Sarong Domingong hapon, dinumanan ni Kenneth saka Filomena, na taga Curaçao, an sarong mag-agom na tinutukduan ninda sa Bibliya.

“Kan mag-abot kami,” an sabi ni Kenneth, “sarado an harong asin mayo su lunadan ninda. Pero garo may nagpahiro sako na apudan sa telepono an agom na babayi.”

Sinimbag kan babayi an apod tapos sinabing nasa trabaho an agom niya. Pero, kan maaraman kaini na nasa luwas kan harong ninda si Kenneth saka Filomena, binuksan niya an pinto asin pinalaog sinda.

Narisa tulos nindang naghibi an babayi. Kan mamibi na si Kenneth para punan an pag-adal sa Bibliya, naghibi na naman ini. Kaya mabuot nindang hinapot kun ano an problema kaini.

Sinabi kan babayi na plano niyang maghugot kan hapon na idto. Nagsusurat siya nin suicide note para sa agom niya kan mag-apod si Kenneth kaya dai niya ini naidagos. Sinabi niya na igwa siya nin depresyon, kaya rinanga ninda an babayi paagi sa mga teksto sa Bibliya. Talagang nakapagligtas iyan nin buhay.

Sinabi ni Kenneth: “Nagpapasalamat kami ki Jehova dahil ginamit niya kami para tabangan an babaying ini na grabe an problema, lalo na sa pagpahiro samo—tibaad paagi sa sarong anghel o sa Saiyang banal na espiritu—na mag-apod sa telepono!” *

Tama daw na maniwala si Kenneth asin Filomena na tinabangan sinda nin Diyos, paagi man iyan sa sarong anghel o sa Saiyang banal na espiritu, o aktibong puwersa? O nagkataon lang an pag-apod ni Kenneth sa telepono?

Dai ta iyan masasabi. Pero aram ta na ginagamit nin Diyos an saiyang mga anghel para tabangan an mga tawo sa espirituwal na paagi. Halimbawa, sinasabi kan Bibliya na ginamit nin Diyos an sarong anghel para giyahan an Kristiyanong ebanghelisador na si Felipe tanganing tabangan sa espirituwal an sarong opisyal na taga Etiopia.—Gibo 8:26-31.

Ipinapalakop nin manlain-lain na relihiyon an paniniwala sa mga espiritung linalang asin itinutukdo na an nagkapira sa mga ini mabubuot asin nagsasagibo kan kabutan nin Diyos o nagigin mga anghel de la guwardiya. Naniniwala an dakul na tawo na dai sana basta nag-eeksister an mga anghel kundi nakakaapektar man iyan sa sainda. Minsan siring, dakul man an dai talaga naniniwala sa mga anghel.

Totoo daw an mga anghel? Kun iyo, sain sinda hali? Ano an totoo dapit sa mga anghel? Nakakaapektar daw sinda sa saimong buhay? Hilingon ta.