1. Ano an hinahagad sa sato ni Jehova?

 AN SARO sa pinakamaugmang panahon sa buhay nin sarong mag-agom iyo an pagkamundag kan saindang aki. Pero dawa ngani padabaon ninda an saindang bagong mundag na umboy, habo man nindang magdanay na sana siyang umboy. Siguradong mahahadit sindang marhay kun dai siya magdakula. Sa kaparehong paagi, nauugma si Jehova pag ginigibo ta na an inot na mga lakdang bilang mga parasunod ni Jesus, pero habo Niya man na magdanay na sana kitang mga umboy sa espirituwal. (1 Cor. 3:1) Imbes, hinahagad niya sa sato na magin “adulto” o maygurang na mga Kristiyano.​—1 Cor. 14:20.

2. Ano an pag-uulayan ta sa artikulong ini?

² Ano an buot sabihon kan pagigin maygurang na Kristiyano? Paano kita magigin maygurang na Kristiyano? Ano an papel kan matagas na espirituwal na kakanon sa pagigin maygurang? Asin taano ta dapat tang likayan an sobrang pagtitiwala sa sadiri? Pag-uulayan ta sa artikulong ini an simbag sa mga hapot na iyan.

ANO AN BUOT SABIHON KAN PAGIGIN MAYGURANG NA KRISTIYANO?

3. An an buot sabihon kan pagigin maygurang na Kristiyano?

³ Sa Bibliya, an Griegong tataramon na trinadusir na “adulto” puwede man mangahulugan na “maygurang,” “perpekto,” asin “kumpleto.” a (1 Cor. 2:6) Nagigin adulto kita, o maygurang, na Kristiyano pag nagtatalubo kita hali sa pagigin umboy sa espirituwal pasiring sa pagigin maygurang sa espirituwal. Siyempre, dawa naabot ta na an pasuhan na iyan, dai kita dapat magpundo sa pag-uswag sa espirituwal. (1 Tim. 4:15) Gabos kita, kaiba na an mga hoben, puwedeng magin maygurang sa espirituwal. Pero paano  ta masasabing saro na kitang maygurang na Kristiyano?

4. Paano mo masasabi na maygurang an sarong Kristiyano?

⁴ An sarong maygurang na Kristiyano nagsusunod sa gabos na kahagadan nin Diyos. Dai niya pinipili kun arin sana an gusto niyang sunudon. Siyempre, makakagibo siya nin sala ta bako siyang perpekto. Pero, ipinapahiling niya man giraray sa saiyang pang-aroaldaw na buhay na nag-iisip asin naghihiro siya kauyon kan kabutan nin Diyos. Isinusulot niya an bagong personalidad asin padagos na naghihinguwa na lalo pang maarog an kaisipan nin Diyos. (Efe. 4:​22-24) Sinasanay niya an saiyang sadiri na gumibo nin madunong na mga desisyon basado sa mga pagbuot asin prinsipyo ni Jehova, kaya dai niya na kaipuhan an halabang lista nin mga susundon para maaraman kun ano an dapat niyang gibuhon. Pag naggigibo siya nin desisyon, igwa siya nin disiplina sa sadiri para gibuhon an napagdesisyunan niya.​—1 Cor. 9:​26, 27.

5. Sa anong mga peligro puwedeng mapaatubang an sarong bakong maygurang na Kristiyano? (Efeso 4:​14, 15)

⁵ Sa ibong na lado, an sarong Kristiyano na dai nagigin maygurang madali sanang madara nin mga “pangloloko” saka “mapandayang mga pakana” asin mapatubod kan mga nagpapalakop nin mapandayang mga bareta, huring-huding, asin bakong totoong mga istorya sa media. Tibaad madaya man siya kan mga apostata. b (Basahon an Efeso 4:​14, 15.) Madali man siyang mauri, magpuon nin iriwal, maghinanakit, o magpadara sa sugot.​—1 Cor. 3:3.

