SIGURADONG pinapahalagahan mong marhay an manlain-lain na regalo ni Jehova, kaiba na an saimong libertad na magdesisyon sa kun paano mo ikakaugma an mga regalong iyan. Interesante nanggad, ibinibilang kan Bibliya an arak na sarong regalo hali sa Diyos. Sinasabi ngani kaiyan: “An tinapay ginigibo para makapaugma, asin an arak nagpapagaya-gaya sa buhay.” (Ecl. 10:19; Sal. 104:15) Minsan siring, posibleng marhay na nahihiling mo na may mga tawo na nagkakaproblema sa pag-inom nin arak. Saro pa, iba-iba an opinyon asin pamantayan kan mga tawo sa bilog na kinaban asin sa kada kultura kun manungod sa pag-inom nin arak. Kun siring, ano an makakatabang sa mga Kristiyano na makagibo nin madunong na desisyon?

Sain man kita nakaistar o ano man an satong kultura, kun tutugutan ta an pagmansay nin Diyos na iyo an maggiya sa satong kaisipan asin mga desisyon, siguradong makikinabang kita asin magigin mas maugma.

Arog kan tibaad nahihiling mo, dakul ngunyan nin mas parating nag-iinom asin nagpapangana sa arak. May mga nag-iinom ta nakakarelaks iyan sa sainda. An iba man nag-iinom para malingawan nguna an saindang mga problema. Asin sa ibang mga lugar, pag makusog kang mag-inom nin arak, matibay ka o lalaking-lalaki an paghiling saimo kan mga tawo.

Minsan siring, an mga Kristiyano igwa nin madunong na giya hali sa saindang mamumuton na Kaglalang. Halimbawa, pinapatanidan niya kita manungod sa maraot na mga epekto nin sobrang pag-inom. Tibaad nabasa ta na an deskriptibong marhay na pagkaladawan kan Talinhaga 23:​29-35 manungod sa sarong tawong naburat asin an mga problemang dara kaiyan sa saiya. a Nagirumduman ni Daniel, sarong elder sa Europa, an buhay niya bago siya magin tunay na Kristiyano. Sinabi niya, “Dahil sa sobra-sobrang pag-inom, nakagibo ako nin salang mga desisyon. Marauton an nagin eksperyensiya ko huli kaiyan, na sagkod ngani ngunyan apektado pa man giraray ako pag narurumduman ko su mga nangyari.”

Paano puwedeng gamiton kan mga Kristiyano an saindang libertad na magdesisyon asin makalikay sa mga problema na puwedeng magin epekto nin sobrang pag-inom? Mahalagang marhay na tugutan niyato an pagmansay nin Diyos na iyo an gumiya sa satong kaisipan asin mga ginigibo.

Hilingon ta an sinasabi kan Bibliya manungod sa arak asin an rason kan nagkapira kun taano ta nag-iinom sinda.

Dai kinokondenar kan Tataramon nin Diyos an tama sanang pag-inom nin arak. Sa katunayan, sinambit sa Bibliya na puwedeng magin nakakaugma an pag-inom nin arak. Mababasa ta diyan: “Kakana an saimong kakanon na may paggaya-gaya, asin inuma an saimong arak na may maugmang puso.” (Ecl. 9:7) May mga pagkakataon kaidto na nag-inom si Jesus nin arak, pati man an ibang maimbod na mga lingkod ni Jehova.​—Mat. 26:​27-29; Luc. 7:34; 1 Tim. 5:23.

Minsan siring, malinaw na ipinapahiling kan Tataramon nin Diyos an pagkakalain nin tama sanang pag-inom nin arak saka kan pagburat o pagpabuyong. Malinaw na sinasabi kaiyan: “Dai kamo maburat sa arak.” (Efe. 5:18) Sinasabi pa ngani kaiyan na an “mga buratsero . . . dai magmamana kan Kahadian nin Diyos.” (1 Cor. 6:10) Iyo, kinokondenar na marhay ni Jehova an sobrang pag-inom asin an pagburat. Imbes na sunudon na sana an nakaugalian sa satong kultura, nagpapagiya kita sa pagmansay nin Diyos.

