Bako. An isinurat digdi ni David tama sana asin realistiko.

Risahon an isinurat niya sa bersikulong iyan saka sa nakakaagid na mga teksto: “Makanta ako nin mga pag-umaw sa saimong pangaran sagkod lamang mantang inuutob ko an sakuyang mga promesa aroaldaw.” “O Jehova na sakuyang Diyos, inuumaw taka nin bilog kong puso, asin papamurawayon ko sagkod lamang an pangaran mo.” “Uumawon ko an saimong pangaran sagkod nuarin pa man.”—Sal. 61:8; 86:12; 145:1, 2.

Dai man nagin sobra an pananaram ni David, na iniisip na dai siya nuarin man magagadan. Aram niya na sinabi ni Jehova na an pagkakasala nin tawo maresulta sa kagadanan, asin inako ni David na siya mismo sarong makasalan. (Gen. 3:3, 17-19; Sal. 51:4, 5) Aram niya man na dawa an mga lalaking inuuyunan nin Diyos, arog ni Abraham, Isaac, asin Jacob, nagadan man. Asin aram ni David na maabot an panahon na magagadan man siya. (Sal. 37:25; 39:4) Alagad an saiyang mga tataramon na nakasurat sa Salmo 61:8 nagpapahiling na mawot niya saka determinado siya na umawon an Diyos sagkod lamang, an buot sabihon, sagkod na nabubuhay si David.—2 Sam. 7:12.

An pira sa mga isinurat ni David iyo an mga nagin eksperyensiya niya sa buhay, arog kan mahihiling ta sa mga superskripsiyon kan Salmo 18, 51, asin 52. Sa Salmo 23, ilinadawan ni David si Jehova bilang sarong pastor na nagtatao nin paggiya, kaginhawahan, asin proteksiyon. Si David arog kaiyan na klaseng pastor. Asin gusto niyang paglingkudan an Diyos “sagkod na [siya] nabubuhay.”—Sal. 23:6.

Tandaan man na si Jehova an nagpasabong ki David na magsurat. Kaiba sa saiyang mga isinurat an mga propesiya manungod sa mga mangyayari sa maabot pang mga panahon. Halimbawa, sa Salmo 110, isinurat ni David an manungod sa panahon na kun sain an saiyang Kagurangnan ‘matukaw sa may tuo’ nin Diyos sa langit asin maako nin dakulang kapangyarihan. Para gibuhon an ano? Para mandaog sa mga kaiwal nin Diyos asin ‘magsagibo nin paghukom laban sa mga nasyon’ digdi sa daga. Si David apuon kan Mesiyas, an saro na mamamahala hali sa langit saka magigin “sarong saserdote sagkod lamang.” (Sal. 110:1-6) Kinumpirmar ni Jesus na an propesiya na yaon sa Salmo 110 nagpapanungod sa saiya asin na magkakaigwa iyan nin kautuban sa maabot na panahon.—Mat. 22:41-45.

Iyo, pinasabngan si David na magsurat manungod sa panahon na kinabubuhayan niya saka sa panahon na maabot kun sain bubuhayon siya liwat asin magigibo niya nang umawon si Jehova sagkod lamang. Nakakatabang iyan sa sato na mahiling na an Salmo 37:10, 11, 29 puwedeng sabuton bilang paglaladawan kan nagin kamugtakan kan Israel kaidto pati man kan magigin kamugtakan kan bilog na daga sa maabot na panahon pag inutob na nin Diyos an saiyang mga panuga.—Hilingon an parapo 8 kan artikulong “Makakaibanan Taka sa Paraiso” na yaon sa isyung ini.

Sa siring, ipinapahiling kan Salmo 61:8 asin kan nakakaagid na mga bersikulo na gusto ni David na pamurawayon si Jehova kaidto sa Israel sagkod na magadan siya. Asin realistikong ipinapahiling kan mga iyan kun ano an magigibo ni David pag siya binuhay na liwat ni Jehova sa maabot na panahon.