1. Ano an espirituwal na paraiso, asin ano an dapat na determinado tang gibuhon?

 IGWA nin sarong paraiso sa daga ngunyan na diyan sibot an mga tawo sa paggibo nin marahay na mga bagay. An minilyon na tawong yaon diyan nakakamati nin tunay na katuninungan. An mga nakalaog na sa paraisong iyan determinadong magdanay diyan. Gusto man nindang makaibanan an pinakadakul na tawong posible sa espesyal na kamugtakan na iyan. Ano iyan? An espirituwal na paraiso! a

2. Ano an kahanga-hanga manungod sa espirituwal na paraiso?

² Sa kahanga-hangang paagi, naggibo si Jehova nin sarong simbolikong lugar na diyan igwa nin katuninungan an saiyang mga lingkod dawa yaon sinda sa kinaban ni Satanas na pano nin pagkaungis, karatan, asin peligro. (1 Juan 5:19; Kap. 12:12) Nahihiling kan satong mamumuton na Diyos an maraot na epekto kan sistemang ini nin mga bagay kaya itinatao niya sa sato an tabang na kaipuhan para maingatan kita asin umuswag sa espirituwal. Ilinaladawan kan saiyang Tataramon an espirituwal na paraiso na sarong ligtas na “pailihan” asin “hardin na pirming nababaribian.” (Isa. 4:6; 58:11) Sa tabang ni Jehova, an mga nag-iistar sa paraisong ini nakakamati nin kaugmahan asin katiwasayan sa masakit na mga huring aldaw na ini.​—Isa. 54:14; 2 Tim. 3:1.

3. Paano nautob kaidto an Isaias kapitulo 65?

³ Paagi ki propeta Isaias, ilinadawan ni Jehova kun ano an magigin kamugtakan kan mga maistar sa espirituwal na paraiso. Mababasa iyan sa kapitulo 65 kan Isaias, na inot na nautob kan 537 B.C.E. Kan panahon na iyan, an nagsulsol na mga Judio pinatalingkas sa pagkabihag sa Babilonya asin nagbaralik sa saindang dagang tinubuan. Binendisyunan ni Jehova an saiyang banwaan  asin tinabangan niya sinda na pagayunon giraray an gabang siyudad nin Jerusalem asin itugdok liwat an templo tanganing magin sentro kan tunay na pagsamba sa Israel.​—Isa. 51:11; Zac. 8:3.

4. Paano nautob sa modernong panahon an Isaias kapitulo 65?

⁴ An panduwang kautuban kan propesiya ni Isaias nagpuon kan 1919 C.E. kan an mga lingkod ni Jehova sa modernong panahon pinatalingkas sa pagkabihag sa Dakulang Babilonya. Dangan luway-luway nang uminuswag asin luminakop sa bilog na daga an espirituwal na paraiso. An maiigot na parabalangibog kan Kahadian nagbilog nin dakul na mga kongregasyon asin nagkaigwa nin espirituwal na mga bunga. An mga lalaki asin babayi na dating mga bayolente asin imoral “[isinulot] an bagong personalidad na linalang sigun sa kabutan nin Diyos.” (Efe. 4:24) Siyempre, dakul sa mga bendisyon na ilinadawan ni Isaias literal na mauutob sa maabot na bagong kinaban. Pero dawa ngunyan, naeeksperyensiyahan ta na an abundang mga pakinabang kaiyan. Hilingon ta an mga pakinabang na dara sa sato kan espirituwal na paraiso asin kun taano ta dai ta dapat nuarin man iyan pagbayaan.

AN KAMUGTAKAN KAN MGA NASA ESPIRITUWAL NA PARAISO

5. Arog kan ipinanuga sa Isaias 65:​13, ano an naeeksperyensiyahan ta sa espirituwal na paraiso?

⁵ Abunda asin nagiginhawahan. Ipinapahiling kan propesiya ni Isaias an malinaw na pagkakalain kan buhay kan mga nasa laog asin kan mga nasa luwas kan espirituwal na paraiso. (Basahon an Isaias 65:13.) Abundang itinatao ni Jehova an espirituwal na mga pangangaipo kan mga nagsasamba sa saiya. Igwa kita kan saiyang banal na espiritu, kan saiyang nasusurat na Tataramon, asin kan abundang espirituwal na kakanon tanganing kita ‘magkarakan, mag-irinom, asin mag-urugma.’ (Ikumparar an Kapahayagan 22:17.) Kabaliktaran nanggad iyan kan mga nasa luwas kan espirituwal na paraiso, na ‘nagkakagurutom, nagkakaparaha, asin nagkakasurupog.’ An saindang espirituwal na mga pangangaipo dai napapaniguan.​—Amos 8:11.

