ARTIKULONG PAG-AADALAN 34
KANTA 107 An Diyos Arugan nin Pagkamuot
Kun Paano Maipapahiling an Pagkamuot Asin Pagkahirak sa mga Nagkasala
“Dahil sa saiyang kabuutan, hinihinguwa nin Diyos na matabangan kang magsulsol.”—ROMA 2:4.
POKUS
Kun paano hinihinguwa kan mga elder na tabangan an mga indibidwal sa kongregasyon na nakagibo nin magabat na kasalan.
1. Ano an puwedeng mangyari pagkatapos na makagibo nin magabat na kasalan an saro?
SA SINUNDAN na artikulo, nahiling ta kun paano inasikaso ni apostol Pablo an sarong kaso nin magabat na pagkakasala sa Corinto. An nagkasala dai nagsusulsol asin kinaipuhan na halion sa kongregasyon. Minsan siring, arog kan ipinapahiling kan satong temang teksto, may mga nakagibo nin magabat na kasalan na puwedeng matabangan. Puwede sindang mapahiro na magsulsol. (Roma 2:4) Paano sinda matatabangan kan mga elder na magsulsol?
2-3. Ano an dapat niyatong gibuhon kun maaraman tang nakagibo nin magabat na kasalan an sarong kapagtubod, asin taano?
2 Tanganing makatao nin tabang an mga elder, kaipuhan nindang maaraman kun ano an problema. Kaya, ano an dapat tang gibuhon kun maaraman niyato na an sarong kapagtubod nakagibo nin magabat na kasalan—kasalan na puwedeng magin dahilan na halion siya sa kongregasyon? Dapat tang dagkahon an nagkasala na magdulok sa mga elder para sa tabang.—Isa. 1:18; Gibo 20:28; 1 Ped. 5:2.
3 Pero, paano kun habo kan nagkasala na makipag-ulay sa mga elder? Kun arog kaiyan, kita na mismo an madulok sa mga elder tanganing masigurado na matawan siya kan kinakaipuhan na tabang. Pagpahiling iyan nin pagkamuot huling habo tang mawara an satong tugang. Kun nagpapadagos siya sa paggibo nin sala, lalo niyang mararaot an relasyon niya ki Jehova. Puwede man niyang maraot an reputasyon kan kongregasyon. Kaya kusog-buot kitang mahiro huli sa pagkamuot ta ki Jehova asin sa nagkasala.—Sal. 27:14.
KUN PAANO TINATABANGAN KAN MGA ELDER AN MGA NAKAGIBO NIN MAGABAT NA KASALAN
4. Ano an pasuhan kan mga elder pag nakikipag-ulay sa saro na nakagibo nin magabat na kasalan?
4 Pag may saro sa kongregasyon na nakagibo nin magabat na kasalan, an grupo nin kamagurangan mapili sa sainda nin tulong kuwalipikadong brother na magseserbing komite. a An mga lalaking ini kaipuhan na hababa an buot asin mapakumbaba. Bagaman hinihinguwa nindang tabangan an nagkasala na magsulsol, nasasabutan ninda na dai ninda puwedeng piriton an saro na magbago. (Deu. 30:19) Aram kan mga elder na bakong gabos na nagkasala magsusulsol, arog ni Hading David. (2 Sam. 12:13) May mga nagkasala na tibaad baliwalaon an konseho ni Jehova. (Gen. 4:6-8) Dawa arog kaiyan, an pasuhan kan mga elder iyo na tabangan an nagkasala na magsulsol, sagkod na posible. Anong mga prinsipyo an naggigiya sa sainda mantang nakikipag-ulay sa nagkasala?
5. Anong sadol an isinasaisip kan mga elder pag nakikipag-ulay sinda sa nagkasala? (2 Timoteo 2:24-26) (Hilingon man an ritrato.)
5 Minamansay kan mga elder an nagkasala bilang sarong namumutan na karnero na nawawara. (Luc. 15:4, 6) Kaya, pag nakikipag-ulay sinda sa nagkasala, bako sindang makulog magtaram saka dai ninda siya tinatratar sa bakong mabuot na paagi; ni iniisip man ninda na an pakikipag-ulay na iyan sarong rutina lang na diyan may sinusunod sindang prosedimiyento. Imbes, ipapahiling ninda an mga kuwalidad na mababasa sa 2 Timoteo 2:24-26. (Basahon.) An mga elder nagdadanay na mahuyo, kalmado, asin mabuot mantang hinihinguwa nindang maabot an puso kan nagkasala.
