Kun dai pa, posibleng nahiling mo nang nabiktima kaiyan an iba. Dakul nin bareta manungod sa mga tawo na kinakaungisan dahil hali sinda sa ibang nasyon, iba an saindang lahi, o dahil mga homoseksuwal sinda. Huli kaiyan, dakul na gobyerno an naggigibo nin mga ley na nagpapadusa sa mga naggigibo nin mga krimen nin huli sa pagkaungis.

An pagkaungis madali sanang magresulta sa mas grabe pang pagkaungis. An mga nabibiktima nin pagkaungis sa parati nagbabalos kaya nagpapadagos an pagkaungis.

Tibaad nakaeksperyensiya ka na nin diskriminasyon, stereotyping, pagtuya-tuya, mga pang-iinsulto, asin mga pagpatakot. Pero labi pa diyan an nagigibo kan pagkaungis. Sa parati, minaresulta iyan sa madahas na mga gibo, pambu-bully, bandalismo, pangungulog, panglulupig, paggadan, o pagpuho pa ngani nin sarong lahi.

Sisimbagon kan magasin na ini an minasunod na mga hapot asin ipapahiling kun paano puwedeng mahali an pagkaungis:

• Taano ta grabe an pagkaungis?

• Paano mapupundo an dai matapos-tapos na pagkaungis?

• Maabot pa daw an panahon na mawawara na sagkod lamang an pagkaungis?