ISIPON an pinakamaugmang aldaw sa buhay mo. Iyan daw kan ikasal ka o kan mamundag an inot mong aki? O iyan daw kan simbolisaran mo an saimong pagdusay ki Jehova paagi sa bawtismo sa tubig? Tibaad iyan man nanggad an sasabihon mong pinakaimportante asin pinakamaugmang aldaw sa buhay mo. Asin kan aldaw na iyan, ugmahon an mga kapagtubod mo na mahiling na ipinapahayag mo sa publiko na namumutan mo an Diyos nin bilog na puso, kalag, isip, asin kusog!—Mar. 12:30.

Posibleng marhay na dakulang kaugmahan an naeksperyensiyahan mo sa paglilingkod ki Jehova puon kan mabawtismuhan ka. Pero, taano ta nabawasan na an dating kaugmahan kan nagkapira sa mga parahayag kan Kahadian? Ano an mga dahilan ta para padagos na maglingkod ki Jehova na may kaugmahan?

Siyertong nakakapaugma sa sato an mensahe kan Kahadian huli sa panuga kaiyan na sa dai mahahaloy hahalion na ni Jehova an presenteng maraot na sistema asin sasalidahan kan saiyang bagong kinaban. Saro pa, sinisigurado sa sato kan Sofonias 1:14: “Harani na an dakulang aldaw [ni Jehova], harani asin makaskas na nagdadangadang.” (An Banal na Biblia) Pero kun halawig na kitang naghahalat kisa sa linalauman niyato, puwedeng mawara an dati tang kaugmahan asin magluya an kaigutan ta sa paglilingkod sa Diyos.—Tal. 13:12.

An maugmang pakikiasosyar sa mga kapwa niyato lingkod nin Diyos nag-eengganyar sa sato na padagos na maglingkod ki Jehova na may kaugmahan. Sa katunayan, an marahay na paggawi kan mga lingkod ni Jehova an tibaad nakaakit sa sato sa tunay na pagsamba asin nakatabang sa sato na maugmang maglingkod man sa Diyos. (1 Ped. 2:12) Pero paano kun nadisiplina an sarong kapagtubod huling dai siya namuhay kauyon kan mga pamantayan nin Diyos? Puwede ining makapadisganar asin makawara sa kaugmahan kan mga nadagka sa katotoohan huli sa marahay na paggawi kan mga lingkod ni Jehova.

Puwede man na magin dahilan kan pagkawara kan satong kaugmahan an materyalismo. Ginagamit kan Diyablo an kinaban niya para paniwalaon kita na kaipuhan ta an mga bagay na dai man talaga niyato kaipuhan. Kaya dapat niyatong tandaan an sinabi ni Jesus: ‘Dai nin siisay man an makakapaglingkod sa duwang kagurangnan; huli ta siya mauungis sa saro, asin mamumuot sa ikaduwa, o madayupot sa saro asin masikwal sa ikaduwa. Dai kamo makakapaglingkod sa Diyos asin sa Kayamanan.’ (Mat. 6:24) Imposibleng makapaglingkod kita ki Jehova na may kaugmahan kun kasabay kaiyan pinagmamaigutan tang magkaigwa kan gabos na bagay na makukua ta sa kinaban na ini.

Para sa mga namumuot ki Jehova, dai nakakapagabat an paglilingkod sa saiya. (1 Juan 5:3) Girumdumon an sinabi ni Jesus: “Madya kamo sa sako, kamo gabos na nagpapagal saka nagagabatan, asin papaginhawahon ko kamo. Pasanon nindo an sakuyang sakal asin makanuod kamo sa sako, huli ta ako may mahuyong buot saka may mapakumbabang puso, asin magiginhawahan kamo. Huli ta an sakuyang sakal komportable, asin an sakuyang pasan magian.” (Mat. 11:28-30, NW) Nagtatao nin kaginhawahan asin kaugmahan an pagigin Kristiyano. Asin siyertong igwa kitang marahay na mga dahilan para magin maugma sa paglilingkod ki Jehova. Pag-ulayan ta ngunyan an tulo sa mga dahilan kun taano ta puwede kitang ‘maggaya-gaya sa Diyos nin [satong] kaligtasan.’—Hab. 3:18.

Naglilingkod kita sa Kagtao kan satong buhay, an maugmang Diyos. (Gui. 17:28; 1 Tim. 1:11) Aram niyato na utang ta sa satong Kaglalang an satong buhay. Kaya, dawa kun pirang taon na an luminihis puon kan kita mabawtismuhan, padagos pa man giraray kitang maugmang naglilingkod sa saiya.

Halimbawa, 40 taon na naglingkod ki Jehova bilang nagbibiyaheng paraataman si Héctor. Pero, ‘minsan sagkod sa pagkagurang,’ maugma pa man giraray siyang naglilingkod ki Jehova. (Sal. 92:12-14) Kan magkahilang an saiyang agom, nainaan an mga aktibidad niya sa paglilingkod sa Diyos, pero dai kaiyan nabawasan an saiyang kaugmahan. Sinabi niya: “Maski ngani namumundo ako pag nahihiling kong luway-luway na nagluluya an salud kan agom ko saka nagigin dipisil na an pag-asikaso sa saiya, dai ko tinugutan na maiwara kan mga ini an kaugmahan ko sa paglilingkod sa tunay na Diyos. An pakaaram na utang ko an buhay ko ki Jehova, na linalang an tawo na may katuyuhan, igo nang dahilan para mamutan siyang marhay saka paglingkudan siya nin bilog na puso. Nagmamaigot akong magdanay na aktibo sa paghuhulit, saka hinihinguwa kong pirming isipon an paglaom ko sa Kahadian para dai mawara an kaugmahan ko.”

