‘Dinadangog mo an mga pamibi. An gabos na tawo sain man na lugar madulok saimo.’—Salmo 65:2, An Marahay na Bareta Biblia (Bikol Popular Version).

May mga tawo na namimibi huling sabi ninda mas nagrarahay an pagmati ninda, dawa ngani dai sinda nagtutubod na may saro na talagang nagdadangog sa sainda. Pero an pamibi bako sanang basta pampagian nin pagmati para tabangan kita na makayanan an satong mga problema. Sinisigurado sa sato kan Bibliya na ‘harani nanggad si Jehova * sa gabos na nag-aarang sa saiya, sa gabos na nag-aarapod sa saiya sa katotoohan. . . . Hihinanyugon niya an [paghagad ninda nin tabang].’—Salmo 145:18, 19.

Kaya, makakasigurado kita na dinadangog kan Diyos na Jehova an mga pamibi kan saiyang mga parasamba. Mamumuton niyang sinasabi: ‘Aarangon ako nindo, asin maduruman kamo asin mamimiribi kamo sakuya, asin ta hihinanyugon ko kamo.’—Jeremias 29:12.

“Magin matiyaga sa pagpamibi.”—Roma 12:12.

Sa Bibliya, dinadagka kita na “padagos na mamibi” asin na ‘padagos na mamibi sa lambang kamugtakan.’ Malinaw na gusto kan Diyos na Jehova na mamibi kita sa saiya.—Mateo 26:41; Efeso 6:18.

Taano ta gusto nin Diyos na mamibi kita sa saiya? Pag-isipan: Siisay na magurang an dai mauugma pag an saiyang sadit na aki magsabi “Puwede mo po akong tabangan, Papa”? Siyempre, puwedeng aram na kan ama an pangangaipo o namamatian kan saiyang aki, pero kan madangog niya an mga tataramon na iyan, ipinapahiling kaiyan na nagtitiwala saiya an aki niya asin dayupot o ugos ini sa saiya. Sa kaagid na paagi, pag namimibi kita sa Diyos na Jehova, ipinapahiling niyato na nagtitiwala kita sa saiya asin gusto ta na magin dayupot sa saiya.—Talinhaga 15:8; Santiago 4:8.

‘Ipasa nindo sa saiya an gabos nindong kahaditan, huli ta nagmamakulog siya sa saindo.’—1 Pedro 5:7.

Gusto nin Diyos na mamibi kita sa saiya huling namumutan niya kita asin nagmamakulog siya sa sato. Aram niya an gabos tang problema asin ikinakahadit, saka gusto niyang tabangan kita.

Sa bilog na buhay ni Hading David, namibi siya sa Diyos na Jehova para sa tabang asin sinabi sa Saiya an mga iniisip asin namamatian niya. (Salmo 23:1-6) Ano an namatian nin Diyos ki David? Namutan nin Diyos si David asin dinangog niya an dakul na pamibi kaini. (Gibo 13:22) Dinadangog man nin Diyos an satong mga pamibi huling nagmamakulog siya sa sato.

Iyan an mga sinabi kan kagsurat kan saro sa mga salmo sa Bibliya. Aram niya na dinangog nin Diyos an saiyang mga pamibi, asin nakatabang na marhay iyan sa saiya. Mas nagin harani siya sa Diyos asin nagkaigwa nin kusog na makayanan an mga kasakitan asin kamunduan sa buhay.—Salmo 116:1-9.

Pag aram niyato na dinadangog nin Diyos an satong mga pamibi, padagos kitang mamimibi sa saiya. Pag-isipan an eksperyensiya ni Pedro, na nakaistar sa norteng parte kan Espanya. Nagadan an 19 anyos niyang aking lalaki kan maaksidente ini sa tinampo. Grabe an kamunduan ni Pedro, kaya sinabi niya sa Diyos an gabos na nasa puso niya asin pauruutrong namibi para sa pagranga asin tabang. Ano an nangyari? “Sinimbag ni Jehova an mga pamibi ko paagi sa pagranga asin tabang na naako mi ni agom hali sa mga kapwa mi Kristiyano,” an sabi ni Pedro.

Dawa ngani dai man nagibo kan mga pamibi na maibalik an buhay kan saiyang aki, nakatabang na marhay iyan ki Pedro asin sa pamilya niya. Nagirumduman kan saiyang agom na si María Carmen: “Natabangan ako kan mga pamibi na matagalan an sakuyang kamunduan. Aram ko na nasasabutan ako kan Diyos na Jehova ta pag namimibi ako sa saiya nakakamati ako nin katuninungan asin nagigin kalmado ako.”

Malinaw na ipinapahiling kan Bibliya asin kan dakul na mga eksperyensiya na dinadangog nin Diyos an mga pamibi. Alagad, malinaw man na bakong gabos na pamibi sinisimbag nin Diyos. Taano ta may mga pamibi na sinisimbag nin Diyos mantang an iba dai?