SARONG PAMBIHIRANG PAGLAOM NANGGAD! Nanuga an satong Kaglalang na tatawan niya kita nin buhay na daing katapusan, digdi mismo sa daga. Pero dakul an nag-iisip na imposible iyan. ‘Gabos man kita magagadan,’ an sabi ninda. ‘Iyan talaga an kaaabtan ta.’ An iba man nagtutubod na posible an mabuhay sagkod lamang, pero bako digdi sa daga. Sinasabi ninda na makakamtan mo sana an buhay na daing katapusan pag nagadan ka na asin nagsakat na sa langit. Ano sa hiling mo?

Bago mo simbagon iyan, pag-isipan nguna an simbag kan Bibliya sa tulong hapot na ini: Ano an ipinaparisa kan pagkagibo sa tawo sa kun gurano kalawig dapat siyang mabuhay? Ano an orihinal na katuyuhan nin Diyos para sa daga asin katawuhan? Taano ta nagagadan an mga tawo?

Sa gabos na linalang nin Diyos sa daga, naiiba nanggad an mga tawo. Paano? Sinasabi sa Bibliya na an mga tawo sana an linalang nin Diyos na uyon sa saiyang “ladawan” asin “kabaing” niya. (Genesis 1:26, 27) Ano an buot sabihon kaiyan? Nangangahulugan iyan na an tawo igwa nin mga karakteristiko asin kuwalidad na kapareho kan sa Diyos, arog nin pagkamuot asin pakamati nin hustisya.

Saro pa, tinawan an mga tawo nin kakayahan na mag-isip asin magrason, patin nin kakayahan na maaraman an tama saka sala asin nin pagmawot na mamidbid asin magkaigwa nin haraning relasyon sa Diyos. Iyan an dahilan kun taano ta naaapresyar ta an kadakulaan kan uniberso asin an kahanga-hangang kapalibutan, pati man an art, musika, asin tula. Urog sa gabos, an mga tawo sana an may kakayahan na sambahon an Kaglalang. Huli sa mga kakayahan na iyan, mas nakakalangkaw an mga tawo kisa sa iba pang nabubuhay na linalang sa daga.

Kaya, pag-isipan ini: Itatao daw nin Diyos an pambihirang mga kuwalidad na iyan, kaiba na an mga kakayahan na puwedeng mapatalubo asin mapauswag, kun katuyuhan niyang mabuhay sana kita nin halipot na panahon? An totoo, itinao nin Diyos sa tawo an daing kaagid na mga kakayahan asin mga abilidad na ini tanganing ikaugma niyato an buhay digdi sa daga sagkod lamang.

Pero, may mga nagsasabi na bako talagang katuyuhan nin Diyos na mabuhay an tawo digdi sa daga sagkod lamang. Sinasabi ninda na an daga dinisenyo para magin temporaryong istaran, sarong lugar kun sain an mga tawo babaluon para mahiling kun siisay an dapat magsakat sa langit asin mabuhay nin daing sagkod kaiba nin Diyos. Pero kun totoo iyan, bako daw na garo man sana sinasabing an Diyos an responsable sa gabos na karatan na nangyayari sa daga? Kabaliktaran nanggad iyan kan mismong kuwalidad nin Diyos. Mapadapit sa saiya, an Bibliya nagsasabi: “Huli ta may  hustisya an gabos niyang ginigibo. Sarong Diyos na maimbod na dai lamang naggigibo nin inhustisya; matanos asin makatanusan siya.”—Deuteronomio 32:4.

Malinaw na ihinahayag kan Bibliya an orihinal na katuyuhan nin Diyos para sa daga paagi sa mga tataramon na ini: “Kun manungod sa kalangitan, ki Jehova iyan, pero an daga itinao niya sa mga aki nin tawo.” (Salmo 115:16) Iyo, linalang nin Diyos an daga tanganing magin sarong magayon asin permanenteng istaran nin mga tawo, asin pinano niya iyan nin gabos na bagay na kaipuhan ta para sa makahulugan asin daing katapusan na buhay.—Genesis 2:8, 9.

