Naisip mo na daw kun ano an magigin puturo mo saka kan saimong pamilya? Naiimahinar mo daw na magigin mayaman kamo o tios, magigin maugma o mamundo? Mabubuhay ka daw nin halawig o halipot? Dakul na taon nang pinag-iisipan kan mga tawo an mga hapot na iyan.

Sa ngunyan, pinag-aadalan kan mga eksperto an dalagan kan mga bagay-bagay sa kinaban asin nagtatao nin mga prediksiyon dapit sa ngapit. Baga man dakul sa mga prediksiyon ninda an nagkatotoo, an iba diyan dai nangyari, asin an nagkapira miserable an resulta. Halimbawa, kan 1912, an imbentor kan sarong wireless telegraph na si Guglielmo Marconi, nagtao nin arog kaining prediksiyon: “Sa panahon na wireless na an komunikasyon, imposible nang magkaigwa nin giyera.” Asin sarong ahente kan Decca Record Company, na hinabuan an Beatles kan 1962, an nagtutubod na dai magigin sikat an mga bandang nagtutugtog nin gitara.

Dakul an naghahanap nin tanda paagi sa kakaibang mga linalang o pangyayari para maaraman an ngapit. An iba nagkokonsulta sa mga astrologo; an horoscope regular na mababasa sa dakul na magasin asin diyaryo. An iba nag-aasa sa mga parahula o mga psychic, na “nakakabasa” daa nin kapaladan paagi sa mga baraha sa panghuhula, mga numero, o mga gurit sa palad.

Huli sa kagustuhan na maaraman an mangyayari sa ngapit, an nagkapira kan suanoy na panahon nagkonsulta sa mga orakulo—mga saserdote asin saserdotesa na tinatawan daa nin mga impormasyon kan mga diyos na irinerepresentar ninda. Halimbawa, sinasabi na si Hading Criso kan Lydia nagpadara nin mamahalon na mga regalo sa orakulo kan Delfi, Grecia, para aramon kun ano an kaluluwasan kun makikipaglaban siya ki Ciro kan Persia. Sinabi kan orakulo na mapapabagsak ni Criso an “sarong dakulang imperyo” kun makikilaban siya ki Ciro. Kumpiyadong manggagana, uminatake si Criso, pero an dakulang imperyong buminagsak iyo an saiyang imperyo!

Mayong serbi an bakong malinaw na prediksiyon kan orakulo; magkakatotoo talaga iyan arin man na lado an manggana. Nawara ki Criso an gabos huli sa salang impormasyon asin nag-ani siya nin kapahamakan. Kumusta man an mga nag-aasa ngunyan sa popular na mga pamamaagi nin pag-aram kan mangyayari sa ngapit?