1. Ano an pinakamarahay na desisyon na magigibo nin siisay man?

SA PARATI, an mga desisyon na ginigibo kan mga magurang may panghaluyan na epekto sa mga aki ninda. Kun bakong madunong an mga desisyon kan mga magurang, puwedeng magdara iyan nin mga problema sa saindang mga aki. Alagad kun madunong an mga desisyon ninda, matatabangan nindang magkaigwa nin maugma asin nakakakontentong buhay an saindang mga aki. Siyempre, kaipuhan man na gumibo nin mga desisyon an mga aki ninda. An pinakamarahay na desisyon na magigibo nin siisay man iyo na maglingkod sa satong mamumuton na Ama sa langit, si Jehova.—Sal. 73:28.

2. Anong marahay na mga desisyon an ginibo ni Jesus asin kan saiyang mga magurang?

² Determinado an mga magurang ni Jesus na tabangan an saindang mga aki na maglingkod ki Jehova, asin mahihiling sa mga desisyon ninda na iyan an pinakapasuhan ninda sa buhay. (Luc. 2:40, 41, 52) Arog ninda, naggibo man si Jesus nin marahay na mga desisyon na nakatabang sa saiya sa pag-utob kan papel niya sa katuyuhan ni Jehova. (Mat. 4:1-10) Si Jesus nagin mabuot, maimbod, asin makusog an buot na adulto—sarong aki na makakapaugma sa puso kan siisay man na magurang na may takot sa Diyos.

3. Anong mga hapot an sisimbagon ta sa artikulong ini?

³ Sa artikulong ini, sisimbagon ta an minasunod na hapot: Anong marahay na mga desisyon an ginibo ni Jehova may koneksiyon ki Jesus? Ano an manunudan kan Kristiyanong mga magurang sa mga desisyon na ginibo ni Jose asin Maria? Asin ano an manunudan kan Kristiyanong mga hoben sa mga desisyon na ginibo ni Jesus?

4. Anong mahalagang desisyon an ginibo ni Jehova may koneksiyon sa saiyang Aki?

⁴ Marahayon na mga magurang an pinili ni Jehova para ki Jesus. (Mat. 1:18-23; Luc. 1:26-38) Maririsa sa udok sa pusong mga tataramon ni Maria sa Bibliya an saiyang hararom na pagkamuot ki Jehova asin sa saiyang Tataramon. (Luc. 1:46-55) Asin an pagsunod ni Jose sa instruksiyon ni Jehova nagpapahiling na may takot siya sa Diyos asin gusto niyang mapaugma Siya.—Mat. 1:24.

5-6. Ano an itinugot ni Jehova na maeksperyensiyahan kan saiyang Aki?

⁵ Mangnuhon na bakong mayaman na mga magurang an pinili ni Jehova para ki Jesus. Maririsa sa atang na idinulot ni Jose asin Maria pagkapangaki ki Jesus na tios sinda. (Luc. 2:24) Huling karpintero si Jose, tibaad may sadit siyang gibuhan kataid kan harong ninda sa Nazaret. Siguradong simple sana an pagbuhay ninda, lalo na mantang nagdadakula an saindang pamilya na may kisiyera pitong aki.—Mat. 13:55, 56.

⁶ Prinotektaran ni Jehova si Jesus sa nagkapirang peligro, pero dai Niya ilinikay an Saiyang Aki sa gabos na kadipisilan. (Mat. 2:13-15) Halimbawa, may mga kaparyente si Jesus na dai nagtubod sa saiya. Isipa na sana an pagkadisganar ni Jesus huli ta kan primero, dai siya inako bilang Mesiyas kan pira sa mismong mga kapamilya niya. (Mar. 3:21; Juan 7:5) Kan magadan an saiyang ama-amaan na si Jose, siguradong makulugon asin masakit iyan para ki Jesus. Asin dahil si Jesus an panganay, nangangahulugan iyan na siya na an mapadagos kan hanapbuhay kan pamilya. (Mar. 6:3) Mantang nagdadakula si Jesus, nakanuod siya kun paano aatamanon an saiyang pamilya. Posibleng marhay na kinaipuhan niyang maigot na magtrabaho para masustentuhan sinda. Kaya naeksperyensiyahan mismo ni Jesus na mapagal pagkatapos nin maghapon na trabaho.