6. Iilustrar an pagtalubo sa espirituwal na pagkamaygurang. (Hilingon man an ritrato.)

⁶ Arog kan sinambit subago, an pagtalubo sa espirituwal na pagkamaygurang ikinumparar kan Kasuratan sa pagdakula pasiring sa pagigin adulto. An sarong aki kulang pa sa pakasabot, kaya kaipuhan niya an proteksiyon asin paggiya nin sarong adulto. Para iilustrar, tibaad sabihon kan sarong ina sa saiyang aki na dai ini magbutas sa saiyang kamot mantang nagbabalyo sinda sa tinampo. Mantang nagdadakula an aki, tibaad tugutan na siya kan saiyang ina na solong magbalyo sa tinampo, pero ipapagirumdom niya pa man giraray sa saiyang aki na maghiling nin wala-tuo bago magbalyo. Pag an aki nagin adulto na, aram na niya kun paano lilikayan an peligro. Kun paanong kaipuhan kan  mga aki an tabang kan mga adulto para makalikay sa peligro, an bakong maygurang na mga Kristiyano parating nangangaipo man nin tabang kan maygurang na mga Kristiyano tanganing makalikay sa espirituwal na mga peligro asin makagibo nin madunong na mga desisyon. Sa kabaliktaran, pag an sarong maygurang na Kristiyano kaipuhan na gumibo nin desisyon, pinag-iisipan ninda an mga prinsipyo sa Bibliya para maaraman an kaisipan ni Jehova dangan sinusunod iyan.

7. Kaipuhan daw kan maygurang na mga Kristiyano an tabang kan iba?

⁷ Buot sabihon daw kaiyan dai na kaipuhan nin sarong maygurang na Kristiyano an tabang kan iba? Bako. Kaipuhan man minsan na maghagad nin tabang kan mga maygurang. Pero an saro na bako pang maygurang sa espirituwal tibaad mag-asa sa iba na sabihon saiya kun ano an dapat niyang gibuhon o an iba an gumibo nin desisyon para sa saiya. Sa kabaliktaran, an sarong maygurang na Kristiyano nagkukua nin kadunungan asin eksperyensiya sa iba mantang isinasaisip na inaasahan saiya ni Jehova na siya an “magdadara kan sadiri niyang pasan.”​—Gal. 6:5.

8. Sa anong mga paagi nagkakalain an mga maygurang na Kristiyano?

⁸ Kun paanong an mga adulto bakong parareho an itsura, an maygurang na mga Kristiyano bako man parareho an espirituwal na mga kuwalidad, arog kan kadunungan, kusog nin buot, pagkabukas-palad, asin empatiya. Dugang pa, pag an duwang maygurang na Kristiyano napaatubang sa magkaparehong sitwasyon, puwedeng magkalain an magin pagmansay ninda pero parehong kauyon iyan kan mga prinsipyo sa Bibliya. Lalo nang totoo iyan sa mga desisyon na depende sa konsiyensiya. Huling isinasaisip iyan, linilikayan nindang husgaran an iba sa siring na mga pagkakalain. Imbes, pinagdadanay ninda an pagkasararo.​—Roma 14:10; 1 Cor. 1:10.

PAANO KITA MAGIGIN MAYGURANG NA KRISTIYANO?

9. Awtomatiko daw kitang nagigin maygurang sa espirituwal? Ipaliwanag.

⁹ Natural sana na magin adulto kita sa pisikal sa paglihis nin panahon, pero mayo nin awtomatikong nagigin maygurang sa espirituwal. Halimbawa, an mga tugang sa Corinto nag-ako kan maugmang bareta, nagpabawtismo, nag-ako kan banal na espiritu, asin nakinabang sa pagtutukdo ni apostol Pablo. (Gibo 18:​8-11) Alagad, mga pirang taon pagkatapos nindang mabawtismuhan, dakul pa man giraray sa sainda an bakong maygurang sa espirituwal. (1 Cor. 3:2) Paano ta malilikayan na mapundo an satong pag-uswag sa espirituwal?

10. Ano an kaipuhan tang gibuhon para magin maygurang? (Judas 20)

¹⁰ Tanganing magin maygurang, kaipuhan ta ngunang magkaigwa nin pagmawot na magin maygurang. An mga “daing eksperyensiya,” na mas gustong magdanay kun ano sinda, dai nuarin man magigin maygurang sa espirituwal. (Tal. 1:22) Habo tang magin arog kaidtong mga adulto na sa pisikal pero nag-aasa pa man giraray sa saindang mga magurang na iyo an maggibo nin desisyon para sa sainda. Imbes, gusto ta na kita mismo an magpakusog kan satong espirituwalidad. (Basahon an Judas 20.) Kun naghihinguwa ka pang magin maygurang, hagadon ki Jehova sa pamibi na tawan ka kan “pagmawot saka kan kakayahan na gumibo.”​—Fil. 2:13.

