Taano ta Kaipuhan Niyato an Kahadian nin Diyos?
Sa kapinunan kan kasaysayan nin tawo, an satong Kaglalang, na an pangaran Jehova, iyo sana an Tagapamahala. An pamamahala niya nakabasar sa pagkamuot. Naggibo siya nin sarong magayon na istaran para sa mga tawo, an hardin nin Eden. Nagtao man siya nin abundang kakanon para sa sainda. Saro pa, tinawan niya nin nakakakontentong trabaho an mga tawo. (Genesis 1:28, 29; 2:8, 15) Mamumuhay kuta nin matuninong an mga tawo kun nagdanay sinda sa mamumuton na pamamahala nin Diyos.
An inot na mga tawo isinikwal an Diyos bilang saindang Tagapamahala
Sinasabi kan Bibliya na sarong rebeldeng anghel, na kan huri inapod na Satanas na Diyablo, an nagkuwestiyon sa deretso nin Diyos na mamahala. Pinaluwas niya na magigin mas maugma an mga tawo kun mayo an paggiya nin Diyos asin kun bako an Diyos an mamamahala sa sainda. Makamumundo, an inot tang mga magurang, si Adan saka Eva, nagsunod ki Satanas asin nagrebelde sa Diyos.—Genesis 3:1-6; Kapahayagan 12:9.
Huling isinikwal ni Adan saka Eva an Diyos bilang saindang Tagapamahala, naiwara ninda an saindang Paraisong istaran saka an paglaom na mabuhay nin daing katapusan na may perpektong salud. (Genesis 3:17-19) An saindang desisyon nakaapektar man sa saindang magigin mga aki. Sinasabi kan Bibliya na huling nagkasala si Adan, “an kasalan luminaog sa kinaban asin an kagadanan paagi sa kasalan.” (Roma 5:12) An kasalan nagdara nin saro pang kapaha-pahamak na resulta: “An tawo nananakop sa tawo sa saiyang ikakapahamak.” (Eclesiastes 8:9) Sa madaling sabi, kun mga tawo an mamamahala sa saindang sadiri, siguradong magkakaigwa iyan nin mga problema.
NAGPUON AN PAMAMAHALA NIN TAWO
Nagrebelde si Nimrod ki Jehova
An inot na tawong tagapamahala na sinambit sa Bibliya iyo si Nimrod. Nagrebelde siya laban sa pamamahala ni Jehova. Puon kan panahon ni Nimrod, inaabuso na kan makapangyarihan na mga tawo an posisyon saka awtoridad ninda para mang-api. Mga 3,000 na taon na an nakaagi, si Hading Solomon nagsurat: “Nahiling ko an mga luha kan mga inaapi, asin mayo nin siisay man na maranga sa sainda. Asin yaon sa mga nang-aapi sa sainda an kapangyarihan.”—Eclesiastes 4:1.
Arog man kaiyan an kamugtakan sa ngunyan. Kan 2009, sinabi sa sarong babasahon kan United Nations na an bakong marahay na pamamahala ibinibilang nin dakul na “saro sa pinakadahilan kan gabos na maraot na nangyayari sa palibot niyato.”
PANAHON NA PARA GUMIBO NIN AKSIYON!
Kaipuhan kan kinaban nin mas marahay na mga tagapamahala saka sarong mas marahay na klase nin gobyerno. Asin iyan nanggad an ipinanuga kan satong Kaglalang!
Dawa pa an pinakamarahay na gobyerno nin tawo dai nakayang solusyunan an seryosong mga problema kan katawuhan
An Diyos nag-establisar nin sarong Kahadian, o gobyerno, na masalida sa gabos na pamamahala nin tawo, asin “ini sana an magdadanay sagkod lamang.” (Daniel 2:44) Ini an Kahadian na ipinapamibi kan minilyon na tawo. (Mateo 6:9, 10) Pero bako mismo an Diyos an mamamahala sa gobyernong ini. Imbes, nagpili siya nin saro na nabuhay kaidto bilang tawo para magin Tagapamahala. Siisay an pinili nin Diyos?
Puwede Mo Man Magustuhan
SIMBAG SA MGA HAPOT SA BIBLIYA
Katuninungan sa Daga—Paano Iyan Mangyayari?
Aramon kun paano nangangako an Diyos na magkakaigwa nin katuninungan sa bilog na kinaban paagi kan saiyang Kahadian.
SIMBAG SA MGA HAPOT SA BIBLIYA
An Kahadian nin Diyos Daw Nasa Puso nin Tawo?
Ano an buot sabihon kan sinasabi sa Bibliya na “an Kahadean nin Dios yaon saindo”?