6. Paano ilinadawan kan Joel 2:​21-24 an satong espirituwal na mga probisyon, asin paano kita nakikinabang diyan?

⁶ Sa propesiya ni Joel, ginamit niya an panginot na mga pangangaipo arog kan tipasi, arak, asin lanang oliba para ipahiling na bulaos na itinatao ni Jehova sa Saiyang banwaan an mga kaipuhan ninda, kaiba na an espirituwal na kakanon. (Joel 2:​21-24) Halimbawa, itinao Niya sa sato an Bibliya asin mga publikasyon na basado sa Bibliya, an satong website, pati man an satong mga pagtiripon, asembleya, asin kumbensiyon. Puwede kitang makinabang sa espirituwal na mga probisyon na ini aroaldaw, kaya bilang resulta, padagos kitang nagkukusog asin nagiginhawahan.

7. Taano ta igwa kita nin “marahay na kamugtakan kan puso”? (Isaias 65:14)

⁷ Maugma asin kontento. An banwaan nin Diyos “maugmang makururahaw” huli sa labi-labing pasasalamat. (Basahon an Isaias 65:14.) Dahil sa nakakapakusog na mga katotoohan asin nakakarangang mga panuga sa Tataramon nin Diyos saka sa siguradong paglaom huli sa atang na pantubos ni Cristo, igwa kita nin “marahay na kamugtakan kan puso.” Pag pinag-uulayan ta an mga bagay na ini kaiba kan satong mga tugang, namamati ta nanggad an tunay na kaugmahan!—Sal. 34:8; 133:​1-3

8. Ano an duwang panginot na mahihiling sa espirituwal na paraiso?

⁸ An pagkamuot asin pagkasararo kan banwaan ni Jehova iyo an duwang panginot na mahihiling sa espirituwal na paraiso. An ‘bugkos na ini nin pagkasararo’ sa ngunyan nagtatao sa sato nin patanaw kan magigin buhay sa bagong kinaban, na duman lalo pang mahihiling sa mga lingkod ni Jehova an pagkamuot asin pagkasararo. (Col. 3:14) Sinabi kan sarong sister an narisa niya sa mga lingkod ni Jehova kan inot niya sindang mabisto:  “Dai ko aram kun paano magin maugma, dawa pa kaibanan ko an sakong pamilya. Sa mga Saksi ni Jehova ko kainot-inuting nahiling an tunay na pagkaminuruot-muutan.” Kun gusto kan siisay man na magin tunay na maugma asin kontento, kaipuhan na yaon siya sa espirituwal na paraiso. Ano man an isipon kan kinaban na ini sa mga lingkod ni Jehova, sinda igwa nin onorableng pangaran, o reputasyon, sa atubangan ni Jehova asin sa gabos na nagsasamba sa saiya sa bilog na uniberso.​—Isa. 65:15.

9. Ano an ipinapanuga kan Isaias 65:​16, 17 manungod sa mga problema sa buhay?

⁹ Tiwasay asin kalmado. Sinasabi sa Isaias 65:14 na an mga habong maglaog sa espirituwal na paraiso ‘maaragrangay huli sa kakulugan nin puso asin matarangis huli sa nalugadan na espiritu.’ Pero ano an mangyayari sa mga bagay na nagdadara nin kulog asin pagsakit sa mga lingkod nin Diyos? Maabot an panahon na an mga iyan ‘malilingawan asin matatago sa mga mata nin Diyos.’ (Basahon an Isaias 65:​16, 17.) Hahalion ni Jehova an satong mga problema, asin pag-abot nin panahon an kulog na epekto kaiyan dai na nuarin man magigirumduman.

10. Taano ta masasabi mong sarong bendisyon na makaibanan an satong mga tugang? (Hilingon man an ritrato.)

¹⁰ Ngunyan pa sana, magayon na sa pagmati pag yaon kita sa satong Kristiyanong mga pagtiripon, na diyan pamugtak an buot ta asin nalilingawan nguna an mga problema sa maraot na kinaban na ini. Nakakakontribwir kita sa katiwasayan kan satong espirituwal na paraiso pag ipinapahiling ta an pagkamuot, kagaya-gayahan, katuninungan, kabuutan, asin kahuyuan na kaiba sa bunga kan espiritu nin Diyos. (Gal. 5:​22, 23) Dakulaon nanggad na bendisyon na mapabilang sa organisasyon nin Diyos! Asin pag-abot nin panahon, mahihiling kan mga nagdadanay sa espirituwal na paraiso an lubos na kautuban kan panuga nin Diyos na “bagong mga langit asin sarong bagong daga.”

