1-2. Ano an kaipuhan tang gibuhon mantang hinahalat an bagong kinaban?

 NAGPAPASALAMAT nanggad kita sa panuga ni Jehova na sasalidahan niya an sistemang ini nin mga bagay nin sarong matanos na bagong kinaban. (2 Ped. 3:13) Maski ngani dai ta aram kun nuarin talaga maabot an bagong kinaban na iyan, ipinapahiling kan mga ebidensiya na dai na kita mahalat pa nin haloy.—Mat. 24:32-34, 36; Gibo 1:7.

² Minsan siring, gurano man kita kahaloy sa katotoohan, kaipuhan ta gabos na pakusugon an satong pagtubod sa panugang iyan. Taano? Huling puwedeng magluya dawa an makusog na pagtubod. Sa katunayan, inapod ni apostol Pablo an kawaran nin pagtubod na “an kasalan na madalion sanang minasabod sa sato.” (Heb. 12:1) Para malikayan na magluya an satong pagtubod, kaipuhan na regular tang pag-isipan na marhay an mga ebidensiya na nagpapatunay na an bagong kinaban madalion nang mag-abot.—Heb. 11:1.

3. Ano an pag-uulayan ta sa artikulong ini?

³ Sa artikulong ini, pag-uulayan ta an tulong paagi na puwede tang gibuhon para mapakusog ta an satong pagtubod sa ipinanuga ni Jehova na sarong bagong kinaban: (1) paagi sa paghurop-hurop sa pantubos, (2) paagi sa paghurop-hurop sa kapangyarihan ni Jehova, asin (3) paagi sa pagtao nin panahon sa espirituwal na mga aktibidad. Dangan pag-uulayan ta kun paano an mensahe ni Jehova ki Habakuk nakakapakusog kan satong pagtubod ngunyan. Pero pag-ulayan ta nguna an nagkapirang sitwasyon na tibaad inaagihan ta ngunyan kun sain kaipuhan an makusog na pagtubod sa ipinanugang bagong kinaban.

 MGA SITWASYON KUN SAIN KAIPUHAN AN MAKUSOG NA PAGTUBOD

4. Sa anong mga desisyon kaipuhan an makusog na pagtubod?

⁴ Aroaldaw, naggigibo kita nin mga desisyon kun sain kaipuhan an makusog na pagtubod. Halimbawa, naggigibo kita nin mga desisyon kun manungod sa satong mga kaiba-iba, libangan, edukasyon, pag-agom, pagkaigwa nin mga aki, asin sekular na trabaho. Marahay na haputon ta an satong sadiri: ‘An sako daw na mga pagpili nagpapahiling na sigurado ako na an sistemang ini temporaryo sana asin madali nang salidahan kan bagong kinaban nin Diyos? O an sako daw na mga pagpili impluwensiyado kan mga tawo na namumuhay na garo baga an kagadanan iyo an katapusan kan gabos?’ (Mat. 6:19, 20; Luc. 12:16-21) Makakagibo kita nin pinakamarahay na mga desisyon kun papakusugon ta an satong pagtubod na an bagong kinaban haranihon na.

5-6. Taano ta kaipuhan ta nin makusog na pagtubod sa panahon nin mga pagbalo? Iilustrar.

⁵ Napapaatubang man kita sa mga pagbalo kun sain kaipuhan an makusog na pagtubod. Tibaad mapaatubang kita sa persekusyon, grabeng hilang, o iba pang mga bagay na puwedeng makapadisganar sa sato. Sa inot, tibaad pagmati ta kayang-kaya tang tagalan an pagbalo. Pero mantang naghahaloy iyan—arog kan parating nangyayari sa mga pagbalo—kakaipuhanon ta an makusog na pagtubod para makatagal asin makapagpadagos kita sa paglilingkod ki Jehova na may kaugmahan.—Roma 12:12; 1 Ped. 1:6, 7.

