1. Kaidtong madali nang magadan si Jesus, ano an sinabi niya sa sarong kriminal na kataid niya? (Lucas 23:39-43)

 SI Jesus asin an duwang kriminal na kataid niya nagsasakit mantang nangruruluya na sinda asin madali nang magadan. (Luc. 23:32, 33) An duwang kriminal parehong pigtutuya si Jesus, kaya malinaw na bako sindang mga disipulo niya. (Mat. 27:44; Mar. 15:32) Pero an saro sa sainda nagbago an sabuot. Sinabi niya: “Jesus, girumdumon mo ako pag yaon ka na sa saimong Kahadian.” Nagsimbag si Jesus: “Sinisigurado ko sa saimo sa aldaw na ini, makakaibanan taka sa Paraiso.” (Basahon an Lucas 23:39-43.) Mayo nin nagpaparisa na inako kan kriminal na ini an mensahe manungod sa “Kahadian kan kalangitan,” na ihinulit ni Jesus durante kan saiyang ministeryo. Asin mayo man nin sinabi si Jesus na an lalaking idto makakalaog sa Kahadian. (Mat. 4:17) An sinasabi ni Jesus iyo an manungod sa maabot na Paraiso digdi sa daga. Taano ta nasabi ta iyan?

2. Ano an nagpaparisa na an nagsusulsol na kriminal sarong Judio?

² An nagsusulsol na kriminal posibleng marhay na sarong Judio. Sinabi kan kriminal na iyan sa saro pang kriminal: “Dai ka lamang natatakot sa Diyos, ngunyan na pareho sa saiya an sentensiya saimo?” (Luc. 23:40) An mga Judio nagsasamba sa saro sanang Diyos, pero an mga tawo kan mga nasyon nagtutubod sa dakul na diyos. (Exo. 20:2, 3; 1 Cor. 8:5, 6) Kun an mga kriminal na idto kabilang sa mga tawo kan mga nasyon, an hapot kutana kan kriminal, “Dai ka lamang natatakot sa mga diyos?” Saro pa, isinugo si Jesus, bako sa mga tawo kan mga nasyon, kundi sa “mga nawawarang karnero . . . kan nasyon nin Israel.” (Mat. 15:24) Ihinayag nin Diyos sa mga Israelita na bubuhayon niya an mga gadan. Posibleng aram ini kan nagsusulsol na kriminal, asin arog kan ipinaparisa kan mga tataramon niya, inisip niya na bubuhayon ni Jehova si Jesus  para mamahala sa Kahadian nin Diyos. Minalataw na naglalaom man an lalaki na bubuhayon man siya nin Diyos.

3. Ano an posibleng marhay na nasa isip kan nagsusulsol na kriminal kan sambiton ni Jesus an Paraiso? Ipaliwanag. (Genesis 2:15)

³ Bilang sarong Judio, posibleng marhay na aram kan nagsusulsol na kriminal an manungod ki Adan asin Eva saka sa Paraiso kun sain pinaistar sinda ni Jehova. Kaya puwedeng nagtutubod an kriminal na an Paraiso na sinambit ni Jesus sarong magayon na hardin digdi sa daga.—Basahon an Genesis 2:15.

4. An mga sinabi ni Jesus sa saro sa mga kriminal dapat na makapahiro sa sato na isip-isipon an ano?

⁴ An mga sinabi ni Jesus sa kriminal dapat na makapahiro sa sato na isip-isipon kun ano an magigin buhay sa Paraiso. Sa katunayan, may manunudan kita manungod sa Paraiso sa pagkasaysay dapit sa matuninong na pamamahala ni Hading Solomon. Asin maaasahan ta na si Jesus, an saro na labi pa ki Solomon, kaiba kan saiyang kairibang tagapamahala gigibuhon na magayunon na paraiso an daga. (Mat. 12:42) Natural sana na dapat na magin interesado an “ibang mga karnero” sa kun ano an dapat nindang gibuhon para mapabilang sa mga mabubuhay sagkod lamang sa Paraiso.—Juan 10:16.

5. Ano an mga inaasahan mo manungod sa magigin buhay sa Paraiso?

⁵ Ano an minalaog sa isip mo pag iniisip-isip mo an manungod sa magigin buhay sa Paraiso? Tibaad naiimahinar mo an sarong magayunon na parke arog kan hardin nin Eden. (Gen. 2:7-9) Puwedeng magirumduman mo an propesiya na isinurat ni Mikas na an lambang saro sa banwaan nin Diyos matukaw sa “sirong kan saiyang puon nin ubas asin kan saiyang puon nin higera.” (Mik. 4:3, 4) Puwedeng magirumduman mo man an mga sinasabi sa Bibliya na magkakaigwa nin abundang kakanon. (Sal. 72:16; Isa. 65:21, 22) Kaya puwedeng maimahinar mo an saimong sadiri sa sarong magayon na hardin, na nagtutukaw-tukaw sa may lamesa na pano nin masisiram na kakanon. Puwedeng naiimahinar mo man an mahamot na parong kan mga tinanom asin mga burak. Asin posibleng marhay na nadadangog mo an maugmahon na ngirisihan nin magkakapamilya asin magkakaaramigo kaiba na an mga binuhay liwat. An gabos na iyan bakong pangaturugan sana. Makakasigurado kita na mangyayari an mga iyan digdi sa daga. Minsan siring, kaiba man sa buhay sa Paraiso an nakakaugmang gibuhon.

