“KINSE anyos ako kan ako mabawtismuhan, asin pakalihis nin anom na bulan nag-auxiliary payunir na ako. Pagkatapos nin sarong taon, nagregular payunir ako. Pakagradwar ko sa hayskul, hinagad kong makapaglingkod ako sa lugar na nangangaipong marhay nin mga parahulit kan Kahadian. Gusto kong makahali sa dinakulaan kong banwaan asin sa lola kong bakong Saksi ni Jehova kun sain ako nakaistar. Pero, namundo talaga ako kan sabihon sa sako kan paraataman nin sirkito na an asignasyon ko iyo an mismong banwaan ko! Dai ko ipinarisa an talagang namamatian ko. Nakaduko akong naghali asin pinag-isipan an sinabi niya. Sinabi ko sa kapartner ko sa paglilingkod: ‘Sa hiling ko nagigin akong arog ni Jonas. Pero kan huri, nagduman man giraray siya sa Nineve. Kaya, arog niya, maglilingkod man ako kun sain ako iinasignar.’

“Sa ngunyan, apat na taon na akong nagpapayunir sa sakong banwaan, asin nahiling ko kun taano ta madunong na sumunod sa mga instruksiyon. An pinakaproblema ko iyo an negatibo kong kaisipan. Pero, maugmang-maugma na ako ngunyan. Sa laog nin sarong bulan, igwa na akong 24 tinutukduan sa Bibliya. Salamat ki Jehova, ta pati an lola kong dating nagkokontra, nagin Bible study ko na.”

Sarong tinutukduan sa Bibliya na taga Fiji an kaipuhan na magdesisyon kun baga maatender siya sa sarong Kristiyanong kumbensiyon o maiba siya sa saiyang agom na lalaki na maatender sa kumpleanyo kan kaparyente kaini. Tinugutan siya kan agom niya na umatender sa kumbensiyon. Sinabi niya sa saiya na puwede siyang magsunod pagkatapos kan kumbensiyon. Pero kan makapuli na siya sa harong ninda, naisip niya na sa sitwasyon niya, mas marahay kun lilikayan niya an mga sitwasyon na puwedeng magsapeligro kan saiyang espirituwalidad, kaya dai na siya nagduman sa kumpleanyo.

Mantang nasa kumpleanyo an agom na lalaki, sinabi kaini sa mga kaparyente na sinabi niya sa agom niya na magsunod na sana pagkatapos niyang umatender sa “pagtiripon kan mga Saksi.” Pero, sinabi kan mga kaparyente, “Dai na siya madigdi; dai nagseselebrar nin birthday an mga Saksi ni Jehova!” *

Bilang resulta, ugmahon na marhay an agom na lalaki sa saiyang agom huling nanindugan ini sa saiyang mga tinutubod asin sa saiyang konsiyensiya. Huli kaini, nagkaoportunidad siya kan huri na mapatotoohan an agom niyang lalaki, asin an iba pa. Ano an resulta? Inako kan agom na lalaki an pag-adal sa Bibliya asin nag-aatender na ini sa mga pagtiripon kaiba niya.