⁶ Pag nag-aagi nin sarong pagbalo, tibaad mamati ta na an bagong kinaban ni Jehova dai na maabot. Buot sabihon daw kaiyan maluya an satong pagtubod? Dai man. Pag-isipan an sarong ilustrasyon. Sa panahon nin halawig na tig-uran, tibaad mamati ta na dai na mapahiling an saldang. Alagad minasirang man giraray an saldang. Sa kaparehong paagi, kun nakakamati kita nin grabeng pangluluya nin buot, tibaad mamati tang an bagong kinaban dai na maabot. Minsan siring, kun makusog an satong pagtubod, aram tang an mga panuga nin Diyos mauutob. (Sal. 94:3, 14, 15; Heb. 6:17-19) Huli sa kumpiyansang iyan, padagos na magigin panginot sa satong buhay an pagsamba ki Jehova.

7. Anong sabuot an dapat tang likayan?

⁷ Pag-isipan an saro pang aspekto kun sain kaipuhan an makusog na pagtubod—an gibuhon na paghuhulit. Para sa dakul na tawo na nahuhulitan ta, an ‘maugmang bareta’ manungod sa maabot na bagong kinaban nin Diyos sobra man kagayon para paniwalaan. (Mat. 24:14; Ezek. 33:32) Dai ta nanggad pagtugutan an saindang mapagdudang sabuot na makaimpluwensiya sa sato. Para malikayan iyan, dapat na padagos tang pakusugon an satong pagtubod. Pag-ulayan ta an tulong paagi kun paano ta iyan magigibo.

HUROP-HURUPON AN PANTUBOS

8-9. Paano an paghurop-hurop sa pantubos makakapakusog kan satong pagtubod?

⁸ An sarong paagi na mapapakusog ta an satong pagtubod iyo an paghurop-hurop sa pantubos. An pantubos sarong garantiya na magkakatotoo an mga panuga nin Diyos. Kun pag-iisipan tang marhay kun taano ta itinao an pantubos asin kun ano an kalabot diyan, mapapakusog ta an satong pagtubod na an panuga nin Diyos na buhay na daing katapusan sa sarong marahayon na kinaban siguradong mauutob. Taano ta nasabi ta iyan?

⁹ Buweno, ano an kalabot sa pantubos? Isinugo ni Jehova an saiyang namumutan na marhay na panganay na Aki, an saiyang pinakadayupot na kaiba-iba, hali sa langit para ipangaki bilang sarong perpektong tawo. Mantang nasa daga, tinagalan ni Jesus an gabos na klase nin kadipisilan. Dangan nagsakit siya asin nag-agi nin makulugon na kagadanan. Dakulaon nanggad na  halaga an ibinayad ni Jehova! Kun para sana iyan sa sarong mas marahay pero haliputon man sanang buhay, nungka kutanang itinugot kan satong mamumuton na Diyos na magsakit asin magadan an saiyang Aki. (Juan 3:16; 1 Ped. 1:18, 19) Huli sa dakulaon na halaga na ibinayad ni Jehova, sisiguraduhon niyang magkakatotoo an buhay na daing katapusan sa bagong kinaban.

HUROP-HURUPON AN KAPANGYARIHAN NI JEHOVA

10. Uyon sa Efeso 3:20, ano an kayang gibuhon ni Jehova?

¹⁰ An ikaduwang paagi na mapapakusog ta an satong pagtubod iyo an paghurop-hurop sa kapangyarihan ni Jehova. Igwa siya nin kapangyarihan na utubon an gabos na ipinanuga niyang gigibuhon niya. Totoo, dakul sa ngunyan an nag-iisip na an panugang buhay na daing katapusan sa sarong bagong kinaban garo imposibleng mangyari. Pero parating nanunuga si Jehova nin mga bagay na nungkang magigibo nin mga tawo. Kun sabagay, siya an Diyos na Makakamhan sa Gabos. (Job 42:2; Mar. 10:27) Kaya dai nanggad kita mangalas kun manuga siya nin ekstraordinaryong mga bagay!—Basahon an Efeso 3:20.

11. Magtao nin halimbawa nin saro sa ekstraordinaryong mga panuga nin Diyos. (Hilingon an kahon na “ Nagkapirang Ekstraordinaryong mga Panuga na Nautob.”)