Arog kan suanoy na mga pastor, hinihinguwa kan mga elder na maibalik an nawawarang karnero (Hilingon an parapo 5)
6. Paano inaandam kan mga elder an saindang puso bago an pakikipag-ulay ninda sa nagkasala? (Roma 2:4)
6 Inaandam kan mga elder an saindang puso. Hinihinguwa nindang arugon si Jehova sa gabos nindang ginigibong pagtabang sa nagkasala, na ginigirumdom an mga tataramon ni Pablo: “Dahil sa saiyang kabuutan, hinihinguwa nin Diyos na matabangan kang magsulsol.” (Basahon an Roma 2:4.) Dapat na tandaan kan mga elder na, sa panginot, sinda mga pastor sa irarom kan paggiya kan Cristo. (Isa. 11:3, 4; Mat. 18:18-20) Bago an pakikipag-ulay ninda sa nagkasala, may pagpamibing pag-iisipan kan komite an saindang pasuhan: an matabangan an nagkasala na magsulsol. Ma-research sinda sa Kasuratan asin sa satong mga publikasyon asin mapamibi para maghagad nin pakasabot. Pag-uulayan ninda kun ano an mga kaipuhan nindang maaraman manungod sa nagkasala na tibaad nagin dahilan kaya nagin arog kaiyan an saiyang kaisipan, sabuot, asin paggawi.—Tal. 20:5.
7-8. Paano maaarog kan mga elder an pagpapasensiya ni Jehova pag kinakaulay ninda an sarong nagkasala?
7 Inaarog kan mga elder an pagpapasensiya ni Jehova. Isinasaisip ninda kun paano trinatar ni Jehova an mga nagkasala kaidto. Halimbawa, mapasensiyang nangatanusan si Jehova ki Cain, na pinapatanidan siya manungod sa mga konsekwensiya nin kasalan asin tinatawan nin paglaom na bebendisyunan siya kun makuyog siya. (Gen. 4:6, 7) Tinawan ni Jehova nin konseho si David paagi ki propeta Natan, na naggamit nin sarong ilustrasyon na nakapahiro sa puso kan hadi. (2 Sam. 12:1-7) Asin ‘padagos na isinugo’ ni Jehova nin “pauruutro” an saiyang mga propeta sa masinuway na nasyon nin Israel. (Jer. 7:24, 25) Dai niya na hinalat an saiyang banwaan na magsulsol bago niya sinda tinabangan. Imbes, siya na an nag-inot na dagkahon sinda na magsulsol.
8 Inaarog kan mga elder an halimbawa ni Jehova sa pagtabang ninda sa mga nakagibo nin magabat na kasalan. Arog kan sinambit sa 2 Timoteo 4:2, nangangatanusan sinda “na ginigibo iyan na may dakulang pagpapasensiya” pag kinakaulay an siring na indibidwal. Manungod sa siring na elder, ini an sabi kan sarong study note sa bersikulong iyan: “Kaipuhan niyang pirming magpahiling nin pagpupugol sa sadiri, na mapasensiyang isinasaisip na gusto [kan nagkasala na] gibuhon kun ano an tama. Kun mapadara [an elder] sa pagkauyam o pagkadisganar, [an nagkasala] tibaad dai na lugod maghimati o masingkog pa ngani.”
9-10. Paano matatabangan kan mga elder an nagkasala na isip-isipon an mga bagay na nagin dahilan kan saiyang pagkakasala?
9 Hinihinguwa kan mga elder na aramon an mga sirkumstansiya na nagresulta sa pagkakasala. Halimbawa, luway-luway daw na nagluya an espirituwalidad kan tugang huling napabayaan niya an saiyang personal na pag-adal o an ministeryo? An saiya daw na mga pamibi ki Jehova nagin bibihira na sana o bako nang udok? Nagpadara daw siya sa saiyang salang mga pagmawot? Dai daw siya nagin madunong sa pinipili niyang mga kaiba-iba o libangan? Paano daw nakaapektar sa saiyang puso an siring na mga desisyon? Nasasabutan daw niya kun ano an namamati kan saiyang Amang si Jehova sa mga desisyon asin mga paggawi niya kaining mga nakaagi?
10 Paagi sa paghapot nin makahulugan na mga hapot, na dai naghahagad nin personal na mga detalye na dai man kaipuhan na aramon, mabuot na tinatabangan kan mga elder an nagkasala na isip-isipon an mga bagay na nagin dahilan kan saiyang pagkakasala. (Tal. 20:5) Saro pa, arog kan ginibo ni Natan ki David, puwede sindang gumamit nin mga ilustrasyon tanganing tabangan siyang makapag-isip-isip asin marealisar kun taano ta sala an ginibo niya. Tibaad sa inot na pakikipag-ulay, an nagkasala magpuon nang makamati nin tunay na kamunduan sa nagibo niya. Tibaad magsulsol pa ngani siya.
