1. Paano ipinahiling nin sarong aking lalaki an saiyang paglaom sa pagkabuhay liwat?

 AN AKING lalaki na si Matthew igwa nin grabeng hilang na nangangaipo nin dakul na operasyon. Siyete anyos siya kaidto, asin naghihiling sindang pamilya kan bulanan na programa kan JW Broadcasting^®. Sa pagtatapos kan programa, may sarong music video manungod sa maugmang pagsabat sa mga binuhay liwat na mga mahal sa buhay. b Pagkatapos kan programa, rinanihan ni Matthew an mga magurang niya, kinaputan an saindang kamot, asin nagsabi: “O Ma, Pa, nahiling po nindo? Dawa po baga magadan ako, bubuhayon man ako giraray. Halaton na lang po nindo ako; okey lang po iyan.” Naiimahinar daw nindo an pagmati kan mga magurang kan mahiling ninda kun gurano katotoo sa aki ninda an paglaom na pagkabuhay liwat?

2-3. Taano ta marahay na hurop-hurupon ta an panuga na pagkabuhay liwat?

² Sa pana-panahon, magayon na hurop-hurupon ta an panuga kan Bibliya sa maabot na pagkabuhay liwat. (Juan 5:28, 29) Taano? Huling dai ta aram kun nuarin kita puwedeng mapaatubang sa sarong nakakagadan na hilang o biglang pagkagadan nin sarong mahal sa buhay. (Ecl. 9:11; Sant. 4:13, 14) An satong paglaom na pagkabuhay liwat makakatabang sa sato na matagalan an siring na mga kasakitan. (1 Tes. 4:13) Sinisigurado sa sato kan Kasuratan na midbid asin namumutan kitang marhay kan satong Ama sa langit. (Luc. 12:7) Isipa na sana kun gurano kita kamidbid kan Diyos na Jehova para matawan niya kita nin panibagong buhay na yaon pa man giraray an satong personalidad asin memorya. Asin talagang mamumuton nanggad si Jehova na tinawan niya kita nin oportunidad na mabuhay nin daing katapusan, asin buhayon pa ngani kun kinakaipuhan!

 ³ Sa artikulong ini, pag-uulayan ta nguna kun taano ta makakapagtiwala kita sa panuga na pagkabuhay liwat. Dangan, pag-uulayan ta an nakakapakusog sa pagtubod na istorya sa Bibliya kun sain yaon an mga tataramon sa satuyang temang teksto: “Mabangon an saimong tugang.” (Juan 11:23) Panghuri, manunudan ta kun ano an magigibo ta para magin totoong-totoo sa sato an paglaom na pagkabuhay liwat.

4. Para maniwala sa sarong panuga, sa ano kita dapat na magin kumbinsido? Iilustrar.

⁴ Para maniwala sa sarong panuga, dapat na kumbinsido kita na an nanunuga kaiyan igwa nin pagmawot asin kapangyarihan, o kakayahan, na utubon iyan. Para iilustrar: Ipamugtak na an saimong harong nadestrosong marhay nin sarong bagyo. Sarong amigo an nagdulok sa saimo asin nanuga, ‘Tatabangan taka na mahirahay an harong mo.’ Sinsero siya, saka kumbinsido ka na igwa siya nin pagmawot na tabangan ka. Kun saro siyang mahusay na paratugdok, asin igwa kan kinakaipuhan na mga gamit, aram mo na igwa man siya nin kakayahan. Kaya nagtitiwala ka sa panuga niya. Kumusta man pag-abot sa panuga nin Diyos na pagkabuhay liwat? Igwa daw talaga siya nin pagmawot asin nin kapangyarihan na utubon iyan?

5-6. Taano ta makakasigurado kita na igwa nin pagmawot si Jehova na buhayon an mga gadan?

