1. Taano ta masasabi ta na an paglaom ni Abraham sigurado?

 NANUGA si Jehova sa amigo niyang si Abraham na an gabos na nasyon sa daga bebendisyunan paagi sa saiyang gikan. (Gen. 15:5; 22:18) Huling si Abraham igwa nin makusog na pagtubod sa Diyos, kumbinsido siya na magkakatotoo an panuga nin Diyos. Minsan siring, kan si Abraham 100 anyos na asin 90 anyos man an saiyang agom, an maimbod na mag-agom na iyan mayo pa man giraray nin aki. (Gen. 21:​1-7) Alagad, sinasabi kan Bibliya: “Base sa paglaom, nagtubod [si Abraham] na siya an magigin ama nin dakul na nasyon, kauyon kan sinabi.” (Roma 4:18) Aram ta na nagkatotoo an linalauman ni Abraham. Nagin ama siya kan aking lalaki na haloy niya nang hinahalat-halat, si Isaac. Ano an basehan kan kumpiyansa ni Abraham?

2. Taano ta kumbinsido si Abraham na an panuga ni Jehova magkakatotoo?

² Huli sa dayupot na relasyon ni Abraham ki Jehova, “lubos siyang kumbinsido na kun ano an . . . ipinanuga” nin Diyos magkakatotoo. (Roma 4:21) Si Abraham may pag-uyon ni Jehova asin ibinilang na matanos huli sa saiyang pagtubod. (Sant. 2:23) Arog kan ipinapahiling sa Roma 4:​18, an pagtubod asin paglaom ni Abraham magkakonektar. Pag-ulayan ta ngunyan an sinabi ni apostol Pablo manungod sa paglaom, arog kan mababasa sa kapitulo 5 kan Roma.

3. Ano an paliwanag ni Pablo manungod sa paglaom?

³ Ipinaliwanag ni Pablo kun taano ta makakasigurado kita na an satong “paglaom . . . dai minaresulta sa pagkadisganar.” (Roma 5:5) Tinatabangan niya man kita na masabutan kun paano puwedeng kumusog an satong Kristiyanong paglaom. Mantang sinisiyasat an proseso na sinambit ni Pablo sa Roma 5:​1-5, pag-isipan an saimo mismong eksperyensiya. Sa paggibo kaiyan, posibleng marhay na marisa mo na an saimong Kristiyanong paglaom padagos na nagkukusog sa paglihis nin panahon. Manunudan ta man  kun paano pa niyato padagos na mapapakusog an satong pagtubod. Pag-ulayan ta nguna an manungod sa sinabi ni Pablo na sarong magayunon na paglaom na dai minaresulta sa pagkadisganar.

4. Manungod sa ano an sinasabi sa Roma 5:​1, 2?

⁴ Basahon an Roma 5:​1, 2. Isinurat ni Pablo an mga tataramon na iyan para sa kongregasyon sa Roma. An mga tugang duman nakanuod manungod ki Jehova asin ki Jesus, nagpahiling nin pagtubod, asin nagin mga Kristiyano. Huli kaiyan, an Diyos “ipinahayag na [sindang] matanos dahil sa pagtubod,” asin linahidan niya sinda nin banal na espiritu. Iyo, nagkaigwa sinda nin sigurado, sarong magayunon na paglaom.

5. Ano an paglaom kan mga linahidan?

⁵ Kan huri, nagsurat si Pablo sa linahidan na mga Kristiyano sa Efeso manungod sa paglaom na itinao sa sainda nin Diyos. Kaiba sa paglaom na iyan an pag-ako ninda kan “mana kan mga banal.” (Efe. 1:18) Sinabi man ni Pablo sa mga taga Colosas kun sain ninda aakuon an paglaom na iyan. Inapod niya iyan na “paglaom na nakatagama para sa saindo sa langit.” (Col. 1:​4, 5) Kaya an paglaom kan linahidan na mga Kristiyano, iyo an mabuhay liwat para mag-ako nin buhay na daing katapusan sa langit, na diyan mamamahala sinda kaiba ni Cristo.​—1 Tes. 4:​13-17; Kap. 20:6.

