ARTIKULONG PAG-AADALAN 15
Ano an Manunudan Ta sa mga Milagro ni Jesus?
“Naglibot siya sa bilog na kadagaan na naggigibo nin marahay saka nagpapaumay.”—GIBO 10:38.
KANTA 13 Si Cristo, an Arugan Niyato
SUMARYO KAN PAG-AADALAN a
1. Iladawan an kamugtakan kan gibuhon ni Jesus an inot niyang milagro.
IMAHINARON an eksena sa huring kabtang kan 29 C.E. sa pagpupuon kan ministeryo ni Jesus. Si Jesus asin an saiyang ina na si Maria, saka an pira sa saiyang mga disipulo inimbitaran sa sarong bangkete sa kasal sa Cana, sarong baryo sa norte kan ginikanan na banwaan ni Jesus na Nazaret. Si Maria amiga kan pamilya kan nobyo asin nobya asin minalataw na nagtatabang siya sa pag-asikaso sa mga bisita. Alagad sa oras kan bangkete, nagkaigwa nin problema na puwedeng makapasupog na marhay sa pamilya asin sa bagong kasal—ubos na an arak. b Posibleng mas dakul kisa sa inaasahan an nag-abot na mga bisita. Tulos-tulos na dinulok ni Maria an saiyang aki asin nagsabi: “Dai na sindang arak.” (Juan 2:1-3) Ano an ginibo ni Jesus? Sarong ekstraordinaryong bagay—milagroso niyang ginibo an tubig na magin “marahay na klaseng arak.”—Juan 2:9, 10.
2-3. (a) Paano ginamit ni Jesus an saiyang kapangyarihan na magmilagro? (b) Paano kita makikinabang sa pagkonsiderar kan mga milagro ni Jesus?
2 Dakul pang ibang milagro an ginibo ni Jesus durante kan saiyang ministeryo. c Ginamit niya an saiyang kapangyarihan na magmilagro para tabangan an ribo-ribong tawo. Halimbawa, sa duwa sana sa saiyang mga milagro—pagpakakan nin 5,000 na lalaki asin kan huri 4,000 na lalaki—puwedeng may kabilugan nang labing 27,000 katawo an presente kun iiiba an mga babayi saka mga aki. (Mat. 14:15-21; 15:32-38) Sa parehong pagkakataon na iyan, nagpaumay man si Jesus nin dakul na may hilang. (Mat. 14:14; 15:30, 31) Imahinara an grabeng pagngalas kan mga tawo na milagrosong pinaumayan asin pinakakan ni Jesus!
3 Dakulon kitang manunudan ngunyan sa mga milagrong ginibo ni Jesus. Sa artikulong ini, pag-uulayan ta an nagkapirang nakakapakusog sa pagtubod na mga leksiyon na itinutukdo sato kan mga milagrong idto. Dangan aaramon ta kun paano ta maaarog an kapakumbabaan asin pagkahirak na ipinahiling ni Jesus kan naggigibo siya nin mga milagro.
MGA LEKSIYON MANUNGOD KI JEHOVA ASIN KI JESUS
4. Manungod kiisay an nakakapakusog sa pagtubod na mga leksiyon an manunudan ta sa mga milagro ni Jesus?
4 An mga milagro ni Jesus nagtutukdo sato nin nakakapakusog sa pagtubod na mga leksiyon bako lang manungod sa saiya kundi manungod man sa saiyang Ama. Kun sabagay, si Jehova man talaga an tunay na Gikanan kan mga milagro. An Gibo 10:38 nagsasabi sa sato: “Linahidan nin Diyos [si Jesus] nin banal na espiritu saka tinawan nin kapangyarihan, asin naglibot siya sa bilog na kadagaan na naggigibo nin marahay saka nagpapaumay sa gabos na pinapasakitan kan Diyablo, huli ta an Diyos nasa kaibanan niya.” Tandaan man na sa gabos na sinabi asin ginibo ni Jesus—kaiba na an mga milagro na ginibo niya—perpekto niyang naarog an kaisipan asin pagmati kan saiyang Ama. (Juan 14:9) Pag-ulayan ta an tulong leksiyon na manunudan ta sa mga milagro ni Jesus.