Para sa iba, kaya nindang mag-inom nin dakul na arak na dai nabuburat. Pero delikadong marhay iyan. Malinaw na sinasabi kan Kasuratan na pag an sarong lalaki (o babayi) “uripon nin arak,” puwede siyang makagibo nin magabat na kasalan asin maraot an saiyang relasyon ki Jehova. (Tito 2:3; Tal. 20:1) Nagpatanid  pa ngani si Jesus na an “sobrang pag-inom” puwedeng makapugol sa saro na makalaog sa bagong kinaban nin Diyos. (Luc. 21:​34-36) Kaya ano an makakatabang sa sarong Kristiyano para malikayan an nakatagong mga peligrong dara kan pag-inom nin arak?

Bako nanggad marahay kun tutugutan kan saro an saiyang kulturang dinakulaan na iyo an magdeterminar kan pagmansay niya sa pag-inom. May kadunungan na ginigibo kan mga Kristiyano kun ano an nakakapaugma ki Jehova pag-abot sa mga bagay na arog kan pagkakan asin pag-inom. Ipinapagirumdom sa sato kan Bibliya: “Nagkakakan man kamo o nag-iinom o naggigibo nin ano pa man, gibuhon nindo an gabos na bagay sa ikakamuraway nin Diyos.” (1 Cor. 10:31) Uni an nagkapirang hapot asin mga prinsipyo sa Bibliya na puwedeng pag-isipan:

Nag-iinom daw ako nin arak para dai ako mapalain? Sinasabi kan Exodo 23:2: “Dai ka magsunod sa kadaklan.” Pinapatanidan digdi ni Jehova an mga Israelita na dai magsunod sa mga tawong dai niya ikinakaugma. Marahay na sadol iyan dawa sa mga Kristiyano sa ngunyan. Kun tutugutan ta an satong mga kaiba-iba na impluwensiyahan an satong kaisipan asin pagdedesisyon sa pag-inom nin arak, puwede kita kaiyan na mairayo ki Jehova asin dai ta masunod an mga pamantayan niya.​—Roma 12:2.

Nag-iinom daw ako nin arak para ipahiling kun gurano ako katibay? Sa nagkapirang kultura, an parati asin grabeng pag-inom nin arak normal sana asin ordinaryo. (1 Ped. 4:3) Pero pag-isipan an kadunungan na ipinaparisa kan 1 Corinto 16:13: “Magdanay kamong mata, marigon na manindugan sa saindong pagtubod, magpakalalaki kamo, magpakakusog kamo.” Makakatabang daw talaga an arak para kumusog an sarong tawo? Kabaliktaran nanggad. Madali sanang mapaluya kan arak an kakayahan nin saro na makapag-isip nin malinaw asin makagibo nin marahay na desisyon. Kaya imbes na magin tanda nin kakusugan, an pag-inom nin dakul na arak nagpapahiling nin kaluyahan. Sa Isaias 28:​7, an saro na nalalagalag huli sa arak ilinaladawan na nagsasayasay o nagriripay-dipay asin natutumba.

An tunay na kusog minagikan ki Jehova asin kaipuhan diyan an pagdadanay na puka asin marigon na paninindugan sa pagtubod. (Sal. 18:32) Magigibo iyan kan sarong sinserong Kristiyano paagi sa pagdadanay na alerto asin desididong paghiro para protektaran an saiyang sadiri sa espirituwal na peligro.  Ipinahiling ni Jesus an siring na kusog kan yaon siya digdi sa daga, asin irinespeto siya kan dakul na tawo huli sa saiyang kusog nin buot asin determinasyon na gibuhon an tama.

Nag-iinom daw ako para makalingaw nguna sa mga problema? Sarong salmista an pinasabngan na magsurat mapadapit ki Jehova: “Kan magparadakul an ikinakahadit ko, rinanga asin pinaginhawa mo ako.” (Sal. 94:19) Pag pinangluluyahan ka dahil sa mga problema, dumulok ki Jehova para sa tabang, bako sa arak. An epektibong paagi para magibo iyan iyo an parating pagpamibi ki Jehova. Nahiling man kan dakul na kapaki-pakinabang an paghagad nin praktikal na sadol sa sarong maygurang na amigo sa kongregasyon. Sa katunayan, an pag-inom nin arak para makayanan an mga problema puwedeng makapaluya sa determinasyon kan saro na gibuhon an tama. (Os. 4:11) Si Daniel, na sinambit kasubago, nagsabi: “Nasasakitan ako huli sa mga kahaditan saka pagkakonsiyensiya. Nagparainom ako para makayanan iyan, pero mas naggrabe lugod an mga problema ko tapos nawaran ako nin mga amigo saka respeto sa sadiri.” Ano an nakatabang ki Daniel kan huri? “Napag-isip-isip ko na kaipuhan ko an tabang ni Jehova, bako nin arak. Kan huri, nakaya ko man giraray na matagalan asin malampasan an mga problema ko,” an sabi niya. Iyo, yaon pirmi si Jehova para tabangan kita, dawa pa kun an sitwasyon ta garo baga mayo nang paglaom.​—Fil. 4:​6, 7; 1 Ped. 5:7.

