Nagsurat si apostol Pablo sa mga Kristiyano sa Tesalonica, na sinasabi: “Kun may siisay man na dai nagsusunod sa mga sinabi mi sa surat na ini, markahan an sarong iyan.” (2 Tes. 3:14) Kaidto, sinasabi niyato na instruksiyon ini para sa mga elder. Kun padagos na binabaliwala kan saro an mga prinsipyo sa Bibliya sa ibong kan pauruutrong konseho sa saiya, tibaad magtao sa kongregasyon an mga elder nin sarong nagpapatanid na pahayag. Pagkatapos kaiyan, an indibidwal na mga parahayag dai na makikiiba-iba sa saro na minarkahan sa mga aktibidad arog kan paglilibang o mga pagturutiripon, apuwera sa satong mga pagtiripon o ministeryo.

Pero, kaipuhan nin pagliliwat. An sadol ni Pablo malinaw na nanunungod sa aksiyon na dapat gibuhon kan indibidwal na mga Kristiyano sa partikular na mga kamugtakan. Kaya dai na kaipuhan kan mga elder na magtao nin nagpapatanid na pahayag. Taano ta kaipuhan na gibuhon an pagliliwat na ini? Pag-isipan an sadol ni Pablo sa konteksto kaiyan.

Sinambit ni Pablo na igwa sa kongregasyon na idto nin nagkapirang indibidwal na “naglalakaw na bakong husay.” Binabaliwala ninda an ipinasabong na mga sadol. Durante kan nainot na pagdalaw ni Pablo, itinao niya an tugon na ini: “Kun an siisay man habong magtrabaho, di dai man siya magkakan.” Alagad, igwa pa man giraray nin nagkapirang habong magtrabaho para suportaran an saindang sadiri, maski ngani kaya man ninda. Saka, nakikiaram sinda sa buhay kan iba. Paano dapat trataron kan mga Kristiyano an siring na mga indibidwal na minagawi na bakong husay?​—2 Tes. 3:​6, 10-12.

“Markahan an sarong iyan,” an sabi ni Pablo. An Griegong tataramon para diyan nagtatao kan ideya na magin mapagbantay laban sa tawong iyan. An paggiyang ini itinao ni Pablo sa bilog na kongregasyon, bako lang sa mga magurang sa kongregasyon. (2 Tes. 1:1; 3:6) Kaya an indibidwal na mga Kristiyano na tibaad nakarisang dai nagsusunod sa ipinasabong na sadol an sarong kapwa ninda Kristiyano madesisyon na “ipundo an pakikiiba-iba” sa sarong ini na minagawi na bakong husay.

Nangangahulugan daw ini na an tawong iyan tatrataron kapareho kan pagtratar sa saro na hinali sa kongregasyon? Dai man, huling sinabi pa ni Pablo: “Padagos siyang sadulon bilang tugang.” Kaya an indibidwal na mga Kristiyano makikiasosyar pa man giraray sa tawong minarkahan pag nasa mga pagtiripon asin ministeryo, pero madesisyon sinda na dai makiasosyar sa saiya pag-abot sa mga pagtiripon-tipon o sa paglilibang. Taano? “Tanganing masupog siya,” an sabi ni Pablo. Dahil sa pagmarka sa saiya, an Kristiyanong minagawi na bakong husay tibaad makamati na nin pagkasupog sa saiyang paggawi asin magbago.​—2 Tes. 3:​14, 15.

Paano puwedeng iaplikar kan mga Kristiyano ngunyan an sadol na ini? Inot, kaipuhan ta ngunang masigurado na an paggawi kan tawong iyan talagang “bakong husay,” arog kan ilinadawan ni Pablo. An pinapanungdan ni Pablo bako an mga indibidwal na iba kan sa sato an mga pagpili kun dapit sa mga bagay-bagay na nakadepende sa konsiyensiya o personal na kagustuhan, saka bako man an mga indibidwal na nakakulog kan buot ta. Imbes, an espesipikong nasa isip ni Pablo iyo an mga tawong tuyong sinusuway an malinaw na mga sadol na itinao nin Diyos.

Sa ngunyan, kun marisa niyato na an sarong kapwa Kristiyano padagos na nagpapahiling nin pagigin masinuway, a magibo kita nin personal na desisyon na dai na makiiba-iba sa saiya pag-abot sa mga pagtiripon-tipon o paglilibang. Huling personal na desisyon ini, dai ta ini ipapakipag-ulay sa mga bakong miyembro kan satong pamilya. Asin makikiasosyar pa man giraray kita sa indibidwal na iyan sa satong mga pagtiripon asin ministeryo. Pag itinanos niya na an saiyang paggawi, ibabalik ta na sa normal an pakikiasosyar ta sa saiya.