5. Ano an nagpahiro ki Jesus na gumibo nin mga milagro? (Mateo 20:30-34)
5 Inot, namumutan na marhay kita ni Jesus asin kan saiyang Ama. Mantang nasa daga, ipinahiling ni Jesus kun gurano niya kanamumutan an mga tawo paagi sa paggamit kan saiyang kapangyarihan na magmilagro para tabangan an mga nagsasakit. Sarong beses, duwang lalaking buta an nakimahirak na marhay saiya para magpatabang. (Basahon an Mateo 20:30-34.) Mangnuhon na “nahirak na marhay” si Jesus dangan pinaumayan niya sinda. An Griegong pandiwa na ginamit digdi na itrinadusir na “nahirak na marhay” nanunungod sa grabeng pagmalasakit na namamati sa kalaog-laugi nin sarong tawo. An grabeng pagmalasakit na iyan, na sarong kapahayagan nin pagkamuot, nagpahiro man ki Jesus na pakakanon an mga nagugutom asin paumayan an sarong may leproso. (Mat. 15:32; Mar. 1:41) Makakasigurado kita na si Jehova, an Diyos nin “mapagpadangat na pagmalasakit,” asin an saiyang Aki namumuot na marhay sa sato asin nakukulgan sa satong pagsakit. (Luc. 1:78; 1 Ped. 5:7) Sigurado nanggad na gustong-gusto na nindang halion an gabos na problema na nagpapasakit sa katawuhan!
6. Anong kapangyarihan an itinao nin Diyos ki Jesus?
6 Ikaduwa, tinawan nin Diyos nin kapangyarihan si Jesus na resolberan an gabos na problema kan katawuhan. Paagi sa saiyang mga milagro, ipinahiling ni Jesus an saiyang kapangyarihan na halion an mga problema na dai ta masosolusyunan kun kita sana. Halimbawa, may kapangyarihan siya na patalingkason kita sa pinakaugat kan mga problema kan katawuhan—an minanang kasalan saka an mga epekto kaiyan, kaiba na an hilang asin kagadanan. (Mat. 9:1-6; Roma 5:12, 18, 19) An saiyang mga milagro nagpapatunay na kaya niyang paumayan an “gabos na klase nin” hilang asin magbuhay pa ngani nin mga gadan. (Mat. 4:23; Juan 11:43, 44) Apuwera kaiyan, may kapangyarihan man siya na kontrulon an makusugon na alipuros nin bagyo asin daugon an maraot na mga espiritu. (Mar. 4:37-39; Luc. 8:2) Nakakapakusog nanggad sa buot na maaraman na tinawan ni Jehova nin arog kaiyan kakusog na kapangyarihan an saiyang Aki!
7-8. (a) Huli sa mga milagrong ginibo ni Jesus, sa ano kita makakapagtiwala? (b) Anong milagro an hinahalat-halat mo sa maabot na bagong kinaban?
7 Ikatulo, lubos kitang makakapagtiwala na magkakatotoo an mga bendisyon na ipapaabot kan Kahadian nin Diyos. An mga milagro na ginibo ni Jesus bilang sarong tawo digdi sa daga nagtutukdo sa sato kan mas mahiwas na gigibuhon niya bilang makalangit na Hadi kan Kahadian nin Diyos. Pag-isipan an madali ta nang maeksperyensiyahan sa irarom kan pamamahala ni Cristo. Magkakaigwa kita nin perpektong salud, huling hahalion niya an gabos na hilang asin diperensiya sa pisikal na nagpapasakit sa katawuhan. (Isa. 33:24; 35:5, 6; Kap. 21:3, 4) Dai na kita nuarin man magugutom o magsasakit huli sa mapandestrosong epekto kan natural na mga kalamidad. (Isa. 25:6; Mar. 4:41) Ikakaugma tang marhay an pagsabat sa satong mga namumutan na binuhay liwat hali sa “mga lulubngan na girumduman.” (Juan 5:28, 29) Anong milagro an lalo nang hinahalat-halat mong mangyari sa maabot na bagong kinaban?
8 Sa mga milagrong ginibo ni Jesus, ipinahiling niya an saiyang dakulang kapakumbabaan asin pagmalasakit—mga kuwalidad na dapat tang arugon. Pag-ulayan ta an duwang halimbawa kaiyan. Inuton ta an pangyayari sa sarong bangkete sa kasal sa Cana.