7. (a) Anong mga hapot an makakatabang sa mga mag-agom manungod sa pagpadakula sa saindang mga aki? (b) Paano makakatabang an Talinhaga 2:1-6 sa pagsasanay sa mga aki?

⁷ Kun kamo sarong mag-agom asin gustong magkaaki, haputon an sadiri: ‘Kami daw mapakumbaba asin mga tawong espirituwal na pipilion ni Jehova na mag-ataman sa sarong mahalagang marhay na buhay?’ (Sal. 127:3, 4) Kun saro ka nang magurang, haputon an sadiri: ‘Itinutukdo ko daw sa sakong mga aki an kahalagahan kan maigot na pagtrabaho?’ (Par. 3:12, 13) ‘Ginigibo ko daw an pinakamakakaya ko para protektaran an sakong mga aki sa mga peligro sa pisikal asin  moral na tibaad mapaatubang sa sainda sa kinaban ni Satanas?’ (Tal. 22:3) Dai mo mapoprotektaran an saimong mga aki sa gabos na kadipisilan na puwedeng mapaatubang sa sainda. Imposible iyan. Pero puwede mo sindang luway-luway asin mamumuton na iandam sa mga realidad kan buhay paagi sa pagtukdo sa sainda kun paano mapagiya sa Tataramon nin Diyos. (Basahon an Talinhaga 2:1-6.) Halimbawa, kun pilion nin sarong kapamilya na bayaan an tunay na pagsamba, tabangan an saimong mga aki na masabutan sa Tataramon nin Diyos kun taano ta mahalagang marhay na magdanay na maimbod ki Jehova. (Sal. 31:23) O kun magadan an sarong mahal sa buhay, ipahiling sa saimong mga aki kun paano gagamiton an Tataramon nin Diyos para makayanan an grabeng kamunduan asin magkaigwa nin katuninungan.—2 Cor. 1:3, 4; 2 Tim. 3:16.

8. Anong instruksiyon na nasa Deuteronomio 6:6, 7 an sinunod ni Jose asin Maria?

⁸ Natabangan ni Jose asin Maria si Jesus na magdakula na inuuyunan nin Diyos huling sinunod ninda an instruksiyon ni Jehova sa mga magurang. (Basahon an Deuteronomio 6:6, 7.) May hararom na pagkamuot ki Jehova si Jose asin Maria, asin priyoridad ninda na tabangan an saindang mga aki na magkaigwa man kan arog kaiyan na pagkamuot.

9. Anong mahalagang desisyon an ginibo ni Jose asin Maria?

⁹ Nagdesisyon si Jose asin Maria na pagdanayon an marahay na espirituwal na rutina bilang pamilya. Mayong duda na nag-atender sinda sa semanal na mga pagtiripon sa sinagoga sa Nazaret, pati man sa taunan na Paskuwa sa Jerusalem. (Luc. 2:41; 4:16) Tibaad ginamit ninda an mga pagbiyaheng iyan pa-Jerusalem tanganing tukduan si Jesus asin an mga tugang niya manungod sa kasaysayan kan banwaan ni Jehova. Asin mantang nasa dalan, posibleng naghahapit sinda sa mga lugar na sinambit sa Kasuratan. Mantang nagdadakula an saindang pamilya, siguradong nadipisilan si Jose asin Maria na pagdanayon an marahay na espirituwal na rutina. Pero hilinga man an nagin mga pakinabang kaiyan! Huling ininot ninda an pagsamba ki Jehova, napangatamanan na marhay sa espirituwal an saindang pamilya.

10. Ano an manunudan ki Jose asin Maria kan Kristiyanong mga magurang?

¹⁰ Ano an manunudan ki Jose asin Maria kan mga magurang na may takot sa Diyos? An pinakamahalaga, tukduan an saimong mga aki paagi sa tataramon asin gibo na namumutan mong  marhay si Jehova. Tandaan na an pinakamarahay na regalong maitatao mo sa sainda iyo an tabangan sindang mamutan si Jehova. Asin an saro sa pinakamahalagang maitutukdo mo sa sainda iyo an kun paano ninda mapagdadanay an marahay na espirituwal na rutina nin pag-adal, pagpamibi, pag-atender sa mga pagtiripon, asin pakikikabtang sa ministeryo. (1 Tim. 6:6) Siyempre dapat mong tawan nin materyal na mga pangangaipo an mga aki. (1 Tim. 5:8) Alagad tandaan na an saindang dayupot na relasyon ki Jehova, bako an materyal na pagsadiri, an makakatabang sa sainda na makaligtas sa katapusan kan lumang sistemang ini asin makabalyo sa bagong kinaban nin Diyos. *—Ezeq. 7:19; 1 Tim. 4:8.

