1. Paano sa parati sinisimbag ni Jehova an mga pamibi kan saiyang mga lingkod?

 ARAM mo daw na puwede kang gamiton ni Jehova para simbagon an udok sa pusong pamibi nin saro? Iyo, posible iyan, ika man sarong elder, ministeryal na lingkod, payunir, o parahayag sa kongregasyon. Posible man iyan baga man ika hoben o gurang, brother man o sister. Pag an saro na namumuot ki Jehova maghagad nin tabang sa saiya, sa parati ginagamit nin Diyos an mga elder asin ibang maimbod na mga lingkod na magin “dakulang karangahan” para sa tawong iyan. (Col. 4:11) Sarong pribilehiyo nanggad na maglingkod ki Jehova asin sa satong mga tugang sa paaging iyan! Puwede tang magibo iyan pag nagkaigwa nin biglang paglakop nin hilang, kalamidad, o persekusyon.

2. Taano ta puwedeng magin dipisil an pagtabang sa iba sa panahon nin biglang paglakop nin hilang?

² Huli sa biglang paglakop nin hilang puwedeng magin dipisil para sa sato na tabangan an lambang saro. Halimbawa, tibaad gusto tang bisitahon an satong mga amigo, pero bakong ligtas na gibuhon iyan. Tibaad gusto tang imbitaran an mga nasasakitan sa pagbuhay na makaibanan ta sa pagkakan, pero bako man iyan posible. Tibaad gusto tang tumabang sa iba, pero puwedeng masakit gibuhon iyan kun an sato mismong mga kapamilya may hilang o nasasakitan sa pagbuhay. Sa ibong kaiyan gusto ta pa man giraray na tumabang sa mga tugang, asin nauugma si Jehova pag ginigibo niyato an makakaya ta para tabangan sinda. (Tal. 3:27; 19:17) Anong puwede tang gibuhon?

3. Ano an manunudan ta sa halimbawa kan mga elder sa kongregasyon ni Desi? (Jeremias 23:4)

 ³ Kun ano an magigibo kan mga elder. Kun saro kang elder, midbidon na marhay an mga karnero. (Basahon an Jeremias 23:4.) Sabi ni Desi, na sarong sister na nasambit sa sinundan na artikulo, “An mga elder sa grupo mi sa paglilingkod iniibanan ako kaidto saka an iba sa ministeryo saka sa mga pagtiripon-tipon.” b Dahil sa mga paghihinguwa kan mga pastor na idto, nagin madali sa sainda na tabangan si Desi kan magkaigwa nin COVID-19 na pandemya asin magadan an nagkapira sa mga kapamilya niya huli sa virus.

4. Taano ta nagibong matabangan kan mga elder si Desi, asin ano an leksiyon?

⁴ Sinabi ni Desi, “Huling midbid ko na an mga elder bilang mga amigo, madali na para sako na sabihon sa sainda an namamati ko asin an mga ikinakahadit ko.” Ano an leksiyon para sa mga elder? Pasturan an mga nasa pangangataman mo bago pa man magkaigwa nin krisis. Amiguhon sinda. Kun igwa nin biglang paglakop nin hilang na nakakaulang sa saimo para bisitahon sinda, kontakon sinda sa ibang mga paagi. “Kun minsan, sa laog nin sarong aldaw nagkapirang elder an nag-aapod sako o nag-mi-message,” an sabi ni Desi. “Napakusog ako kan mga teksto na ihiniras ninda sako, dawa ngani pamilyar na man ako sa mga tekstong iyan.”

5. Paano maaaraman kan mga elder an pangangaipo kan mga tugang asin paano sinda makakatabang sa sainda?

⁵ An sarong paagi para maaraman mo kun ano an kaipuhan kan saimong mga tugang iyo an mataktikang paghapot sa sainda. (Tal. 20:5) Igwa daw sinda nin igong kakanon, bulong, asin iba pang mga suplay? Namemeligro daw sinda na mawaran nin trabaho o nin istaran pa ngani? Kaipuhan daw ninda nin tabang para makakua nin asistensiya hali sa gobyerno? Nakaresibi si Desi nin materyal na tabang hali sa mga kapagtubod. Pero an nakatabang na marhay sa saiya para makayanan an mga pagbalo iyo an pampakusog nin buot asin espirituwal na suporta kan mga elder. Sinabi niya: “Namibi an mga elder kaiba ko. Dawa ngani dai ko magirumduman an eksaktong sinabi ninda, nagigirumduman ko kun ano an namati ko. Idto an paagi ni Jehova nin pagsabing, ‘Dai ka nagsosolo.’”—Isa. 41:10, 13.