⁵ Igwa daw si Jehova nin pagmawot na buhayon an mga gadan? Siyerto nanggad! Pinasabngan niya an nagkapirang kagsurat kan Bibliya na isurat an saiyang panuga na pagkabuhay liwat sa maabot. (Isa. 26:19; Os. 13:14; Kap. 20:11-13) Asin pag nanunuga si Jehova, pirmi niya iyan na inuutob. (Jos. 23:14) Sa katunayan, gustong-gusto ni Jehova na buhayon an mga gadan. Taano ta nasabi ta iyan?

⁶ Pag-isipan an mga sinabi kan patriyarkang si Job. Sigurado siya na dawa pa magadan siya, hihidawon ni Jehova na mahiling giraray si Job na buhay. (Job 14:14, 15) Arog man kaiyan an pagmawot ni Jehova sa gabos niyang mga parasamba na nagadan. Gustong-gusto niyang buhayon sinda, na may makusog na salud asin maugma. Paano man an bilyon-bilyon na nagadan na dai nagkaigwa nin pagkakataon na maaraman an katotoohan manungod ki Jehova? Gusto man kan satong mamumuton na Diyos na buhayon sinda. (Gibo 24:15) Gusto niya na magkaigwa sinda nin oportunidad na magin amigo niya asin mabuhay nin daing katapusan sa daga. (Juan 3:16) Malinaw, igwa nin pagmawot si Jehova na buhayon an mga gadan.

7-8. Taano ta makakasigurado kita na may kapangyarihan si Jehova na buhayon an mga gadan?

⁷ Igwa man daw nin kapangyarihan si Jehova na buhayon an mga gadan? Igwa nanggad! Siya “an Makakamhan sa Gabos.” (Kap. 1:8) Kaya makapangyarihan nanggad siya para daugon an ano man na kaiwal, dawa an kagadanan. (1 Cor. 15:26) Nakakapakusog asin nakakarangang maaraman ta iyan. Pag-isipan an eksperyensiya ni Sister Emma Arnold. Siya saka an saiyang pamilya nag-agi nin grabeng mga pagbalo sa pagtubod kaidtong Giyera Mundiyal II. Para rangahon an saiyang aking babayi sa pagkagadan nin mga namumutan sa mga kampo de-konsentrasyon kan Nazi, sinabi ni Emma: “Kun an kagadanan nin tawo permanente, magigin mas makusog iyan kisa sa Diyos, bako daw?” Siyerto nanggad, mayo nin mas makusog pa ki Jehova! Kayang-kaya kan Diyos na Makakamhan sa Gabos na naglalang kan buhay na ibalik an buhay kan mga nagadan.

⁸ An saro pang rason kun taano ta kaya kan Diyos na buhayon an mga gadan iyo an saiyang daing limiteng memorya. Inaapod niya sa pangaran an lambang bituon. (Isa. 40:26) Saka nagigirumduman niya man an mga nagadan. (Job 14:13; Luc. 20:37, 38) Madali niyang magigirumduman an lambang detalye manungod sa mga bubuhayon niya, kaiba na an saindang genetic  code, asin mga eksperyensiya saka memorya sa buhay.

9. Taano ta naniniwala ka sa panuga ni Jehova na pagkabuhay liwat sa maabot?

⁹ Malinaw, makakapagtiwala kita sa panuga ni Jehova sa maabot na pagkabuhay liwat huling aram ta na igwa siya kan pagmawot saka kakayahan na utubon iyan. Pag-isipan an saro pang rason para maniwala sa panuga nin Diyos na pagkabuhay liwat: Ginibo na iyan ni Jehova. Kan mga panahon kan Bibliya, tinawan niya nin kapangyarihan an nagkapirang maimbod na mga lalaki, kaiba na si Jesus, para magbuhay nin mga gadan. Siyasaton ta an saro sa pagbuhay liwat na ginibo ni Jesus, arog kan mababasa sa Juan kapitulo 11.

