ARTIKULONG PAG-AADALAN 31
KANTA 12 Dakulang Diyos na Jehova
An Ginibo ni Jehova Para Iligtas an Makasalan na Katawuhan
“An Diyos namuot na gayo sa kinaban kaya itinao niya an saiyang bugtong na Aki.”—JUAN 3:16.
POKUS
Kun ano an mga ginigibo ni Jehova para tabangan kitang malabanan an kasalan asin kun paano niya pinagin posible na magkaigwa kita nin buhay na daing sagkod na mayo nang kasalan.
1-2. (a) Ano an kasalan, asin paano kita manggagana sa pakikipaglaban ta diyan? (Hilingon man an “Paliwanag Dapit sa Tataramon.”) (b) Ano an pag-uulayan ta sa artikulong ini asin sa iba pang mga artikulo sa isyung ini kan An Torrengbantayan? (Hilingon man an “Mensahe Para sa mga Parabasa” sa isyung ini.)
GUSTO mo daw na maaraman kun gurano ka kanamumutan kan Diyos na Jehova? Uni an marahay na paagi para maaraman mo an simbag: Pag-adalan kun ano an ginibo niya tanganing iligtas ka sa kasalan asin kagadanan. An kasalan a sarong makatakot na kaiwal na dai mo madadaog na ika sana. Gabos kita nagkakasala aroaldaw, asin nagagadan kita huli sa kasalan. (Roma 5:12) Pero may marahay na bareta. Sa tabang ni Jehova, kaya tang madaog an kasalan. Sa katunayan, sigurado na manggagana kita!
2 Mga 6,000 na taon nang tinatabangan kan Diyos na Jehova an mga tawo na malabanan an kasalan. Taano? Huling namumutan niya kita. Puon pa kan lalangon niya kitang mga tawo namumutan niya na kita, kaya dakulon siyang ginibo para tabangan kita sa pakikipaglaban na ini. Aram kan Diyos na an kasalan minaresulta sa kagadanan, asin habo niyang magadan kita. Gusto niyang mabuhay kita nin daing katapusan. (Roma 6:23) Iyan an gusto niya para saimo. Sa artikulong ini, pag-uulayan ta an tulong hapot: (1) Paano ni Jehova tinawan nin paglaom an makasalan na katawuhan? (2) Kan mga panahon kan Bibliya, ano an ginibo kan makasalan na katawuhan tanganing makamtan an pag-uyon ni Jehova? (3) Ano an ginibo ni Jesus para iligtas an makasalan na katawuhan?
ANONG PAGLAOM AN ITINAO NI JEHOVA SA MAKASALAN NA MGA TAWO?
3. Paano nagin makasalan an satong inot na mga magurang?
3 Kan lalangon ni Jehova an inot na lalaki saka babayi, gusto niyang magin maugma sinda. Tinawan niya sinda nin magayon na istaran, regalong pag-inaguman, asin nin kawili-wiling asignasyon. An daga papanuon ninda kan saindang mga gikan, asin an bilog na planeta gigibuhon nindang paraiso arog kan hardin nin Eden. Tinawan niya sinda nin saro sanang simpleng pagbuot. Asin pinatanidan niya sinda na kun babalgahon ninda an pagbuot na iyan paagi sa tuyong pagrebelde sa saiya, an saindang kasalan maresulta sa kagadanan. Aram niyato kun ano an nangyari. Sarong dai nahihiling na espiritu, na daing pagkamuot sa Diyos o sa sainda, an naglaog sa eksena asin tinentaran sindang gibuhon an kasalan na iyan. Nagpadara si Adan asin Eva sa maraot na impluwensiyang iyan. Huling dai sinda nagtiwala sa saindang mamumuton na Ama, nagkasala sinda. Arog kan aram ta, nagkatotoo an mga tataramon ni Jehova. Puon kan aldaw na idto, kaipuhan na nindang atubangon an mga konsekwensiya: nagpuon sindang maggurang, asin sa katapos-tapusi nagadan.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Taano ta nauungis si Jehova sa kasalan asin taano ta tinatabangan niya kita na malabanan iyan? (Roma 8:20, 21)
4 Ipinasurat ni Jehova an nakakamundong salaysay na ini para sa kapakinabangan ta. Tinatabangan kita kaiyan na masabutan kun taano ta ikinakaungis niyang marhay an kasalan. An kasalan isinusuway kita sa satong Ama, asin minaresulta iyan sa kagadanan. (Isa. 59:2) Iyan an dahilan kun taano ta si Satanas, an rebeldeng espiritu na promotor kan gabos na problemang ini, gustong-gusto an kasalan asin padagos na tinetentaran an mga tawo. Posibleng iniisip niyang nagibo niya an gusto niya kaidto sa Eden. Pero dai niya nasabutan kun gurano kamamumuton si Jehova. Nungkang binago nin Diyos an saiyang katuyuhan para sa mga gikan ni Adan asin Eva. Namumutan niya an mga tawo, kaya nagtao tulos siya nin paglaom para sa gabos. (Basahon an Roma 8:20, 21.) Aram ni Jehova na may mga gikan sinda na madesisyon na mamutan siya asin mahagad nin tabang sa saiya sa pakikipaglaban sa kasalan. Asin bilang saindang Ama asin Kaglalang, magibo siya nin paagi para mapatalingkas sinda sa kasalan asin magin harani sa saiya. Ano an gigibuhon ni Jehova para magin posible an gabos na iyan?