6. Ano an mga gigibuhon ta sa Paraiso? (Hilingon an ritrato.)

⁶ Linalang kita ni Jehova para magin maugma sa satong gibuhon. (Ecl. 2:24) Magigin sibot nanggad kita durante kan Sangribong Taon na Paghadi ni Cristo. An mga nakaligtas sa dakulang kasakitan, kaiba na an minilyon na binuhay liwat, mangangaipo nin bado, kakanon, asin maiistaran. Para maitao an gabos na iyan, kadakul kitang kapaki-pakinabang na trabahong  gigibuhon. Kun paanong si Adan asin Eva kinaipuhan na kultibaron an saindang istaran na hardin, magkakaigwa man kita kan pribilehiyo na kultibaron an Paraisong daga. Imahinara man kun gurano kaugma an pagtutukdo sa minilyon na mga binuhay liwat na dikit sana an aram manungod ki Jehova asin sa saiyang katuyuhan saka an pagtabang sa mga maimbod na nabuhay haloy pa bago an panahon ni Jesus para makanuod pa nin urog!

7. Sa ano kita makakapagtiwala, asin taano?

⁷ Makakapagtiwala kita na an buhay sa maabot na Paraiso magigin matuninong, abunda, asin organisadong marhay. Taano? Huling tinawan na kita ni Jehova nin patanaw sa kun ano an magigin buhay sa irarom kan pamamahala kan saiyang Aki. Mahihiling ta iyan sa pagkasaysay manungod sa pamamahala ni Hading Solomon.

8. Paano nautob an mga tataramon sa Salmo 37:10, 11, 29 pagkatapos na isurat iyan ni Hading David? (Hilingon an “Hapot Hali sa mga Parabasa” sa isyung ini.)

⁸ Pinasabngan si Hading David na isurat an manungod sa kun ano an magigin buhay pag an sarong madunong asin maimbod na hadi magtukaw na sa trono. (Basahon an Salmo 37:10, 11, 29.) Parati tang binabasa sa iba an Salmo 37:11 pag ipinapakipag-ulay ta an manungod sa maabot na Paraiso. Tama sana iyan huling kinotar ni Jesus an tekstong iyan sa saiyang Sermon sa Bukid, na nagpapahiling na magkakaigwa iyan nin kautuban sa maabot na panahon. (Mat. 5:5) Pero ihinayag man kan mga tataramon ni David kun ano an magigin buhay sa panahon ni Hading Solomon. Kan mamahala si Solomon sa Israel, an banwaan nin Diyos namuhay na igwa nin pambihirang katuninungan asin abundansiya sa sarong daga na “nagbubulos nin gatas saka tangguli.” Sinabi nin Diyos: “Kun padagos nindong susunudon an sakuyang mga reglamento . . . , papangyarihon ko na magkaigwa nin katuninungan sa saindong daga, asin mahigda kamo na daing siisay man na nananakot sa saindo.” (Lev. 20:24; 26:3, 6) Nagkatotoo an mga panugang iyan durante kan pamamahala ni Solomon. (1 Cron. 22:9; 29:26-28) Asin igwa nin paglaom na an mga maraot “mawawara na.” (Sal. 37:10) Kaya, an mga tataramon na nasa Salmo 37:10, 11, 29 nagkaigwa nin kautuban kan suanoy na panahon asin magkakaigwa man nin kautuban sa maabot na panahon.

9. Ano an sinabi kan reyna kan Sheba manungod sa pamamahala ni Hading Solomon?

 ⁹ An bareta manungod sa katuninungan asin abundansiya na nakakamtan kan mga Israelita sa pamamahala ni Solomon nakaabot sa reyna kan Sheba. Nagbiyahe an reyna hali sa harayong daga pasiring sa Jerusalem para mahiling niya mismo an sitwasyon. (1 Ha. 10:1) Pagkatapos na mahiling an kahadian ni Solomon, sinabi niya: “Mayo pa palan sa kabanga an nasabi sako. . . . Maugma an mga tawuhan mo, asin maugma an saimong mga lingkod na pirming nagtitindog sa saimong atubangan, na nagdadangog sa saimong kadunungan!” (1 Ha. 10:6-8) Pero an mga kamugtakan sa irarom kan pamamahala ni Solomon patanaw sana sa gigibuhon ni Jehova para sa mga tawo sa irarom kan pamamahala kan Saiyang Aki, si Jesus.

