1. Ano an makakatabang sa sato para ikaugma an pag-adal kan mga propesiya sa Bibliya?

 “GUSTUHON kong pag-adalan an mga propesiya sa Bibliya,” an sabi nin sarong hoben na brother na si Ben. Uyon ka sa saiya? O natatakot kang pag-adalan iyan huling iniisip mong dipisilon sabuton an mga propesiya sa Bibliya? Tibaad isipon mo pa ngani na boring an pag-adal nin mga propesiya. Minsan siring, pag naaraman mo kun taano ta ipinasurat ni Jehova an mga iyan sa saiyang Tataramon, tibaad magbago an opinyon mo.

2. Ano an pag-uulayan ta sa artikulong ini?

² Pag-uulayan sa artikulong ini bako lang kun taano ta dapat tang maaraman an manungod sa mga propesiya sa Bibliya kundi kun paano man niyato pag-aadalan an mga iyan. Dangan sisiyasaton ta an duwang propesiya sa libro nin Daniel tanganing mahiling kun paano makakatabang sa sato ngunyan an pagsabot sa mga iyan.

3. Ano an kaipuhan tang gibuhon para masabutan an mga propesiya sa Bibliya?

³ Kaipuhan tang maghagad nin tabang para masabutan an mga propesiya sa Bibliya. Pag-isipan an ilustrasyon na ini. Imahinara na nagpasyar ka sa sarong lugar na bakong pamilyar saimo pero kaiba mo sa pagbiyahe an sarong amigo na aram na marhay an lugar na iyan. Aram niya nanggad kun hain kamo asin kun pasain an kada tinampo. Siguradong maugma ka ta nagtugot an amigo mo na mag-iba saimo! Sa kaagid na paagi, aram ni Jehova kun hain na kita sa dalagan nin panahon asin kun ano an nasa puro kan dalan na linalakawan ta. Kaya para masabutan an mga propesiya sa Bibliya, dapat na mapakumbaba tang hagadon an tabang ni Jehova.—Dan. 2:28; 2 Ped. 1:19, 20.

4. Taano ta ipinasurat ni Jehova an mga propesiya sa saiyang Tataramon? (Jeremias 29:11) (Hilingon man an ritrato.)

⁴ Arog nin sarong marahay na magurang, gusto ni Jehova na magkaigwa  nin maugmang puturo an saiyang mga aki. (Basahon an Jeremias 29:11.) Pero bakong arog nin siisay man na tawong magurang, kaya ni Jehova na sabihon nin eksakto an mangyayari sa maabot. Ipinasurat niya an mga propesiya sa saiyang Tataramon tanganing maaraman ta an manungod sa importanteng mga pangyayari bago pa iyan mangyari. (Isa. 46:10) An mga propesiya sa Bibliya mga regalo hali sa satong mamumuton na Ama sa langit. Pero paano ka makakasigurado na an mga ihinula kan Bibliya talagang magkakatotoo?

5. Ano an puwedeng manudan nin sarong hoben sa eksperyensiya ni Max?

⁵ Sa eskuwelahan, an mga hoben parating may nakakaibanan na mga tawong kakadikit o mayo ngani nin paggalang sa Bibliya. An mga sinasabi asin paggawi kan mga ini puwedeng magin dahilan para magkaigwa nin mga pagduda an sarong hoben na Saksi. Mangnuhon an eksperyensiya nin sarong brother na an pangaran Max. Sinabi niya, “Kan tin-edyer ako, nagpuon akong magduda kun baga an itinutukdo sako kan mga magurang ko iyo an tunay na relihiyon asin kun baga an Bibliya ipinasabong nin Diyos.” Ano an ginibo kan saiyang mga magurang? Sinabi niya, “Nagin kalmado lang sinda, dawa ngani aram ko na nahahadit sinda.” Gamit an Bibliya, sinimbag kan mga magurang ni Max an saiyang mga hapot. May ginibo man si Max. “Pinag-adalan ko mismo an mga propesiya sa Bibliya,” an sabi niya, “asin ipinakipag-ulay ko an sakong mga nanudan sa ibang mga hoben.” Ano an nagin resulta? Sinabi ni Max, “Pagkatapos kaiyan, kumbinsido na ako na an Bibliya ipinasabong nin Diyos!”

6. Ano an kaipuhan mong gibuhon kun may mga pagduda ka, asin taano?

⁶ Kun, arog ni Max, magpuon ka man na magduda kun baga nasa Bibliya an katotoohan, dai mo kaipuhan na makonsiyensiya. Pero kaipuhan na may gibuhon ka tulos manungod diyan. An pagduda garo takla. Kun babaliwalaon, puwede kaiyan na luway-luway na rauton an sarong bagay na mahalaga. Tanganing punan na halion an “takla” sa saimong pagtubod, kaipuhan mong haputon an saimong sadiri, ‘Nagtutubod daw ako sa sinasabi kan Bibliya manungod sa puturo?’ Kun dai ka sigurado, kaipuhan mong pag-adalan an mga propesiya sa Bibliya na nagkatotoo na. Paano mo magigibo iyan?

