Dinisenyo Kita Para Mabuhay nin Daing Katapusan
SIISAY baga sa sato an habong magkaigwa nin halawig asin maugmang buhay? Isipon mo na lang kun gurano kagayon na mabuhay nin daing katapusan, na maugma saka mayo nin hilang! Puwede tang makaibanan nin mas haloy an satong mga mahal sa buhay, magbiyahe sa bilog na kinaban, makanuod nin mga bagong kakayahan, urog na magkaigwa nin kadunungan, asin lubos na manudan an ano man na bagay na gustong-gusto tang gibuhon.
Sala daw an pagmawot na iyan? Bako nanggad! An Kasuratan nagsasabi na ilinaag sa sato nin Diyos an pagmawot na iyan. (Parahulit 3:11) Sinasabi man kaiyan na “an Diyos pagkamuot.” (1 Juan 4:8) Rasonable daw isipon na ilalaag sa sato kan mamumuton na Diyos an pagmawot na mabuhay nin daing katapusan pero imposible man palan na makamtan iyan?
Malinaw, an kagadanan bako tang amigo. Sa katunayan, ilinaladawan iyan kan Bibliya bilang maraot na “kaiwal.” (1 Corinto 15:26) An iba amay na nagagadan; an iba man nabubuhay nin halawig. Pero maabot sa punto na gabos kita magagadan. Para sa dakul, an pag-isip kaiyan bakong magayon, o nakakatakot pa ngani. Madadaog pa daw an kaiwal na ini? Posible daw talaga iyan?
EBIDENSIYA PARA MAGLAOM
Mapapangalas ka daw kun maaraman mo na bako talagang katuyuhan nin Diyos na magadan an mga tawo? An libro sa Bibliya na Genesis nagtatao nin ebidensiya na an katuyuhan nin Diyos para sa mga tawo iyo na mabuhay nin daing katapusan digdi sa daga. Maingat na linalang kan Diyos na Jehova an daga para istaran nin mga tawo. Dangan linalang niya an inot na tawo, si Adan, asin ilinaag siya sa sarong paraiso, an hardin nin Eden. Pagkatapos kaiyan, ‘Nahiling nin Diyos an gabos niyang ginibo, asin uya! labi-labi karahay.’—Genesis 1:26, 31.
Si Adan linalang na perpekto, uyon sa ladawan nin Diyos. (Deuteronomio 32:4) Pati an agom ni Adan, si Eva, mayo nin ano man na depekto, perpekto an saiyang isip asin hawak. Sinabi ni Jehova sa sainda: ‘Pangagbunga asin pangagdakul kamo, asin [panuon] nindo an daga, asin sakupon nindo iyan, asin [pamahalaan] nindo an mga sira sa dagat, asin an mga gamgam sa kalangitan, patin an gabos na hayop na naghihiro sa ibabaw nin daga.’—Genesis 1:28.
Kaipuhan nin panahon para mapano an daga kan saindang mga aki. Magkakaaki si Eva, asin an saiyang mga aki mangangaki man sagkod na mapano an daga arog kan katuyuhan nin Diyos. (Isaias 45:18) Rasonable daw na isipon na itatao ni Jehova ki Adan saka Eva an paglaom na iyan kun an lawig kan buhay ninda sagkod sana sa panahon na mahihiling ninda an saindang mga aki saka tibaad mga makuapo, asin dai na maaaraman an sunod na mga mangyayari?
Isipon man an itinaong pagbuot na pamahalaan an mga hayop. Pinagbutan si Adan na pangaranan an mga hayop, asin siguradong nangaipo iyan nin panahon. (Genesis 2:19) Pero para mapamahalaan sinda kaipuhan niyang manudan an manungod sa sainda asin masabutan kun paano sinda aatamanon. Mas lalong nangangaipo iyan nin halawig na panahon.
Kaya an pagbuot nin Diyos na panuon an daga asin pamahalaan an mga hayop nagpapahiling na an inot na tawong mag-agom dinisenyo para mabuhay nin halawig na panahon. Sa katunayan, nabuhay si Adan sa laog nin halawigon na panahon.
KATUYUHAN NIN DIYOS NA AN MGA TAWO MABUHAY NIN DAING KATAPUSAN SA PARAISONG DAGA
NABUHAY SINDA NIN HALAWIGON NA PANAHON
Si Adan, 930 taon
Si Matusalem, 969 taon
Si Noe, 950 taon
Ngunyan, 70-80 taon
Ipinapahiling kan Bibliya na an mga tawo kaidto nabuhay nin mas halawig kisa sa sato ngunyan. Sinasabi kaiyan: “An bilog na buhay ni Adan uminabot nin 930 taon.” (NW) Dangan, sinambit man na may anom pang lalaki na nabuhay nin labing 900 na taon! Sinda si Set, Enos, Quenan, Jared, Matusalem, saka si Noe. Gabos sinda nabuhay bago an Baha kan aldaw ni Noe—nabuhay si Noe nin 600 na taon bago nag-abot an Baha. (Genesis 5:5-27; 7:6; 9:29) Paano nagin posible an arog kaiyan kalawig na buhay?
An gabos na lalaking idto nabuhay kan panahon na harani pa sa pagkaperpekto an mga tawo. Posibleng marhay na iyan an panginot na dahilan kan saindang halawig na buhay. Pero paano konektado sa pagkaigwa nin halawig na buhay an pagigin perpekto? Asin paano madadaog an kagadanan? Para maaraman an simbag, kaipuhan ta ngunang masabutan kun taano ta naggugurang asin nagagadan kita.