DAWA ngani an pagsuway kan satong inot na mga magurang, si Adan saka Eva, nagdara nin kasalan asin kagadanan sa gabos na tawo, dai kaiyan nabago an katuyuhan nin Diyos para sa katawuhan. Sa saiyang nasusurat na Tataramon, an Bibliya, pauruutrong sinigurado kan Diyos na an saiyang katuyuhan dai nagbago.

• ‘[Magigin pagsadiri] kan mga matanos an daga asin [maistar] sinda duman sagkod lamang.’—Salmo 37:29, BPV *

• ‘Hahalunon niya an kagadanan [sagkod lamang], asin papahidon kan Kagurangnan [na Jehova] an gabos na luha kan gabos na lalawgon.’—Isaias 25:8.

• “An ultimong kaiwal, an kagadanan, paparaon.”—1 Corinto 15:26.

• “An kagadanan mawawara na. Dai na man magkakaigwa nin pagmundo, o nin pagtangis, o nin kulog.”—Kapahayagan 21:4.

Paano nin Diyos ‘hahalunon an kagadanan,’ na an kaiwal na kagadanan “paparaon”? Arog kan nahiling ta, malinaw na sinasabi kan Bibliya na ‘an mga matanos maistar sagkod lamang.’ Pero sinasabi man kaiyan na “mayo nanggad nin sarong matanos na tawo na danay na naggigibo nin karahayan sa gabos na panahon.” (Parahulit 7:20, BPV) Para madaog an kagadanan, tatalikudan daw nin Diyos an saiyang sadiring pamantayan? Dai nanggad! Dai niya iyan gigibuhon, huling an “Diyos . . . dai makakapagputik.” (Tito 1:2) Kun siring, ano an gigibuhon nin Diyos para mautob an mamumuton na katuyuhan niya sa paglalang sa mga tawo?

Naggibo an Diyos na Jehova nin mamumuton na probisyon para tubuson an katawuhan sa kagadanan—paagi sa pagbayad nin pantubos. An pundamental na ideya kan pantubos iyo an katumbas na halaga para bayadan an mga danyos o tanganing mapaniguan an hinahagad na hustisya. Huling an gabos na tawo makasalan asin nasentensiyahan nin kagadanan, prangkang sinasabi kan Bibliya: ‘Mayong makakabalukat kan saiyang [tugang]; dai niya mababayadan an Diyos kan halaga kan saiyang buhay, huli ta an kabayadan kan buhay nin tawo dakulang gayo, asin an ibabayad niya dai nanggad magkakanigo.’—Salmo 49:7, 8, BPV.

Pag an sarong bakong perpektong tawo magadan, an mababayadan niya sana iyo an saiyang sadiring mga kasalan; dai niya matutubos an saiyang sadiri, ni mababayadan niya an kasalan kan siisay man. (Roma 6:7) Kaipuhan ta an sarong tawong perpekto asin daing kasalan para itao an saiyang buhay, bako para sa saiyang kasalan, kundi para sa kasalan niyato.—Hebreo 10:1-4.

Iyan nanggad an iinareglo nin Diyos na mangyari. Isinugo niya an saiyang Aki, si Jesus, hali sa langit para mamundag sa daga bilang sarong tawong perpekto asin daing kasalan. (1 Pedro 2:22) Sinabi ni Jesus na nagdigdi siya para “itao an saiyang buhay bilang pantubos na karibay nin dakul.” (Marcos 10:45) Nagadan siya para daugon an kaiwal na kagadanan tanganing magkaigwa kita nin buhay.—Juan 3:16.

Bilang kautuban kan propesiya sa Bibliya, nabubuhay na kita ngunyan sa “delikado asin masakit na mga panahon,” patunay na nabubuhay na kita sa “huring mga aldaw” kan maraot na sistemang ini nin mga bagay. (2 Timoteo 3:1) An huring mga aldaw masagkod sa “aldaw nin paghukom asin nin paglaglag sa mga bakong diyosnon na tawo.” (2 Pedro 3:3, 7) Alagad  an mga tawo na namumuot sa Diyos makakaligtas sa kalaglagan na iyan asin bebendisyunan nin “buhay na daing katapusan.”—Mateo 25:46.

Minilyon na tawo an magkakaigwa nin oportunidad na magkamit nin buhay na daing katapusan pag sinda binuhay na liwat. Kan si Jesus magbisita sa siyudad nin Nain, igwa siya nin binuhay liwat duman. Nagadan an kasaro-saruing aking lalaki nin sarong babaying balo, asin si Jesus, na ‘nahirak na marhay,’ binuhay liwat an aki. (Lucas 7:11-15) Sinabi man ni apostol Pablo: “[Igwa ako nin] paglaom . . . na bubuhayon liwat nin Diyos an mga matanos pati an mga bakong matanos.” An masarig na paglaom na ini pambihirang kapahayagan kan pagkamuot nin Diyos sa katawuhan.—Gibo 24:15.

Binilyon na tawo an puwedeng mabuhay nin daing katapusan. An Bibliya nagsasabi: ‘[Magigin pagsadiri] kan mga matanos an daga asin [maistar] sinda duman sagkod lamang.’ (Salmo 37:29, BPV) Sa panahon na iyan, personal nindang maeeksperyensiyahan an nakakapukaw sa buot asin nakakarangang mga tataramon na isinurat ni apostol Pablo mga 2000 taon na an nakakaagi: “Kagadanan, hain an saimong kapangganahan? Kagadanan, hain an saimong kamandag?” (1 Corinto 15:55) An kagadanan, na makusog na kaiwal kan katawuhan, sa panahon na iyan nadaog na!