7. Anong halimbawa an ipinahiling ni Daniel manungod sa kun paano pag-aadalan an mga propesiya? (Daniel 12:10) (Hilingon man an ritrato.)

⁷ Nagpahiling si Daniel nin marahay na halimbawa manungod sa kun paano pag-aadalan an mga propesiya. Pinag-adalan niya an mga propesiya na may tamang motibo, an maaraman an katotoohan. Mapakumbaba man si Daniel. Aram niya na itatao ni Jehova an pakasabot sa mga nakakamidbid sa Saiya asin namumuhay kauyon kan Saiyang malinig na mga pamantayan. (Dan. 2:27, 28; basahon an Daniel 12:10.) Pinatunayan ni Daniel na mapakumbaba siya paagi sa pagsarig ki Jehova para sa tabang. (Dan. 2:18) Siring man, nag-adal na marhay si Daniel. Siniyasat niya an ipinasabong na Kasuratan na makukua kan panahon na idto. (Jer. 25:11, 12; Dan. 9:2) Paano mo maaarog si Daniel?

8. Taano ta may mga dai naniniwala na nagkakatotoo an mga propesiya sa Bibliya, pero ano an dapat tang gibuhon?

⁸ Siyasaton an saimong mga motibo. Pinag-aadalan mo daw an mga propesiya sa Bibliya  huli sa makusog na pagmawot na maaraman an katotoohan? Kun iyo, tatabangan ka ni Jehova. (Juan 4:23, 24; 14:16, 17) Taano ta pinag-aadalan man kan iba an mga propesiya? Tibaad ginigibo iyan kan iba huling gusto nindang makahanap nin ebidensiya na an Bibliya dai ipinasabong nin Diyos. Sa paaging iyan, iniisip ninda na maipapangatanusan ninda an pagbugtak ninda nin sadiri nindang mga pamantayan sa kun ano an tama saka sala asin an pamumuhay ninda kauyon kan mga pamantayan na iyan. Alagad, kaipuhan tang magkaigwa nin tamang motibasyon. Apuwera kaiyan, kaipuhan an sarong mahalagang kuwalidad tanganing masabutan an mga propesiya sa Bibliya.

9. Anong kuwalidad an kaipuhan tanganing masabutan an mga propesiya sa Bibliya? Ipaliwanag.

⁹ Magin mapakumbaba. Nanunuga si Jehova na tatabangan niya an mapakumbaba. (Sant. 4:6) Kaya kaipuhan tang hagadon sa pamibi an Saiyang tabang tanganing masabutan an mga propesiya sa Bibliya. Dapat man niyatong akuon na kaipuhan ta an tabang kan saiyang ginagamit na paagihan tanganing magtao sato nin espirituwal na kakanon sa tamang panahon. (Luc. 12:42) Si Jehova sarong Diyos nin pagigin areglado, kaya tama sana na maggamit siya nin saro sanang paagihan para tabangan kita na masabutan an mga katotoohan na yaon sa saiyang Tataramon.—1 Cor. 14:33; Efe. 4:4-6.

10. Ano an manunudan mo sa eksperyensiya ni Esther?

¹⁰ Mag-adal na marhay. Pumili nin sarong propesiya na interesante para sa saimo asin iyan nguna an pag-adalan na marhay. Iyan an ginibo kan sister na si Esther. Interesado siya sa mga propesiya manungod sa pag-abot kan Mesiyas. “Kan 15 anyos ako,” an sabi niya, “pinunan kong mag-research nin mga pruweba na an mga propesiyang ini talagang isinurat bago an panahon ni Jesus.” An mga nabasa niya manungod sa Dead Sea Scrolls nakakumbinsir saiya. “An pira sa mga iyan isinurat bago an panahon ni Cristo,” an sabi niya, “kaya an mga propesiya na yaon diyan siguradong hali sa Diyos.” Inadmitir ni Esther, “Kinaipuhan ko iyan na basahon nin pirang beses para masabutan ko iyan.” Pero maugma siya sa ginibo niyang paghihinguwa. Pakatapos niyang mapag-adalan na marhay an pira sa mga propesiya sa Bibliya, sinabi niya, “Malinaw na para sa sako na totoo an mga sinasabi sa Bibliya!”

