1. Ano an gusto ni Jehova para sa gabos na tawo?

 LINALANG ni Jehova an tawo na igwa nin libertad na magdesisyon. Pirmi mong ginagamit an regalong iyan pag nagdedesisyon ka. An pinakamahalagang desisyon na puwedeng gibuhon nin siisay man na tawo iyo an pagdusay kan saiyang sadiri ki Jehova asin na magin parte kan Saiyang pamilya nin mga parasamba. Gusto ni Jehova na gibuhon iyan kan gabos. Taano? Huling namumutan niya an mga tawo asin an gusto niya iyo an pinakamarahay para sa sainda. Gusto niyang magin amigo ninda siya asin na mabuhay sinda nin daing katapusan.​—Deu. 30:​19, 20; Gal. 6:​7, 8.

2. Ano an namamatian ni Jehova manungod sa nagsusulsol na mga nagkasala? (1 Juan 2:1)

² Pero, dai pinipirit ni Jehova an siisay man na maglingkod sa saiya. Ipinapabaya niya sa lambang saro sa sato an pagdedesisyon kun ano an gigibuhon ta. Paano kun balgahon nin sarong bawtisadong Kristiyano an pagbuot nin Diyos asin makagibo nin magabat na kasalan? Kun dai siya magsulsol, dapat siyang halion sa kongregasyon. (1 Cor. 5:13) Pero dawa pa arog kaiyan, udok nanggad na naglalaom si Jehova na bumalik sa Saiya an nagkasala. Sa katunayan, sarong mahalagang dahilan iyan kun taano ta itinao niya an pantubos—tanganing magin posible na mapatawad an nagsusulsol na mga nagkasala. (Basahon an 1 Juan 2:1.) An satong mamumuton na Diyos mabuot na nakikiulay sa mga nagkasala, na dinadagka sindang magsulsol.​—Zac. 1:3; Roma 2:4; Sant. 4:8.

3. Ano an pag-uulayan ta sa artikulong ini?

³ Gusto ni Jehova na arugon ta an pagmansay niya manungod  sa kasalan asin sa mga nakagibo nin magabat na kasalan. Pag-uulayan sa artikulong ini kun paano ta iyan magigibo. Mantang binabasa mo an artikulong ini, aramon (1) kun paano inasikaso sa kongregasyon sa Corinto kan inot na siglo an sarong kaso nin magabat na pagkakasala, (2) kun anong instruksiyon an itinao ni apostol Pablo kan magsulsol an sarong nagkasala, asin (3) kun ano an ihinahayag kan salaysay na ini sa Bibliya manungod sa pagmansay ni Jehova sa mga Kristiyanong naggigibo nin magabat na kasalan.

KUN PAANO INASIKASO KAN INOT NA SIGLO AN SARONG KASO NIN MAGABAT NA PAGKAKASALA

4. Nagkaigwa nin anong problema sa kongregasyon sa Corinto kan inot na siglo? (1 Corinto 5:​1, 2)

⁴ Basahon an 1 Corinto 5:​1, 2. Durante kan ikatulong pagbiyahe ni Pablo bilang misyonero, may nakaabot saiyang marauton na bareta manungod sa bago pa sanang maestablisar na kongregasyon sa Corinto. Sarong tugang na lalaki sa kongregasyon na iyan an nagkakaigwa nin seksuwal na relasyon sa saiyang madrasta. An paggawing iyan labi-labi karaot asin “dai piggigibo maski ngani kan mga tawo kan mga nasyon”! Pero dai sana kinunsinti kan kongregasyon an saiyang paggawi kundi tibaad ipinag-orgulyo pa an ipinapahiling nindang pagkunsinti diyan. Inisip gayod kan nagkapira sa sainda na ipinapahiling kaiyan kun gurano kamahihirakon saka kamapagsabot an Diyos sa bakong perpektong mga tawo. Pero dai kinukunsinti ni Jehova an salang gibo sa tahaw kan saiyang banwaan. Huli sa daing pakundangan na paggawi kan lalaki, siguradong nararaot niya an marahay na reputasyon kan kongregasyon. Tibaad naiimpluwensiyahan niya na man an iba pang mga Kristiyano na nakikiiba-iba sa saiya. Kaya anong instruksiyon an itinao ni Pablo sa kongregasyon?