11. Uyon sa Isaias 65:​18, 19, ano an dapat na magin epekto sa sato kan espirituwal na paraiso?

¹¹ Nagpapasalamat asin maugmang naghahalat-halat. Ipinaliwanag pa ni Isaias kun taano ta dapat kitang “maggaya-gaya . . . nin labi-labi asin magin maugma” sa espirituwal na paraiso. Si Jehova an naggibo kan paraisong ini. (Basahon an Isaias 65:​18, 19.) Kaya dai nanggad kita mangalas na ginagamit niya kita para tabangan an mga tawo na lumuwas sa lumang kinaban na ini na alang sa espirituwal asin giyahan sinda pasiring sa satong magayon na espirituwal na paraiso! Nauugmang marhay kita sa mga bendisyon na nakakamtan ta huling yaon kita sa katotoohan, asin napapahiro kita na sabihon sa iba an manungod diyan.​—Jer. 31:12.

12. Ano an namamatian mo sa mga panuga na ilinadawan sa Isaias 65:​20-24, asin taano?

 ¹² Nagpapasalamat man kitang marhay asin maugmang hinahalat-halat an paglaom ta bilang mga residente kan espirituwal na paraiso. Isipa na sana an gabos na mahihiling asin gigibuhon ta sa bagong kinaban nin Diyos! Nangangako an Bibliya: “Dai na magkakaigwa sa lugar na iyan nin umboy na mabubuhay nin pirang aldaw sana, o nin gurang na dai mabubuhay sa lubos na lawig kan buhay niya.” “Matugdok [kita] nin mga harong asin maistar sa mga iyan, asin magibo [kita] nin mga ubasan asin kakakanon an bunga kan mga iyan.” “Dai [kita] magpapagal nin sayang sana” huling ‘bebendisyunan kita ni Jehova.’ Nanunuga siya sa sato nin matiwasay asin nakakakontentong buhay na may tunay na katuyuhan. “Bago pa sinda mag-apod,” aram na ni Jehova kun ano an kaipuhan kan kada saro asin papaniguan niya “an mawot kan lambang bagay na may buhay.”​—Isa. 65:​20-24; Sal. 145:16.

13. Paano ilinaladawan kan Isaias 65:25 an mga pagbabago na ginigibo nin mga tawo pag nagpuon na sindang maglingkod ki Jehova?

¹³ Matuninong asin ligtas. Sa tabang kan espiritu nin Diyos, dakul na dating mga bayolente, agresibo, o bakong onesto an naggibo nin dakulang mga pagbabago sa saindang buhay. (Basahon an Isaias 65:25.) Binago ninda an dati nindang maraot na mga ugali. (Roma 12:2; Efe. 4:​22-24) Totoo, an mga lingkod nin Diyos bako pang mga perpekto kaya makakagibo pa man giraray sinda nin sala. Minsan siring, pinangyari ni Jehova na magkasararo an “gabos na klase nin tawo” na may pagkamuot sa saiya asin sa kada saro, asin bilang resulta, igwa sinda nin tunay na katuninungan. (Tito 2:11) Saro nanggad ining milagro na an makakagibo sana iyo an Diyos na makakamhan sa gabos!

14. Paano nagin totoo sa sarong brother an Isaias 65:25?

¹⁴ Kaya daw talagang baguhon kan mga tawo an saindang personalidad? Pag-isipan an eksperyensiyang ini. Sarong hoben na lalaki na luwas-laog sa presuhan sa edad na 20 an may imoral asin bayolenteng pamumuhay. Napreso siya huli sa carnapping, paghabon, asin iba pang magabat na krimen. Mayo siyang inaatrasan na iriwal. Kan inot niyang madangog an katotoohan sa Bibliya asin nagpuon na mag-atender sa mga pagtiripon kan Mga Saksi ni Jehova, nakumbinsir siya na igwa nin katuyuhan an buhay—an sambahon si Jehova sa espirituwal na paraiso. Pagkatapos niyang mabawtismuhan, pirmi niyang hinuhurop-hurop kun paano nagin totoo sa saiya an sinasabi sa Isaias 65:25. Nagbago siya hali sa pagigin bayolente na arog nin leon pasiring sa pagigin mapagpatuninong na arog nin sarong karnero.