6. Ano an magigibo kan dakul sa kongregasyon para tabangan an iba? (Hilingon an ritrato.)

⁶ Kun ano an magigibo kan iba. Tama sanang asahan ta na manginginot an mga elder. Pero dinadagka kita gabos ni Jehova na pakusugon asin tabangan an iba. (Gal. 6:10) Dawa an sarong simpleng pagpahiling ta kan satong pagkamuot puwedeng magkaigwa nin dakulang epekto sa saro na may hilang. An sarong aki puwedeng magpadara nin kard o drowing para pakusugon an sarong tugang. An sarong hoben na adulto puwedeng iyo  an mamakal kan mga kinakaipuhan nin sarong sister. Tibaad puwedeng ipagluto nin pagkakan an sarong may hilang asin darahon iyan sa saiyang harong. Siyempre, pag lakop an hilang, an gabos sa kongregasyon nangangaipo nin pampakusog. Tibaad puwedeng dai nguna kita maghali tulos pakatapos nin mga pagtiripon para makaulay an mga tugang, iyan man sa Kingdom Hall o paagi sa videoconferencing. Asin an mga elder kaipuhan man nin pampakusog. May mga Saksi na nagpapadara nin mensahe nin pasasalamat sa mga elder, na sa parati sibot na marhay sa panahon nin biglang paglakop nin hilang. Magayunon nanggad pag ginigibo ta an satong kabtang para “padagos na pakusugon asin parigunon an lambang saro”!—1 Tes. 5:11.

7. Ano an posibleng mga kadipisilan pakatapos nin kalamidad?

⁷ Puwedeng biglang mabago an buhay nin tawo huli sa sarong kalamidad. May mga tawo na puwedeng mawaran nin mga pagsadiri, harong, o mga mahal sa buhay pa ngani. An satong Kristiyanong mga tugang bakong libredo sa siring kaiyan na makamumundong mga pangyayari. Ano an magigibo ta para makatabang?

8. Ano an puwedeng gibuhon kan mga elder asin kan mga payo kan pamilya bago magkaigwa nin kalamidad?

⁸ Kun ano an magigibo kan mga elder. Mga elder, tabangan an saindong mga tugang na mag-andam bago pa magkaigwa nin kalamidad. Siyertuhon na aram kan gabos sa kongregasyon kun ano an mga dapat na gibuhon para magdanay na ligtas asin para makontak an mga elder. Si Margaret, na sinambit sa sinundan na artikulo, nagsabi: “An samong mga elder nag-atubang nin lokal na mga pangangaipo, na pinapatanidan kami na puwedeng magkaigwa pa nin wildfire sa samong lugar. Sinabi ninda na kun ipagbuot kan mga awtoridad na maghali kami sa samong mga harong o kun magin peligroso an kamugtakan, dapat na maghali kami tulos.” Napapanahon an impormasyon na idto huling pakalihis nin limang semana nagkaigwa nin peligrosong marhay na wildfire. Sa panahon nin pampamilyang pagsamba, an mga payo kan pamilya puwedeng repasuhon kun ano an dapat na gibuhon kan kada miyembro kan pamilya. Kun andam ka asin an saimong mga aki, posibleng marhay na magdadanay kang kalmado kun mangyari an sarong kalamidad.

9. Anong mga paghihinguwa an puwedeng gibuhon kan mga elder bago asin pakatapos nin kalamidad?

⁹ Kun saro kang paraataman nin grupo, siguraduhon mo na bago pa man magkaigwa nin kalamidad igwa ka na kan tamang numero nin telepono asin adres kan gabos na kabilang sa saimong grupo sa paglilingkod. Gumibo nin lista kaiyan asin pirming i-update iyan. Kaya sa panahon nin kalamidad, magigibo mo na makontak an lambang parahayag para maaraman an saindang mga pangangaipo. Ipaabot tulos iyan sa koordineytor kan grupo nin kamagurangan, na iyong makontak sa paraataman nin sirkito. Dakula an magigibo kan pagtitinarabangan na iyan. Pakatapos kan kasulo, an paraataman nin sirkito sa lugar ninda Margaret nagdanay na mata sa laog nin 36 oras, na nakikipagkoordinar sa paghihinguwa kan mga elder na makontak asin maasikaso an mga pangangaipo kan mga 450 mga tugang na kinaipuhan na maghali sa saindang mga harong. (2 Cor. 11:27) Huli kaiyan, naasikaso an gabos na nangangaipo nin madadagusan.

