Pag-isipan an saro sa pinakadayupot na relasyon nin tawo—an relasyon nin identical twins. An arog kaining klase nin magkambal igwa nin espesyal na relasyon sa kada saro. May magkambal ngani na “dawa dai ipaliwanag an sinasabi kan saro, aram na niya nin eksakto an buot sabihon kaini,” an sabi ni Nancy Segal, direktor kan Twin Studies Center asin saro man na may kakambal. Ilinadawan kan sarong babayi an saiyang relasyon sa kakambal niya sa arog kaining paagi: “Bistado ming marhay an kada saro.”

Ano an dahilan kan pambihirang koneksiyon na ini? Sinasabi sa mga pag-adal na apuwera sa pinagdakulaan na lugar o sa paagi nin pagpadakula sa identical twins, may mahalagang papel an pagkakaigwa ninda nin parehong marhay na genes.

PAG-ISIPAN: An Kaglalang kan kahanga-hangang genes na ini siguradong igwa nin pambihirang pakasabot sa pagkahaman sa lambang saro sa sato. Sa katunayan, an salmistang si David nagsabi: “Itinago mo akong nalilipudan sa tulak kan sakuyang ina. An sakong mga tulang dai natago sa saimo kan ginibo ako sa sekreto. . . . Nahiling ako kan saimong mga mata dawa kan ako embrayo pa; gabos na parte kaiyan nakasurat sa saimong libro.” (Salmo 139:13, 15, 16) An Diyos sana an nakakaaram asin lubos na nakakasabot bako lang sa pagkahaman kan satong genes kundi pati man kan gabos na pangyayari sa satong buhay na nakaimpluwensiya sa personalidad niyato. An pambihirang kaaraman nin Diyos dapit sa sato asin sa pagkahaman kan satong genes nag-aasigurar na talagang nasasabutan niya an lambang detalye manungod sa sato.

Namibi si David: “O Jehova, siniyasat mo ako, asin midbid mo ako. Naaaraman mo pag minatukaw ako asin pag minatindog ako. Nasasabutan mo hali sa harayo an mga kaisipan ko. Mayo pa man nin sarong tataramon sa sakong dila, alagad uya! O Jehova, aram mo nang marhay iyan.” (Salmo 139:1, 2, 4) Saro pa, aram ni Jehova an satong kauruiraruming pagmati asin “nasasabutan niya an lambang ingklinasyon kan mga kaisipan” niyato. (1 Cronica 28:9; 1 Samuel 16:6, 7) Ano an itinutukdo kan mga bersikulong ini manungod sa Diyos?

Dawa posibleng dai ta masabi sa pamibi an gabos niyatong iniisip asin namamati, an satong Kaglalang dai lang nahihiling kun ano an ginigibo ta, kundi nasasabutan man niya kun taano ta ginigibo ta iyan. Apuwera diyan, nasasabutan niya an marahay na bagay na gusto tang gibuhon, dawa ngani dai ta magibo an minamawot kan satong puso huli sa satong mga limitasyon. Pero, huling ibinugtak mismo nin Diyos sa puso ta an pagkamuot, andam siya asin gustuhon niya ngani na mahiling asin masabutan an satong mga kaisipan saka motibo.—1 Juan 4:7-10.

 Sinisigurado sa sato kan Kasuratan

• “Nakahiling sa mga matanos an mga mata ni Jehova, asin nagdadangog sa pagngayo-ngayo ninda an saiyang mga talinga.”—1 PEDRO 3:12.

• Nanunuga an Diyos: “Tatawan taka nin pakasabot asin tutukduan taka manungod sa dalan na dapat mong lakawan. Tatawan taka nin sadol mantang nakahiling ako sa saimo.”—SALMO 32:8.

An pakaaram daw na nasasabutan nin Diyos an satong sitwasyon asin mga namamatian makakatabang na makayanan ta an mga kasakitan? Pag-isipan an nangyari ki Anna na taga Nigeria. “Inisip ko kun baga dapat pa akong mabuhay huli sa masakiton kong kamugtakan,” an paliwanag niya. “Balo na ako asin may inaataman akong aking babayi na nasa ospital na may hydrocephalus (pagkaigwa nin sobrang tubig sa hutok) kan na-diagnose ako na may kanser sa suso asin kinaipuhan kong magpaopera, asin magpa-chemotherapy saka radiotherapy. Masakiton talagang sitwasyon idto na sabay kaming maospital kan aki ko.”

Ano an nakatabang ki Anna na magtagal? “Hinurop-hurop ko an mga teksto sa Bibliya arog kan Filipos 4:6, 7, na nagsasabi na ‘an katuninungan nin Diyos na nakakalabi sa gabos na pakasabot iyo an magbabantay sa saindong puso asin kaisipan.’ Pag naiisip ko an tekstong ini, namamati ko na dayupot ako ki Jehova, huling aram ko na mas nasasabutan niya ako kisa sa sadiri ko. Pinakusog man ako kan mamumuton kong mga tugang sa Kristiyanong kongregasyon.

“Dawa nasasakitan pa man giraray ako huli sa hilang ko, medyo nagin okey na man an kondisyon ko saka kan sakong aki. Huling yaon sa kataid mi si Jehova, nanudan mi na dai mag-isip nin negatibo pag napapaatubang sa mga kadipisilan. An Santiago 5:11 nag-aasigurar sa sato: ‘Ibinibilang niyato na maugma idtong mga nagtagal. Aram baga nindo kun paano nagtagal si Job asin kun paano siya binendisyunan ni Jehova, na nagpapahiling na si Jehova mamumuton na marhay [o, “mapagmalasakit,” nota sa ibaba] asin mahihirakon.’” Lubos na nasabutan ni Jehova an sitwasyon ni Job, kaya makakasigurado kita na nasasabutan man niya an ano man na kasakitan na inaagihan ta.