Hali sa Alemania, nagbalyo sa Australia an sakong ama kan 1949. Naghanap siya nin trabaho sa mga minahan asin industriya nin kuryente asin nag-istar sa probinsiya nin Victoria. Duman sinda nagkaaguman ni Nanay. Dangan, namundag ako kan 1953.

Pakalihis sana nin pirang taon, nakipag-adal si Nanay nin Bibliya sa mga Saksi ni Jehova, kaya aki pa ako medyo pamilyar na ako sa mga tukdo kan Bibliya. Pero sarado an isip ni Tatay sa ano man na relihiyon. Naanggot siya kaidto asin nagin madahas, kaya takuton saiya si Nanay. Pero patagong ipinadagos ni Nanay an pag-adal nin Bibliya asin gustuhon niya an mga nanunudan niya. Pag mayo si Tatay, iiniistorya niya samo ni Ate an mga nanunudan niya. Sinasabi niya samo an dapit sa maabot na paraisong daga saka an kaugmahan na makakamtan mi pag sinunod mi an mga pamantayan kan Bibliya.—Salmo 37:10, 29; Isaias 48:17.

Kan mag-18 anyos ako, napiritan akong maghali sa harong dahil sa pagigin madahas ni Tatay. Tubod ako sa itinukdo sako ni Nanay hali sa Bibliya, pero dai ko mahiling an kapakinabangan kaiyan kaya dai ko iyan isinabuhay. Nagtrabaho ako bilang electrician sa sarong minahan nin karbon. Nag-agom ako kan 20 anyos ako. Pakalihis nin tulong taon, nagkaaki kami nin aking babayi. Kaidto ko napag-isip-isip na siyasaton an buhay ko. Aram kong makakatabang an Bibliya sa pamilya mi, kaya nakipag-adal ako nin Bibliya sa mga Saksi ni Jehova. Pero kontrang marhay diyan an agom ko. Sarong beses kan mag-atender ako sa saindang pagtiripon, tinawan niya ako nin ultimatum—magpundo sa pag-adal o maghali sa harong. Dai akong nagibo kundi sunudon na sana kun ano an gusto niya asin dai na ako nakipag-ulay sa mga Saksi. Kan huri ko na sana pinagbasulan na dai ko ginibo an aram kong tama.

Sarong aldaw, huli sa sarong katrabaho nakanuod akong maghiling nin pornograpiya. Nakakaakit iyan pero nakakangiri man, asin nakokonsiyensiya ako pagkatapos. Huli sa nanudan ko sa Bibliya, aram kong papadusahan ako nin Diyos. Pero huling padagos akong nabantad sa malaswang mga ritrato, nagin ordinaryo na sana sako an pornograpiya. Dai nahaloy, naadik ako diyan.

Sa suminunod na 20 taon, lalo akong naparayo sa pamantayan kan Bibliya na hininguwang itukdo sa sako ni Nanay. Nahihiling na sa ugali ko an mga ilinalaog ko sa isip ko. Bulgar na akong magtaram  asin ugmahon ako pag bastos an surubahan. Nagin biribid an kaisipan ko dapit sa sekso. Dawa saro pa kami kan agom ko, nagkaigwa ako nin ibang mga babayi. Sarong aldaw, paghiling ko sa salming, sabi ko sa sadiri ko, ‘Marauton ka.’ Naati ako sa sadiri ko asin nawaran nin respeto.

Nagkasuwayan kaming mag-agom, asin nawaran na nin direksiyon an buhay ko. Udok akong namibi ki Jehova kaidto. Dangan, ipinadagos ko an pag-adal nin Bibliya dawa duwang dekada na an nag-agi. Gadan na kaidto si Tatay, asin si Nanay saro nang bawtisadong Saksi ni Jehova.

