Kan pagbutan ni Jehova an mga tawo na ‘panuon an daga asin sakupon iyan,’ ipinarisa niya na an bilog na daga magigin paraiso pag-abot nin panahon. (Gen. 1:28) An pagbuot na iyan kaipuhan man na sunudon kan mga magmamana kan daga. Pero sa pagpupuon bako pang paraiso an iistaran ninda huling mayo na an hardin nin Eden; kadakul kan kaipuhan na gibuhon para linigon an mga lugar na nagkararaot. Talagang dakulaon na gibuhon iyan!

Ipinapagirumdom kaini sa sato an kinaipuhan na gibuhon kan mga Israelita kan magbalik sinda hali sa Babilonya. An saindang daga dai inistaran sa laog nin 70 taon. Pero ihinula ni Isaias na sa tabang ni Jehova, magigibo nindang maibalik iyan sa dati. Sinabi sa propesiya: “Gigibuhon Niyang magin siring sa Eden an saiyang kaawagan asin na magin siring sa hardin ni Jehova an saiyang disyertong kapatagan.” (Isa. 51:3) Nagin mapanggana an mga Israelita. Sa kaagid na paagi, sa tabang ni Jehova, an mga magmamana kan daga magigin mapanggana man sa pagsakop diyan. Asin maipapahiling mo dawa ngunyan  an pagmawot mo na makikabtang sa gibuhon na iyan.

An sarong paagi iyo an paghihinguwa na papagdanayon na malinig asin areglado an saimong harong asin kapalibutan. Magigibo mo iyan dawa pa bakong arog kaiyan an saimong pagtaraid. Puwede kang magtabang sa paglinig asin pagmentenar kan saindong Kingdom Hall asin kan Assembly Hall. Kun itinutugot kan saimong kamugtakan, puwede ka man mag-aplay bilang boluntaryo para sa pag-ayuda sa mga naapektaran nin kalamidad. Paagi kaiyan, ipinapahiling mo na andam kang tumabang kun may pangangaipo. Haputon an sadiri, ‘Puwede ko daw pag-adalan an nagkapirang skill na magagamit ko kun makakabilang ako sa mga magmamana kan daga?’

Pakatapos tulos na buhayon liwat an aking babayi ni Jairo, sinabi ni Jesus na tawan nin makakakan an aki. (Mar. 5:42, 43) An pag-asikaso sa 12 anyos na aking babaying idto puwedeng bako man masakiton gibuhon. Pero pag-isipan kun ano an kalabot pag inutob na ni Jesus an saiyang panuga na “an gabos na yaon sa mga lulubngan na girumduman makakadangog kan saiyang boses asin maruluwas.” (Juan 5:28, 29) Dawa ngani an Bibliya dai nagtatao nin dakul na detalye, maiimahinar ta na kakaipuhanon kan mga bubuhayon liwat nin tabang para magkaigwa nin kakanon, istaran, asin maisusulot. Puwede mo daw na ikapahiling dawa ngunyan na andam kang tumabang? Pag-isipan an nagkapirang hapot.

Pag ipinaisi na madalaw an paraataman nin sirkito sa saindong kongregasyon, iniimbitaran mo daw siya para makaibanan na magkakan? Pag may mga Bethelite na ma-reassign sa field o pag an sarong paraataman sa sirkito magpundo na sa saiyang paglilingkod bilang nagbibiyaheng paraataman, puwede mo daw sindang tabangan na makahanap nin madadagusan? Kun gigibuhon sa saindong lugar an pangrehiyon o espesyal na kumbensiyon, makakapagboluntaryo ka daw bago o pakatapos kan kumbensiyon o magigin available ka daw para i-welcome an mga delegado?

Kauyon kan sinasabi sa Gibo 24:15, linalauman ta na binilyon na tawo an bubuhayon liwat. Dakul sainda an dai nagkaigwa nin oportunidad na mamidbid si Jehova. Magigin bukas sa sainda an oportunidad na iyan pag binuhay na liwat sinda. a Makikikabtang sa siring na gibuhon na pagtutukdo an maimbod asin eksperyensiyadong mga lingkod nin Diyos. (Isa. 11:9) Si Charlotte, na nakapaghulit na sa Europa, South America, asin Aprika, hinahalat-halat nang makikabtang diyan. Maugma niyang sinabi: “Excited na akong tukduan an mga bubuhayon liwat. Pag nakakabasa ako manungod sa sarong tawo na nabuhay kaidto, naiisip ko: ‘Kun namidbid lang kuta kaini si Jehova, puwedeng ibang marhay kuta an nagin buhay niya.’ Gustong-gusto ko nang sabihon sa mga tawong bubuhayon liwat an mga dai ninda naaraman.”

Dawa an maimbod na mga lingkod ni Jehova na nabuhay bago si Jesus nagdigdi sa daga dakul an kaipuhan na manudan. Isip-isipon an kaugmahan asin an dakulang pribilehiyo na ipaliwanag ki Daniel an kautuban kan mga propesiyang isinurat niya pero dai niya nasabutan. (Dan. 12:8) O kaya an pagtabang ki Ruth asin Noemi na maaraman ninda kun paano an saindang pamilya nakaiba sa ginikanan kan Mesiyas. Maugmahon nanggad na makikabtang sa pambilog na kinaban na programa nin pagtutukdo, na mayo kan mga panggigipit asin pandisturbo kan maraot na kinaban ngunyan!

Paano mo maipapahiling ngunyan na gusto mong magin andam na makikabtang sa programang iyan? An sarong paagi iyo an pagmamaigot na pauswagon an saimong kakayahan sa pagtutukdo asin an regular na pakikikabtang sa pambilog na kinaban na gibuhon nin paghuhulit ngunyan. (Mat. 24:14) Dawa ngani nalilimitaran an mga nagigibo mo ngunyan huli sa edad o iba pang mga kamugtakan, an saimong mga paghihinguwa nagpapahiling kan pagigin andam mo na tukduan an mga binuhay liwat.

Kaya, an mahalagang hapot iyo ini, Talaga daw na hinahalat-halat mo nang manahon an daga? Excited ka na daw sa paglaom na sakupon an daga, pati na sa pagtabang asin sa pagtukdo sa mga binuhay liwat? Maipapahiling mong andam ka na diyan paagi sa pag-aprobetsar sa mga oportunidad ngunyan na makikabtang sa mga gibuhon na kaagid kan mga gigibuhon mo pag minana mo na an daga!