• “Pagmati ko garo man sana pauruutrong nagsambay an agom ko.”

• “Nakamati ako nin pagkasupog, inisip kong bako akong magayon saka daing halaga.”

• “Dai ko iyan maiistorya sa iba. Pigparatios ko sana iyan.”

• “Pagmati ko dai sako nagmamalasakit si Jehova.”

Ipinapahiling sana kan mga pananaram na iyan kun gurano nagsasakit an agom na babayi pag naghihiling nin pornograpiya an agom niya. Asin kun ginigibo iyan nin pasekreto kan agom niya, tibaad sa laog nin mga bulan o mga taon, puwedeng mamatian niya na dai niya na ini mapagtitiwalaan. Arog kan sinabi nin sarong agom na babayi, “Pig-isip-isip ko: ‘Si’say an lalaking ini na kataid ko? May iba pa daw siyang tinatago sa sako?’”

An artikulong ini ginibo para sa agom na babayi na an agom naghihiling nin pornograpiya. a Tutukaron digdi an mga prinsipyo sa Bibliya na matao saiya nin karangahan, maasigurar saiya kan tabang ni Jehova, asin matabang sa saiya na maka-recover sa emosyonal asin sa espirituwal na paagi. b

Dawa ngani dai mo man puwedeng kontrulon an gabos na ginigibo kan saimong agom, may magigibo ka na mga lakdang para mabawasan an grabeng pagsakit mo asin para magkaigwa ka nin mas matuninong na isip. Pag-isipan an minasunod.

Likayan na basulon an sadiri. Tibaad mamatian kan agom na babayi na may pagkukulang siya kaya naghihiling nin pornograpiya an agom niya. Si Alice c nakamati na bako siyang gayong magayon sa paghiling kan saiyang agom. Inisip niya, ‘Ta’no ta mas gusto pa kan agom ko na maghiling sa ibang mga babayi kisa sako?’ May mga agom na babayi na binabasol an saindang sadiri huli sa reaksiyon ninda, na iniisip na pinapalala ninda an sitwasyon. Si Danielle nagsabi, “Nahiling ko an sadiri ko bilang sarong arangguton na babayi na rinaraot an relasyon ming mag-agom dahil sa bakong sa-Kristiyanong kaanggutan ko.”

Kun arog man kaiyan an namamatian mo, tandaan na dai ka papanimbagon ni Jehova sa mga ginigibo kan agom mo. An Santiago 1:14 nagsasabi: “An lambang saro nababalo pag naguguyod siya asin naaakit kan sadiri niyang pagmawot.” (Roma 14:12;  Fil. 2:12) Imbes na basulon ka ni Jehova, pinapahalagahan niya an kaimbudan mo sa saiya.—2 Cron. 16:9.

Tibaad makatabang man an pakaaram na dai buot sabihon na miling naghihiling an agom na lalaki nin pornograpiya bakong gayong magayon an agom niya. Sinasabi kan mga eksperto manungod sa temang ini na huli sa pornograpiya nagkakaigwa an saro nin dai naiinggustuhan na seksuwal na mga pagmawot na dai kayang paniguan nin siisay man na babayi.

Likayan an sobrang paghadit. Si Catherine nagsabi na an pagparaisip niya na naghihiling na naman an saiyang agom nin pornograpiya nakaapektar na marhay sa saiya. Si Frances nagsabi: “Nahahadit akong marhay pag dai ko aram kun hain si agom. Maghapon ako kaiyan na ninenerbiyos.” Sinasabi kan ibang mga agom na babayi kun gurano sinda nasusupog pag nakakaibahan ninda an mga kapwa Kristiyano na tibaad may aram manungod sa problema kan saindang agom. May iba man na nagsasabi na namamati nindang nagsosolo sinda huling iniisip ninda na mayong nakakasabot sa sitwasyon ninda.

Normal sana an mga namamatian nindang ini. Alagad, kun pagpaparaisipon mo an siring na mga bagay, lalo ka lang mahahadit. Imbes kaiyan, purbaran mong magpokus sa saimong relasyon ki Jehova. An paggibo mo kaiyan matabang sa saimo na magkaigwa nin panglaog na kusog.—Sal. 62:2; Efe. 6:10.

