1, 2. Paano ipinahiling ni David na maimbod siya sa Diyos? (Hilingon an ritrato sa itaas.)

SA KADIKLUMAN nin banggi, luway-luway asin silensiyong naglalaog si David saka Abisai sa kampo na may 3,000 na suldados na nagtuturog. Nanumpungan ninda si Saul na nanok na nagtuturog sa tahaw kan kampo. Nagbaklay ini sa kaawagan kan Judea tanganing hanapon asin gadanon si David. Hininghingan ni Abisai si David: ‘Tuguti akong lugadon ko siya kan sakuyang budyak, itatahi ko siya sa daga nin sarong [beses], asin dai ko na duduwahan.’ Pero makangangalas an simbag ni David! ‘Dai mo siya paggadanon, huli ta siisay an maunat kan saiyang kamot tumang sa linahidan ni Jehova, asin magigin dai nin sala? Ilikay lugod ako ni Jehova na unaton ko an sakuyang kamot tumang sa linahidan ni Jehova.’—1 Sam. 26:8-12.

² Nasasabutan ni David kun ano an kaipuhan niyang gibuhon tanganing magin maimbod siya sa Diyos. Aram niyang dapat niyang igalang si Saul asin dai niya inisip na kulgan ini. Taano? Huli ta ninombrahan nin Diyos si Saul bilang hadi nin Israel. Iginagalang kan maimbod na mga lingkod ni Jehova an mga ninombrahan niya. Iyo, hinahagad ni Jehova  sa gabos niyang lingkod na mamutan an kaimbudan.—Basahon an Miqueas 6:8.

3. Paano nagin maimbod si Abisai ki David?

³ Nagpahiling man nin paggalang si Abisai ki David. Halimbawa, tanganing maitago ni David an pakikisambay niya ki Bat-seba, ipinagbuot niya sa tugang ni Abisai na si Joab na siguraduhon na magadan sa ralaban an agom ni Bat-seba na si Urias. (2 Sam. 11:2-4, 14, 15; 1 Cron. 2:16) Posibleng naaraman ni Abisai an mga ginibong ini ni David, pero padagos niyang iginalang si David bilang hadi na ninombrahan nin Diyos. Saro pa, puwede kutanang gamiton ni Abisai an saiyang posisyon bilang namumuon sa militar tanganing agawon an pagigin hadi sa Israel. Pero, dai niya ginibo iyan. Imbes, naglingkod siya ki David asin prinotektaran ini laban sa mga traydor asin sa iba pang kalaban.—2 Sam. 10:10; 20:6; 21:15-17.

4. (a) Taano ta marahay na halimbawa si David sa pagigin maimbod sa Diyos? (b) Kiisay na iba pang halimbawa an pag-uulayan niyato?

⁴ An dai pagtugot ni David na gadanon si Saul nagpapahiling na saro siya sa maimbod na mga lingkod ni Jehova. Kan hoben pa si David, inatubang niya asin ginadan an higanteng Filisteo na si Goliat, huling daing supog na dinuhagi kaini an ‘mga hukbo kan Diyos na nabubuhay’! (1 Sam. 17:23, 26, 48-51) Kan magin hadi si David asin nakakomiter siya nin grabeng kasalan na pagsambay saka paggadan, inako niya an pagsagwi nin Diyos paagi kan propetang si Natan asin nagsulsol siya. (2 Sam. 12:1-5, 13) Kan gurang na si David, padagos niyang ipinahiling an kaimbudan sa Diyos. Halimbawa, kadakul siyang idinonar para sa pagpatugdok kan templo ni Jehova. (1 Cron. 29:1-5) Iyo, nagkasala nin magabat si David, pero nagin maimbod siya sa Diyos. (Sal. 51:4, 10; 86:2) Mantang pinag-uulayan niyato an iba pang istorya dapit ki David asin sa mga kakontemporanyo niya, sisimbagon ta an mga hapot na ini: Kiisay kita dapat na inot na magin maimbod? Anong mga kuwalidad an kaipuhan tanganing magin maimbod kita sa Diyos?

