Ipinapahiling kan Bibliya na tanganing mangyari an kabutan nin Diyos, kun minsan nagtatao nin proteksiyon an mga anghel sa tunay na mga parasamba. (Salmo 34:7) Halimbawa:

• Kan laglagon ni Jehova an maraot na mga siyudad nin Sodoma asin Gomora, tinabangan kan mga anghel an matanos na si Lot saka an pamilya kaini tanganing makahali tulos.—Genesis 19:1, 15-26.

• Sa suanoy na Babilonya, kan ipagbuot na gadanon an tulong hoben na Hebreo paagi sa nagkakalayong hurno, an Diyos ‘nagsugo kan saiyang anghel asin ilinigtas an saiyang mga [lingkod].’—Daniel 3:19-28.

• Kan an matanos na lalaking si Daniel iapon sa lungib nin mabangis na mga leon asin magdamlag na yaon duman, sinabi niya na buhay pa siya huling ‘isinugo nin Diyos an saiyang anghel, na iyo an [nagtikom] kan nguso kan mga leon.’—Daniel 6:16, 22.

Nagtabang an mensaherong mga anghel nin Diyos sa mga aktibidad kan inot na Kristiyanong kongregasyon sa mga panahon na kaipuhan iyan tanganing mangyari an katuyuhan ni Jehova. Halimbawa:

• Binuksan kan sarong anghel an mga pinto kan presuhan asin sinabihan an mga napresong apostol na padagos na maghulit sa templo.—Gibo 5:17-21.

• Pinagbutan kan sarong anghel an ebanghelisador na si Felipe na magpasiring sa tinampo sa disyerto hali sa Jerusalem pasiring sa Gaza asin hulitan an sarong taga Etiopia na nagduman sa Jerusalem tanganing sumamba.—Gibo 8:26-33.

• Kan itinugot na nin Diyos na magin Kristiyano an bakong mga Judio, sarong anghel an nagpahiling sa opisyal kan hukbo nin Roma na si Cornelio paagi sa sarong bisyon asin pinagbutan niya ini na ipaapod si apostol Pedro sa saiyang harong.—Gibo 10:3-5.

• Kan mapreso si apostol Pedro, sarong anghel an nagpahiling saiya asin giniyahan siya paluwas sa presuhan.—Gibo 12:1-11.

Mayong ebidensiya na ginagamit ngunyan nin Diyos an mga anghel tanganing tabangan an mga  tawo sa milagrosong mga paagi arog kan sinasabi sa Bibliya. Pero kun dapit sa panahon niyato ngunyan, sinabi ni Jesus: “An maugmang baretang ini kan Kahadian ihuhulit sa bilog na kinaban bilang patotoo sa gabos na nasyon, dangan maabot an katapusan.” (Mateo 24:14) Aram mo daw na isinasagibo ini kan mga disipulo ni Cristo sa paggiya kan mga anghel?

Ipinapahiling sa libro nin Kapahayagan na magigin maigot an mga anghel sa pagtabang sa mga tawo sa bilog na daga tanganing ipamidbid an Diyos na Jehova asin ipaaram an katuyuhan niya para sa mga tawo. Si apostol Juan nagsurat: “Nahiling ko an saro pang anghel na naglalayog sa kaitaasan, asin igwa siya nin daing katapusan na maugmang bareta na ipapahayag sa mga nag-iirok sa daga, sa gabos na nasyon asin tribo asin lengguwahe saka banwaan. Sinasabi niya sa makusog na boses: ‘Matakot kamo sa Diyos asin pamurawayon nindo siya, huli ta nag-abot na an oras kan saiyang paghukom, kaya sambahon nindo an Saro na naggibo kan langit asin kan daga asin kan dagat saka kan mga burabod nin tubig.’” (Kapahayagan 14:6, 7) Dakul na eksperyensiya sa panahon ta an nagpapatunay na sinusuportaran kan mga anghel an pambilog na kinaban na paghuhulit kan Kahadian. Sa katunayan, dawa ngani may saro sanang nagsulsol asin bumalik ki Jehova, “nagkakaigwa nin kagaya-gayahan an mga anghel nin Diyos.”—Lucas 15:10.

Ano an mangyayari pag natapos na an gibuhon na paghuhulit? An “mga hukbo [nin mga anghel] sa langit” susuportaran si Jesu-Cristo, an Hadi nin mga hadi, sa pakikilaban sa “ralaban kan dakulang aldaw kan Diyos na Makakamhan sa Gabos” sa Armagedon. (Kapahayagan 16:14-16; 19:14-16) Sa paghukom nin Diyos, an mga anghel magigin mga parakastigo mantang isinasagibo kan Kagurangnan na Jesus an ‘pamamalos tumang sa mga dai nagkukuyog sa maugmang bareta’ manungod sa saiya.—2 Tesalonica 1:7, 8.

Kaya, makakasiyerto ka na interesado saimo an mga anghel. Nagmamakulog sindang marhay sa kapakanan kan mga tawo na nagmamawot na paglingkudan an Diyos, asin dakul na beses sindang ginamit ni Jehova tanganing pakusugon asin protektaran an maimbod niyang mga lingkod sa daga.—Hebreo 1:14.

Kun siring, kada saro sa sato kaipuhan na gumibo nin importanteng desisyon. Mahinanyog daw kita asin masunod sa maugmang bareta na ipinapahayag sa bilog na daga? Mauugma an mga Saksi ni Jehova sa lugar nindo na tabangan kang maaraman an mga pakinabang sa mamumuton na tabang kan makapangyarihan na mga anghel nin Diyos.