SARONG LEKSIYON MANUNGOD SA KAPAKUMBABAAN
9. Taano ta naggibo si Jesus nin milagro sa sarong bangkete sa kasal? (Juan 2:6-10)
9 Basahon an Juan 2:6-10. Kan naubos na an arak sa sarong bangkete sa kasal, obligado daw si Jesus na gumibo nin ano man? Dai. Mayo nin propesiya na nagsasabi na an Mesiyas milagrosong magibo nin arak. Pero imahinara na sana kun sa kasal mo mismo maubusan nin maiinom. Posibleng marhay na napahiro si Jesus huli sa pagmalasakit niya sa pamilya, lalo na sa nobya asin nobyo, asin habo niya na mapasupog sinda. Kaya, arog kan sinambit sa inutan, naggibo siya nin sarong milagro. Ginibo niya an tubig—na mga 390 litro (103 gal)—na magin marahayon na klase nin arak. Posibleng arog kaiyan kadakul an ginibo niya tanganing may matada pa na magagamit kan mag-agom sa ngapit o maipabakal pa ngani para makatabang sainda sa pinansiyal. Siguradong pinasalamatan na marhay iyan kan bagong kasal!
Arugon si Jesus paagi sa dai paghambog manungod sa satong mga naginibuhan (Hilingon an parapo 10-11) e
10. Ano an nagkapirang interesanteng mga detalye na mababasa sa Juan kapitulo 2? (Hilingon man an ritrato.)
10 Pag-isipan an nagkapirang interesanteng mga detalye na mababasa sa Juan kapitulo 2. Narisa mo na bako si Jesus an nagpano nin tubig sa mga gapong tapayan? Imbes na darahon an atensiyon sa saiyang sadiri, sinabihan niya an mga suruguon na panuon an mga tapayan. (Bersikulo 6, 7) Asin pagkatapos niyang gibuhon na arak an tubig, bako mismo si Jesus an nagdara kan ipapanamit na arak sa namamahala sa bangkete. Imbes, ipinagibo niya iyan sa mga suruguon. (Bersikulo 8) Siguradong dai si Jesus nagkua nin kopa nin arak, itinaas iyan sa atubangan kan mga bisita, asin ipinaghambog, ‘Namitan nindo an arak na kagigibo ko pa sana!’
11. Ano an manunudan ta sa milagro ni Jesus?
11 Ano an manunudan ta sa milagro ni Jesus kan gibuhon niyang arak an tubig? Makakanuod kita diyan nin kapakumbabaan. Dai ni Jesus ipinaghambog an manungod sa milagro; sa katunayan, dai niya nuarin man ipinaghambog an saiyang mga nagibo. Sa kabaliktaran, mapakumbaba asin pauruutro niyang itinatao an gabos na kamurawayan asin kaumawan sa saiyang Ama. (Juan 5:19, 30; 8:28) Kun aarugon ta si Jesus paagi sa pagdadanay na mapakumbaba, dai ta ipaghahambog an manungod sa mga nagibo ta. Ano man an ginigibo ta sa paglilingkod ki Jehova, ipaghambog ta, bako an manungod sa satong sadiri, kundi an manungod sa satong marahayon na Diyos na pribilehiyo tang paglingkudan. (Jer. 9:23, 24) Itao ta sa saiya an onra na maninigo sa saiya. Tutal, anong marahay na bagay an magigibo ta kun mayo an tabang ni Jehova?—1 Cor. 1:26-31.
12. Ano an saro pang paagi na puwede tang maarog an kapakumbabaan ni Jesus? Magtao nin halimbawa.
12 Pag-isipan an saro pang paagi na puwede tang maarog an kapakumbabaan ni Jesus. Imahinara an senaryong ini: Sarong elder an nagtao nin dakul na panahon para tabangan an sarong hoben na ministeryal na lingkod sa pag-andam kan inot na pampublikong pahayag kaini. Bilang resulta, nakapagtao an hoben na brother nin nakakapakusog na pahayag, na ikinaugma kan kongregasyon. Pagkatapos kan pagtiripon, may nagdulok sa elder asin nagsabi: ‘Magayunon su pahayag ni Brod, ano?’ Kaipuhan daw na sabihon kan elder: ‘Ah, iyo, pero dakul na oras an ginamit ko sa pagtabang saiya’? O mapakumbaba niyang sasabihon: ‘Ah, iyo. Mahusay talaga siya’? Kun mapakumbaba kita, dai ta kaipuhan na kuanon an onra sa marahay na mga bagay na ginigibo ta para sa iba. Kontento kita huling aram ta na nahihiling asin pinapahalagahan ni Jehova an ginigibo ta. (Ikumparar an Mateo 6:2-4; Heb. 13:16) Siguradong napapaugma ta si Jehova pag inaarog ta si Jesus sa pagpahiling nin kapakumbabaan.—1 Ped. 5:6.