Puwedeng makatabang sa saimo an pagbasa asin paghurop-hurop kan mga pagkasaysay sa Bibliya manungod sa mga babaying nakamati nin sobrang kahaditan pero naranga paagi sa pagdulok ki Jehova sa pamibi. Dai man niya binabago sa gabos na pagkakataon an mga kamugtakan ninda, pero tinawan niya sinda nin katuninungan. Halimbawa, “grabe an pagmundo” ni Hana sa sitwasyon niya. Pero pagkatapos niyang ‘mamibi nin haloy sa atubangan ni Jehova,’ nakamati siya nin katuninungan, maski dai niya pa aram kaidto kun ano an mangyayari sa maabot.—1 Sam. 1:10, 12, 18; 2 Cor. 1:3, 4.

Magpatabang sa mga elder sa kongregasyon. Puwede sindang magin “sarong sirungan sa duros, sarong pailihan sa makusugon na uran.” (Isa. 32:2, mga nota sa ibaba) Puwede pa ngani sindang magrekomendar nin sarong sister na puwedeng masabihan mo kan mga namamatian mo asin makaranga sa saimo.—Tal. 17:17.

Matatabangan mo daw an saimong agom na mapangganahan an kinatudan niya nang paghiling nin pornograpiya? Posible. Sinasabi kan Bibliya na sa pagresolber nin problema o sa pakikipaglaban sa sarong masakit daugon na kaiwal, “mas marahay an duwa kisa sa saro.” (Ecl. 4:9-12) Sigun sa mga pag-aadal, sa parati mas marahay an nagigin resulta pag nagtitinabangan an mag-agom para mapangganahan an adiksiyon sa pornograpiya asin para maibalik giraray an pagtitiwala kan agom na babayi sa saiyang agom.

 Siyempre, nakadependeng marhay iyan sa paghihinguwa asin determinasyon kan saimong agom na mapundo an paghiling niya nin pornograpiya. Nakimahirak na daw siya ki Jehova para sa kusog asin naghagad nin tabang sa mga elder? (2 Cor. 4:7; Sant. 5:14, 15) Nakaisip na daw siya nin mga pamamaagi para makalikay sa sugot—halimbawa, dai paggamit nin mga gadyet asin paglikay sa mga sitwasyon na puwedeng masugutan siya? (Tal. 27:12) Andam daw siyang akuon an saimong tabang asin magin onesto sa saimo sa gabos na bagay? Kun iyo, puwede mo siyang matabangan.

Paano? Pag-isipan an sarong halimbawa. Nagin agom ni Felicia si Ethan, na aki pa lang naadik na sa pagparahiling nin pornograpiya. Ginibo ni Felicia na magin pamugtak an agom niya na makipag-ulay sa saiya pag nasusugutan ini na maghiling nin pornograpiya. Sinabi ni Ethan: “Onesto ako saka sinasabi ko gabos ki agom. Mamumuton niya akong tinatabangan na magbugtak nin mga limitasyon saka pirmi niya akong kinukumusta. Asin tinatabangan niya akong limitaran an pag-Internet.” Normal sana na nakukulugan si Felicia pag naeengganyo si Ethan na maghiling nin pornograpiya. “Pero,” an sabi ni Felicia, “dai man nakakatabang ki agom an mga namamatian kong kaanggutan saka kulog para padagos niyang malikayan an grabe karaot na gibong ini. Pagkatapos ming pag-ulayan an mga problema na inaagihan niya, ako na man an tatabangan niya na makaya ko an kulog na namamatian ko.”

An arog kaiyan na mga pag-uulay dai lang makakatabang sa agom na lalaki na malikayan an paghiling nin pornograpiya kundi makakatabang man sa agom na babayi na magtiwala giraray sa saiya. An totoo, pag sinasabi kan agom na lalaki sa saiyang agom pag nasusugutan siya, kun masain siya, asin kun ano an mga ginigibo niya, ipinapahiling kaiyan na mayo siyang ano man na isinesekreto.

