisasyon durante kan masakit na mga panahon puon kan 1917 sagkod 1919. Ano an puwedeng gibuhon para tabangan sinda?

Mababasa sa Abril 1, 1920 na isyu kan The Watch Tower an artikulong “Mamuhay Kita nin May Katuninungan.” Igwa diyan nin mamumuton na pakiulay: “Sigurado kami . . . na gabos na igwa kan espiritu kan Kagurangnan . . . andam na lingawan an mga bagay na nasa likudan, . . . may pagkasararong mag-irok na magkairiba asin may pagkauruyon na isagibo an Saiyang gibuhon.”

Dakul an napahiro kan mabuot na mga tataramon na iyan. Sarong mag-agom an nagsurat: “Kumbinsido kami na sala kami na mayo kaming ginigibo sa nakaaging taon asin bago pa kaiyan mantang an iba [naghuhulit]. . . . Sana dai mi na mautro iyan.” Dakulon pang gibuhon an naghahalat sa mga trabahador na ini na nagin aktibo giraray.

Kan Hunyo 21, 1920, pinunan kan mga Estudyante sa Bibliya an sigidong kampanya para idistribwir an “ZG,” na sarong softcover na edisyon  kan The Finished Mystery. * Dakul na kopya kan librong ini an isinaray kan ipagbawal iyan kan 1918.

An gabos na class worker, bako sanang mga colporteur, inimbitaran na makikabtang sa pagdistribwir. “An lambang dusay [bawtisado] asin puwedeng magpartisipar na mga indibidwal sa lambang class [kongregasyon] maninigong gibuhon iyan nin gikan sa buot. Ini lugod an magin motto ngunyan kan lambang saro: ‘Ini an priyoridad ko’—idistribwir an ZG.” Sinabi ni Edmund Hooper na para sa dakul an kampanyang ini an inot na aktuwal na pagharong-harong na ginibo ninda. Sinabi pa niya, “Nagin mas pamilyar kami sa gibuhon na magigin mas mahiwas pang marhay kisa sa ano man na inaasahan mi.”

Nagin masakit an komunikasyon durante kan Giyera Mundiyal I, kaya masakit makontak an mga Estudyante sa Bibliya sa ibang mga nasyon. Huli kaiyan, gustong pakusugon ni Brother Rutherford an mga tugang na ini asin organisaron giraray an gibuhon na paghuhulit. Kaya kan Agosto 12, 1920, nagbiyahe siya asin an apat pang brother pasiring sa Britania, Continental Europe, asin Middle East.

Kan binisita ni Rutherford an Britania, an mga Estudyante sa Bibliya nagsagibo nin tulong kumbensiyon asin 12 pampublikong pagtiripon. Kinakarkulong 50,000 an nag-atender. Kun manungod sa pagbisita, sinabi kan The Watch Tower: “Naginhawahan asin napakusog an mga tugang. Nagin mas dayupot sinda sa lambang saro huli sa pagkamuot saka sa paglilingkod, asin dakul an napakusog.” Sa Paris, nagpahayag giraray si Brother Rutherford manungod sa temang “An Minilyon na Nabubuhay Ngunyan Dai Na Nuarin Man Magagadan.” Kan magpuon an pahayag, pano-pano an pasilidad. Tres sientos katawo an nag-request nin dagdag na impormasyon.

Kan suminunod na mga semana, binisita ni Brother Rutherford asin kan saiyang kairiba an Athens, Cairo, asin Jerusalem. Para kultibaron an interes kan mga nakaistar sa mga lugar na iyan, nag-establisar si Brother Rutherford nin sangang opisina sa banwaan nin Ramallah, harani sa Jerusalem. Dangan nagbalik siya sa Europa saka inestablisar an Central European Branch Office asin iinareglo na iimprenta an mga literatura diyan.

Kan Setyembre 1920, ilinuwas kan mga Estudyante sa Bibliya an Num. 27 kan The Golden Age  na sarong espesyal na isyu na naghayag kan pagpersegir sa mga Estudyante sa Bibliya kan 1918. An Battleship, na nasambitan kasubago, aldaw-bangging nag-imprenta tanganing makaprodusir nin labing apat na milyon na kopya kan magasin na ini.

Naaraman kan mga parabasa kan magasin na iyan an manungod sa pambihirang kaso ni Emma Martin. Sarong colporteur si Sister Martin sa San Bernardino, California. Kan Marso 17, 1918, siya asin an tulong brother na si E. Hamm, E. J. Sonnenburg, asin E. A. Stevens nag-atender sa sarong sadit na pagtiripon kan mga Estudyante sa Bibliya.

May sarong lalaki duman na nag-atender bako para makanuod sa Bibliya. Kan huri inadmitir kaini: “Nag-atender ako sa pagtiripon na iyan . . . huli sa sugo kan opisina kan Prosecuting attorney. Nag-atender ako para makakua nin ebidensiya.” Nakua niya an “ebidensiya” na hinahanap niya, sarong kopya kan The Finished Mystery. Pakalihis nin pirang aldaw, inarestar si Sister Martin asin an tulong brother. Kinasuhan sinda nin pagbalga sa ley (Espionage Act) huli sa pagdistribwir nin mga kopya kan ipinagbabawal na libro.

Napatunayan na may sála si Emma asin an tulong brother asin sinentensiyahan sinda nin tulong taon na pagkapreso. Kan Mayo 17, 1920, dai na sinda makakaapelar pa kaya iprineso na sinda. Alagad dai nahaloy, nagrahay an mga bagay-bagay.

Kan Hunyo 20, 1920, isinaysay ni Brother Rutherford an saindang eksperyensiya sa sarong kumbensiyon sa San Francisco. Ikinabigla kan mga nagdadangog an pagtratar sa mga Kristiyanong ini, kaya nagpadara sinda nin telegrama sa presidente kan Estados Unidos. Isinurat ninda: “Para sa samo an hatol . . . ki Mrs. Martin, . . . sa irarom kan Espionage law bakong makatanusan . . . An ginibo kan mga opisyal kan Pederal na paggamit kan saindang kapangyarihan para . . . siudon si Mrs. Martin . . . dangan kasuhan siya tanganing maipreso para sa samo . . . labi-labi karaot.”

Kan sunod mismong aldaw, hinali tulos ni Presidente Woodrow Wilson an sentensiya ki Sister Martin asin ka Brother Hamm, Sonnenburg, asin Stevens. Tapos na an bakong makatanusan na pagkapreso ninda.

Sa pagtatapos kan 1920, dakul nin dahilan para mag-ugma an mga Estudyante sa Bibliya. Padagos na naghihiwas an gibuhon kan headquarters, asin urog kasuarin man, aktibong ibinabalangibog kan tunay na mga Kristiyano an Kahadian nin Diyos bilang solusyon sa mga problema kan katawuhan. (Mat. 24:14) An sunod na taon na 1921 magkakaigwa nin mas dakul nanggad na gibuhon kun manungod sa pagpaisi kan katotoohan sa Kahadian.