1. Taano ta nagkokomento kita sa mga pagtiripon?

 TAANO ta nag-aatender kita sa mga pagtiripon kan kongregasyon? Panginot na, para umawon si Jehova. (Sal. 26:12; 111:1) Nag-aatender man kita sa mga pagtiripon tanganing mapakusog ta an lambang saro sa masakit na mga panahon na ini. (1 Tes. 5:11) Pag nagtataas kita nin kamot para magkomento, nagigibo ta an duwang bagay na iyan.

2. Sa satong mga pagtiripon, sa anong mga kabtang kita may oportunidad na magkomento?

² Kada semana, may oportunidad kita na magkomento sa satong mga pagtiripon. Halimbawa, sa puro kan semana, puwede kitang magpartisipar sa Pag-adal sa Torrengbantayan. Sa mga pagtiripon sa tahaw kan semana, puwede kitang magkomento sa Espirituwal na Kayamanan, sa Pag-adal sa Bibliya kan Kongregasyon, asin sa iba pang mga kabtang na may pagtukar.

3. Taano ta tibaad madipisilan kitang magkomento, asin paano puwedeng makatabang an Hebreo 10:24, 25?

³ Gusto ta gabos na umawon si Jehova asin pakusugon an satong mga kapwa parasamba. Pero pag-abot sa pagkomento, tibaad magin dipisil iyan para sa sato. Tibaad ninenerbiyos kita na magkomento, o tibaad gustong-gusto ta kutana na parating magkomento pero bihira kitang maapod. Ano an makakatabang sa sato? Matatabangan kita kan surat ni apostol Pablo sa mga Hebreo na masimbag iyan. Sa pagpaliwanag niya kan kahalagahan kan pagtiripon, sinabi niya na dapat tang isaisip  an ‘pagpakusog sa lambang saro.’ (Basahon an Hebreo 10:24, 25.) Pag iniisip ta na puwede tang mapakusog an iba dawa sa satong simpleng kapahayagan nin pagtubod, dai kita gayong ninerbiyuson na magkomento. Asin kun bihira kitang maapod, puwede tang ikaugma na an iba sa kongregasyon nagkaigwa nin oportunidad na magkomento.—1 Ped. 3:8.

4. Ano an tulong punto na pag-uulayan ta sa artikulong ini?

⁴ Sa artikulong ini, inot tang pag-uulayan kun paano ta mapapakusog an lambang saro kun yaon kita sa sadit na kongregasyon kun sain limitado an bilang kan mga nagkokomento. Dangan, pag-uulayan ta kun paano ta mapapakusog an lambang saro kun yaon kita sa dakulang kongregasyon kun sain dakul an nagtataas nin kamot para magkomento. Panghuri, pag-uulayan ta an mga paagi para an laog kan satong mga komento magin tunay na nakakapakusog.

5. Paano ta puwedeng mapakusog an lambang saro pag dikit an nag-aatender?

⁵ Sa sadit na kongregasyon o grupo, dikit lang an pagpipilian kan konduktor para magkomento. Kun minsan, tibaad kaipuhan niya pang maghalat nin dikit bago may magtaas nin kamot. Dahil diyan garo baga nakakalangkag an pagtiripon, asin dai iyan nakakapakusog. Ano an puwede mong gibuhon? Magin andam na parating magtaas nin kamot. Paagi kaiyan, tibaad mapahiro mo an iba na mas parating magpartisipar.

6-7. Paano ta puwedeng mabawasan an satong nerbiyos sa pagkomento?

⁶ Paano kun iniisip mo pa sanang magkomento pignenerbiyos ka na? Dakul an nakakamati nin arog kaiyan. Pero, para magin mas nakakapakusog sa saimong mga tugang, taano ta dai maghanap nin mga paagi para mabawasan an nerbiyos mo sa pagkomento? Paano mo iyan puwedeng gibuhon?

⁷ Tibaad makatabang saimo an pagrepaso kan nagkapirang suhestiyon na ipinublikar sa nakaaging mga isyu kan An Torrengbantayan. b Halimbawa, mag-andam na marhay. (Tal. 21:5) Pag mas pamilyar ka sa materyal na pag-aadalan, magigin mas pasil man sa saimo na magtaas nin kamot para magkomento. Siring man, gibuhon na halipot an saimong mga komento. (Tal. 15:23; 17:27) An halipot na simbag dai gayong nakakanerbiyos. An halipot na komento, na posibleng saro o duwa sanang sentence, tibaad mas madali pa nganing masabutan kan mga tugang kisa sa haralabang komento na kadakul nin punto. Paagi sa pagtao nin halipot na komento gamit an sadiri mong mga tataramon, maipapahiling mo na nag-andam kang marhay asin na malinaw mong nasasabutan an pinag-aadalan.