10. Sa anong mga bagay nakakalabi si Jesus ki Solomon?

¹⁰ Si Jesus nakakalabi ki Solomon sa gabos na bagay. Si Solomon sarong bakong perpektong tawo na nakagibo nin magabat na mga pagkakasala na pag-abot nin panahon nagdara nin mga kasakitan sa banwaan nin Diyos. Sa ibong na lado, si Jesus, sarong perpektong Tagapamahala na dai nagkakasala. (Luc. 1:32; Heb. 4:14, 15) Nalampasan ni Jesus an masakiton na mga pagbalo sa saiya ni Satanas. Pinatunayan ni Cristo na dai siya nuarin man magkakasala o magibo nin ano man na makakadanyar sa saiyang maimbod na mga sakop. Sarong onra nanggad na siya an satuyang Hadi.

11. Sairisay an makakaibanan ni Jesus para mamahala?

¹¹ Magkakaigwa si Jesus nin 144,000 na kairibang tagapamahala na makikipagtabangan sa saiya para atamanon an mga tawo asin utubon an katuyuhan ni Jehova para sa daga. (Kap. 14:1-3) Nakaeksperyensiya an mga ini nin dakul na pagbalo asin kasakitan kan sinda yaon pa digdi sa daga, kaya magigin maduminamay sindang mga kairibang tagapamahala. Ano an magigin papel kan kairibang tagapamahalang ini?

12. Anong trabaho an itatao ni Jehova sa 144,000?

¹² An trabahong itinao ki Jesus asin sa saiyang kairibang tagapamahala mas dakula nanggad kisa sa trabahong itinao ki Solomon. An hading iyan kan Israel kinaipuhan na atamanon an minilyon na tawo sa saro sanang nasyon. Minsan siring, an mga mamamahala sa Kahadian nin Diyos matabang para pangatamanan an binilyon na tawo sa bilog na daga. Dakulang onra nanggad an itinao ni Jehova sa 144,000!

13. Ano an magigin daing kaagid na papel kan mga kairibang tagapamahala ni Jesus?

¹³ Arog ni Jesus, an 144,000 maglilingkod bilang mga hadi asin mga saserdote. (Kap. 5:10) Sa irarom kan Katugunan ni Moises, an mga saserdote an panginot na may paninimbagan na protektaran an pisikal na salud kan mga tawo pati na an saindang espirituwal na salud. An Katugunan “anino kan marahay na mga bagay na maabot,” kaya rasonable sanang isipon na an mga kairibang tagapamahala ni Jesus matabang sa daing kaagid na papel na pangatamanan an pisikal asin espirituwal na mga pangangaipo kan banwaan nin Diyos. (Heb. 10:1) Kaipuhan tang maghalat na sana kun paano an mga hadi asin saserdoteng ini makikipagkomunikar sa mga sakop kan Kahadian na yaon digdi sa daga. Ano man an magin areglo ni Jehova, makakapagtiwala kita na sa maabot na Paraiso, an mga yaon digdi sa daga maako kan paggiya na kaipuhan ninda.—Kap. 21:3, 4.

14. Ano an relasyon kan “ibang mga karnero” asin kan sadit na aripumpon?

¹⁴ Inapod ni Jesus an mga mamamahalang kairiba niya na “sadit na aripumpon.” (Luc. 12:32) Nasambitan niya man an ikaduwang grupo, na inapod niyang “ibang mga karnero.” An duwang grupong ini an minakompuwesto sa sarong  nagkakasararong aripumpon. (Juan 10:16) An duwang grupo nagtitinabangan na ngunyan, asin magpapadagos iyan sagkod na magin Paraiso na an daga. Siyempre, sa panahon na iyan, an mga kabilang sa “sadit na aripumpon” yaon na sa langit asin an mga kabilang sa “ibang mga karnero” magkakaigwa kan paglaom na mabuhay digdi sa daga sagkod lamang. Pero may mga bagay na kaipuhan na gibuhon ngunyan kan “ibang mga karnero” para mapabilang sa mga maistar sa Paraiso.

15. (a) Paano an “ibang mga karnero” nakikipagtabangan sa mga tugang ni Cristo? (b) Paano mo maaarog an halimbawa kan brother na nasa botika? (Hilingon an ritrato.)