¹¹ Pag-isipan an pira sa garo imposibleng mga bagay na ipinanuga ni Jehova sa saiyang banwaan kaidto. Sinigurado niya ki Abraham saka ki Sara na magkakaigwa sinda nin sarong aking lalaki dawa gurang na sinda. (Gen. 17:15-17) Sinabi niya man ki Abraham na magigin pagsadiri kan mga magigin gikan niya an daga nin Canaan. Garo baga imposible nanggad na magkatotoo an panugang iyan durante kan dakul na taon na an mga gikan ni Abraham, an mga Israelita, mga uripon sa Ehipto. Pero nagkatotoo iyan. Dangan kan huri, sinabi ni Jehova na magkakaigwa nin sarong aki an may edad nang si Elizabeth. Sinabi man ni Jehova ki Maria, na sarong birhen, na ipapangaki kaini an Saiya mismong Aking lalaki, na an pag-abot patiinot nang ipinanuga ni Jehova rinibong taon bago kaiyan sa hardin nin Eden—saro pang panuga na nautob!—Gen. 3:15.

12. Ano an sinisigurado sa sato kan Josue 23:14 asin Isaias 55:10, 11 manungod sa kapangyarihan ni Jehova?

¹² Mapapakusog ta an satong pagtubod sa kapangyarihan ni Jehova na ipaabot an sarong bagong kinaban paagi sa paghurop-hurop kan mga ginibo asin inutob niyang mga panuga. (Basahon an Josue 23:14; Isaias 55:10, 11.) Makakatabang iyan sa sato na magin mas andam na tabangan an iba na masabutan na an ipinanugang bagong kinaban bakong pangaturugan o uruistorya sana. Mapadapit sa bagong mga langit asin bagong daga, sinabi mismo ni Jehova: “An mga tataramon na ini maimbod asin totoo.”—Kap. 21:1, 5.

MAGIN SIBOT SA ESPIRITUWAL NA MGA AKTIBIDAD

13. Paano an mga pagtiripon kan kongregasyon puwedeng makapakusog kan satong pagtubod? Ipaliwanag.

¹³ An ikatulong paagi na mapapakusog ta an satong pagtubod iyo an pagtao nin panahon sa espirituwal na mga aktibidad. Halimbawa, pag-isipan kun paano kita nakikinabang sa mga pagtiripon kan kongregasyon. Si Anna, na nakapaglingkod na nin pirang dekada sa manlain-lain na klase nin bilog na panahon na paglilingkod, nagsabi: “An mga pagtiripon pinapagdanay an sakong pagtubod na matibay na nakaangkla. Maski ngani an ispiker bakong gayong mahusay sa pagtutukdo o mayo man nin nasabing bago sako, sa parati nakakadangog ako nin sarong bagay na nakakatabang sa sako na mas masabutan pa an sarong katotoohan sa Bibliya, asin napapakusog kaiyan an pagtubod ko.” b Daing duda na naaapresyar ta man an mga nakakapakusog sa pagtubod na mga  komento kan mga nag-aatender sa pagtiripon.—Roma 1:11, 12; 10:17.

14. Paano an ministeryo nakakapakusog kan satong pagtubod?

¹⁴ Napapakusog ta man an satong pagtubod pag nakikikabtang kita sa ministeryo sa langtad. (Heb. 10:23) Si Barbara, na labing 70 taon nang naglilingkod ki Jehova, nagsabi: “Napapakusog talaga pirmi kan paghuhulit an pagtubod ko. Mantang mas ipinapakipag-ulay ko sa iba an manungod sa magagayon na panuga ni Jehova, mas nagigin buhay man asin makusog an sakong pagtubod.”

15. Paano an personal na pag-adal nakakapakusog kan satong pagtubod? (Hilingon man an mga ritrato.)

¹⁵ Pag-isipan an saro pang espirituwal na aktibidad na nakakapakusog kan satong pagtubod: an personal na pag-adal. Narisa ni Susan na nakakatabang saiya an pagkaigwa nin iskedyul sa pag-adal. Sinabi niya: “Pag Domingo, nag-aandam ako para sa sunod na semanang Pag-adal sa Torrengbantayan. Pag Lunes saka Martes, pinag-aandaman ko an para sa midweek na pagtiripon. Ginagamit ko man an ibang mga aldaw para sa personal study project ko.” Paagi sa pagsunod ni Susan sa saiyang regular na iskedyul nin pag-adal, padagos niyang napapakusog an saiyang pagtubod. Nahiling ni Irene, na mga pirang dekada nang naglilingkod sa world headquarters, na an pag-adal manungod sa mga propesiya sa Bibliya nakakapakusog kan saiyang pagtubod. Sinabi niya: “Napapahanga talaga ako na maaraman na an mga propesiya ni Jehova nautob sagkod sa kasadit-saditing detalye.” c