11. Anong tabang an itinatao sa sato para umuswag sa pagkamaygurang? (Efeso 4:​11-13)

¹¹ Dai inaasahan sa sato ni Jehova na magigin maygurang kita sa sadiri ta sanang kakayahan. An mga naglilingkod bilang pastor asin paratukdo sa Kristiyanong kongregasyon andam na tabangan kita na magin maygurang o “adulto” sa espirituwal, “na nagdadakula sagkod na maabot an sukol kan kalubusan kan Cristo.” (Basahon an Efeso 4:​11-13.) Itinatao man ni Jehova an saiyang banal na espiritu para tabangan kitang magkaigwa kan “pag-iisip ni Cristo.” (1 Cor. 2:​14-16) Dugang  pa, ipinasabong nin Diyos na isurat an apat na Ebanghelyo para ipahiling sato an pag-iisip, pagtaram, asin paggawi ni Jesus sa panahon kan saiyang ministeryo digdi sa daga. Paagi sa pag-arog sa kaisipan asin paggawi ni Jesus, maaabot mo an saimong pasuhan na magin maygurang na Kristiyano.

AN PAPEL KAN MATAGAS NA ESPIRITUWAL NA KAKANON

12. Ano an “pundamental na doktrina manungod sa Cristo”?

¹² Para umuswag sa pagkamaygurang, dapat na urog pa sa “pundamental,” o panginot, na “doktrina manungod sa Cristo” an dapat tang manudan. Kaiba sa panginot na mga katukduan na iyan iyo an pagsulsol, pagtubod, bawtismo, asin pagkabuhay liwat. (Heb. 6:​1, 2) An siring na mga katukduan iyo an pundasyon kan pagigin Kristiyano. Iyan an dahilan kaya ipinakipag-ulay ni apostol Pedro an manungod sa mga bagay na iyan kan maghulit siya sa mga tawo kan Pentecostes. (Gibo 2:​32-35, 38) Dapat tang akuon an panginot na mga katukduan na iyan tanganing magin mga disipulo ni Cristo. Nagpatanid si Pablo na an siisay man na dai nagtutubod sa pagkabuhay liwat isinisikwal an bilog na Kristiyanong pagtubod. (1 Cor. 15:​12-14) Minsan siring, dai kita dapat makontento na an panginot sanang mga katukduan sa Bibliya an aram ta.

13. Ano an kaipuhan tang gibuhon tanganing makinabang kita sa matagas na espirituwal na kakanon na sinambit sa Hebreo 5:14? (Hilingon man an ritrato.)

¹³ Bakong arog kan panginot na mga doktrina, kaiba sa matagas na espirituwal na kakanon bako lang an mga katugunan ni Jehova kundi pati an saiyang mga prinsipyo, na nakakatabang sa sato na masabutan an saiyang kaisipan. Para makinabang sa siring na kakanon, dapat kitang mag-adal, maghurop-hurop, asin maingat na iaplikar an Tataramon nin Diyos. Mantang ginigibo ta iyan, sinasanay ta an satong sadiri na gumibo nin mga desisyon na nakakapaugma ki Jehova. c—Basahon an Hebreo 5:14.

14. Paano tinabangan ni Pablo an mga Kristiyano sa Corinto na magin maygurang?

¹⁴ An bakong maygurang na mga Kristiyano sa parati nasasakitan na gumibo nin tamang desisyon sa mga sitwasyon na mayong espesipikong pagbuot an Bibliya. Tibaad mamatian kan nagkapira na puwede nindang gibuhon an ano man na gusto ninda. An iba naghahagad nin sarong  susundon sa mga bagay na dai man kaipuhan nin sarong susundon. Halimbawa, minalataw na an mga Kristiyano sa Corinto naghagad ki Pablo nin sarong susundon kun baga puwede nindang kakanon an mga iinatang sa sarong idolo. Imbes na sabihon sainda kun ano an dapat gibuhon, ipinaliwanag ni Pablo an papel kan konsiyensiya asin an katunayan na an kada saro igwa nin “deretsong pumili.” Nagsambit siya nin mga prinsipyo na makakatabang sa lambang indibidwal tanganing dai sinda ribukon kan saindang konsiyensiya asin dai man sinda makapasingkog sa iba. (1 Cor. 8:​4, 7-9) Paagi kaiyan, tinabangan ni Pablo an mga taga Corinto na umuswag sa pagkamaygurang tanganing magamit ninda an saindang kakayahan na makasabot imbes na magdepende sa iba o maghanap na sana nin mga susundon.