5. Kasuarin inot na tinawan ni Jehova nin paglaom an makasalan na katawuhan? Ipaliwanag. (Genesis 3:15)
5 Basahon an Genesis 3:15. Sa inot na pagkakataon, tinawan ni Jehova nin paglaom an makasalan na katawuhan kan ideklarar niya an saiyang sentensiya ki Satanas paagi sa propesiyang ini. Idineklarar niya an saiyang sentensiya ki Satanas. Ihinula nin Diyos na paagi sa sarong “gikan,” magkakaigwa nin paglaom an katawuhan. An gikan na ini an marunot ki Satanas pag-abot nin panahon asin mahali kan gabos na karatan na kagigibuhan ni Satanas sa Eden. (1 Juan 3:8) Pero, an gikan na iyan makakaeksperyensiya nin kasakitan. Aatakihon siya ni Satanas, na maresulta sa saiyang kagadanan. Makukulgan na marhay kaiyan si Jehova. Pero magigin sulit nanggad an kulog na iyan dahil dakulon na tawo an maililigtas sa kasalan asin kagadanan.
PAANO NAKAMTAN KAN MAKASALAN NA MGA TAWO KAN MGA PANAHON KAN BIBLIYA AN PAG-UYON NI JEHOVA?
6. Ano an ginibo kan mga lalaking may makusog na pagtubod, arog ni Abel asin Noe, tanganing magin harani ki Jehova?
6 Sa suminurunod na siglo, luway-luway na lininaw ni Jehova kun paano puwedeng magin harani sa saiya an makasalan na katawuhan. Si Abel, an ikaduwang aking lalaki ni Adan asin Eva, iyo an inot na tawong nagpahiling nin pagtubod ki Jehova pagkatapos kan rebelyon sa Eden. Huling namutan ni Abel si Jehova asin gusto niyang mapaugma Siya saka magin harani sa Saiya, nagdulot siya nin atang. Si Abel sarong pastor, kaya nagkua siya nin nagkapirang ugbon na kordero asin binuno iyan, dangan iinatang iyan ki Jehova. Ano an nagin reaksiyon ni Jehova? “Nauyunan ni Jehova si Abel asin an dulot kaini.” (Gen. 4:4) Inuyunan man ni Jehova an kaagid kaiyan na mga atang kan mga tawong nagpahiling nin pagkamuot asin pagtitiwala sa saiya—arog ni Noe. (Gen. 8:20, 21) Paagi sa pag-ako sa siring na mga atang, ipinahiling ni Jehova na puwedeng makamtan kan makasalan na katawuhan an saiyang pag-uyon asin magin harani sa saiya. b
7. Ano an manunudan ta sa pagigin andam ni Abraham na iatang an saiya mismong aki?
7 May ipinagibo si Jehova ki Abraham na sarong lalaking may pambihirang pagtubod na sarong bagay na dipisilon na marhay—an idulot bilang atang an saiya mismong aki na si Isaac. Siguradong para ki Abraham, ini na an pinakamasakit asin pinakamakulog na bagay na ipinapagibo sa saiya. Minsan siring, nagpreparar siya para gibuhon iyan. Pero kaidto mismong gagadanon na ni Abraham an saiyang aki, pinugulan siya nin Diyos. An halimbawang iyan may itinutukdong mahalagang marhay na katotoohan sa gabos na tawong may makusog na pagtubod—si Jehova andam na iatang an saiya mismong namumutan na Aki. Arog kaiyan kanamumutan ni Jehova an mga tawo.—Gen. 22:1-18.