“SIGURADONG MAUUTOB IYAN”

16. Taano ta an asigurasyon ni Jehova ki Habakuk igwa nin kahulugan para sa sato ngunyan? (Hebreo 10:36, 37)

¹⁶ An pira sa mga lingkod ni Jehova haloy nang naghahalat sa katapusan kan sistemang ini nin mga bagay. Sa pagmansay nin tawo, an kautuban kan panuga nin Diyos garo baga naaatraso. Huling nasasabutan ni Jehova an pagmating iyan, inasigurar niya an propetang si  Habakuk: “An bisyon para pa sa itinalaan na panahon kaiyan, asin naghihidali iyan pasiring sa katapusan kaiyan, asin dai iyan maputik. Dawa pa kun maatraso iyan, padagos mong halaton iyan! Huli ta siguradong mauutob iyan. Dai iyan mahuhuri!” (Hab. 2:3) An asigurasyon daw na iyan nin Diyos para lang ki Habakuk? O an Saiyang mga tataramon igwa nin kahulugan para sa sato ngunyan? Pinasabngan si apostol Pablo na ipanungod an mga tataramon na iyan sa mga Kristiyano na naghahalat sa bagong kinaban. (Basahon an Hebreo 10:36, 37.) Iyo, dawa ngani garo baga naaatraso an panuga sa sato na ililigtas kita, “siguradong mauutob iyan. Dai iyan mahuhuri!”

17. Paano inaplikar kan sarong sister an konseho na itinao ni Jehova ki Habakuk?

¹⁷ Inaplikar kan dakul na lingkod ni Jehova an konseho na “padagos [na] halaton iyan”—dawa pa sa laog nin dakul na dekada. Halimbawa, si Louise. Nagpuon siyang maglingkod ki Jehova kan 1939. Sinabi niya: “Kan panahon na idto, huna ko maabot na an Armagedon bago ako maggradwar sa hayskul. Pero dai iyan nangyari. Sa paglihis nin mga taon, nahiling ko na nakakatabang an pagbasa kan inaapod kong ‘mga istorya nin paghalat’—an mga istorya sa Bibliya manungod ki Noe, Abraham, Jose, asin sa iba pa na naghalat nin haloy na panahon bago ninda inako an ipinanugang balos hali ki Jehova. An padagos na paghalat nakatabang sa sako asin sa iba na magpokus na talagang haranihon na an bagong kinaban.” Minauyon nanggad diyan an dakul na iba pa na haloy nang nagsasamba ki Jehova!

18. Paano an pag-obserbar sa mga linalang makakapakusog kan satong pagtubod sa maabot na bagong kinaban?

¹⁸ Totoo, dai pa nag-aabot an bagong kinaban. Minsan siring, mangnuhon an pirang bagay na yaon ngunyan—mga bituon, mga kahoy, mga hayop, asin an mga kapwa mo tawo. Mayong magdududa na an gabos na bagay na iyan totoo, dawa ngani may panahon kaidto na dai pa nag-eeksister an mga iyan. Igwa kan mga iyan ngunyan dahil linalang iyan gabos ni Jehova. (Gen. 1:1, 26, 27) Katuyuhan man kan satong Diyos na mag-establisar nin sarong bagong kinaban. Uutubon niya an katuyuhan niyang iyan. Sa bagong kinaban, an mga tawo magkakaigwa nin buhay na daing katapusan asin perpektong salud. Sa itinalaan na panahon nin Diyos, magigin totoong-totoo an bagong kinaban kun paanong totoong-totoo an uniberso sa palibot niyato ngunyan.—Isa. 65:17; Kap. 21:3, 4.

19. Paano mo mapapakusog an saimong pagtubod?

¹⁹ Miyentras tanto, gamiton an gabos na oportunidad na igwa ka para pakusugon an saimong pagtubod. Patalubuon an pag-apresyar sa pantubos. Hurop-hurupon an kapangyarihan ni Jehova. Magin sibot sa espirituwal na mga aktibidad. Sa paggibo kaiyan, puwede kang mapabilang sa mga magmamana “kan mga panuga huli sa pagtubod asin pakatios.”—Heb. 6:11, 12; Roma 5:5.