Aram Mo Daw?
Taano ta may mga dayuhan na nagserbi sa hukbo ni Hading David?
AN PIRA sa mga dayuhan na parapakilaban na kabilang sa hukbo ni David iyo si Zelek na Ammonita, si Urias na Hiteo, asin si Itma na Moabita. a (1 Cron. 11:39, 41, 46) Kaiba man sa sainda an mga “Keretita saka Peleteo, asin [mga] Giteo.” (2 Sam. 15:18) An mga Keretita asin an mga Peleteo pighuhuna kan kadaklan na igwang haraning relasyon sa mga Filisteo. (Ezek. 25:16) An mga Giteo naggikan sa Gat na siyudad kan mga Filisteo.—Jos. 13:2, 3; 1 Sam. 6:17, 18.
Taano ta itinugot ni David na may mga dayuhan na mapabilang sa saiyang hukbo? Tiwala siya na maimbod sinda sa saiya, asin lalo na ki Jehova. Halimbawa, kun manungod sa mga Keretita asin mga Peleteo, an The New Interpreter’s Dictionary of the Bible nagsasabi: “Nagdanay sindang maimbod ki David sa pinakamasakit na mga panahon kan saiyang paghadi.” Paano? Kan an “gabos na lalaki kan Israel” bayaan si Hading David para magsunod sa “paraparibok na an pangaran Sheba,” an mga Keretita saka an mga Peleteo nagdanay na maimbod ki David asin nagtabang na papunduhon an pagrebelde ni Sheba. (2 Sam. 20:1, 2, 7) Sa saro pang pagkakataon, pinurbaran kan aki ni Hading David na si Adonias na agawon an trono. Alagad, an mga Keretita saka an mga Peleteo padagos na nagin maimbod ki David asin nagtabang para mapatukaw si Solomon, an saro na pinili ni Jehova, bilang an sunod na hadi.—1 Ha. 1:24-27, 38, 39.
An saro pang dayuhan na nagin maimbod na marhay ki David iyo si Itai na Giteo. Sinuportaran niya saka kan saiyang 600 na parapakilaban si Hading David kan an aki kaini na si Absalom nagrebelde asin inimpluwensiyahan an mga lalaki kan Israel na kalabanon an hadi. Kan primero, sinabi ni David ki Itai na huling dayuhan ini, dai man kaini kaipuhan na makipaglaban para sa saiya. Pero nagsimbag si Itai: “Isinusumpa ko sa ngaran kan buhay na Diyos na si Jehova asin sa atubangan mo kagurangnan kong hadi, sa kagadanan man o sa buhay, maiba an saimong lingkod sain man magduman an kagurangnan kong hadi!”—2 Sam. 15:6, 18-21.
Si Itai maimbod ki David, an hading ninombrahan ni Jehova
Maski ngani mga dayuhan an mga Keretita, mga Peleteo, asin an mga Giteo, minidbid ninda si Jehova bilang an tunay na Diyos asin na si David an hading ninombrahan ni Jehova. Siguradong nagpapasalamat na marhay si David na igwa siya nin maimbod na mga tawuhan para suportaran siya!
a Sigun sa Deuteronomio 23:3-6, dai itinutugot kan katugunan nin Diyos na magin kabtang kan kongregasyon kan Israel an mga Ammonita asin mga Moabita. Minsan siring, an katugunan na ini posibleng nanunungod sa pagkaigwa nin lubos asin legal na deretso bilang mga siyudadano kan nasyon, asin dai man ipinagbabawal sa mga dayuhan na ini na makiiba-iba o mag-istar kaiba an banwaan nin Diyos. Hilingon an Kaunawaan sa Kasulatan, Tomo 1, p. 114.