8. Sa ano nagtutukdo an dakul na atang asin dulot na kahagadan kan Katugunan? (Levitico 4:27-29; 17:11)
8 Pakalihis nin mga siglo, sa Katugunan na itinao ni Jehova sa nasyon nin Israel, naghagad siya sa sainda nin dakul na atang asin dulot tanganing mabayadan an mga kasalan kan saiyang banwaan. (Basahon an Levitico 4:27-29; 17:11.) An siring na mga atang nagtutukdo sa sarong nangungurog na atang na lubos na magliligtas sa katawuhan sa saindang kasalan. Pinasabngan an mga propeta nin Diyos na ipaliwanag na an ipinanugang gikan, na saro palan na espesyal na Aki nin Diyos, kaipuhan na magsakit asin magadan. Gagadanon siya siring sa sarong karnerong ginagamit sa pag-atang. (Isa. 53:1-12) Imahinara: Magibo nin areglo si Jehova na iatang an saiya mismong namumutan na Aki tanganing iligtas an katawuhan—kaiba ka—sa kasalan asin kagadanan!
ANO AN GINIBO NI JESUS PARA ILIGTAS KITA?
9. Ano an sinabi ni Juan Bautista manungod ki Jesus? (Hebreo 9:22; 10:1-4, 12)
9 Kan inot na siglo C.E., nahiling kan lingkod nin Diyos na si Juan Bautista si Jesus na taga Nazaret asin sinabi: “Hilinga nindo, an Kordero nin Diyos na naghahali kan kasalan kan kinaban!” (Juan 1:29) An ipinasabong na mga tataramon na ini ipinamidbid si Jesus bilang an haloy nang ihinulang gikan. Itatao niya an saiyang buhay bilang an ipinanugang atang. Sa pagkakataon na ini, urog kisa kasuarin man, igwa na nin makusog na paglaom para sa makasalan na katawuhan—lubos nang madadaog an kasalan.—Basahon an Hebreo 9:22; 10:1-4, 12.
10. Paano ipinahiling ni Jesus na siya “nag-abot . . . tanganing apudon” an mga parakasala?
10 Panginot nang tinawan ni Jesus nin atensiyon an mga tawong nakakamati nin grabeng kamunduan huli sa kasalan asin inimbitaran niya sindang magin mga parasunod niya. Aram niyang an kasalan an pinakagamot kan pagsakit kan katawuhan. Kaya tinabangan niya lalo na an mga lalaki asin mga babaying midbid bilang mga parakasala. Gamit an sarong ilustrasyon, sinabi niya: “An mga tawong marahay an salud dai nangangaipo nin doktor, pero an mga may hilang iyo.” Sinabi niya pa: “Nag-abot ako tanganing apudon, bako an mga tawong matanos, kundi an mga parakasala.” (Mat. 9:12, 13) Inutob ni Jesus an mga tataramon na iyan. Mabuot na pinatawad ni Jesus an mga kasalan kan sarong babayi na hinugasan an mga bitis niya gamit an mga luha kaini. (Luc. 7:37-50) Tinukduan niya nin mahalagang marhay na mga katotoohan an sarong Samaritana sa may bubon, dawa ngani aram niyang imoral an pamumuhay kaini. (Juan 4:7, 17-19, 25, 26) An Diyos tinawan pa ngani nin kapangyarihan si Jesus na halion an ultimong epekto kan gabos na kasalan—an kagadanan. Paano? Nagbuhay liwat si Jesus nin mga tawo—mga lalaki asin babayi, mga aki asin mga adulto.—Mat. 11:5.
11. Taano ta harani an buot ki Jesus kan makasalan na mga tawo?
11 Bakong makangangalas na harani an buot ki Jesus dawa kan mga tawong naggigibo nin kasalan. Pinahilingan niya sinda nin pagkahirak asin empatiya. Dai sinda nag-alangan na magdulok sa saiya. (Luc. 15:1, 2) Asin kinomendaran saka tinawan ni Jesus nin balos an siring na mga indibidwal dahil nagpahiling sinda nin pagtubod sa saiya. (Luc. 19:1-10) Paagi sa saiyang halimbawa, lubos niyang naipahiling kun gurano kamahihirakon an saiyang Ama. (Juan 14:9) Sa tataramon asin gibo, ipinahiling niya na an saiyang mapagmakulog asin mahihirakon na Ama namumutan an mga tawo asin gustong tabangan an lambang saro sa sainda na manggana sa pakikipaglaban sa kasalan. Tinabangan ni Jesus an makasalan na mga tawo na magmawot na baguhon an saindang pamumuhay asin na magin parasunod niya.—Luc. 5:27, 28.
