Sinabi kan propetang si Moises na kun susunudon ta an mga pagbuot nin Diyos, bibiyayaan kita nin Diyos. (Deuteronomio 10:13; 11:27) Sinusunod ta an Diyos bakong dahil sa natatakot kitang padusahan niya. Pinapahiro kita kan magagayon na kuwalidad nin Diyos na sunudon siya huling namumutan ta siya asin habo tang gibuhon an sarong bagay na makakapamundo sa saiya. “Ini an kahulugan kan pagkamuot sa Diyos, an utubon niyato an saiyang mga tugon.”—1 Juan 5:3.

Pero paanong an pagsunod sa Diyos nagreresulta nin mga biyaya? Pag-isipan an duwang paagi.

‘Ako si Jehova na saimong Diyos, na nagtutukdo saimo na igwa nin pakinabang, na nagpapalakaw saimo sa dalan na saimong linalakawan.’—ISAIAS 48:17.

Midbid kita kan Diyos na Jehova, an satong Kaglalang, asin itinatao niya sa sato an paggiya na kaipuhan ta. Kun gusto tang matabangan kita kan saiyang mga pagtutukdo na makagibo nin madunong na mga desisyon, dapat tang aramon sa Banal na Kasuratan kun ano an gusto nin Diyos na gibuhon ta dangan isabuhay iyan.

“Maugma an mga nagdadangog kan tataramon nin Diyos asin nag-uutob kaiyan!”—LUCAS 11:28.

Sa ngunyan, minilyon na nagsusunod sa sinasabi kan Tataramon nin Diyos an nakakamati nin tunay na kaugmahan. Pag-isipan an halimbawa kan sarong lalaki sa España na arangguton na marhay saka bakong marahay an pagtratar sa iba—pati sa saiyang agom. Sarong aldaw nabasa niya an isinurat kan propetang si Moises manungod sa magayon na kuwalidad ni Jose, an aki ni Jacob. Ipinabakal si Jose bilang uripon asin iprineso nin bakong makatanusan; alagad, nagdanay siyang kalmado, mapagpatuninong, asin mapagpatawad. (Genesis, kapitulo 37-45) Sinabi kan lalaking taga España: “An paghurop-hurop sa halimbawa ni Jose nagpahiro sa sako na magin kalmado, mabuot, asin magkaigwa nin pagpupugol sa sadiri. Bilang resulta, maugma na an buhay ko ngunyan.”

An Banal na Kasuratan nagtatao nin dakul pang paggiya kun paano ta dapat trataron an iba. Tutukaron ini nin mas detalyado sa sunod na artikulo.