11. (a) Paano makakatabang sa mga magurang an sadol na nasa 1 Timoteo 6:17-19 na makagibo nin marahay na mga desisyon sa pagpadakula sa saindang mga aki? (b) Anong mga pasuhan an puwedeng pag-isipan kan saindong pamilya, asin ano an mga puwedeng magin bendisyon kaiyan? (Hilingon an kahon na “ Anong mga Pasuhan an Aabuton Mo?”)

¹¹ Nakakaugma nanggad na mahiling an dakulon na Kristiyanong magurang na naggigibo nin marahay na mga desisyon tanganing tabangan an saindang mga aki na magin dayupot ki Jehova! Regular sindang iribang nagsasamba. Nag-aatender sinda sa mga pagtiripon kan kongregasyon asin sa mga kumbensiyon. Asin nakikikabtang sinda sa ministeryo sa langtad. May mga pamilya na nakakapaghulit pa ngani sa mga teritoryong bihirang magibo. An iba nagbibisita sa Bethel o nagtatabang sa mga proyekto sa pagtugdok kan organisasyon. An mga pamilya na pinipiling gibuhon an mga iyan nangangaipong gumastos, asin puwedeng magin dipisil iyan sa sainda. Pero an mga pakinabang na nakakamtan ninda tunay nanggad na nakakapayaman sainda sa espirituwal. (Basahon an 1 Timoteo 6:17-19.) An mga aki na nagdakula sa arog kaiyan na pamilya, sa parati, ipinagpapadagos an marahay na mga kaugalian na nanudan ninda, asin dai nanggad ninda iyan pinagbabasulan! *—Tal. 10:22.

12. Ano an kinaipuhan na gibuhon ni Jesus mantang nagdadakula siya?

¹² An Ama ni Jesus sa langit pirming marahay an mga desisyon, asin naggibo man nin madunong na mga desisyon an saiyang mga magurang digdi sa daga. Alagad, mantang nagdadakula si Jesus, kaipuhan niya man na gumibo nin sadiring mga desisyon. (Gal. 6:5) Arog sa sato, igwa man siya kan regalong libertad na magdesisyon. Puwede kuta na sadiring kapakanan an ininot niya. Pero, nagdesisyon siyang papagdanayon an marahay na relasyon niya ki Jehova. (Juan 8:29) Paano makakatabang sa mga hoben ngunyan an saiyang halimbawa?

13. Anong mahalagang desisyon an ginibo ni Jesus kan siya aki pa?

¹³ Kan aki pa siya, pinili ni Jesus na magpasakop  sa saiyang mga magurang. Nungka niyang sinuway an paggiya kan saiyang mga magurang, na iniisip na mas dakul siyang aram kisa sainda. Imbes, “padagos siyang nagpasakop sa sainda.” (Luc. 2:51) Mayong duda na sineryoso niya an saiyang responsabilidad bilang panganay. Siguradong nagmaigot siya na manudan an trabaho kan saiyang ama-amaan tanganing makatabang sa pagsustento sa pamilya.

14. Paano niyato naaraman na paraadal si Jesus kan Tataramon nin Diyos?

¹⁴ Posibleng marhay na inistorya ni Jose asin Maria ki Jesus an manungod sa milagrosong pagkamundag sa saiya asin kun ano an sinabi kan mga mensahero nin Diyos manungod sa saiya. (Luc. 2:8-19, 25-38) Dai nakontento si Jesus sa kun ano sana an nadangog niya; pinag-adalan niya man an Kasuratan. Paano niyato naaraman na paraadal si Jesus kan Tataramon nin Diyos? Huling kan siya aki pa, an mga paratukdo sa Jerusalem “ngalason sa saiyang pakasabot asin mga simbag.” (Luc. 2:46, 47) Asin dawa 12 anyos pa sana si Jesus, kumbinsido na siya na si Jehova an saiyang Ama.—Luc. 2:42, 43, 49.