5. Anong leksiyon an manunudan ta sa nagibong sala ni Abisai?

⁵ Kan maglaog si Abisai sa kampo ni Saul, mayo sa tamang kamugtakan an saiyang kaimbudan. Ki David niya gustong magin maimbod kaya gustong-gusto niyang gadanon si Hading Saul. Pero aram ni David na sala an gumibo nin maraot “tumang sa linahidan ni Jehova,” kaya pinugulan niya siya. (1 Sam. 26:8-11) May manunudan kitang mahalagang leksiyon sa pangyayaring ini: Kun kaipuhan niyatong magdesisyon kun kiisay kita inot na magigin maimbod, dapat tang isipon kun anong mga prinsipyo sa Bibliya an makakatabang sa sato sa sitwasyon na iyan.

6. Natural sanang magin maimbod sa kapamilya asin kaamigo, pero taano ta dapat kitang mag-ingat?

⁶ Sa puso naghahali an kaimbudan, pero madaya an puso nin tawo. (Jer. 17:9) Kaya, dawa maimbod sa Diyos an saro, puwede siyang madaya na mas magpahiling nin kaimbudan sa sarong dayupot na kaamigo o kapamilya dawa kun may ginigibo ining maraot. Dapat niyatong tandaan na ki Jehova kita dapat na inot na magin maimbod lalo na kun bayaan nin sarong dayupot sa sato an katotoohan.—Basahon an Mateo 22:37.

7. Paano nagdanay na maimbod sa Diyos an sarong sister kan mapaatubang ini sa sarong masakit na sitwasyon?

⁷ Kun matiwalag an saro sa kapamilya niyato, dapat tang ipahiling na ki Jehova kita nagigin maimbod. Halimbawa, nakaresibi si Anne ^[1] nin apod sa telepono hali sa saiyang natiwalag na ina asin nakiulay ining magbisita sa saiya. Namumundo an saiyang ina huli ta dai ini kinakaulay kan mga kapamilya. Napurisaw na marhay si Anne sa pakiulay kan saiyang ina asin nanuga na masimbag sa surat. Bago magsurat, rinepaso niya an mga prinsipyo sa Bibliya. (1 Cor. 5:11; 2 Juan 9-11) Dangan, nagsurat si Anne asin mabuot na ipinagirumdom na an saiyang ina mismo an nagbaya sa pamilya kan magkasala ini asin dai nagsulsol. Sinabi pa ni Anne sa surat: “An solamente pong paagi para mahali an  kamunduan nindo iyo na magbalik po kamo ki Jehova.”—Sant. 4:8.

8. Anong mga kuwalidad an makakatabang sa sato na magin maimbod sa Diyos?

⁸ Mahihiling niyato sa mga halimbawa kan mga maiimbod na kakontemporanyo ni David an tulong kuwalidad na makakatabang sa sato na magin maimbod sa Diyos. Ini an kapakumbabaan, kabuutan, asin kusog nin buot. Saro-saro niyatong pag-ulayan an mga kuwalidad na iyan.

9. Taano ta gustong gadanon ni Abner si David?

⁹ Kan darahon ni David an payo ni Goliat sa atubangan ni Hading Saul, nahiling siya kan aki ni Saul na si Jonathan asin kan komandante kan hukbo nin Israel na si Abner. Nagin amigo ni Jonathan si David asin nakipagtipan siya sa saiya. (1 Sam. 17:57–18:3) Pero, bakong arog kaiyan si Abner. Sa katunayan, kan huri, tinabangan niya si Saul sa paghanap ki David tanganing gadanon. “Maringis na tawo an nagmamawot na gadanon ako,” an sabi ni David. (Sal. 54:3, BPV; ^[2] 1 Sam. 26:1-5) Taano ta magkalain na marhay an nagin pagtratar ni Jonathan asin Abner ki David? Arog ni Jonathan, aram ni Abner na si David an pinili nin Diyos na magin sunod na hadi kan Israel. Pero pagkagadan ni Saul, huli sa kapalangkawan ni Abner asin pagigin niyang bakong maimbod sa Diyos, dai niya sinuportaran si David. Imbes, pinurbaran niyang gibuhon na hadi an aki ni Saul na si Isboset. Kan huri, garo gusto man ni Abner na magin hadi; posibleng iyan an dahilan kun taano ta dinurugan niya an saro sa mga agom ni Hading Saul.—2 Sam. 2:8-10; 3:6-11.

10. Taano ta dai nagin maimbod sa Diyos si Absalom?

¹⁰ Dai nagin maimbod sa Diyos an aki ni David na si Absalom huling bako siyang mapakumbaba. Gusto niyang magin hadi, kaya nagkua ‘si Absalom nin karo asin mga kabayo, asin limang pulong lalaki na nagdadalagan sa inutan niya.’ (2 Sam. 15:1) Inagaw man niya an kaimbudan kan mga tawo. Arog ni Abner, gustong gadanon ni Absalom si David dawa aram niya na pinili ni Jehova si David na magin hadi kan Israel.—2 Sam. 15:13, 14; 17:1-4.

