KUN PAANO MAPAPAPUNDO AN DAI MATAPOS-TAPOS NA PAGKAUNGIS
2 | Dai Magbalos
Itinutukdo kan Bibliya:
“Dai magbalos sa kiisay man nin maraot para sa maraot. . . . Kun posible, sagkod na nakadepende iyan sa saindo, makipagkatuninungan sa gabos na tawo. Dai nanggad kamo magbalos, . . . huli ta nasusurat: ‘“Sakuya an pagbalos; ako an mabalos,” an sabi ni Jehova.’”—ROMA 12:17-19.
An Buot Sabihon Kaiyan:
Dawa normal sanang maanggot pag ginibuhan nin maraot, dai inuuyunan nin Diyos an pagbalos. Imbes, sinasadol niya kita na mapasensiyang maghalat sa saiya dahil madali na niyang itanos an gabos na inhustisya.—Salmo 37:7, 10.
An Puwede Mong Gibuhon:
Pag nagbalos an bakong perpektong mga tawo, nagpapadagos an pagkaungis. Kaya, kun may nakakulog kan buot mo o may naggibo saimong maraot, dai magbalos. Hinguwahon na kontrulon an namamatian mo saka magin kalmado. May mga pagkakataon na tibaad mas marahay na palampason na sana an nangyari. (Talinhaga 19:11) Siyempre, may mga pagkakataon na mas marahay kun aatubangon mo an problema. Halimbawa, kun nagin biktima ka nin krimen, puwede mong ireport an krimen sa pulis o sa iba pang nasa awtoridad.
Ika man sana an madadanyaran kun dai mo ipupundo an pagbalos
Paano kun garo baga mayo nin matuninong na paagi para masolusyunan an problema? O paano kun ginibo mo na an gabos para masolusyunan an problema sa matuninong na paagi? Dai magbalos. Mas mapaparaot sana kaiyan an sitwasyon. Imbes, ipundo an dai matapos-tapos na pagkaungis. Makakapagtiwala ka sa paagi nin Diyos sa pagsolusyon sa problema. “Manarig ka sa saiya, asin mahiro siya para sa saimo.”—Salmo 37:3-5.
Puwede Mo Man Magustuhan
BINAGO KAN BIBLIYA AN SAINDANG BUHAY
Gusto Kong Labanan an Diskriminasyon sa Lahi
Nagbali kaidto si Rafika sa sarong rebolusyonaryong grupo para labanan an inhustisya. Pero naaraman niya an panuga kan Bibliya na magkakaigwa nin katuninungan asin hustisya sa pamamahala kan Kahadian nin Diyos.
BINAGO KAN BIBLIYA AN SAINDANG BUHAY
Nuarin Madadaog kan Maimbod na Pagkamuot an Pagkaungis?
Puwedeng dipisil na mapangganahan an diskriminasyon. Hilingon kun paanong nagibo iyan nin sarong Judio asin nin sarong Palestino.