10. Taano ta mahalaga sa mga elder an pagpapastor? (Juan 21:15)

¹⁰ An pagtao nin espirituwal asin emosyonal na tabang kaiba sa responsabilidad kan mga elder. (1 Ped. 5:2) Sa panahon nin kalamidad dapat na siguraduhon nguna kan mga elder na ligtas an lambang tugang, asin igwa nin kakanon, bado, asin madadagusan. Pero pakalihis nin dakul na bulan, posibleng marhay na an mga nakaligtas mangangaipo nin espirituwal asin emosyonal na tabang. (Basahon an Juan 21:15.) “Kaipuhan an panahon para maka-recover,” an sabi ni Harold, na naglilingkod sa sarong Komite kan Sangay asin  na nagdadalaw sa dakul na tugang na naapektaran nin mga kalamidad. “Tibaad luway-luway na sindang nakakabangon, pero puwedeng dai pa man giraray mawara-wara sa isip ninda an pagkagadan kan mahal ninda sa buhay, an nawarang iniingatan na marhay na pamana, o an sitwasyon na dikit-dikitan pa sindang magadan. Dahil sa mga pangyayaring iyan tibaad pauruutro sindang makamati nin kamunduan. Dai iyan nangangahulugan nin kawaran nin pagtubod kundi normal na reaksiyon sana iyan nin sarong tawo.”

11. Anong tabang an padagos na kakaipuhanon kan mga pamilya?

¹¹ Isinasapuso kan mga elder an sadol na “makitangis sa mga nagtatangis.” (Roma 12:15) Tibaad kaipuhan kan mga nakaligtas nin asigurasyon na namumutan pa man giraray sinda ni Jehova o kan saindang Kristiyanong mga tugang. Gusto kan mga elder na tabangan an mga pamilya na mapagdanay an saindang espirituwal na rutina, kaiba na an pagpamibi, pag-adal, pag-atender sa mga pagtiripon, asin pakikikabtang sa gibuhon na paghuhulit. Puwede man na dagkahon kan mga elder an mga magurang na tabangan an saindang mga aki na magpokus sa mga bagay na dai kayang rauton nin kalamidad. Mga magurang, ipagirumdom sa saindong mga aki na si Jehova magdadanay na saindang Amigo asin na siya pirming yaon para sa sainda. Asin siguraduhon na ipaliwanag sa sainda na puwede sindang magdanay na kabtang kan pambilog na kinaban na pamilya nin mga tugang na lalaki asin babayi na andam na tumabang.—1 Ped. 2:17.

12. Ano an puwedeng gibuhon kan iba para makatabang sa pag-ayuda sa panahon nin kalamidad? (Hilingon an ritrato.)

¹² Kun ano an magigibo kan iba. Kun may mangyaring kalamidad harani sa lugar nindo, haputon an mga elder kun paano ka makakatabang. Tibaad puwede kang mag-alok nin temporaryong madadagusan para sa mga napiritan na humali sa saindang sadiring harong o para sa mga boluntaryo sa pagtugdok. Tibaad puwede kang magdara nin kakanon asin mga suplay para sa mga parahayag na nangangaipo. Kun an kalamidad mangyari harayo sa lugar nindo, puwede ka pa man giraray tumabang. Paano? Paagi sa pagpamibi sa mga naapektaran kan kalamidad. (2 Cor. 1:8-11) Puwede kang makasuportar sa pinansiyal na paagi sa gibuhon na pag-ayuda paagi sa pagtao nin donasyon sa pambilog na kinaban na gibuhon. (2 Cor. 8:2-5) Kun magigibo mong magbiyahe pasiring sa naapektaran na lugar para tumabang, haputon an mga elder manungod sa pagboboluntaryo. Kun maimbitaran ka na magboluntaryo, posibleng marhay na mag-ako ka nin nagkapirang pagsasanay para maiasignar ka sa lugar asin sa panahon na pinakakaipuhan ka.

13. Sa anong mga kadipisilan napapaatubang an satong mga tugang sa mga kadagaan na ipinagbabawal an satong gibuhon?

¹³ Sa mga kadagaan na ipinagbabawal an satong gibuhon, nagigin mas masakit an buhay huli sa persekusyon. An mga tugang sa mga kadagaan na iyan nasasakitan man sa pagbuhay, nagkakahilang, asin nagagadanan nin mga mahal sa buhay. Pero huli kan pagbabawal, an mga elder puwedeng malimitaran an hiro o an pakikikomunikar sa mga nangangaipo nin pampakusog nin buot. Arog kaiyan an nangyari ki Andrei, na nasambit sa sinundan na artikulo. Sarong sister na kabilang sa saiyang grupo sa paglilingkod sa langtad an nasasakitan sa pinansiyal. Dangan naaksidente ini sa awto. Kinaipuhan kaini nin nagkapirang operasyon asin dai ini makapagtrabaho. Sa ibong kan pagbabawal asin kan pandemya, ginibo kan mga tugang an makakaya ninda para makatabang, asin nahihiling iyan ni Jehova.