10. Ano an nangyari kan naghuhulit si Jesus sa ibong kan Jordan, asin ano an ginibo niya? (Juan 11:1-3)

¹⁰ Basahon an Juan 11:1-3. Imahinara an nangyari sa Betania sa pagtatapos kan 32 C.E. May dayupot na mga amigo si Jesus sa baryong ini—si Lazaro asin an duwa niyang tugang na babayi, si Maria saka si Marta. (Luc. 10:38-42) Pero nagkahilang si Lazaro, asin haditon an saiyang mga tugang. Nagpadara sinda nin mensahe ki Jesus, na yaon sa ibong kan Jordan, mga duwang aldaw na lakaw hali sa Betania. (Juan 10:40) Nakakamundo, nagadan si Lazaro kan mga oras na makaabot ki Jesus an mensahero. Dawa ngani aram ni Jesus na nagadan pa sana an saiyang amigo, nagdanay siya duman nin duwa pang aldaw dangan nagpa-Betania na siya. Kaya kan mga oras na mag-abot si Jesus, apat nang aldaw na gadan si Lazaro. Gusto ni Jesus na gumibo nin sarong bagay na diyan makikinabang an saiyang mga amigo asin mapapamuraway an Diyos.—Juan 11:4, 6, 11, 17.

11. Anong leksiyon manungod sa pakikipag-amigo an manunudan ta sa istoryang ini?

¹¹ Makakanuod kita manungod sa pakikipag-amigo sa istoryang ini. Pag-isipan: Kan magpadara si Maria asin si Marta nin mensahe ki Jesus, dai ninda sinabi ki Jesus na magpa-Betania. Sinabi sana ninda na may hilang an namumutan niyang amigo. (Juan 11:3) Kan magadan si Lazaro, puwede man kutanang buhayon siya ni Jesus dawa nasa harayo. Minsan siring, pinili ni Jesus na magpa-Betania para dumanan an mga amiga niyang si Maria saka Marta. May amigo ka daw na andam na magtabang dawa dai mo sabihan? Kun siring, aram mo na maaasahan mo an tabang niya “sa mga panahon nin kasakitan.” (Tal. 17:17) Arog ni Jesus, lugod na magin arog kita kaiyan na amigo sa iba! Balikan ta ngunyan an istorya asin hilingon ta an sunod na nangyari.

12. Ano an ipinangako ni Jesus ki Marta, asin taano ta mapagtitiwalaan ini? (Juan 11:23-26)

¹² Basahon an Juan 11:23-26. Naaraman ni Marta na harani na si Jesus sa Betania. Naghidali siya para sabaton ini asin sinabi: “Kagurangnan, kun yaon ka lang digdi, dai kutana nagadan an tugang ko.” (Juan 11:21) Totoo, puwede kutanang pinaumayan niya si Lazaro. Pero naisip ni Jesus na gumibo nin sarong bagay na mas pambihira. Nangako siya: “Mabangon an saimong tugang.” Tinawan man niya si Marta nin urog pang dahilan para maniwala sa pangako niya sa pagsabing: “Ako an pagkabuhay liwat  asin an buhay.” Iyo, tinawan siya nin Diyos nin kapangyarihan na magbuhay nin gadan. Bago kaiyan, binuhay niya an sarong daragita na dai pa sana nahahaloy na mautsan asin binuhay niya man an sarong hoben na lalaki, na minalataw na kan aldaw man sanang magadan ini. (Luc. 7:11-15; 8:49-55) Pero makakaya niya daw buhayon an apat na aldaw nang gadan na an hawak nagpupuon nang malapa?

13. Arog kan mababasa sa Juan 11:32-35, ano an reaksiyon ni Jesus kan mahiling niya si Maria asin an iba pa na naghihiribi? (Hilingon man an ritrato.)