6. Ano an sinabi kan sarong linahidan na brother manungod sa saiyang paglaom?

⁶ An saro sa sainda, si Brother Frederick Franz, na maimbod na naglingkod sa Diyos sa laog nin mga dekada, marigon na nagsabi kan 1991: “An satong paglaom sigurado, asin lubos na mauutob iyan sagkod sa kahuri-hurihing miyembro kan 144,000 kan sadit na aripumpon sagkod sa punto na labi sa maiimahinar niyato. . . . Dai [kita] nawawaran nin pagpapahalaga sa paglaom na iyan. . . . Miyentras na mas haloy ta iyan na hinahalat mas urog ta man iyan na pinapahalagahan. Bawi nanggad an paghalat diyan, dawa pa maghalat nin sarong milyon na taon. Urog kong pinapahalagahan ngunyan kisa kasuarin man an satong paglaom na iyan.”

7-8. Ano an paglaom kan kadaklan sa mga lingkod ni Jehova? (Roma 8:​20, 21)

 ⁷ An kadaklan sa mga nagsasamba ki Jehova ngunyan igwa nin ibang paglaom. Iyan an paglaom na arog kan ki Abraham—buhay na daing katapusan sa pamamahala kan Kahadian nin Diyos. (Heb. 11:​8-10, 13) Isinurat ni Pablo an manungod sa magayon na mga bagay na naghahalat para sa mga igwa kan paglaom na iyan. (Basahon an Roma 8:​20, 21.) Kan inot mong manudan an panuga kan Bibliya sa maabot, ano an pinakanagustuhan mo? An panuga daw na sarong aldaw magigin perpekto ka na, bako nang makasalan? O naugma ka daw na marhay kan maaraman mo na an mga mahal mo sa buhay na nagadan mabubuhay giraray sa sarong paraisong daga? Kadakul ka nanggad nin mga bagay na puwedeng halat-halaton “base sa paglaom.”

⁸ Ano man an satong hinahalat-halat, iyan man buhay na daing katapusan sa langit o sa daga, igwa kita nin magayunon na paglaom na nagtatao sato nin dahilan para mag-ugma. Asin an satong maugmang paglaom puwede nganing urog pang kumusog. An sunod na isinurat ni Pablo nagpapaliwanag kun paano iyan puwedeng mangyari. Pag-ulayan ta an isinurat niya manungod sa satong paglaom. Paagi kaiyan, mas magkakaigwa kita nin kumpiyansa na an satong paglaom magkakatotoo.

9-10. Arog kan ipinapahiling kan halimbawa ni Pablo, ano an puwedeng asahan kan mga Kristiyano? (Roma 5:3) (Hilingon man an mga ritrato.)

⁹ Basahon an Roma 5:3. Mangnuhon na an kasakitan puwedeng kaiba sa pagpapakusog kan satong paglaom. Tibaad magngalas kita diyan. An totoo, an gabos na parasunod ni Cristo puwedeng mag-agi nin kasakitan. Pag-isipan an halimbawa ni Pablo. Sinabi niya sa mga taga Tesalonica: “Kan kaibanan mi baga kamo, pirmi ming sinasabi sa saindo na maagi kita nin kasakitan, asin iyan an nangyari.” (1 Tes. 3:4) Asin sa mga taga Corinto, isinurat niya: “Habo ming dai nindo naaaraman, mga tugang, an mapadapit sa kasakitan na naeksperyensiyahan mi . . . Mala ta dai na kami nakakasigurado maski kan buhay mi.”​—2 Cor. 1:8; 11:​23-27.

 ¹⁰ Inaasahan man kan mga Kristiyano ngunyan na makakaeksperyensiya sinda nin manlain-lain na kasakitan. (2 Tim. 3:12) Ika, ano man an naeksperyensiyahan mo? Mantang nagpapahiling ka nin pagtubod ki Jesus asin nagsusunod sa saiya, may naeksperyensiyahan ka daw na kasakitan? Tibaad ininsulto ka kan saimong mga amigo o kapamilya. Tibaad nagin maringis pa ngani sinda sa saimo. Nagkaproblema ka daw sa trabaho huli sa pagigin determinado mo na magin onesto sa gabos na bagay? (Heb. 13:18) Napaatubang ka daw sa pagkontra kan gobyerno huli sa paghiras mo sa iba kan saimong paglaom? Minsan siring, ano man na kasakitan na tibaad maeksperyensiyahan ta, sinasabi ni Pablo na dapat kitang mag-ugma. Taano?