12. Ano an itinukdo ni Jesus manungod sa saiya mismong kagadanan?
12 Aram ni Jesus kun ano an mangyayari sa saiya. Bako sanang sarong beses niyang sinabi sa mga parasunod niya na tatrayduron siya asin gagadanon sa hariging pasakitan. (Mat. 17:22; 20:18, 19) Aram niya na hahalion kan saiyang atang an kasalan kan kinaban, arog kan iprinoklamar ni Juan asin kan ihinula kan mga propeta. Itinukdo man ni Jesus na pagkatapos niyang itao an saiyang buhay, “irarani [niya sa saiya] an gabos na klase nin tawo.” (Juan 12:32) Puwedeng mapaugma si Jehova kan makasalan na mga tawo paagi sa pag-ako ki Jesus bilang saindang Kagurangnan asin paagi sa pagsunod sa saiyang mga lakad. Kun gigibuhon ninda iyan, sinda magigin nang ‘talingkas sa kasalan.’ (Roma 6:14, 18, 22; Juan 8:32) Kaya gikan sa buot asin kusog-buot na inatubang ni Jesus an saiyang makulugon na kagadanan.—Juan 10:17, 18.
13. Paano nagadan si Jesus, asin ano an itinutukdo sa sato kan saiyang kagadanan manungod ki Jehova? (Hilingon man an ritrato.)
13 Si Jesus trinaydor, inaresto, ininsulto, pinakaraot, hinatulan na nagkasala, asin pinasakitan pa ngani. Dinara siya kan mga suldados sa lugar na paggagadanan sa saiya asin ipinako siya sa hariging pasakitan. Mantang maimbod niyang tinatagalan an gabos na kulog asin pagsakit na iyan, igwa nin Saro na mas lalo nang nakukulgan—an Diyos na Jehova. Nagpugol si Jehova na gamiton an saiyang daing limiteng kapangyarihan asin dai siya nag-interbenir. Taano? Ano an puwedeng magpahiro sa sarong mamumuton na Ama na gibuhon iyan? Saro lang na tataramon: pagkamuot. Sinabi ni Jesus: “An Diyos namuot na gayo sa kinaban kaya itinao niya an saiyang bugtong na Aki, tanganing an lambang nagtutubod sa saiya dai malaglag kundi magkaigwa nin buhay na daing katapusan.”—Juan 3:16.
Sa pagtugot ni Jehova na gadanon an saiyang Aki, grabeng kulog an namatian niya tanganing mapatalingkas kita sa kasalan asin kagadanan (Hilingon an parapo 13)
14. Ano an itinutukdo sa saimo kan atang ni Jesus?
14 An atang ni Jesus iyo an pinakadakulang patunay na namumutan na marhay ni Jehova an mga gikan ni Adan asin Eva. Pinapatunayan kaiyan na namumutan kang marhay ni Jehova. Dakulon siyang ginibo asin isinakripisyo, tinagalan niya an pinakagrabeng kulog na maiimahinar ta tanganing iligtas ka sa kasalan asin kagadanan. (1 Juan 4:9, 10) Iyo, gusto niyang tabangan an lambang saro sa sato na malabanan an kasalan—asin manggana!
15. Ano an kaipuhan nanggad niyatong gibuhon tanganing makinabang sa regalo nin Diyos na atang na pantubos ni Jesus?
15 An regalo nin Diyos, an atang na pantubos kan saiyang bugtong na Aki, nagpagin posible para sa sato na mapatawad an satong mga kasalan. Pero tanganing mag-ako kan pagpapatawad nin Diyos, dapat na may gibuhon kita. Ano iyan? Itinao ni Juan Bautista dangan ni Jesu-Cristo mismo an simbag: “Magsurulsol kamo, huli ta an Kahadian kan kalangitan harani na.” (Mat. 3:1, 2; 4:17) Kaya kaipuhan nanggad an pagsulsol kun talagang gusto tang malabanan an kasalan asin magin harani sa satong mamumuton na Ama. Alagad ano an kalabot sa pagsulsol, asin paano iyan makakatabang sa sato na malabanan an satong pagigin makasalan? Sisimbagon iyan sa sunod na artikulo.
KANTA 18 Nagpapasalamat Huli sa Pantubos
a PALIWANAG DAPIT SA TATARAMON: Sa Bibliya, an tataramon na “kasalan” puwedeng nanunungod sa salang mga gibo, sa pamumuhay o paggawi na bakong kauyon kan mga pamantayan ni Jehova sa moral. Pero an tataramon na “kasalan” puwede man na magpanungod sa bakong perpekto, o makasalan, na kamugtakan na minana ta ki Adan. An minanang kasalan iyo an dahilan kaya gabos kita nagagadan.