Naniniwala ka daw na matatabangan mo an saimong agom na lalaki sa arog kaiyan na paagi? Kun iyo, taano ta dai nindo basahon na magkaibanan asin pag-ulayan an artikulong ini? An mawot niya iyo na punduhon an paghiling nin pornograpiya asin tawan ka nin basehan para pagtiwalaan mo siya. Imbes na maanggot siya sa ipinapakipag-ulay mo sa saiya na problema, dapat niyang hinguwahon na sabuton kun paano nakakaapektar sa saimo an problema. Kaipuhan mong suportaran an mga paghihinguwa niya asin tawan mo siya nin pagkakataon na maibalik giraray an tiwala mo. Pareho nindo kaipuhan na maaraman kun taano ta nadadara an mga tawo sa paghiling nin pornograpiya asin kun paano iyan mapapangganahan. d

Kun natatakot ka na magresulta sa mainit na pagdiskusyunan an saindong pag-uulay, puwede nindong  pakiulayan an sarong elder, na pamugtak an buot nindo sa saiya, na ibanan nguna kamo sa pag-uulay nindo kan problema. Tandaan na dawa napangganahan na kan saro an adiksiyon sa pornograpiya, tibaad mangaipo nin igong panahon para maibalik giraray an pagtitiwala. Dai sumuko. Humanap nin mga saradit na marahay na nagibo nindo sa saindong relasyon. Asahan na sa paglihis nin panahon asin sa pagpapasensiya nindo, makusog giraray an pag-ibanan nindong mag-agom.—Ecl. 7:8; 1 Cor. 13:4.

Kun an saimong agom minabalik pa man giraray sa paghiling nin pornograpiya, buot daw sabihon kaiyan dai siya nagsusulsol o mayo na siyang pag-asa na magbago? Dai man. Tibaad bilog na buhay niyang paglalabanan an problemang ini, lalo na kun nagin adikto na siya. Dawa ngani dakul nang taon niyang napundo an gibong iyan, posibleng bumalik pa man giraray siya sa paghiling nin pornograpiya. Para dai iyan mangyari, kaipuhan niyang magbugtak nin mas istriktong limitasyon sa sadiri niya, na posibleng pinapagdanay pa man giraray an mga pamamaaging ginigibo niya dawa ngani garo baga napundo na niya an gibong iyan. (Tal. 28:14; Mat. 5:29; 1 Cor. 10:12) Kaipuhan niyang patalubuon an bagong “nangingibabaw na dalagan kan . . . isip” asin manudan na “ikaungis . . . an maraot”—an pornograpiya saka an ano man na maating gibo arog nin masturbasyon. (Efe. 4:23; Sal. 97:10; Roma 12:9) Andam daw siyang gibuhon an mga paghihinguwang ini? Kun iyo, may pag-asa pa siyang magbago. e

Pero, paano kun habo kan saimong agom na mapangganahan an gibong iyan? Natural sanang makakamati ka sa parati nin pagkadisganar saka pagkaanggot, asin mamamatian mo na trinaydor ka. Hinguwahon na magkaigwa nin katuninungan nin isip paagi sa pagpabaya kaiyan ki Jehova. (1 Ped. 5:7) Padagos na rumani ki Jehova paagi sa pag-adal, pagpamibi, asin paghurop-hurop. Mantang ginigibo mo iyan, makakasigurado ka na padagos man siyang marani sa saimo. Arog kan sinasabi sa Isaias 57:15, siya nag-iirok kaiba kan mga nakakamati na sinda “runot” asin “hamak,” na pinapakusog giraray an saindang espiritu. Hinguwahon sa pinakamakakaya mo na magin pinakamarahay na Kristiyano. Magpatabang sa mga elder. Asin dai mawaran nin paglaom na sa maabot na panahon, tibaad udok sa pusong magbago an agom mo.—Roma 2:4; 2 Ped. 3:9.