15. Taano ta gusto tang agdahon an mga tawo na umiba sa sato sa espirituwal na paraiso, asin paano ta iyan magigibo?

¹⁵ An Isaias 65:13 nagpupuon paagi sa mga tataramon na: “Ini an sabi kan Soberanong Kagurangnan na Jehova.” An bersikulo 25 nagtatapos man sa mga tataramon na “an sabi ni Jehova.” Iyo, pirming nagkakatotoo an mga sinasabi niya. (Isa. 55:​10, 11) Naeeksperyensiyahan ta na ngunyan an espirituwal na paraiso. Naggibo si Jehova nin sarong pamilya nin mga nagsasamba saiya na talagang daing kaagid. Huling parte kita kan saiyang pamilya, nakakaeksperyensiya kita nin katuninungan asin seguridad dawa yaon kita sa sarong kinaban na pano nin kadahasan. (Sal. 72:7) Huli kaiyan, gusto tang matabangan an pinakadakul na tawong posible na magin parte kan satong Kristiyanong pamilya. Magigibo ta iyan kun mapokus kita sa paggibo nin mga disipulo.​—Mat. 28:​19, 20.

KUN PAANO TA MADADAGKA AN IBA NA LUMAOG SA ESPIRITUWAL NA PARAISO

16. Ano an puwedeng makapahiro sa mga tawo na lumaog sa espirituwal na paraiso?

¹⁶ An kada saro sa sato igwa nin mahalagang kabtang na magigibo para magin nakakadagka sa iba an espirituwal na paraiso. Magigibo ta  iyan kun aarugon ta si Jehova. Dai niya pinipirit an mga tawo na lumaog sa saiyang organisasyon. Imbes, mabuot niya sindang ‘irinarani’ sa saiya. (Juan 6:44; Jer. 31:3) Natural sanang maparani ki Jehova an sinserong mga tawo na nakakanuod manungod sa mamumuton asin kaakit-akit na mga kuwalidad niya. Paano an satong marahay na mga kuwalidad asin paggawi makakadagka sa mga tawo na lumaog sa espirituwal na paraiso?

17. Paano ta madadagka an iba na lumaog sa espirituwal na paraiso?

¹⁷ An sarong paagi para madagka ta an iba na lumaog sa espirituwal na paraiso iyo an pagpahiling nin pagkamuot asin kabuutan sa satong mga tugang. Pag may nag-atender na mga baguhan sa satong mga pagtiripon, gusto ta na mamatian man ninda an namati kan mga interesado na posibleng nag-atender kaidto sa mga pagtiripon sa suanoy na Corinto. Nasabi ninda: “Talagang yaon sa saindo an Diyos.” (1 Cor. 14:​24, 25; Zac. 8:23) Kaya, kaipuhan tang padagos na sunudon an sadol na “makipagkatuninungan . . . sa lambang saro.”​—1 Tes. 5:13.

18. Ano an puwedeng makadagka sa mga tawo na lumaog sa satong organisasyon?

¹⁸ Dapat tang pirming hinguwahon na mansayon an satong mga tugang arog kan pagmansay sainda ni Jehova. Magigibo ta iyan paagi sa pagpokus sa saindang positibong mga kuwalidad asin bako sa saindang mga kaluyahan, na pag-abot nin panahon mawawara na. Mareresolberan ta an ano man na dai pagkasinabutan sa mamumuton na paagi kun pirming magigin “mabuot [kita] sa lambang saro, mapagmalasakit na may kapadangatan, lubos na nagpapatinarawadan sa lambang saro.” (Efe. 4:32) Paagi kaiyan, madadagkang lumaog sa espirituwal na paraiso an mga tawong gusto man na trataron sa mamumuton na paagi. b

 MAGDANAY SA LAOG KAN ESPIRITUWAL NA PARAISO

19. (a) Arog kan ipinapahiling sa kahon na “ Nagbalik Sinda,” ano an sinabi nin nagkapira pagkatapos nindang bumalik sa espirituwal na paraiso? (b) Ano an dapat na magin determinasyon ta? (Hilingon man an ritrato.)

¹⁹ Nagpapasalamat talaga kitang marhay sa satong espirituwal na paraiso! Mas lalo pa iyan na guminayon, asin mas duminakul pa an mga nagsasamba ki Jehova diyan. Lugod na padagos tang pahalagahan an paraisong ginibo ni Jehova para sa sato. An siisay man na gustong makamati nin kaginhawahan, pagkakontento, katiwasayan, asin pagigin ligtas dapat na lumaog sa espirituwal na paraiso asin dai nuarin man iyan pagbayaan! Pero mag-ingat kitang marhay huling ginigibo ni Satanas an gabos para impluwensiyahan kitang humali diyan. (1 Ped. 5:8; Kap. 12:9) Dai ta pagtugutan na magibo niya iyan. Gibuhon niyato an satong pinakamakakaya na ingatan an kagayunan, kadalisayan, asin katuninungan kan espirituwal na paraiso.