11. Ano an manunudan ta sa mga istorya kan Bibliya dapit ki Abner, Absalom, asin Baruc?

¹¹ Malinaw na ipinapahiling kan mga halimbawa ni Abner asin Absalom na masakit magdanay na maimbod sa Diyos an sarong tawong bakong mapakumbaba asin may ambisyon na magkaigwa nin urog na awtoridad. Siyertong mayong maimbod na lingkod ni Jehova an gustong magin maraot asin makasadiri arog ni Abner asin Absalom. Pero, dapat kitang mag-ingat na mag-ambisyon na yumaman o magkaigwa nin prominenteng trabaho sa kinaban na ini. Makakadanyar ini sa satong espirituwalidad.  May panahon kaidto na temporaryong nawara sa pokus an sekretaryo ni Jeremias na si Baruc. Kaya ini an sinabi ni Jehova sa saiya: ‘Ako an naggagaba kan sakong itinugdok saka naggagabot kan sakong itinanom. Gigibuhon ko ini sa bilog na daga. Naghahanap ka nin darakulang bagay para sa saimong sadiri? Dai mo paggibuhon iyan.’ (Jer. 45:4, 5, BPV) Inako ni Baruc an pagtatanos sa saiya. Sarong kadunungan man para sa sato na pirming isaisip an mga tataramon na iyan ni Jehova mantang hinahalat ta an katapusan kan maraot na kinaban na ini!

12. Ipahiling kun taano ta dai kita magigin maimbod sa Diyos kun makasadiri kita.

¹² Kinaipuhan ni Daniel, sarong brother na taga Mexico, na magdesisyon kun kiisay siya magigin maimbod, sa Diyos o sa sadiri niya. Gusto niyang pakasalan an sarong bakong kapagtubod. Sinabi niya: “Sinusuratan ko pa man giraray siya dawa kan payunir na ako.” Pero napag-isip-isip niya na nagigin makasadiri siya—sinusunod kun ano sana an gusto niya. Dai siya nagigin maimbod ki Jehova, asin kaipuhan niyang magin mapakumbaba. Kaya sinabi niya an bagay na iyan sa sarong eksperyensiyadong elder. An sabi ni Daniel: “Tinabangan niya akong masabutan na tanganing magin maimbod sa Diyos, kaipuhan kong ipundo an pagsurat sa babaying idto. Pakatapos nin dakul na pamibi asin pagluha, ginibo ko an sinabi niya. Dai nahaloy, nagin mas maugma na ako sa ministeryo.” Kan huri, nakaagom si Daniel nin mahusay na sister asin ngunyan naglilingkod siya bilang paraataman nin sirkito.

13. Kan magkasala si David, paano si Natan nagdanay na maimbod sa Diyos asin ki David?

¹³ Kun maimbod kita ki Jehova, puwede man kitang magin maimbod sa iba asin tatabangan ta sinda sa pinakamarahay na paagi. Padagos na nagin maimbod sa Diyos an propetang si Natan dawa pinagdadanay man niya an kaimbudan ki David. Naaraman ni Natan na nakakomiter si David nin pagsambay asin paggadan. Kan isugo ni Jehova si Natan para sagwion si David, kusog-buot na nagkuyog an propeta dawa ngani maimbod siya ki David. Pero, mabuot asin may kadunungan niyang sinagwi si David. Gusto niyang tabangan si David na masabutan kun gurano kagabat kan pagkakasala kaini. Kaya naggamit si Natan nin sarong ilustrasyon dapit sa sarong lalaking mayaman na kinua an kasaro-saruing kordero nin sarong dukhang lalaki. Kan madangog iyan ni David, naanggot siyang marhay sa ginibo kan lalaking mayaman. Dangan, sinabihan siya ni Natan: “Ika iyo an lalaking idto!” Narealisar ni David kun gurano kagabat kan kasalan niya ki Jehova.—2 Sam. 12:1-7, 13.