11. Paano trinatar ni Jesus an mga parakasala?
11 Hinihinguwa kan mga elder na arugon si Jesus. Kan kinakaulay kan binuhay liwat na si Jesus si Saulo na taga Tarso, naggamit siya nin nakakapaisip na hapot: “Saulo, Saulo, taano ta pinepersegir mo ako?” Paagi kaiyan natabangan ni Jesus si Saulo na marealisar na sala an mga ginigibo niya. (Gibo 9:3-6) Asin kun manungod ki “Jezebel,” na nanunungod sa sarong babayi o grupo nin mga babayi na may nakakaraot na impluwensiya sa kongregasyon, sinabi ni Jesus: “Tinawan ko siya nin panahon para magsulsol.”—Kap. 2:20, 21.
12-13. Paano puwedeng tawan kan mga elder nin panahon na magsulsol an nagkasala? (Hilingon man an ritrato.)
12 Bilang pag-arog ki Jesus, dai tulos nagkokongklusyon an mga elder na dai masulsol an sarong nagkasala. An iba tibaad magsulsol durante kan inot na pakikipag-ulay sa sainda kan komite, mantang an iba tibaad mangaipo nin dagdag na panahon. Kaya puwedeng iareglo kan mga elder na makipag-ulay sa nagkasala nin labi sa sarong beses. Tibaad pagkatapos kan inot na pakikipag-ulay, magpuon nang seryosong pag-isipan kan nagkasalang Kristiyano an mga sinabi sa saiya kan mga elder. Tibaad mapakumbaba siyang magdulok ki Jehova sa pamibi. (Sal. 32:5; 38:18) Kaya, sa sunod na pakikipag-ulay, posibleng magin iba na an sabuot kan nagkasala kumpara kaidtong inot na pagkaulay sa saiya.
13 Tanganing matabangan an nagkasala na magsulsol, an mga elder nagpapahiling nin empatiya saka kabuutan. Naglalaom sinda asin namimibi na lugod bendisyunan ni Jehova an saindang mga paghihinguwa asin na tibaad makapag-isip-isip an nagkasalang Kristiyano asin magsulsol.—2 Tim. 2:25, 26.
An mga elder puwedeng makipag-ulay nin labi sa sarong beses sa nagkasala tanganing matawan ini nin panahon na magsulsol (Hilingon an parapo 12)
14. Kiisay maninigong itao an kredito pag an sarong nagkasala magsulsol, asin taano?
14 Kun an nagkasala magsulsol, nakakaugma nanggad iyan! (Luc. 15:7, 10) Kiisay maninigong itao an kredito kaiyan? Sa mga elder daw? Girumdumon an isinurat ni Pablo manungod sa mga parakasala: “Tibaad pa tawan sinda nin Diyos nin oportunidad na magsulsol.” (2 Tim. 2:25) Ini an sabi sa sarong study note sa bersikulong iyan: “Para sa siring na pagbabago nin kaisipan asin sabuot, an kredito kaiyan bako sa kiisay man na tawo, kundi ki Jehova, na nagtabang sa nagkasalang Kristiyano na magbago. Sinambit man ni Pablo an pira sa magagayon na resulta kan siring na pagsulsol—an nagkasala nagkakaigwa nin mas tamang pakasabot sa katotoohan, nagigin tultol giraray an saiyang pag-iisip, asin nakakatabang iyan sa saiya na makadulag sa mga siod ni Satanas.—2 Tim. 2:26.”
15. Paano puwedeng padagos na matabangan kan mga elder an nagsusulsol na nagkasala?
15 Pag an sarong nagkasala magsulsol, an komite maareglo nin mga pagsungko sa pagpastor tanganing an indibidwal na iyan padagos na mag-ako kan tabang na kaipuhan tanganing malabanan an mga siod ni Satanas asin tanganing maitanos niya an saiyang mga dalan. (Heb. 12:12, 13) Siyempre, dai sasabihon kan mga elder sa siisay man an mga detalye kan mga salang ginibo kan nagkasala. Pero ano an tibaad kaipuhan na maaraman kan kongregasyon?
“SAGWION . . . SA ATUBANGAN KAN GABOS NA NAGMAMASID”
16. Uyon sa 1 Timoteo 5:20, sa ano nanunungod an mga “nagmamasid” na sinambit ni Pablo?
16 Basahon an 1 Timoteo 5:20. Isinurat ni Pablo an mga tataramon na iyan para sa kapwa niya elder na si Timoteo may koneksiyon sa kun ano an gigibuhon sa “mga naggigibo nin kasalan.” Ano an buot niyang sabihon? Dai man niya buot sabihon na an bilog na kongregasyon iyo an mga “nagmamasid.” Imbes, an pinapanungdan niya digdi iyo an pirang indibidwal na tibaad nakakaaram na kan kasalan. Puwedeng sinda su mga nakahiling mismo o su mga pigtugaan kan nagkasala. Ipapaaram sa sainda kan mga elder sa pribado na inaksiyunan na an bagay na iyan asin na itinanos na an nagkasala.