¹³ Basahon an Juan 11:32-35. Imahinara an sunod na nangyari. Si Maria, an saro pang tugang ni Lazaro, nagluwas para sabaton si Jesus. Inutro niya an sinabi kan tugang niya: “Kagurangnan, kun yaon ka lang digdi, dai kutana nagadan an tugang ko.” Grabe an kamunduan niya saka kan iba pa. Kan mahiling asin madangog niya an saindang hiribian, namundong marhay si Jesus. Huli sa mamumuton niyang pagmalasakit sa saiyang mga amigo, napaluha siya. Nasasabutan niya kun gurano kakulog pag nagadan an sarong mahal sa buhay. Sigurado nanggad na gustong-gusto niyang halion an kawsa kan saindang pagluha!

14. Ano an manunudan ta manungod ki Jehova sa reaksiyon ni Jesus sa paghibi ni Maria?

¹⁴ An reaksiyon ni Jesus sa paghibi ni Maria nagtutukdo sa sato na si Jehova sarong Diyos nin mamumuton na pagmalasakit. Taano ta masasabi ta iyan? Arog kan naaraman ta sa sinundan na artikulo, perpektong naarog ni Jesus an kaisipan asin pagmati kan saiyang Ama. (Juan 12:45) Kaya pag nababasa ta na si Jesus nakamati nin grabeng pagmalasakit sa saiyang nagmumundong mga amigo na huli kaiyan napaluha siya, makakapagkongklusyon kita na nahihirak man na marhay sato si Jehova pag nahihiling niya an satong mga luha nin kamunduan. (Sal. 56:8) Dai ka daw napapahiro kaiyan na magin mas dayupot pa sa satong mamumuton na Diyos?

15. Arog kan sinasabi sa Juan 11:41-44, ano an mga nangyari duman sa may lulubngan ni Lazaro? (Hilingon man an ritrato.)

¹⁵ Basahon an Juan 11:41-44. Nakaabot na si Jesus sa lulubngan ni Lazaro asin ipinahali niya an nakasarang gapo diyan. Pero sinabi ni Marta na siguradong namamarong na an bangkay. Nagsimbag si Jesus: “Bakong sinabi ko sa saimo na kun matubod ka mahihiling mo an kamurawayan nin Diyos?” (Juan 11:39, 40) Dangan  nagtangad si Jesus asin namibi sa atubangan kan mga tawo. Gusto niyang itao ki Jehova an gabos na onra sa sunod na mangyayari. Dangan nagkurahaw si Jesus: “Lazaro, lumuwas ka!” Asin nagluwas si Lazaro sa lulubngan! Ginibo pa sana ni Jesus an iniisip kan iba na imposible. c

16. Paano an istorya na mababasa sa Juan kapitulo 11 nagpapakusog kan satong pagtubod sa paglaom na pagkabuhay liwat?

¹⁶ An istorya na mababasa sa Juan kapitulo 11 nagpapakusog kan satong pagtubod sa paglaom na pagkabuhay liwat. Paano? Girumdumon an panuga ni Jesus ki Marta: “Mabangon an saimong tugang.” (Juan 11:23) Arog kan saiyang Ama, igwa si Jesus nin pagmawot asin kakayahan na utubon an panugang iyan. Ipinapahiling kan saiyang mga luha na igwa siya nin udok na pagmawot na halion an kagadanan asin an grabeng kamunduan na dara kaiyan. Asin kan pagluwas mismo ni Lazaro sa lulubngan, pinatunayan giraray ni Jesus na igwa siya nin kapangyarihan na magbuhay nin mga gadan. Pag-isipan man an ipinagirumdom ni Jesus ki Marta: “Bakong sinabi ko sa saimo na kun matubod ka mahihiling mo an kamurawayan nin Diyos?” (Juan 11:40) May marahay na mga dahilan kita para maniwala na magkakatotoo an panuga nin Diyos na pagkabuhay liwat. Minsan siring, ano an puwede tang gibuhon para magin mas totoong-totoo sato an paglaom na ini?

