Nagmamakulog sa Saimo an Diyos
AN Bibliya an pinakamarahay na mapagkukuanan nin espirituwal na paggiya. Bako man iyan libro manungod sa pag-ataman sa salud, pero makakatao iyan sa sato nin praktikal na mga paagi na makakatabang sato pag kita nasa nakaka-stress na mga sitwasyon, pag pirming ribokado an satong isip, pag pinupurisaw kita nin makulog na mga eksperyensiya, asin pag igwa kita nin mga problema sa hawak saka sa isip na nakakapadisganar sa sato.
An pinakamahalaga, inaasigurar sa sato kan Bibliya na mayo na nin iba pang mas nakakasabot sa satong mga iniisip saka namamatian kundi an satong Kaglalang, an Diyos na Jehova. a Gustong-gusto niyang tabangan kita na makayanan an ano man na problemang napapaatubang sa sato. Halimbawa, isip-isipon an duwang nakakarangang teksto sa Bibliya:
“Harani si Jehova sa mga nalugadan an puso; iliniligtas niya an mga may runot na espiritu.”—SALMO 34:18.
“Ako, si Jehova na saimong Diyos, an nagkakapot sa tuo mong kamot, an Saro na nagsasabi sa saimo, ‘Dai ka matakot. Tatabangan taka.’”—ISAIAS 41:13.
Alagad, paano kita tinatabangan ni Jehova sa pag-atubang sa mga problema manungod sa mental na salud? Arog kan maaaraman mo sa minasunod na mga artikulo, ipinapahiling ni Jehova na talagang nagmamakulog siya sa sato sa dakul na kapaki-pakinabang na paagi.
a Jehova an personal na pangaran nin Diyos.—Salmo 83:18.