SARONG LEKSIYON MANUNGOD SA PAGMALASAKIT
13. Ano an nahiling ni Jesus harani sa siyudad nin Nain, asin ano an ginibo niya? (Lucas 7:11-15)
13 Basahon an Lucas 7:11-15. Imahinara an eksenang ini na nangyari mga duwang taon pagkatapos na punan ni Jesus an saiyang ministeryo. Nagbaklay siya pasiring sa Nain, sarong siyudad sa Galilea na harani sa Sunem, kun sain binuhay ni propeta Eliseo an aking lalaki nin sarong babayi mga 900 na taon na an nakaagi. (2 Ha. 4:32-37) Kan paparani na si Jesus sa trangkahan kan siyudad, nahiling niya an sarong prusisyon sa lubong na papaluwas na. Nakakamundong marhay an eksena—sarong balo na nagadanan kan kasaro-sarui niyang aking lalaki. Pero dai man nagsosolo an nagmumundong ina; dakulon na tawo hali sa siyudad an kaibanan niya. Pinapundo ni Jesus an prusisyon asin may ginibo siyang sarong pambihirang bagay para sa nagmumundong ina—binuhay niya an saiyang aking lalaki! Ini an inot sa tulong pagbuhay liwat na ginibo ni Jesus na espesipikong isinurat sa mga Ebanghelyo.
Arugon si Jesus paagi sa pagpahiling nin pagmalasakit sa mga nagadanan (Hilingon an parapo 14-16)
14. Ano an nagkapirang interesanteng mga detalye na mababasa sa Lucas kapitulo 7? (Hilingon man an ritrato.)
14 Pag-isipan an nagkapirang interesanteng mga detalye na mababasa sa Lucas kapitulo 7. Narisa mo daw na inot, ‘nahiling’ ni Jesus an nagmumundong ina asin pagkatapos kaiyan, “nahirak siyang marhay sa saiya”? (Bersikulo 13) Kaya, huli sa nahiling niya—posibleng an pagtangis kan ina mantang naglalakaw ini sa inutan kan bangkay kan saiyang aki—nakamati si Jesus nin grabeng pagmalasakit sa saiya. Si Jesus dai lang basta nakamati nin pagkahirak sa ina; ipinahiling niya an saiyang pagmalasakit sa saiya. Nakipag-ulay siya sa saiya, na siguradong sa nakakapakusog sa buot na tono, asin sinabi: “Magpundo ka na sa paghibi.” Dangan may ginibo siya para makatabang. Binuhay niya an aking lalaki asin “itinao siya ni Jesus sa saiyang ina.”—Bersikulo 14, 15.
15. Ano an manunudan ta sa milagro ni Jesus?
15 Ano an manunudan ta sa milagro ni Jesus kan buhayon niya an aking lalaki kan babaying balo? Manunudan ta na kaipuhan tang magpahiling nin pagmalasakit sa mga nagmumundo. Siyempre, dai ta kayang magbuhay nin gadan, arog kan ginibo ni Jesus. Pero arog ni Jesus, puwede kitang magpahiling nin pagmalasakit sa mga nagadanan paagi sa pagigin mapag-obserbar. Puwede kitang gumibo nin mga paagi para ipahiling an satong pagmalasakit paagi sa mga tataramon saka paggibo kan magigibo ta para tabangan asin rangahon sinda. d (Tal. 17:17; 2 Cor. 1:3, 4; 1 Ped. 3:8) Dawa an simpleng mga tataramon asin gibo puwedeng makapakusog na marhay.
16. Arog kan reenactment na mahihiling sa ritrato, ano an manunudan mo sa eksperyensiya kan sarong ina na dai pa sana nahahaloy na nagadanan nin aki?