5. Ano an sinabi ni Pablo na gibuhon kan kongregasyon, asin ano an buot niyang sabihon? (1 Corinto 5:13) (Hilingon man an ritrato.)

⁵ Basahon an 1 Corinto 5:13. Paagi sa pasabong nin Diyos, naggibo si Pablo nin sarong surat na nagtataong instruksiyon na dapat halion sa kongregasyon an dai nagsusulsol na nagkasala. Paano dapat trataron kan maimbod na mga Kristiyano an nagkasala? Sinabihan sinda ni Pablo “na ipundo . . . an pakikiiba-iba” sa saiya. Sinabi pa niya na dai ninda dapat gibuhon “maski an magkakan kaiba kan tawong iyan.” (1 Cor. 5:11) Taano? Huling an pagkakan kaiba nin saro puwedeng madalion sanang magresulta sa urog pang pakikiiba-iba. Ano an magigin mga pakinabang kun mapundo an kongregasyon sa pakikiiba-iba sa nagkasala? Mapoprotektaran kaiyan an kongregasyon sa  saiyang nakakaraot na impluwensiya. (1 Cor. 5:​5-7) Dugang pa, puwede man ining makatabang na marealisar niya kun gurano na siya naparayo sa dalan ni Jehova, saka tibaad makamati siya nin pagkasupog asin mapahirong magsulsol.

6. Ano an nagin reaksiyon kan kongregasyon asin kan nagkasala sa surat ni Pablo?

⁶ Pakapadara niya kan saiyang surat sa mga Kristiyano sa Corinto, inisip-isip ni Pablo kun ano daw kaya an magigin reaksiyon diyan kan kongregasyon. Kan huri, may ibinareta sa saiya si Tito na nakapaugmang marhay ki Pablo. Positibo an nagin reaksiyon kan kongregasyon sa surat niya. (2 Cor. 7:​6, 7) Nagsunod sinda sa saiyang instruksiyon. Apuwera kaiyan, sa mga bulan na naglihis puon kan ipadara ni Pablo an surat, nagsulsol an nagkasala sa saiyang makasalan na gibo! Binago niya an saiyang  paggawi saka kaisipan asin nagpuon na magsunod sa matanos na mga pamantayan ni Jehova. (2 Cor. 7:​8-11) Ano an sunod na instruksiyon ni Pablo sa kongregasyon?

KUN PAANO DAPAT TRATARON KAN KONGREGASYON AN NAGSUSULSOL NA NAGKASALA

7. Ano an marahay na nagin resulta kan halion sa kongregasyon an nagkasala? (2 Corinto 2:​5-8)

⁷ Basahon an 2 Corinto 2:​5-8. Sinabi ni Pablo na “tama na para sa siring na tawo an pagsaway na ini kan kadaklan.” Sa ibang pagtaram, nagibo na kan disiplina an katuyuhan kaiyan sa saiya. Anong katuyuhan? Tanganing siya magsulsol.​—Heb. 12:11.

8. Ano an sunod na sinabi ni Pablo na gibuhon kan kongregasyon?

⁸ Huli kaiyan, ininstruksiyunan ni Pablo an kongregasyon: “Patawadon nindo . . . nin may kabuutan asin rangahon” an nagkasalang tugang, asin “siyertuhon nindo sa saiya na namumutan nindo siya.” Mangnuhon na gusto ni Pablo na dai lang basta akuon kan kongregasyon an lalaki. Gusto ni Pablo na asiguraron ninda an nagsusulsol na lalaki paagi sa saindang mga tataramon, paghiro, asin gibo na talagang pinatawad na ninda siya asin na namumutan ninda siya. Paagi kaiyan, malinaw nindang ipinapahiling na maugma nindang inaako an pagbabalik niya sa kongregasyon.