11. Paano kita nakikinabang pag pinapatunayan ta sa satong sadiri na totoo an mga sinasabi sa Bibliya?

¹¹ Pag nanudan ta kun paano an pira sa mga propesiya sa Tataramon nin Diyos nagkaurutob na, nagkakaigwa kita nin makusog na pagtitiwala ki Jehova asin sa paagi niya nin paggiya sa sato. Apuwera kaiyan, tinatabangan man kita kan mga propesiya sa Bibliya na mapagdanay an positibong paglaom sa maabot, ano man na mga pagbalo an napapaatubang sato ngunyan. Pag-ulayan ta sa halipot an duwang propesiya na isinurat ni Daniel na nauutob na sa ngunyan. An pakasabot sa mga iyan makakatabang sa sato na makagibo nin madunong na mga desisyon.

12. Ano an irinerepresentar kan mga bitis na “lansang [na] may salak na malumoy na dalipay”? (Daniel 2:41-43)

¹² Basahon an Daniel 2:41-43. Sa pangaturugan ni Hading Nabucodonosor na tinawan nin pakahulugan  ni Daniel, an mga bitis kan imahen na nahiling kan hadi gibo sa “lansang [na] may salak na malumoy na dalipay.” Paagi sa pagkumparar kan propesiyang ini sa iba pang mga propesiya sa libro nin Daniel asin Kapahayagan, masasabi ta na an mga bitis nagrerepresentar sa alyansang Anglo-Amerikano, an nangingibabaw na pambilog na kinaban na kapangyarihan ngunyan. Manungod sa pambilog na kinaban na kapangyarihan na ini, sinabi ni Daniel na “an kahadian . . . magkakaigwa nin parteng makusog asin nin parteng maluya.” Taano ta igwa iyan nin parteng maluya? Huling an mga ordinaryong tawo, na ilinaladawan kan malumoy na dalipay, pinapaluya an arog-lansang na kusog kaiyan. b

13. Anong mahalagang mga katotoohan an manunudan ta sa propesiyang ini?

¹³ Sa paglaladawan ni Daniel kan imahen sa pangaturugan asin partikular na kan mga bitis kaiyan, nagkapirang mahalagang katotoohan an manunudan ta. Inot, ipinahiling kan Pambilog na Kinaban na Kapangyarihan na Anglo-Amerikano an kusog kaiyan sa nagkapirang paagi. Halimbawa, dakula an nagin papel kaiyan para manggana sa Giyera Mundiyal I asin Giyera Mundiyal II. Alagad, an pambilog na kinaban na kapangyarihan na ini pinaluya asin padagos na papaluyahon kan mga iriwal kan mismong mga siyudadano kaiyan. Ikaduwa, an alyansang ini magigin an ultimong pambilog na kinaban na kapangyarihan na mamamahala bago tapuson kan Kahadian nin Diyos an gabos na gobyerno nin tawo. Dawa ngani tibaad kun minsan labanan kan ibang mga nasyon an Pambilog na Kinaban na Kapangyarihan na Anglo-Amerikano, dai ninda masasalidahan iyan. Aram ta iyan huling “an gapo” na nagrerepresentar sa Kahadian nin Diyos an marunot sa mga bitis, an parte kan imahen na nagrerepresentar sa alyansang Anglo-Amerikano.—Dan. 2:34, 35, 44, 45.

14. Paano an pakasabot sa propesiya manungod sa mga bitis na lansang asin dalipay makakatabang sato na makagibo nin madunong na mga desisyon?

¹⁴ Kumbinsido ka daw na totoo an propesiya ni Daniel manungod sa mga bitis na lansang asin dalipay? Kun iyo, magkakaigwa iyan nin epekto sa saimong paagi nin pamumuhay. Dai ka magpaparahinguwang magkamit nin materyal na seguridad sa sarong kinaban na madali nang paraon. (Luc. 12:16-21; 1 Juan 2:15-17) An pakasabot sa propesiyang ini makakatabang man sa saimo na mahiling an kahalagahan kan gibuhon na paghuhulit asin pagtutukdo. (Mat. 6:33; 28:18-20) Pakatapos na mapag-adalan an propesiyang ini, haputon an sadiri, ‘Ipinapahiling daw kan ginigibo kong mga desisyon na kumbinsido ako na madali nang tapuson kan Kahadian nin Diyos an gabos na gobyerno nin tawo?’