16 Pag-isipan an sarong eksperyensiya. Mga pirang taon na an nakaagi mantang nagkakanta sa pagtiripon sa kongregasyon, narisa nin sarong sister na naghihibi an sarong ina na nakatukaw sa ibong na raya kan mga tukawan. Sinambit sa kanta an paglaom na pagkabuhay liwat, asin an inang iyan dai pa sana nahahaloy na nagadanan nin aking babayi. Huling aram iyan kan sister, tulos-tulos niyang rinanihan an ina, inakbayan ini, asin ipinadagos an pagkanta kataid kan ina. Kan huri, sinabi kan ina: “Mating-mati ko an grabeng pagkamuot kan mga tugang.” Nagpapasalamat siyang marhay na nag-atender siya sa pagtiripon. “Yaon duman an tabang na kaipuhan mi,” an sabi niya, “duman sa Kingdom Hall.” Makakasigurado kita na nahihiling asin pinapahalagahan ni Jehova dawa an simpleng mga bagay na ginigibo ta para ipahiling an pagmalasakit sa mga nagadanan, na “may runot na espiritu.”—Sal. 34:18.
SARONG NAKAKAPAKUSOG NA PROYEKTO SA PAG-ADAL
17. Ano an nanudan ta sa artikulong ini?
17 An mga istorya sa Ebanghelyo manungod sa mga milagro ni Jesus puwedeng magin nakakapakusog na proyekto sa pag-adal. Itinutukdo kaiyan sa sato na namumutan na marhay kita ni Jehova asin ni Jesus, na si Jesus igwa nin kapangyarihan na resolberan an gabos na problema kan katawuhan, asin na lubos kitang makakapagtiwala sa ipinanugang mga bendisyon kan Kahadian na madalion ta nang makamtan. Mantang pinag-iisipan ta an mga istoryang idto, puwede tang hurop-hurupon an mga paagi na puwede tang maarog an mga kuwalidad ni Jesus. Taano ta dai mag-iskedyul nin personal na proyekto sa pag-adal o Pampamilyang Pagsamba na nakapokus sa iba pang milagro na ginibo ni Jesus? Hilingon kun anong mga leksiyon an manunudan mo, dangan ihiras man iyan sa iba. Posibleng marhay na magkakaigwa ka nin nakakapakusog na marhay na mga pakikipag-ulay!—Roma 1:11, 12.
18. Ano an pag-uulayan ta sa sunod na artikulo?
18 Sa pagtatapos kan saiyang ministeryo, ginibo ni Jesus an pantulo sa tulong pagbuhay liwat na ginibo niya na ipinasurat sa Bibliya. Pero napapalain ini—binuhay niya an sarong namumutan na amigo, asin ginibo niya ini sa kakaibang kamugtakan. Anong mga leksiyon an manunudan ta sa salaysay kan Ebanghelyo manungod sa milagrong iyan? Asin paano ta mapapakusog an satong pagtubod sa paglaom na pagkabuhay liwat? Sisimbagon sa sunod na artikulo an mga hapot na iyan.
KANTA 20 Itinao Mo an Saimong Bugtong na Aki
a Pinakalma niya an makusugon na alipuros, pinaumayan an mga may hilang, asin binuhay an mga gadan. Nakakapukaw nanggad sa buot na basahon an manungod sa mga milagrong ginibo ni Jesus! An mga pangyayaring iyan ipinasurat sa Bibliya, bako para malibang kita, kundi para tukduan kita. Mantang rinerepaso an mga iyan, makakanuod kita nin nakakapakusog sa pagtubod na mga leksiyon manungod ki Jehova asin ki Jesus asin maaaraman ta an diyosnon na mga kuwalidad na dapat tang patalubuon.
b Ipinaliwanag nin sarong iskolar sa Bibliya: “An pagigin mapag-istimar sa Sirangan sarong sagradong obligasyon asin dai ibinibilang na igo na an paghanda para sa mga bisita nin tamang-tama sana. An tunay na pagigin mapag-istimar, lalo na sa sarong bangkete sa kasal, nangangaipo nin sobra kadakul na handa.”
c Mababasa sa mga Ebanghelyo an labing 30 espesipikong mga milagro ni Jesus. Apuwera kaiyan, kun minsan may mga milagro na iriba nang sinambit sa sarong pagkasaysay. Sa sarong pagkakataon, sarong “bilog na siyudad” an nagduman sa saiya asin ‘pinaumayan niya an dakul na igwa nin hilang.’—Mar. 1:32-34.
d Para sa mga suhestiyon kun ano an puwede mong sabihon o gibuhon para rangahon an mga nagmumundo, hilingon an artikulo na “Pagranga sa mga Nagmumundo” sa Num. 3 2016 na isyu kan An Torrengbantayan.
e DESKRIPSIYON KAN RITRATO: Mantang nakatindog si Jesus sa parteng likod, ikinakaugma kan nobyo asin nobya asin kan saindang mga bisita an marahay na klase nin arak.