17. Ano an mga dapat tang tandaan pag binabasa ta an mga istorya sa Bibliya manungod sa pagkabuhay liwat?

¹⁷ Basahon asin hurop-hurupon an mga ginibong pagbuhay liwat kaidto. Sa Bibliya, igwa nin walong salaysay manungod sa mga tawong binuhay liwat digdi sa daga. d Puwede mo daw pag-adalan na marhay an kada saro sa mga iyan? Mantang ginigibo iyan, tandaan na sinda tunay na mga tawo—mga lalaki, mga babayi, asin mga aki. Maghanap nin mga leksiyon. Pag-isipan kun  paano ipinapahiling kan kada saro kaiyan an pagmawot asin kakayahan nin Diyos na magbuhay nin mga gadan. Urog sa gabos, hurop-hurupon an pinakaimportanteng pagkabuhay liwat—an pagbuhay liwat ki Jesus. Tandaan na an saiyang pagkabuhay liwat kinumpirmar nin ginatos na nakahiling mismo kaiyan asin nagtatao iyan sato nin masarig na basehan para sa satong pagtubod.—1 Cor. 15:3-6, 20-22.

18. Paano mo magagamit na marhay an satong mga kanta na manungod sa paglaom na pagkabuhay liwat? (Hilingon man an nota sa ibaba.)

¹⁸ Gamiton na marhay an “mga kantang pang-espirituwal” na nagsasambit kan paglaom na pagkabuhay liwat. e (Efe. 5:19) Tinatabangan kita kan mga kantang iyan na magin mas totoong-totoo sa sato an pagkabuhay liwat asin pinapakusog an satong pagtubod sa magayunon na paglaom na ini. Dangugon an mga iyan, praktison, asin pag-ulayan an kahulugan kan mga liriko sa saindong pampamilyang pagsamba. Itadom sa saindong isip asin puso an mga liriko. Dangan kun mameligro man an saimong buhay o magadanan ka nin sarong mahal sa buhay, tatabangan ka kan espiritu ni Jehova na magirumduman an mga kantang iyan asin mararanga saka mapapakusog ka kan mga iyan.

19. Ano an mga puwede tang imahinaron manungod sa pagkabuhay liwat? (Hilingon an kahon na “ Ano an Ihahapot Mo sa Sainda?”)

¹⁹ Gamiton an saimong imahinasyon. Tinawan kita ni Jehova nin abilidad na maimahinar an satong sadiri sa bagong kinaban. Sinabi nin sarong sister: “Haloy kong iniimahinar an sakong sadiri na yaon na ako sa bagong kinaban na garo napaparong ko na an hamot kan nagbubukad na mga rosas sa Paraiso.” Imahinara na nakikipagbistuhan ka sa maimbod na mga lalaki asin babayi kan mga panahon kan Bibliya. Siisay an gusto mong mabisto? Anong mga hapot an ihahapot mo saiya? Imahinara na makakaibanan mo giraray an mga mahal mo sa buhay na nagadan. Imahinara an mga mangyayari pag nagkahilingan na kamo—an inot nindong mga sasabihon, an saindong higot na pagkugusan, asin an saindong mga luha nin kaugmahan.

20. Ano an dapat na magin determinasyon ta?

²⁰ Nagpapasalamat nanggad kitang marhay sa panuga ni Jehova na pagkabuhay liwat! Makakasigurado kita na magkakatotoo an panuga niyang iyan, huling si Jehova igwa kan pagmawot asin kakayahan na utubon iyan. Lugod na magin determinado kita na padagos na pakusugon an satong pagtubod sa mahalagang marhay na paglaom na iyan. Kun gigibuhon ta iyan, mas lalo kitang magigin dayupot sa satong Diyos, na garo man sana nanunuga sa lambang saro sa sato, ‘Mabangon an saimong mahal sa buhay!’