15. Paano tinabangan ni Pablo an mga Kristiyanong Hebreo na umuswag sa espirituwal?

¹⁵ May manunudan kitang mahalagang leksiyon sa isinurat ni Pablo sa mga Kristiyanong Hebreo. An iba nagpundo nang umuswag sa espirituwal; sa katunayan “gatas na naman giraray an kaipuhan [ninda] imbes na matagas [na espirituwal] na kakanon.” (Heb. 5:12) Dai sinda nakasabay sa padagos na pagliwanag kan katotoohan, na progresibong ihinahayag paagi sa kongregasyon. (Tal. 4:18) Halimbawa, dakul na Judiong Kristiyano an nangangapot pa man giraray sa Katugunan ni Moises dawa ngani mga 30 taon na an nakaagi kan tapuson iyan basado sa atang ni Cristo. (Roma 10:4; Tito 1:10) An 30 taon na iyan siguradong igong panahon nanggad para sa mga Kristiyanong Judio na liwaton an saindang kaisipan! An siisay man na nakabasa kan ipinasabong na surat ni Pablo sa mga Hebreo makakapagsabi na matagas na espirituwal na kakanon an laog kan librong iyan. Iyan mismo an kaipuhan kan mga Kristiyanong idto para mapakusog an saindang pagtubod sa pagigin nakakalabi kan Kristiyanong areglo sa pagsamba asin para magkaigwa sinda nin kusog nin buot tanganing padagos na makapaghulit sa ibong kan pagkontra kan ibang mga Judio.​—Heb. 10:​19-23.

LIKAYAN AN SOBRANG PAGTITIWALA SA SADIRI

16. Apuwera sa pag-uswag sa pagkamaygurang, ano an kaipuhan tang gibuhon?

¹⁶ Kaipuhan tang maghinguwa bako lang na magin maygurang kundi na mapagdanay man iyan. Para magibo iyan, kaipuhan tang likayan an sobrang pagtitiwala sa sadiri. (1 Cor. 10:12) Dapat tang “padagos na baluon” an satong sadiri tanganing masigurado niyato na padagos kitang nag-uuswag.​—2 Cor. 13:5

17. Paano ipinahiling kan surat ni Pablo sa mga taga Colosas na kaipuhan nindang magdanay na maygurang?

 ¹⁷ Sa saiyang surat sa mga taga Colosas, idinuon giraray ni Pablo na kaipuhan nindang magdanay na maygurang. Dawa ngani maygurang na sindang mga Kristiyano, pinatanidan sinda ni Pablo tanganing dai sinda madaya kan kaisipan kan kinaban. (Col. 2:​6-10) Asin si Epafras, na minalataw na bistong marhay an mga tugang sa kongregasyon, pirming namibi na lugod na “padagos [sindang] makapanindugan nin lubos,” o magin maygurang. (Col. 4:12) Ano an punto? Parehong nasabutan ni Pablo asin Epafras na tanganing magdanay na maygurang, kaipuhan kan saro na maghinguwa asin an tabang nin Diyos. Gusto nindang magdanay na maygurang na mga Kristiyano an mga taga Colosas sa ibong kan ano man na kadipisilan na naeeksperyensiyahan ninda.

18. Ano an posibleng mangyari sa sarong maygurang na Kristiyano? (Hilingon man an ritrato.)

¹⁸ Pinatanidan ni Pablo an mga Hebreo na posibleng permanenteng maiwara kan sarong maygurang na Kristiyano an pag-uyon nin Diyos. An puso nin sarong Kristiyano puwedeng tumagas na marhay kaya dai na siya nagsusulsol asin nag-aako nin kapatawadan nin Diyos. Marahay na sana ta dai man suminagkod sa arog kaiyan an mga Hebreo. (Heb. 6:​4-9) Sa ngunyan, kumusta man an mga nagin inaktibo o an mga natiwalag pero kan huri nagsulsol? An saindang mapakumbabang pagsulsol nagpapahiling na bako sindang kapareho kaidtong sinambit ni Pablo sa saiyang surat. Pero, pag nagbalik sinda ki Jehova, kaipuhan ninda an tabang na itinatao niya. (Ezek. 34:​15, 16) An mga elder puwedeng gumibo nin areglo para matabangan sinda nin sarong maygurang na tugang na maibalik an saindang espirituwal na kusog.

19. Ano an dapat na magin pasuhan ta?

¹⁹ Kun naghihinguwa ka na magin sarong maygurang na Kristiyano, maaabot mo nanggad an pasuhan na iyan! Padagos na magkakan nin matagas na espirituwal na kakanon asin maghinguwa na lalo pang iuyon an saimong kaisipan sa kaisipan ni Jehova. Asin kun naabot mo na an pasuhan na iyan, magdanay na marigon bilang sarong maygurang na Kristiyano.