Itinao ni Jehova an atang na pantubos, na nagpagin posible para magkaigwa kita nin maugmang buhay. Tunay nanggad, ‘an Diyos namuot na gayo sa kinaban, na itinao niya an saiyang aking bugtong, tanganing an siisay man na minatubod sa saiya dai mapahamak, kundi magkaigwa nin buhay na daing katapusan.’ (Juan 3:16) Iyo, puwedeng mapatawad an satong mga kasalan asin magkaigwa kita nin buhay na daing katapusan kun magpapahiling kita nin pagtubod sa mamumuton na probisyon nin Diyos na pantubos ni Jesus. Bako daw na marahayon na dahilan iyan para magpasalamat? Asin bako daw na dapat kitang pahiruon kan pagtanaw ta nin utang na buot na maugmang maglingkod ki Jehova?

Sarong brother na taga Mexico, na an pangaran Jesús, an nagsabi: “Uripon ako kan trabaho ko, may mga panahon na limang sunod-sunod na relyebo an tinatrabaho ko dawa dai man ako obligadong gibuhon iyan. Gusto ko kayang magkaigwa nin dakul na kuwarta. Dangan, nanudan ko an manungod ki Jehova saka  kun paano niya itinao an namumutan niyang Aki para sa katawuhan. Huli kaiyan, napahirong marhay an puso kong paglingkudan siya. Kaya idinusay ko an buhay ko ki Jehova, asin pagkatapos na magtrabaho nin 28 taon sa linalaugan kong kompanya, nagdesisyon akong mag-resign asin maglaog sa bilog na panahon na paglilingkod.” Diyan nagpuon an saiyang maugmang mga taon nin paglilingkod ki Jehova.

Namumuhay kitang malinig sa moral na nagtatao sa sato, bako nin kamunduan, kundi kaugmahan. Nagigirumduman mo pa kun ano an buhay mo kaidtong dai mo pa namimidbid si Jehova? Ipinagirumdom ni apostol Pablo sa mga Kristiyano sa Roma na sinda ‘mga uripon kaidto nin kasalan’ pero sinda nagin nang ‘mga uripon nin katanusan.’ Huling namumuhay sinda na malinig sa moral, may paglaom sindang mabuhay na daing katapusan. (Roma 6:17-22, BPV *) Namumuhay man kita uyon sa mga pamantayan ni Jehova, kaya dai kita apektado nin kamunduan na resulta kan imoral o madahas na paagi nin pamumuhay. Sarong dahilan nanggad iyan para mag-ugma!

Pag-isipan an halimbawa ni Jaime, dati siyang ateista, ebolusyonista, saka boksingero. Nag-atender siya sa Kristiyanong mga pagtiripon asin napahanga sa pagkamuot na ipinahiling kan mga tugang. Tanganing mabayaan an dati niyang pamumuhay, hinagad ni Jaime ki Jehova na tabangan siyang magtubod sa Saiya. “Padikit-dikit, napapatunayan kong talagang igwa nin sarong mamumuton na Ama saka mahihirakon na Diyos,” an sabi ni Jaime. “Nagin proteksiyon sa sako an padagos na pagsunod sa matanos na mga pamantayan ni Jehova. Kun dai ako nagbago, tibaad nagadan na ako, arog kan nagkapira sa mga dati kong amigong boksingero. An pinakamaugmang mga taon sa buhay ko iyo an mga taon na ginamit ko sa paglilingkod ki Jehova.”

Ano sa paghuna mo an dapat na mamatian ta mantang hinahalat an katapusan kan maraot na sistemang ini nin mga bagay? Tandaan, kita ‘nagtatanom manungod sa espiritu’ asin ‘mag-aani sa espiritu nin buhay na daing katapusan.’ Kaya, ‘dai kita mapagal sa paggibo nin karahayan, huli ta sa kapanahunan mag-aani kita kun dai kita [mangluya].’ (Gal. 6:8, 9) Sa tabang ni Jehova, lugod na magtagal kita, magmaigot na magkaigwa kan mga kuwalidad na kakaipuhanon para makaligtas sa ‘dakulang kahurasaan,’ asin padagos na maglingkod ki Jehova na may kaugmahan, dawa nasa mga pagbalo.—Kap. 7:9, 13, 14; Sant. 1:2-4.

Makakapagtiwala kita na tatawan nin balos an satong pakatagal, huling aram nin Diyos an mga ginigibo niyato asin an pagkamuot ta sa saiya saka sa saiyang pangaran. Kun padagos kitang maglilingkod ki Jehova na may kaugmahan, magigin arog kita kan salmistang si David na nagsabi: “Pinagdadanay ko si Jehova sa atubangan ko. Huling nasa tuo ko siya, nungka akong matatanyog. Kaya nag-uugma an sakong puso, maugma an bilog kong pagkatawo. Asin tiwasay ako.”—Sal. 16:8, 9, NW.