An maugmang bareta kan Kahadian nin Diyos ihinuhulit sa bilog na kinaban, arog kan ihinula ni Jesus. (Mateo 24:14) Sinasabi sa sato kan libro sa Bibliya na Daniel na an Kahadian na ini sarong gobyerno nin Diyos. Mababasa sa kapitulo 2 kan librong iyan an sarong propesiya na nagpapahiling kan sunod-sunod na mga gobyerno nin tawo, o kahadian, na nagin makapangyarihan, puon sa suanoy na Babilonya sagkod sa panahon niyato ngunyan. Kun manungod sa mga mangyayari sa maabot na panahon, an bersikulo 44 nagsasabi:

“An Diyos nin langit maestablisar nin sarong kahadian na dai nuarin man malalaglag. Asin an kahadian na ini dai itatao sa arin man na ibang banwaan. Rurunuton kaini asin tatapuson an gabos na kahadian na iyan, asin ini sana an magdadanay sagkod lamang.”

Sinasabi kaini asin kan iba pang mga propesiya sa Bibliya na sasalidahan kan Kahadian nin Diyos an gabos na gobyerno nin tawo asin madara iyan nin katuninungan asin katiwasayan sa mga tawo digdi sa daga. Ano an magigin kamugtakan pag namahala na an Kahadian nin Diyos? Uni an pira sa kahanga-hangang mga panuga na madali nang mautob.

• MAYO NANG GIYERA

  Salmo 46:9: “Pinapapundo [nin Diyos] an mga giyera sa bilog na daga. Binabari niya an pana asin pinuputol-putol an garod; sinusulo niya an mga karetang panggiyera.”

  Isip-isipon an magigin kamugtakan kan kinaban kun an gabos na mga ginagastos asin pinagpapagalan para makagibo nin mga armas na nakakagadan mapaduman sa mga bagay na talagang kaipuhan kan mga tawo! Sa pamamahala kan Kahadian nin Diyos, mauutob an panugang iyan.

• MAYO NANG HILANG

  Isaias 33:24: “Mayo nin residente an magsasabi: ‘May hilang ako.’”

  Imahinara an sarong kinaban na mayo nang nagsasakit huli sa hilang sa puso, kanser, malaria, o iba pang hilang. Dai na mangangaipo nin mga ospital asin bulong. Perpektong salud—iyan an makakamtan kan mga tawo digdi sa daga.

• MAYO NANG MAGUGUTOM

  Salmo 72:16: “Magkakaigwa nin abundang tipasi sa ibabaw kan daga; masurobra iyan sa alituktok kan kabukidan.”

  An daga mamumunga nin igong kakanon para sa gabos, asin makakakua kaiyan an gabos. An gutom asin malnutrisyon mawawara na.

• MAYO NANG KULOG, PAGMUNDO, ASIN KAGADANAN

  Kapahayagan 21:4: “Papahidon [nin Diyos] an lambang luha sa saindang mga mata, asin an kagadanan mawawara na. Dai na man magkakaigwa nin pagmundo, o nin pagtangis, o nin kulog. An mga dating bagay nakalihis na.”

   Mangangahulugan iyan nin buhay na daing katapusan sa sarong perpektong kamugtakan sa paraisong daga! Iyan an ipinanuga kan satong mamumuton na Kaglalang, an Diyos na Jehova.

Posible daw talagang magkatotoo an gabos na iyan? Maski ngani dakul na tawo an nagsasabi na talagang nakakaugma an buhay na ipinanuga asin sinasabi kan Bibliya, may nagkapira na nag-iisip na an ideya na mabuhay nin daing katapusan garo imposible. Bako iyan makangangalas, huling mayo pa man nin tawong nakaeksperyensiya kaiyan na makakapagsabi dapit sa bagay na iyan.

An katawuhan haloy nang uripon nin kasalan asin kagadanan saka haluyon nang nakakamati nin kulog, pagsakit, asin problema kaya iniisip kan dakul na tawo na parte na iyan kan saindang buhay. Pero bako nanggad iyan an katuyuhan para sa katawuhan kan satong Kaglalang, an Diyos na Jehova.

Para matabangan kitang magtiwala sa gabos na ipinanuga niya, may pagduduon na sinabi nin Diyos: “Dai iyan mabalik sa sako na mayong resulta, kundi talagang gigibuhon kaiyan an ano man na ikinakaugma ko, asin siyertong magigin mapanggana iyan sa isinugo kong gibuhon kaiyan.”—Isaias 55:11.

Sinasabi sa Bibliya na si Jehova sarong Diyos “na dai makakapagputik.” (Tito 1:2) Huling ipinanuga niya an gabos na magayunon na bagay na ini na mangyayari sa ngapit, madunong na pag-isipan an mga hapot na ini: Posible daw talaga na an mga tawo mabuhay sagkod lamang sa ipinanugang Paraisong daga? Ano an dapat niyatong gibuhon para makinabang kita sa panuga nin Diyos? Sa masunod na artikulo, maaaraman mo an simbag sa mga hapot na iyan.