Harayuon nang marhay an buhay ko sa halangkaw na mga pamantayan kan Bibliya. Pero determinado na akong magkaigwa nin matuninong na isip arog kan ipinapanuga kan Bibliya. Nagdesisyon akong pakarhayon an sakong pagtaram asin hinguwahon na magin kalmado. Ipinundo ko man an imoral na pamumuhay, pagsugal, pagburat, asin paghabon sa amo ko.

Dai maintindihan kan mga katrabaho ko kun taano ta ginigibo ko an mga pagbabagong iyan. Sa laog nin tulong taon, padagos nindang pigbubuyo ako na bumalik sa dati kong buhay. Pag nadadara ako, arog kun bigla akong naanggot o nakapagmuda, ugmahon sinda kaiyan tapos makururahaw: “Nagluwas na an totoong Josef!” Makulugon sa buot na madangog iyan! Naiisip ko kaidto na garo dai ko na kayang magbago.

Grabe an pornograpiya sa trabaho mi, sa kompyuter man o sa papel. An mga katrabaho ko pirming nagpapadara nin malaswang mga ritrato sa kompyuter, arog ko man kaidto. Kun gurano ako kadesididong labanan an adiksiyon ko, arog man kaiyan kadesidido an mga katrabaho ko na tentaran akong bumalik sa dati. Nagpatabang ako sa nagba-Bible study sako. Mapasensiya siyang nagdangog mantang iiniistorya ko saiya an mga nasa buot ko. Ipinahiling niya sako paagi sa espesipikong mga teksto sa Bibliya kun paano ko malalabanan an adiksiyon ko. Pinakusog niya ako na hagadon an tabang ni Jehova paagi sa padagos na pagpamibi.—Salmo 119:37.

Sarong aldaw, nagpaapod ako nin miting sa mga katrabaho ko. Kan tiripon na kami, sinabi ko sainda na tawan nin beer an duwa ming katrabaho na naghihinguwang mapundo an pagigin alkoholiko. Biyo sindang nagkorontra: “Hala, bawal ’yan sainda! Aram mo nang may pinaglalabanan an duwang ’yan!” Sinimbag ko sinda: “Tama kamo. Pareho ko man baga sinda.” Puon kaidto, irinespeto na ninda an pagmamaigot kong labanan an adiksiyon ko sa pornograpiya kaya pinunduhan na ninda ako.

Pag-abot nin panahon, saka dahil sa dakulaon na tabang ni Jehova, napangganahan ko an pagkaadik sa pornograpiya. Kan 1999, nabawtismuhan ako bilang sarong Saksi ni Jehova. Nagpapasalamat ako na tinawan ako nin ikaduwang pagkakataon na mamuhay nin disente asin maugma.

Aram ko na kun taano ta ikinakaanggot ni Jehova an mga bagay na haloy na panahon kong kinawilihan. Bilang sarong mamumuton na Ama, gusto niyang maprotektaran ako sa mga danyos na dara kan pornograpiya. Totoo talaga an sinabi sa Talinhaga 3:5, 6! An sabi: ‘Manarig ka ki Jehova sa bilog mong puso asin dai ka manarig sa sadiri mong [pakasabot]. Midbidon mo siya sa gabos mong mga dalan, asin siya an magtatanos kan saimong mga dalan.’ An mga pamantayan sa Bibliya bako sanang proteksiyon kundi garantiya man na puwede kang magin mapanggana.—Salmo 1:1-3.

Hababaon kaidto an paghiling ko sa sadiri, pero ngunyan matuninong na an isip ko saka may respeto sa sadiri. Malinig na an sakong pamumuhay asin aram kong pinatawad na ako ni Jehova saka tinatabangan niya ako. Kan taon 2000, nagpakasal kami ni Karolin, sarong marahayon na sister na padangaton man si Jehova, arog ko. May matuninong kaming pamilya asin talagang pribilehiyo para samo na magin parte kan malinig asin mamumuton na Kristiyanong magturugang na abot sagkod sa bilog na kinaban.