11. Taano ta dapat na magin determinado kitang tagalan an ano man na pagbalo?

¹¹ Puwede kitang mag-ugma dawa nag-aagi nin kasakitan huli sa mga ibinubunga kaiyan. Arog kan sinasabi sa Roma 5:​3, “an kasakitan nagbubunga nin pakatagal.” An gabos na Kristiyano mag-aagi nin kasakitan, kaya an gabos na Kristiyano dapat na magtagal. Dapat na magin determinado kitang magtagal ano man na kasakitan an tibaad agihan ta. Pag ginibo ta iyan, saka ta lang mahihiling an kautuban kan satong paglaom. Habo tang magin arog kan mga tawong nasa isip ni Jesus kan sambiton niya an manungod sa mga banhi na napaduman sa magapong daga. Maugma nindang inako an tataramon kan primero alagad “pag-abot nin kasakitan o pagpersegir,” nasingkog sinda. (Mat. 13:​5, 6, 20, 21) Totoo, bakong magayon na makaeksperyensiya nin pagkontra o mga kasakitan, pero an pagtagal sa mga iyan madara nin nagdadanay na mga pakinabang. Sa paanong paagi?

12. Paano kita nakikinabang pag tinatagalan ta an mga pagbalo?

¹² Idinuon kan disipulong si Santiago an mga pakinabang kan pagtagal sa mga kasakitan. Isinurat niya: “Pabayaan nindo na maisagibo kan pakatagal an katuyuhan kaiyan, tanganing kamo magin lubos asin makusog sa gabos na bagay, na dai nagkukulang nin ano man.” (Sant. 1:​2-4) Ilinadawan ni Santiago an pakatagal na garo baga igwa iyan nin trabahong ginigibo. Anong trabaho an kaipuhan na gibuhon kan pakatagal? Makakatabang iyan saimo na urog pang mapauswag an mga kuwalidad na arog kan pagpapasensiya, pagtubod, asin pagsarig sa Diyos. Apuwera kaiyan, may saro pang mahalagang pakinabang na makukua ta sa pagtagal.

13-14. Ano an ibinubunga kan pakatagal, asin paano iyan konektado sa paglaom? (Roma 5:4)

¹³ Basahon an Roma 5:4. Sinabi ni Pablo na an pakatagal nagbubunga nin “pagigin inuuyunan nin Diyos.” Nakakamtan mo an pag-uyon ni Jehova huli sa saimong pakatagal. Dai buot sabihon kaiyan na nauugma si Jehova na nag-aagi ka nin mga kasakitan o problema. An inuuyunan nin Diyos ika. An saimong pakatagal nagbubunga nin pagigin inuuyunan nin Diyos. Magayunon nanggad na bendisyon!—Sal. 5:12.

¹⁴ Girumdumon si Abraham na tinagalan an mga pagbalong inagihan niya asin nakamtan an pag-uyon nin Diyos. Ibinilang siya ni Jehova na Saiyang amigo asin inapod na matanos. (Gen. 15:6; Roma 4:​13, 22) Puwede man iyan magin totoo sa sato. An pag-uyon nin Diyos sa sato dai niya ibinabase sa kadakulan kan satong nagigibo sa paglilingkod sa saiya o sa pribilehiyo na igwa kita. Makakamtan ta an saiyang pag-uyon kun kita maimbod na nagtatagal. Asin ano man an satong edad, kamugtakan, o abilidad, makakaya ta gabos na magtagal. Maimbod mo daw na tinatagalan sa ngunyan an sarong pagbalo? Kun iyo, mararanga ka sa pakaaram na inuuyunan ka nin Diyos. Pag aram tang napapaugma ta an Diyos, puwede iyan magkaigwa nin mapuwersang epekto sa sato. Mapapakusog kaiyan an satong paglaom.

15. Ano pang punto an idinagdag ni Pablo, asin taano ta tibaad mapaisip diyan an iba?

¹⁵ Arog kan ipinaliwanag ni Pablo, nakakamtan ta an pag-uyon ni Jehova paagi sa maimbod na pagtagal sa mga pagbalo. Mangnuhon an sunod na sinabi ni Pablo: “An pagigin inuuyunan nin Diyos nagbubunga nin paglaom, asin an paglaom na iyan dai minaresulta sa pagkadisganar.” (Roma 5:​4, 5) Tibaad mapaisip an iba. Taano? Sa nainot kayang sinabi ni Pablo sa Roma 5:​2, sinambit niya na an mga Kristiyanong idto sa Roma igwa na nin paglaom, an “paglaom [na] makamtan an kamurawayan nin Diyos.” Kaya tibaad may maghapot, ‘Kun an mga Kristiyanong idto igwa na nin paglaom, taano ta iiniba giraray ni Pablo an paglaom sa sunod na mga sinabi niya?’