15. Siisay an “hadi kan norte” asin an “hadi kan timog” ngunyan? (Daniel 11:40)

¹⁵ Basahon an Daniel 11:40. Sinasabi sa Daniel kapitulo 11 an manungod sa duwang hadi, o pulitikal na kapangyarihan, na nagdidinaugan kun baga siisay sainda an pinakamakapangyarihan sa kinaban. Paagi sa pagkumparar kan propesiyang ini sa ibang mga propesiya sa Bibliya, masasabi ta na an “hadi kan norte” iyo an Russia saka an mga kaalyado kaini asin an “hadi kan timog” iyo an Pambilog na Kinaban na Kapangyarihan na Anglo-Amerikano. c

16. Anong mga kadipisilan an inaagihan kan mga nakaistar sa lugar na sakop kan “hadi kan norte”?

¹⁶ An mga lingkod nin Diyos na nakaistar sa lugar na sakop kan “hadi kan norte” direktang pinepersegir kan hading ini. May mga Saksi na kinukulgan asin ipinepreso huli sa saindang pagtubod. Imbes na matakot an satong mga tugang, an mga ginigibo kan “hadi kan norte” nagpapakusog kan saindang pagtubod. Taano? Huling aram  kan satong mga tugang na an pagpersegir sa mga lingkod nin Diyos kautuban kan mga propesiya ni Daniel. d (Dan. 11:41) An pakaaram ta manungod diyan nakakatabang sa sato na magdanay na masarig an satong paglaom asin integridad.

17. Anong mga kadipisilan an inaagihan kan mga lingkod nin Diyos na nasa irarom kan pamamahala kan “hadi kan timog”?

¹⁷ Direktang pinersegir man kaidto kan “hadi kan timog” an mga lingkod ni Jehova. Halimbawa, kan inot na kabangaan kan ika-20 siglo, dakul sa mga tugang ta an prineso huli sa saindang Kristiyanong neutralidad asin may mga aking Saksi na pinahali sa eskuwelahan huli sa kaparehong dahilan. Pero, sa nakaaging mga dekada, an mga lingkod ni Jehova na nakaistar sa lugar na sakop kan hading iyan nag-agi nin daing gayo risang mga pagbalo sa kaimbudan ninda sa Kahadian nin Diyos. Halimbawa, pag panahon nin eleksiyon, tibaad masugutan an sarong Kristiyano na suportaran an sarong partido sa pulitika o an sarong kandidato. Tibaad dai man siya magboto; pero sa isip asin puso niya, may kinakampihan  siya. Mahalaga nanggad na magdanay kitang neutral sa pulitika bako lang sa ginigibo ta kundi pati man sa satong isip asin pagmati!—Juan 15:18, 19; 18:36.

18. Ano an reaksiyon ta sa paglalabanan kan “hadi kan norte” asin kan kalaban kaini? (Hilingon man an ritrato.)

¹⁸ An mga dai nagtutubod sa mga propesiya sa Bibliya tibaad mahadit na marhay pag nahiling ninda na ‘nakikipagsuagan’ an “hadi kan timog” sa “hadi kan norte.” (Dan. 11:40, nota sa ibaba) An duwang hading ini parehong igwa nin nuklear na mga armas na kayang paraon an gabos na nabubuhay sa daga. Pero aram ta na dai iyan tutugutan ni Jehova na mangyari. (Isa. 45:18) Kaya imbes na makapahadit iyan sa sato, an paglalabanan kan “hadi kan norte” asin kan “hadi kan timog” nakakapakusog kan satong pagtubod. Pinapatunayan kaiyan na harani na an katapusan kan sistemang ini.

19. Ano an dapat na magin sabuot ta manungod sa mga propesiya sa Bibliya?

¹⁹ Dai ta aram kun paano mauutob an nagkapirang mga propesiya sa Bibliya. Dawa si propeta Daniel dai nasabutan an kahulugan kan gabos na isinurat niya. (Dan. 12:8, 9) Pero dai buot sabihon na miling dai ta lubos na nasasabutan kun paano mauutob an sarong propesiya dai na iyan magkakatotoo. Siguradong makakapagtiwala kita ki Jehova na ihahayag niya sa sato an kaipuhan tang maaraman nin eksakto asin sa tamang panahon, arog kan ginibo niya kaidto.—Amos 3:7.

20. Anong nakakaugmang mga propesiya sa Bibliya an madali ta nang mahiling na mautob, asin ano an dapat na padagos tang gibuhon?

²⁰ Sarong pagproklamar nin “katuninungan asin katiwasayan” an mangyayari. (1 Tes. 5:3) Dangan aatakihon kan pulitikal na mga kapangyarihan kan kinaban an palsong relihiyon asin lalaglagon iyan. (Kap. 17:16, 17) Pagkatapos, sasalakayon ninda an banwaan nin Diyos. (Ezek. 38:18, 19) An mga pangyayaring ini masagkod sa pangultimong giyera nin Armagedon. (Kap. 16:14, 16) Makakasigurado kitang mangyayari an mga ini sa dai na mahahaloy. Mantang dai pa iyan nangyayari, padagos tang ipahiling an pagpapasalamat niyato sa satong mamumuton na Ama sa langit paagi sa pagtaong atensiyon sa mga propesiya sa Bibliya asin sa pagtabang sa iba na iyo man an gibuhon.