8. Paano minamansay ni Jehova an paggibo ta kan satong pinakamakakaya?

⁸ Paano kun pinurbaran mo na an nagkapira sa mga suhestiyon na ini pero grabe pa man giraray an nerbiyos mo pag nagkokomento ka nin labi sa saro o duwang beses? Makakasigurado ka na pinapahalagahan ni Jehova an saimong sinserong paghihinguwa na gibuhon an makakaya mo. (Luc. 21:1-4) An paggibo kan satong pinakamakakaya dai nangangahulugan na papasakitan ta an sadiri ta. (Fil. 4:5) Determinaran kun ano an kaya mong gibuhon, magbugtak nin pasuhan para magibo iyan, asin mamibi na tawan ka nin kalmadong puso. Sa primero, puwede mong magin pasuhan na makapagtao nin halipot na komento.

9. Taano ta tibaad madipisilan kitang magkomento pag yaon kita sa dakulang kongregasyon?

⁹ Kun dakul an parahayag sa kongregasyon nindo, tibaad ibang kadipisilan man an mapaatubang saimo. Tibaad dakulon na tugang an nagtataas nin kamot kaya sa parati dai ka naaapod. Halimbawa si Danielle, na gustong-gusto talaga na magparakomento sa mga pagtiripon. c Minamansay niya iyan na kabtang kan saiyang pagsamba, sarong paagi para pakusugon an iba pati man an saiyang pagtubod sa mga katotoohan sa Bibliya. Pero kan maglipat siya sa mas dakulang kongregasyon, bihira na sana siyang maapod—minsan ngani, dai talaga siya naaapod. “Nakakadisganar,” an sabi niya. “Pagmati ko pinalampas ko an sarong pribilehiyo. Pag pauruutro iyan na nangyayari, napapaisip lugod ako na ’baad tinutuyo iyan.”

10. Ano an puwede tang gibuhon para mas magkaigwa kita nin tsansa na makapagkomento?

¹⁰ Namati mo man daw an namatian ni Danielle? Kun iyo, tibaad maisip mo na dai na lang magkomento asin magdangog na sana sa pagtiripon. Pero dai ka magsuko. Ano an puwede mong gibuhon? Tibaad makatabang kun mapreparar ka nin nagkapirang komento sa kada pagtiripon. Sa siring kun dai ka tulos maapod, igwa ka pa nin ibang oportunidad na magkomento mantang nagpapadagos an pagtiripon. Pag nag-aandam para sa Pag-adal sa Torrengbantayan, pag-isipan kun paano an kada parapo konektado sa tema kan artikulo. Kun gigibuhon mo iyan, posibleng marhay na may maikomento ka sa bilog na pagtukar. Dugang pa, puwede mo man na pag-andaman na komentuhan an mga parapo na nagtutukar nin mas hararom na mga katukduan sa Bibliya na mas dipisil ipaliwanag. (1 Cor. 2:10) Taano? Huling tibaad dikit sana an magtaas nin kamot sa parteng iyan kan pinag-aadalan. Pero paano kun, dawa sinunod mo na an mga suhestiyon na iyan, dai ka pa man giraray natatawan nin oportunidad na magkomento pagkatapos nin nagkapirang pagtiripon? Puwede kang magdulok sa konduktor bago an pagtiripon asin sabihon saiya kun arin na hapot an gusto mong komentuhan.

11. Dinadagka kita kan Filipos 2:4 na gibuhon an ano?

 ¹¹ Basahon an Filipos 2:4. Paagi sa pasabong nin Diyos, dinagka ni apostol Pablo an mga Kristiyano na tawan nin atensiyon an kapakanan kan iba. Paano ta maiaaplikar an konsehong iyan sa mga pagtiripon? Paagi sa paggirumdom na an iba, arog ta, gusto man na magpartisipar.

12. Ano an sarong paagi na mapapakusog ta an iba sa mga pagtiripon? (Hilingon man an ritrato.)

¹² Pag-isipan an bagay na ini. Pag nakikipag-ulay ka sa saimong mga amigo, ika na sana daw an nagpaparataram kaya dikit na sana an pagkakataon kan iba na magtaram? Siyempre dai! Gusto mo na umiba man sinda sa pag-urulay. Sa kaagid na paagi, sa mga pagtiripon, gusto tang dakul an makapagkomento sagkod na mapupuwede. Sa katunayan, an saro sa pinakamarahay na paagi na mapapakusog ta an mga tugang iyo an pagtao sainda nin pagkakataon na ipahayag an saindang pagtubod. (1 Cor. 10:24) Pag-ulayan niyato kun paano ta iyan magigibo.

13. Ano an puwede tang gibuhon para dakul an makapagkomento?

¹³ Puwede tang pagdanayon na haralipot sana an satong mga komento, sa siring dakul an makakapagpartisipar huling may oras pa. An mga elder asin iba pang eksperyensiyadong mga parahayag puwedeng magpahiling nin marahay na halimbawa. Dawa pag nagtatao ka nin halipot na komento, likayan na magsambit nin dakulon na punto. Pag haros maubos mo nang komentuhan an gabos na punto sa parapo, dikit na sana an matatada para sa iba. Halimbawa, sa parapong ini duwang suhestiyon an itinao—pagdanayon na haralipot an mga komento saka likayan na magsambit nin dakulon na punto. Kun ika an inot na inapod para magkomento sa parapong ini, ano daw kun saro sana sa mga punto digdi an ikomento mo?