9. Taano ta posibleng may mga nagduwa-duwa na patawadon an nagsulsol nang nagkasala?

⁹ Igwa daw sa kongregasyon na iyan nin mga nagduwa-duwang akuon an pagbabalik kan nagsulsol nang nagkasala? Mayong sinasabi an salaysay, pero posible iyan. Siyempre, an ginibo niya nagdara nin problema sa bilog na kongregasyon asin tibaad pati man nin kasusupgan sa partikular na mga indibidwal. Tibaad inisip kan iba na bakong makatanusan na mainit na akuon bilang tugang an lalaki mantang sinda su grabe an pagmamaigot na magdanay na malinig sa moral. (Ikumparar an Lucas 15:​28-30.) Pero taano ta mahalaga na magpahiling an kongregasyon nin tunay na pagkamuot sa saindang nagsulsol nang tugang?

10-11. Ano an puwedeng mangyari kun habong patawadon kan mga elder an nagsusulsol na nagkasala?

¹⁰ Imahinara kun ano an puwedeng mangyari kun habo kan kamagurangan o kan mga elder na ibalik sa kongregasyon an nagsusulsol na lalaking idto o kun pagkatapos siyang ibalik, habo kan kongregasyon na pahilingan siya nin pagkamuot. Tibaad mapangibabawan siya nin “sobrang kamunduan.” Tibaad mamatian niyang mayo na siyang pag-asa. Tibaad ipundo niya pa ngani an mga ginigibo niyang paghihinguwa na maibalik an marahay na relasyon niya sa Diyos.

¹¹ An mas grabe pa, kun habo kan iba pang mga tugang sa kongregasyon na patawadon an nagsusulsol na nagkasala, maisasapeligro ninda an sainda mismong relasyon ki Jehova. Taano? Huling an maipapabanaag ninda, bako an pagigin mapagpatawad ni Jehova sa mga nagsusulsol na nagkasala, kundi an maringis asin daing hirak na ugali ni Satanas. Garo man sana sinda nagigin mga kasangkapan na puwedeng gamiton kan Diyablo tanganing rauton an espirituwalidad kan lalaki.​—2 Cor. 2:​10, 11; Efe. 4:27.

12. Paano maaarog kan kongregasyon si Jehova?

¹² Kaya paano maaarog kan kongregasyon sa Corinto si Jehova, bako si Satanas? Paagi sa pag-arog ki Jehova sa kun paano niya tinatratar an nagsusulsol na mga nagkasala. Mangnuhon kun ano an sinabi kan nagkapirang kagsurat kan Bibliya manungod ki Jehova. Siya “marahay asin andam na magpatawad,” an sabi ni David. (Sal. 86:5) Isinurat ni Mikas: “Siisay an Diyos na arog mo, na nagpapatawad sa pagkakasala asin nagpapalampas sa paglapas?” (Mik. 7:18) Asin si Isaias nagsabi: “Bayaan kan maraot na tawo an saiyang dalan asin kan  paragibo nin maraot an saiyang mga kaisipan; magbalik siya ki Jehova, na mahihirak sa saiya, sa satuyang Diyos, huling bulaos siyang magpapatawad.”​—Isa. 55:7.

13. Taano ta tama sanang dai pinahaloy na ibinalik sa kongregasyon an lalaki? (Hilingon an kahon na “ Kasuarin an Lalaki Ibinalik sa Kongregasyon sa Corinto?”)