¹⁵ An nagsusulsol na kriminal nagadan bago pa man siya nagkaigwa kan oportunidad na ipahiling an saiyang lubos na pagpapahalaga sa ginibo ni Cristo para sa saiya. Sa kabaliktaran, kita na mga kabilang sa “ibang mga karnero” igwa ngunyan nin dakul na oportunidad na ipahiling kun ano an namamati ta manungod ki Jesus. Halimbawa, ipinapahiling ta an satong pagkamuot sa saiya paagi sa kun paano ta tinatratar an saiyang linahidan nin espiritu na mga tugang. Sinabi ni Jesus na huhusgaran niya an mga karnero base diyan. (Mat. 25:31-40) Masusuportaran ta an mga tugang ni Cristo paagi sa maigot na pagtabang sa sainda sa paghuhulit asin paggibo nin disipulo. (Mat. 28:18-20) Para magibo iyan, gusto tang magamit nin lubos an mga pantabang sa pag-adal sa Bibliya na itinatao sato, arog kan librong Mabuhay nin Maugma Sagkod Pa Man! Kun mayo ka pang kinokonduktahan na pag-adal sa Bibliya, taano ta dai magin pasuhan an pag-alok nin pag-adal sa Bibliya sa pinakadakul na tawo sagkod sa mapupuwede?

16. Ano an kalabot sa pamumuhay bilang mga sakop kan Kahadian nin Diyos?

¹⁶ Dai ta kaipuhan na halaton na yaon na kita sa Paraiso para magin an klase nin tawo na gusto ni Jehova na mag-istar diyan. Sa ngunyan puwede tang hinguwahon na magin sadiyosan sa satuyang tataramon asin gibo saka magin balanse sa satong paggawi. Asin puwede kitang magin maimbod ki Jehova, sa satong agom, asin sa satong mga kapwa Kristiyano. Mantang mas namumuhay kita kauyon kan mga pamantayan nin Diyos miyentras na yaon pa kita sa maraot na kinaban na ini, mas magigin madali sa sato na mamuhay kauyon kan mga pamantayan na iyan sa Paraiso. Puwede ta man pauswagon an satong mga kakayahan asin mga kuwalidad para ipahiling na nag-aandam kita na mamuhay sa panahon na iyan.  Hilingon an artikulong “Andam Ka Na Daw na ‘Manahon an Daga’?” na yaon sa isyung ini.

17. Dapat daw kitang madisganar huli sa mga pagkakasala na nagibo ta kan nakaagi? Ipaliwanag.

¹⁷ Dapat ta man pagmaigutan na halion an pakamati nin pagkakonsiyensiya huli sa magabat na mga pagkakasala na nagibo ta kan nakaagi. Siyempre, dai ta lamang gigibuhon na sarahutan an atang na pantubos para gumibo nin ‘tuyong pagkakasala.’ (Heb. 10:26-31) Pero makakapagtiwala kita na bulaos na kitang pinatawad ni Jehova, kun tunay kitang nagsulsol sa magabat na pagkakasala, hininguwang kamtan an tabang na itinatao niya, asin binago an satong paggawi. (Isa. 55:7; Gibo 3:19) Girumdumon an sinabi ni Jesus sa mga Fariseo: “Nag-abot ako tanganing apudon, bako an mga tawong matanos, kundi an mga parakasala.” (Mat. 9:13) An atang na pantubos igo nang marhay para tahuban an gabos tang mga kasalan.

18. Ano an gusto mong ipakipag-ulay sa kriminal na nagadan sa kataid ni Jesus?

¹⁸ Naiimahinar mo daw an sadiri mo sa Paraiso na nakikipag-ulay sa kriminal na nakipag-ulay ki Jesus? Siguradong pareho nindong ipapahayag an saindong pagpapahalaga sa atang ni Jesus. Posibleng marhay na papaistoryahon mo siya manungod sa kun ano an nangyari kan huring mga oras ni Jesus digdi sa daga asin kun ano an namati niya kan simbagon ni Jesus an saiyang pakiulay. Sa ibong na lado, tibaad haputon ka man niya kun ano an nagin kamugtakan kan buhay durante kan huring mga aldaw kan sistema ni Satanas. Sarong pribilehiyo nanggad na tukduan kan Tataramon nin Diyos an mga tawong arog kan lalaking iyan!—Efe. 4:22-24.

19. Taano ta dai magigin boring an buhay sa Paraiso? (Hilingon an ritrato sa cover.)

¹⁹ Dai lamang magigin boring an buhay sa Paraiso. Siguradong dakul na tawo an magigin interesado kitang kaulayon asin siguradong kadakul nin kapaki-pakinabang na gibuhon duman. Urog sa gabos, kada aldaw, urog tang mamimidbid an satong Ama sa langit asin ikakaugma an mga probisyon niya. Kadakul kitang manunudan manungod sa saiya, asin sa saiyang mga linalang. Mantang mas naglalawig an buhay ta, mas nagrararom man an satong pagkamuot sa Diyos. Nagpapasalamat nanggad kita ki Jehova asin ki Jesus sa pagtao sato kan panuga na puwede kitang mabuhay sagkod lamang sa Paraiso!