17. Kun an sarong magabat na pagkakasala naaraman o posibleng marhay na maaraman kan dakul sa kongregasyon, anong paisi an gigibuhon, asin taano?
17 Sa nagkapirang kaso, an pagkakasala tibaad naaraman o posibleng marhay na maaraman kan dakul sa kongregasyon. Sa arog kaiyan na sitwasyon, kaiba na sa mga “nagmamasid” an bilog na kongregasyon. Kaya ipapaisi nin sarong elder sa kongregasyon na an sarong brother o sister sinagwi. Taano? Ini an sabi ni Pablo: “Bilang patanid sa iba” tanganing dai sinda makagibo nin kasalan.
18. Paano inaasikaso kan mga elder an mga sitwasyon na kalabot an bawtisadong mga menor de-edad? (Hilingon man an ritrato.)
18 Paano kun bawtisadong mga menor de-edad—mga indibidwal na mayo pang 18 anyos—an nakagibo nin magabat na kasalan? Iaareglo kan grupo nin kamagurangan na kaulayon nin duwang elder an menor de-edad kaiba an saiyang Kristiyanong mga magurang. b Aaramon kan mga elder kun ano na an mga ginibo kan mga magurang tanganing tabangan an saindang aki na magsulsol. Kun positibo an sabuot kan menor de-edad sa konseho saiya asin tinatabangan na siya kan saiyang mga magurang, puwedeng magdesisyon an duwang elder na dai na kaipuhan na magsagibo nin dugang pang aksiyon. Tutal, sa mga magurang itinao nin Diyos an paninimbagan na magtao nin mamumuton na pagtatanos sa saindang mga aki. (Deu. 6:6, 7; Tal. 6:20; 22:6; Efe. 6:2-4) Pagkatapos kaiyan, kukumustahon sa pana-panahon kan mga elder an mga magurang tanganing masiguradong natatawan an menor de-edad kan tabang na kinakaipuhan kaini. Pero, paano kun an sarong bawtisadong menor de-edad daing pagsulsol na nagpapadagos sa paggibo nin sala? Sa kasong iyan, sarong komite nin mga elder an makikipag-ulay sa saiya kaiba an saiyang Kristiyanong mga magurang.
Pag sarong menor de-edad an nakagibo nin magabat na kasalan, duwang elder an makikipag-ulay sa saiya kaiba an saiyang Kristiyanong mga magurang (Hilingon an parapo 18)
“SI JEHOVA MAMUMUTON NA MARHAY ASIN MAHIHIRAKON”
19. Paano hinihinguwa kan mga elder na arugon si Jehova pag nagtatabang sa mga nagkasala?
19 An mga elder na naglilingkod sa mga komite igwa nin paninimbagan sa atubangan ni Jehova na pagdanayon na malinig an kongregasyon. (1 Cor. 5:7) Gusto man nindang mapahiro an mga nagkasala na magsulsol kun posible. Mantang nagtatabang, nagdadanay na positibo an mga elder, na padagos na naglalaom na magbabago an indibidwal. Taano? Huling gusto nindang arugon si Jehova, na “mamumuton na marhay asin mahihirakon.” (Sant. 5:11) Mangnuhon kun paano iyan ipinahiling kan may edad nang si apostol Juan. Isinurat niya: “Mga namumutan kong aki, sinusuratan ko kamo kan mga bagay na ini tanganing dai kamo makagibo nin kasalan. Alagad ta kun makagibo man nin kasalan an siisay man, igwa kita nin paratabang na kaibanan kan Ama, si Jesu-Cristo, na sarong matanos.”—1 Juan 2:1.
20. Ano an pag-uulayan ta sa huring artikulo kan seryeng ini?
20 Nakakamundo, may mga pagkakataon na an sarong Kristiyano habong magsulsol. Kun arog kaiyan, dapat siyang halion sa kongregasyon. Ano an ginigibo kan mga elder pag arog kaiyan? Pag-uulayan ta iyan sa huring artikulo kan seryeng ini.
KANTA 103 Mga Pastor—Balaog na mga Lalaki
a Kaidto, an mga grupong ini inaapod na hudisyal na komite. Pero huling an paghusgar saro lang sa mga aspekto kan saindang gibuhon, dai na niyato gagamiton an ekspresyon na iyan. Imbes, aapudon ta na lang an grupong ini na komite nin mga elder.
b An sinasabi digdi manungod sa mga magurang aplikado man sa legal guardian o iba pang tawo na igwa nin sa-magurang na responsabilidad sa sarong menor de-edad.