14. Paano ka parehong magigin maimbod ki Jehova asin sa saimong kaamigo o kapamilya?

 ¹⁴ Makakatabang man sa saimo an kabuutan para makapagdesisyon kun kiisay ka inot na magigin maimbod. Halimbawa, tibaad may aram kang sarong kapagtubod na kumpirmadong nakagibo nin magabat na kasalan. Tibaad gusto mong magin maimbod sa saiya, lalo na kun dayupot mo siyang kaamigo o kapamilya. Pero kun itatago mo an saiyang pagkakasala, magigin bako kang maimbod sa Diyos. Siyempre, dapat niyatong inuton an kaimbudan ki Jehova. Kaya arog ni Natan, sunudon mo si Jehova; pero, magin mabuot sa saimong tugang. Sabihan mo siya na maghagad nin tabang sa mga elder. Kun dai niya iyan gibuhon sa laog nin rasonableng panahon, dapat pahiruon ka kan kaimbudan mo sa Diyos na sabihon an bagay na iyan sa mga elder. Kun gigibuhon mo ini, maipapahiling mo an kaimbudan ki Jehova asin an kabuutan sa saimong kaamigo o kapamilya huling mabuot siyang tatabangan kan mga elder na maibalik an marahay na relasyon niya ki Jehova.—Basahon an Levitico 5:1; Galacia 6:1.

15, 16. Taano ta kaipuhan ni Husai an kusog nin buot para magin maimbod sa Diyos?

¹⁵ Kinaipuhan nin sarong lalaki, na an pangaran Husai, an kusog nin buot para magin maimbod sa Diyos. Sarong maimbod na amigo ni Hading David si Husai. Pero, nabalo an kaimbudan niya kan kuminampi an dakul na Israelita ki Absalom asin gusto kaining agawon an Jerusalem saka an pagigin hadi. (2 Sam. 15:13; 16:15) Nagdulag si David sa siyudad. Ano an gigibuhon ni Husai? Makampi daw siya ki Absalom o padagos niyang susuportaran an may edad nang nagdudulag na hadi? Nagdesisyon si Husai na magdanay na maimbod sa hading ninombrahan nin Diyos. Kaya nagpasiring siya sa Bukid nin mga Olibo para sabaton si David.—2 Sam. 15:30, 32.

¹⁶ Hinagad ni David ki Husai na magbalik sa Jerusalem tanganing magsagin-sagin na amigo ni Absalom, asin ulangon an sadol ni Ahitofel. Isinapeligro ni Husai an saiyang buhay tanganing gibuhon an ipinapagibo ni David asin magdanay na maimbod ki Jehova. Arog kan ipinamibi ni David, naulang kan sadol ni Husai an sadol ni Ahitofel.—2 Sam. 15:31; 17:14.

17. Taano ta kaipuhan niyato an kusog nin buot para magin maimbod?

¹⁷ Kaipuhan niyato an kusog nin buot para magin maimbod ki Jehova. Dakul sa sato an kusog-buot na nanindugan laban sa mga panggigipit nin kapamilya, katrabaho, o mga awtoridad sa gobyerno tanganing magdanay na maimbod sa Diyos. Halimbawa, puon kan aki pa si Taro na taga Japan, maimbod na siya asin makinuyog sa saiyang mga magurang. Ginigibo niya iyan bakong huli ta obligasyon niya kundi talagang gusto niya sindang mapaugma. Kaya kan pinapapundo siya kan saiyang mga magurang sa pakikipag-adal sa mga Saksi ni Jehova, namundo siya asin nasakitan siyang sabihon sa sainda na nagdesisyon na siyang mag-atender sa mga pagtiripon. An sabi ni Taro: “Angguton sinda. Kaya sa laog nin dakul na taon, pinagbawalan ninda akong bisitahon sinda sa harong. Namibi ako para sa kusog nin buot tanganing makapanindugan ako sa desisyon ko. Ngunyan nagbago na sinda, saka puwede ko na sindang regular na bisitahon.”—Basahon an Talinhaga 29:25.

18. Paano ka nakinabang sa artikulong ini?

¹⁸ Arog ni David, Jonathan, Natan, asin Husai, lugod na mamatian niyato an dakulang kaugmahan huli sa pagigin maimbod ta ki Jehova. Pero, makanuod man kita sa pagigin bakong maimbod ni Abner asin Absalom. Siguradong gusto niyatong magdanay ki Jehova, arog kan ginibo ni David. Bilang bakong perpektong mga tawo, dai ta malilikayan na makagibo nin sala. Minsan siring, ipahiling niyato na an kaimbudan ki Jehova an panginot sa sato.