“Kun manungod sa kalangitan, ki Jehova iyan, pero an daga itinao niya sa mga aki nin tawo.”—Salmo 115:16

Malinaw man na sinasabi kan Bibliya an dapit sa katuyuhan nin Diyos para sa mga tawo. Pinagbutan niya an inot na tawong mag-agom na ‘panuon an daga asin sakupon iyan asin pamahalaan an gabos na buhay na linalang na naghihiriro sa ibabaw kan daga.’ (Genesis 1:28) Dakulang pribilehiyo nanggad para sa sainda na atamanon an Paraisong istaran ninda asin pahiwason iyan sa bilog na kinaban! Tunay nanggad, si Adan asin Eva patin an mga magigin aki ninda may oportunidad na mabuhay nin daing katapusan digdi sa daga, bako sa langit.

Kun siring, taano ta nagagadan kita? Sinasabi kan Bibliya na an saro sa mga espiritung linalang nin Diyos, na kan huri inapod bilang an rebeldeng si Satanas na Diyablo, nagpurbar na isabotahe an areglo nin Diyos sa Eden. Paano?

Sinutsutan ni Satanas an satong inot na mga magurang, si Adan asin Eva, na magrebelde sa Diyos. Kan sabihon ni Satanas na may marahay na bagay na habong itao an Diyos sa sainda—an deretso nindang magdesisyon kun ano an marahay asin maraot—pinili ninda an lado ni Satanas asin nagrebelde sinda sa Diyos. Ano an nagin resulta? Pag-abot nin panahon, nagadan sinda, arog kan patanid sa sainda nin Diyos. Naiwara ninda an oportunidad na mabuhay sagkod lamang sa Paraisong daga.—Genesis 2:17; 3:1-6; 5:5.

An pagrebelde ni Adan asin Eva nakaapektar sa gabos na tawo sagkod sa panahon niyato ngunyan. An Tataramon nin Diyos nagsasabi: “Paagi sa sarong tawo [si Adan] an kasalan luminaog sa kinaban asin an kagadanan luminaog paagi sa kasalan, asin sa siring an kagadanan luminakop sa gabos na tawo.” (Roma 5:12) Nagagadan kita huling minana ta an kasalan asin kagadanan sa satong inot na mga magurang, bakong huli sa garo nakatalaga o dai masabutan na ‘plano’ nin Diyos.

An rebelyon sa Eden dai nakaulang sa orihinal na katuyuhan nin Diyos para sa katawuhan asin sa daga. An perpektong pagkamuot nin Diyos asin pakamati nin hustisya an nagpahiro sa saiya para gumibo nin paagi na makatalingkas kita sa pagkauripon sa minanang kasalan asin kagadanan. Ipinaliwanag ni apostol Pablo: “An kabayadan na ibinabayad nin kasalan iyo an kagadanan, alagad an regalo na itinatao nin Diyos iyo an buhay na daing katapusan paagi ki Cristo Jesus na satuyang Kagurangnan.” (Roma 6:23) Huli sa pagkamuot nin Diyos, “itinao niya an saiyang bugtong na Aki [si Jesu-Cristo], tanganing an siisay man na nagtutubod sa saiya dai malaglag kundi magkaigwa nin buhay na daing katapusan.” (Juan 3:16) Gikan sa buot na itinao ni Jesus an saiyang sadiri bilang atang na pantubos, paagi kaini naibalik ni Jesus an gabos na nawara huli sa pagkakasala ni Adan. *

Dai mahahaloy, mauutob na an panuga nin Diyos na sarong paraisong daga. Puwedeng mapasaimo an magayunon na puturong ini kun isasapuso mo an konseho ni Jesus: “Magralaog kamo sa hayakpit na trangkahan, huli ta halakbang an trangkahan saka mahiwas an dalan na pasiring sa kalaglagan, asin dakul an nag-aaragi diyan; mantang hayakpit an trangkahan saka piot an dalan na pasiring sa buhay, asin dikit an nakakakua kaiyan.” (Mateo 7:13, 14) Iyo, nakadepende sa saimo kun ano an magigin puturo mo. Kaya, ano an gigibuhon mo?