¹³ Tanganing maarog si Jehova, kaipuhan kan kongregasyon sa Corinto na akuon giraray an nagsusulsol na lalaki asin asiguraron sa saiya na namumutan ninda siya. Paagi sa pagsunod sa instruksiyon ni Pablo na akuon giraray an nagsusulsol na nagkasala, ipinahiling kan kongregasyon na sinda “masinunod . . . sa gabos na bagay.” (2 Cor. 2:9) Totoo na mga pirang bulan pa sana an naglihis kan halion siya sa kongregasyon, alagad an disiplinang iyan nakapahiro sa saiya na magsulsol. Kaya mayo nin dahilan na pahaluyon pa an pagbabalik sa saiya sa kongregasyon.

PAGPABANAAG KAN HUSTISYA ASIN PAGKAHIRAK NI JEHOVA

14-15. Ano an nanudan niyato sa kun paano inasikaso an kaso nin pagkakasala sa suanoy na Corinto? (2 Pedro 3:9) (Hilingon man an ritrato.)

¹⁴ An salaysay manungod sa kun paano inasikaso an kasong idto sa suanoy na Corinto isinurat asin iningatan “para sa pagtukdo sa sato.” (Roma 15:4) Sa salaysay na iyan, nanudan niyato na dai kinukunsinti ni Jehova an magabat na pagkakasala sa tahaw kan saiyang banwaan. Dai niya man inaako an kaisipan na an mga nagkasalang dai nagsusulsol dapat na pahilingan  nin “pagkahirak” paagi sa pagtugot na padagos sindang makiasosyar sa saiyang maimbod na mga parasamba. Mahihirakon si Jehova, pero bako siyang kunsintidor; dai niya man ibinababa an saiyang mga pamantayan. (Jud. 4) Kun tinugutan ni Jehova na magdanay sa kongregasyon an dai nagsusulsol na mga nagkasala, bako iyan pagkahirak huling maisasapeligro kaiyan an bilog na kongregasyon.​—Tal. 13:20; 1 Cor. 15:33.

¹⁵ Pero nanudan niyato na habo ni Jehova na malaglag an siisay man. Gusto niyang magligtas nin mga tawo pag posible. Nagpapahiling siya nin pagkahirak sa mga tawong binago na an saindang kaisipan saka paggawi asin gustong maibalik an marahay na relasyon sa saiya. (Ezek. 33:11; basahon an 2 Pedro 3:9.) Kaya kan an lalaki sa Corinto magsulsol asin talikdan an saiyang makasalan na pamumuhay, ginamit ni Jehova si Pablo tanganing ipaliwanag sa kongregasyon na dapat nindang patawadon an lalaki asin akuon giraray ini.

16. Ano an namamatian mo manungod sa kun paano inasikaso an kaso sa Corinto?

¹⁶ Natabangan kita kan pagrepaso niyato sa kun paano inasikaso an kaso sa Corinto na maaraman kun paano si Jehova nagpapahiling nin pagkamuot, katanusan, asin hustisya. (Sal. 33:5) Bako daw na napapahiro ka kaiyan na urog pang tawan nin pag-umaw an satuyang Diyos? Tutal, gabos kita—an lambang saro sa sato—makasalan, asin kaipuhan ta an saiyang pagpapatawad. An lambang saro sa sato may dahilan na magpasalamat ki Jehova huli sa pantubos, na nagpagin posible na mapatawad kita. Nakakaranga asin nakakapakusog nanggad na maaraman na talagang namumutan ni Jehova an saiyang mga lingkod asin an gusto niya iyo an pinakamarahay para sa sainda!

17. Ano an pag-uulayan sa masurunod na artikulo?

¹⁷ Pero paano inaasikaso sa ngunyan an mga kaso nin pagkakasala? Paano maipapabanaag kan mga elder sa kongregasyon an pagmawot ni Jehova na matabangan an nagkasala na magsulsol? Ano an dapat na magin reaksiyon kan kongregasyon pag nagdesisyon an mga elder na halion o ibalik sa kongregasyon an saro? Pag-uulayan an mga hapot na ini sa masurunod na artikulo.