14. Ano an makakatabang sa sato sa pagdedesisyon kun gurano kita kaparating mataas nin kamot? (Hilingon man an ritrato.)

¹⁴ Gamiton an marahay na paghusgar pag nagdedesisyon kun gurano ka kaparating makomento. Kun parati kitang nagtataas nin  kamot, tibaad mapiritan an nagkokondukta na pauruutro kitang apudon dawa ngani dai pa natatawan nin oportunidad an iba na makapagkomento. Puwede iyan na makapadisganar sa iba na magtaas kan saindang kamot.—Ecl. 3:7.

15. (a) Ano an dapat na magin sabuot niyato pag dai kita naapod para magkomento (b) Paano an nagkokondukta makakapahiling nin konsiderasyon sa gabos? (Hilingon an kahon na “ Kun Ika an Nagkokondukta.”)

¹⁵ Pag dakul na parahayag an nagtataas nin kamot durante kan pag-adal, tibaad dai kita makapagkomento nin arog kaparati kan gusto ta. Kun minsan, tibaad dai pa ngani talaga kita maapod kan nagkokondukta. Puwedeng nakakadisganar iyan, pero dapat tang hinguwahon na dai iyan pagpersonalon.—Ecl. 7:9.

16. Paano ta puwedeng pakusugon an iba na nagkomento?

¹⁶ Kun dai ka makapagkomento nin arog kaparati kan gusto mo, taano ta dai magdangog na marhay mantang nagkokomento an iba dangan pagkatapos kan pagtiripon komendaran mo sinda sa saindang komento? An komendasyon mo sa saimong mga tugang puwedeng magin nakakapakusog sa sainda arog kan itatao mo kutang mga komento. (Tal. 10:21) An pagtao nin komendasyon saro pang paagi na mapapakusog ta an lambang saro.

17. (a) Paano matatabangan kan mga magurang an saindang mga aki na maghanda nin mga komento na angay sa edad ninda? (b) Uyon sa video, ano an apat na lakdang sa paghanda nin komento? (Hilingon man an nota sa ibaba.)

¹⁷ Paano ta pa puwedeng mapakusog an lambang saro sa satong mga pagtiripon? Kun saro kang magurang, tabangan an saimong  mga aki na makapaghanda nin mga komento na angay sa edad ninda. (Mat. 21:16) Kun minsan, seryosong mga bagay an pinag-uulayan sa pag-adal, arog kan problemang pang mag-agom o mga isyu sa moral. Pero posibleng may saro o duwang parapo diyan na puwedeng komentuhan nin sarong aki. Saro pa, tabangan an saimong mga aki na masabutan kun taano ta puwedeng dai sinda maapod sa kada magtaas sinda nin kamot. Makakatabang iyan sa sainda na dai madisganar pag iba an naapod.—1 Tim. 6:18. d

18. Paano ta malilikayan na madara an atensiyon sa satong sadiri pag nagkokomento? (Talinhaga 27:2)

¹⁸ Gabos kita puwedeng makapaghanda nin nakakapakusog na mga komento na makakatao nin onra ki Jehova asin makakapakusog sa satong mga kapwa Kristiyano. (Tal. 25:11) Dawa ngani puwede kitang magtao kun minsan nin halipot na personal na eksperyensiya, likayan tang magtaram nin sobra manungod sa satong sadiri. (Basahon an Talinhaga 27:2; 2 Cor. 10:18) Imbes, hinihinguwa tang isentro an atensiyon ki Jehova, sa saiyang Tataramon, asin sa saiyang banwaan sa kabilugan. (Kap. 4:11) Siyempre, kun an hapot sa sarong parapo nagdadagka sato na magtao kita nin personal na ekspresyon, angay sana na gibuhon iyan. An sarong halimbawa kaiyan mahihiling sa sunod na parapo kan artikulong ini.

19. (a) Ano an magigin resulta kun mapahiling kita nin konsiderasyon sa gabos na nag-aatender? (Roma 1:11, 12) (b) Ano an personal na naapresyar mo manungod sa pagkomento sa mga pagtiripon?

¹⁹ Dawa ngani mayo man nin istriktong mga susundon sa kun paano matao nin komento, gabos kita puwedeng maghinguwa na magin nakakapakusog an satong pagpartisipar. Puwedeng mangahulugan iyan nin mas parating pagkomento. O puwedeng mangahulugan man iyan nin pagigin kontento sa mga oportunidad ta na magkomento asin pagigin maugma na pinapahalagahan man kan iba an pribilehiyong magkomento arog kan pagpapahalaga ta diyan. Paagi sa pagpokus sa kapakanan kan iba sa mga pagtiripon kan kongregasyon, gabos kita magigin maugma na “magpakinurusog-kusugan.”—Basahon an Roma 1:11, 12.