14. Paano makakapahiling nin halimbawa an mga elder may koneksiyon sa pagtitiwala ki Jehova?

¹⁴ Kun ano an magigibo kan mga elder. Namibi si Andrei asin ginibo kun ano an kaya niya. Paano si Jehova huminiro? Pinahiro niya an nagkapira sa kongregasyon na mas nasa kamugtakan para tumabang. An iba iniibanan an sister para sa mga check-up kaini. An iba man nagtao nin kuwarta para makatabang sa saiya. Pinahiro sinda ni Jehova na gibuhon an makakaya ninda, asin binendisyunan niya an saindang nagkakasararo asin may kusog nin buot na mga paghihinguwa. (Heb. 13:16) Mga elder, pag igwa nin pagbabawal sa gibuhon, hagadon an tabang kan iba. (Jer. 36:5, 6) Urog sa gabos, magtiwala ki Jehova. Matatabangan ka niya para itao an mga pangangaipo kan satong mga tugang.

15. Paano ta mapapagdanay an satong Kristiyanong pagkasararo pag nag-aagi nin persekusyon?

¹⁵ Kun ano an magigibo kan iba. Mantang nasa pagbabawal, puwedeng limitaran ta an satong pakikiasosyar sa satong mga tugang sa saradit sanang grupo. Kaya urog na mahalaga ngunyan kisa kasuarin man na pagdanayon ta an matuninong na relasyon sa mga tugang. Labanan si Satanas, imbes na kita an magralaban-laban. Palampason an mga pagkakasala kan mga tugang, o hinguwahon na husayon tulos an ano man na dai pagkakasinarabutan. (Tal. 19:11; Efe. 4:26) Mag-inot sa pagtabang sa lambang saro. (Tito 3:14) An tabang na itinao kan iba sa sister na nangangaipo nagkaigwa nin positibong epekto sa grupo sa paglilingkod. Nagin mas dayupot sinda, siring sa sarong pamilya.—Sal. 133:1.

16. Kauyon kan sinasabi sa Colosas 4:3, 18, paano ta matatabangan an satong mga tugang na nag-aagi nin persekusyon?

¹⁶ Manampulong ribo kan satong mga tugang an  naglilingkod ki Jehova sa ibong kan mga pagbabawal kan gobyerno. An nagkapira sa sainda iprineso huli kan saindang pagtubod. Puwede tang ipamibi sinda, an saindang pamilya, asin an mga isinasapeligro an saindang sadiring katalingkasan para maitao sa mga tugang na ini an espirituwal asin pisikal na tabang pati na an legal na asistensiya. c (Basahon an Colosas 4:3, 18.) Nungka nanggad na pagbaliwalaon an magigibo kan saindong mga pamibi!—2 Tes. 3:1, 2; 1 Tim. 2:1, 2.

17. Paano ka makakapag-andam na ngunyan para sa persekusyon?

¹⁷ Ika asin an saimong pamilya makakapag-andam na ngunyan para sa persekusyon. (Gibo 14:22) Dai mo pag-isipon an gabos na maraot na mga bagay na posibleng mangyari. Imbes, pakusugon an saimong pakikipag-amigo ki Jehova asin tabangan an saimong mga aki na gibuhon man iyan. Kun may mga panahon na nahahadit ka, sabihon mo sa Diyos an laog kan saimong puso. (Sal. 62:7, 8) Bilang pamilya, pag-ulayan an gabos na dahilan kun taano ta makakapagtiwala kamo sa saiya. d Arog kan pag may kalamidad, an saimong pag-andam asin pagtitiwala ki Jehova makakatabang sa saimong mga aki na magkaigwa nin kusog nin buot asin katuninungan.

18. Anong puturo an naghahalat sa sato?

¹⁸ An katuninungan nin Diyos nagtatao sa sato nin katiwasayan. (Fil. 4:6, 7) Paagi kaiyan, pinapakalma ni Jehova an satuyang puso sa ibong kan mga hilang, kalamidad, asin persekusyon na puwedeng makaapektar sa sato ngunyan. Ginagamit niya an mahihigos na elder para pasturan kita. Asin tinatawan niya kita gabos kan pribilehiyo na tabangan an kada saro. An katuninungan na igwa kita ngunyan maandam sa sato para atubangon an mas dakulang mga pagbalo na maabot, dawa pa an “dakulang kasakitan.” (Mat. 24:21) Sa panahon na iyan, kaipuhan tang papagdanayon an satuyang katuninungan asin tabangan an iba na gibuhon man iyan. Pero pakatapos kaiyan, dai na kita mapapaatubang sa mga problema na nagtatao sa sato nin kahaditan. Sa katapos-tapusi, makakamtan ta na an talagang gusto ni Jehova para sa sato—perpekto asin nagdadanay na katuninungan.—Isa. 26:3, 4.