16. Paano an paglaom nagpupuon na magtalubo sa sarong tawo? (Hilingon man an mga ritrato.)

¹⁶ Masasabutan ta an buot sabihon ni Pablo kun isasaisip tang an paglaom sarong bagay na nagtatalubo o nagkukusog. Para iilustrar: Nagigirumduman mo daw kan inot mong nadangog an manungod sa makangangalas na paglaom na mababasa sa Tataramon nin Diyos? Tibaad kan panahon na idto, iniisip mo na an mabuhay nin daing katapusan sa sarong paraisong daga garo baga pangarap sana o imahinasyon. Minsan siring, mantang mas namimidbid mo si Jehova asin mas nadadagdagan an kaaraman mo manungod sa mga pangako kan Bibliya, mas nagigin kumbinsido ka na an paglaom na iyan magkakatotoo.

17. Paano an saimong paglaom padagos na nagkukusog pagkatapos kan saimong pagdusay asin bawtismo?

¹⁷ Dawa kan pagkatapos mong magdusay asin magpabawtismo, an saimong paglaom padagos na nagkukusog mantang mas nakakanuod ka asin nagigin maygurang sa espirituwal. (Heb. 5:13–6:1) Posibleng naeksperyensiyahan mo an sinambit sa Roma 5:​2-4. Nag-agi ka nin manlain-lain na kasakitan, pero tinagalan mo an mga iyan asin namati mo na inuuyunan ka nin Diyos. Huling kumbinsido ka na inuuyunan ka nin Diyos, mas may dahilan ka ngunyan na maglaom na makakamtan mo an mga bagay na ipinanuga niya. Mas nagkusog an paglaom mo kisa kan inot. Mas  nagin totoo iyan sa saimo. Nagkakaigwa iyan nin mas dakulang epekto sa saimo sa lambang aspekto kan saimong buhay asin binago kaiyan an paagi mo nin pagtrato sa saimong mga kapamilya, kun paano ka naggigibo nin mga desisyon, asin kun paano mo pa ngani ginagamit an saimong oras.

18. Anong garantiya an itinatao ni Jehova?

¹⁸ May idinagdag pa an apostol na sarong mahalagang marhay na punto manungod sa paglaom na igwa ka pagkatapos na makamtan an pag-uyon nin Diyos. Sinisigurado niya sa saimo na an paglaom mo magkakatotoo. Taano ta makakasigurado kang marhay? Iiniba ni Pablo an garantiyang ini hali sa Diyos para sa mga Kristiyano: “An paglaom na iyan dai minaresulta sa pagkadisganar; huli ta an pagkamuot nin Diyos ipinano sa satuyang puso paagi sa banal na espiritu na itinao sa sato.” (Roma 5:5) Makakasigurado ka nanggad na magkakatotoo an paglaom na iyan—an saimong paglaom.

19. Manungod sa saimong paglaom, sa ano ka makakasigurado?

¹⁹ Pag-isipan an panuga ni Jehova ki Abraham asin kun paano siya inuyunan nin Diyos asin ibinilang na Saiyang amigo. An paglaom ni Abraham dai nanggad nasayang. Sinasabi kan Bibliya: “Pagkatapos magpahiling ni Abraham nin pakatios, nakamtan niya an panugang ini.” (Heb. 6:15; 11:​9, 18; Roma 4:​20-22) An saiyang paglaom dai nanggad nagresulta sa pagkadisganar. Arog niya, makakasigurado ka man na kun magdadanay kang maimbod, babalusan an saimong paglaom. Totoo an saimong paglaom; sarong dahilan iyan para mag-ugma, bako para madisganar! (Roma 12:12) Sinabi ni Pablo: “Lugod na an Diyos na nagtatao nin paglaom panuon kamo nin lubos na kaugmahan asin katuninungan huli sa pagtitiwala nindo sa saiya, tanganing mag-urog an saindong paglaom paagi sa kapangyarihan nin banal na espiritu.”​—Roma 15:13.