15. Paano ipinahiling ni Jesus na desisyon niyang gibuhon an kabutan ni Jehova?

¹⁵ Kan masabutan ni Jesus an manungod sa papel niya sa katuyuhan ni Jehova, nagdesisyon siyang akuon an saiyang asignasyon. (Juan 6:38) Aram niya na ikakaungis siya kan dakul kaya siguradong nakapurisaw iyan sa saiya. Dawa arog kaiyan, pinili niyang magpasakop ki Jehova. Kan mabawtismuhan si Jesus kan 29 C.E., an saiyang buhay panginot nang nakapokus sa paggibo kan hinahagad sa saiya ni Jehova. (Heb. 10:5-7) Dawa kan naghihingagdan na si Jesus sa hariging pasakitan, nungkang nagluya an determinasyon niya na gibuhon an kabutan kan saiyang Ama.—Juan 19:30.

16. Ano an manunudan kan mga aki ki Jesus?

¹⁶ Magsunod sa saimong mga magurang. Arog ni Jose asin Maria, bakong perpekto an mga magurang mo. Pero, inasignaran ni Jehova an saimong mga magurang para protektaran ka, tukduan, asin giyahan. Kun papahalagahan mo an saindang sadol asin igagalang an awtoridad ninda, ‘mapaparahay ka.’—Efe. 6:1-4.

17. Kauyon kan Josue 24:15, anong desisyon an kaipuhan na gibuhon kan mga hoben?

¹⁷ Magdesisyon kun siisay an saimong paglilingkudan. Kaipuhan mong patunayan sa sadiri mo kun siisay si Jehova, kun ano an kalabot sa katuyuhan niya, kun ano an kabutan niya, asin kun paano mo iuuyon diyan an saimong buhay. (Roma 12:2) Sa siring, magigibo mo na an pinakaimportanteng desisyon sa saimong buhay —an paglingkudan si Jehova. (Basahon an Josue 24:15; Par. 12:1) Kun pagdadanayon mo an regular na iskedyul nin pagbasa asin pag-adal sa Bibliya, magkukusog an pagkamuot asin pagtubod mo ki Jehova.

18. Anong desisyon an kaipuhan na gibuhon nin mga hoben, asin ano an magigin resulta kaiyan?

¹⁸ Magdesisyon na inuton sa saimong buhay an kabutan ni Jehova. Nanunuga an kinaban ni Satanas na kun gagamiton mo an saimong mga kakayahan para sa sadiri mong pakinabang, magigin maugma ka. An totoo, an mga nagpopokus sa materyal na mga pasuhan sinasaksak an saindang sadiri nin “gulping mga kakulugan.” (1 Tim. 6:9, 10) Pero, kun magdadangog ka ki Jehova asin magdedesisyon na inuton sa saimong buhay an saiyang kabutan, magigin mapanggana ka asin “magigin kang . . . madunong.”—Jos. 1:8, NWT.

19. Ano an dapat na tandaan kan mga magurang?

¹⁹ Mga magurang, gibuhon an saindong pinakamakakaya na tabangan an mga aki nindo na maglingkod ki Jehova. Magtiwala sa saiya, asin tatabangan niya kamong makagibo nin madunong na mga desisyon. (Tal. 3:5, 6) Tandaan na mas may epekto sa saindong mga aki an ginigibo nindo kisa sa sinasabi nindo. Kaya gumibo nin mga desisyon na makakatabang sa saindong mga aki na makamtan an pag-uyon ni Jehova.

20. Anong mga bendisyon an makakamtan kan mga hoben kun magdedesisyon sindang paglingkudan si Jehova?

²⁰ Mga hoben, matatabangan kamo kan saindong mga magurang na makagibo nin madunong na mga desisyon sa buhay. Pero kamo an dapat na gumibo kan mga desisyon na iyan para makamtan an pag-uyon nin Diyos. Kaya arugon si Jesus asin magdesisyon na paglingkudan an saindong mamumuton na Ama sa langit. Kun gigibuhon mo iyan, magkakaigwa ka nin sibot, makahulugan, asin nakakaugmang buhay ngunyan. (1 Tim. 4:16) Asin sa maabot na panahon, makakamtan mo nanggad an pinakanakakakontentong buhay na posible!