Kun nagtatagainom ka, tibaad marahay na pag-isipan mo: ‘May kapamilya daw ako o dayupot na amigo na nagpahayag kan saiyang pagkahadit manungod sa ugali ko sa pag-inom?’ Kun iyo, puwedeng indikasyon iyan na natutuod ka na o nagkakaigwa ka na nin problema na dai mo naririsa. ‘Mas dakul na daw an naiinom ko kisa kan dati?’ Puwedeng arog kaiyan an sitwasyon nin saro na dawa bako man adikto sa arak pero pasiring na siya diyan. ‘Nasasakitan daw ako pag dai ako nakakainom nin arak sa laog nin mga pirang aldaw?’ Kun iyo, posibleng nagigin bisyo mo na an pag-inom o nagigin adikto ka na diyan. Tibaad kaipuhanon mong magpatabang sa mga doktor para mahali an problemang iyan.

Huli sa mga posibleng peligro o problema na dara kan pag-inom nin arak, pinipili kan ibang mga Kristiyano na dai mag-inom nin ano man na klase nin arak. An iba dai nag-iinom nin arak dahil dai lang talaga ninda gusto an namit kaiyan. Kun iyan an desisyon kan saro, puwede kang magpahiling nin kabuutan paagi sa pagrespeto asin dai pagkritika sa saiyang desisyon.

 O tibaad nahihiling mo an kapakinabangan nin pagbugtak nin limitasyon sa sadiri mo. An sarong Kristiyano tibaad magbugtak nin limitasyon sa kun gurano kadakul an iinumon niya. O puwedeng limitaran niya an sadiri niya sa kun gurano siya kaparati mainom, tibaad sarong beses kada semana o pag-inom nin katamtaman sana pag nagkakakan. An iba naglaag nin limitasyon sa kun anong klaseng arak an iinumon ninda, arog kan katamtaman na pag-inom nin wine o beer pero dai kan mga maisog na arak, dawa ngani idtong may dikit na halo kaiyan. Kun an saro may ibinugtak nang malinaw na mga limitasyon sa pag-inom nin arak, mas magigin madali saiya na sunudon an mga iyan. Asin dai kaipuhan na masupog kan sarong maygurang na Kristiyano kun arog kaiyan an napagdesisyunan niya asin determinadong gibuhon.

An pagpahiling nin konsiderasyon sa iba an saro pang dapat na tandaan. An Roma 14:21 nagsasabi: “Pinakamarahay nang dai kumakan nin karne o uminom nin arak o gumibo nin ano man na makakapasingkog sa saimong tugang.” Paano mo maiaaplikar an konsehong ini? Magpahiling nin pagkamuot na sa-magturugang. Kun sa hiling mo may masisingkog kun mainom ka nin arak, bako daw na papahiruon ka kan pagkamuot na dai ipirit an saimong deretso? Paagi kaiyan, maipapahiling mo an saimong konsiderasyon asin respeto sa namamatian kan iba, na iniinot bako an para sa sadiri mong kapakinabangan, kundi an para sa ibang tawo.​—1 Cor. 10:24.

Saro pa, an gobyerno tibaad magbugtak nin mga ley manungod sa arak, asin dapat na sunudon iyan kan mga Kristiyano. Puwedeng kaiba sa ley na iyan an pagbugtak nin minimum na edad kan puwede nang mag-inom nin arak o an pagbabawal na mag-inom pag mamaneho nin lunadan o mapadalagan nin partikular na mga makinarya.​—Roma 13:​1-5.

Tinawan kita ni Jehova nin libertad na magdesisyon kun paano ta gagamiton an dakul na regalong itinao niya sa sato. Kaiba diyan an libertad na magdesisyon kun ano an kakakanon asin kun ano an iinumon ta. Lugod na an satong pagpili magpahiling na pinapahalagahan tang marhay an satong libertad na magdesisyon paagi sa paggamit kaiyan sa paaging nakakapaugma sa satong Ama sa langit.