1. Ano an kaipuhan na gibuhon nin sarong Kristiyanong lalaki para magin mapanggana?

 SINABI ni Hading David ki Solomon: “Magpakakusog ka asin magpakalalaki.” (1 Ha. 2:​1-3) Marahay na sunudon kan gabos na Kristiyanong lalaki ngunyan an sadol na iyan. Para magin mapanggana, dapat na manudan nindang magsunod sa katugunan nin Diyos asin iaplikar an mga prinsipyo sa Bibliya sa gabos na aspekto kan saindang buhay. (Luc. 2:52) Taano ta mahalagang marhay para sa mga hoben na brother na magin maygurang na Kristiyano?

2-3. Taano ta mahalaga sa sarong hoben na brother na magin maygurang na Kristiyano?

² An sarong Kristiyanong lalaki igwa nin mahalagang mga responsabilidad sa laog kan pamilya asin sa kongregasyon. Mga hoben na brother, siyertong napag-isipan na nindo an manungod sa posibleng magin mga responsabilidad nindo pag-abot nin panahon. Tibaad pasuhan nindo na magin sarong bilog na panahon na ministro, ministeryal na lingkod, asin sa huri magin elder sa kongregasyon. Tibaad gusto man nindo na mag-agom asin magkaigwa nin mga aki. (Efe. 6:4; 1 Tim. 3:1) Tanganing maabot an mga pasuhan na iyan asin magin mapanggana, kaipuhan nindong magin maygurang na Kristiyano. b

³ Ano an makakatabang saindo na magin maygurang na Kristiyano? May mahalagang mga kasanayan na kaipuhan nindong manudan. Kaya ano an magigibo nindo ngunyan para magin andam asin magin mapanggana sa ano man na puwedeng magin responsabilidad nindo pag-abot nin panahon?

4. Sain ka makakahanap nin marahay na mga halimbawa na puwedeng arugon? (Hilingon man an ritrato.)

⁴ Magpili nin marahay na mga halimbawa na puwedeng arugon.  Kadakul sa Bibliya nin marahay na halimbawa na puwedeng arugon kan mga hoben na lalaki. An suanoy na mga lalaking idto namutan an Diyos asin nagkapot nin mga responsabilidad sa pangangataman sa saiyang banwaan. Makakahanap man kamo sa saindo mismong pamilya asin sa saindong kongregasyon nin maygurang na mga Kristiyano na marahay na mga halimbawa. (Heb. 13:7) Asin igwa kamo nin perpektong halimbawa​—si Jesu-Cristo. (1 Ped. 2:21) Mantang pinag-aadalan nindong marhay an mga halimbawang iyan, isip-isipon an marahayon nindang mga kuwalidad. (Heb. 12:​1, 2) Dangan pag-isipan kun paano nindo maaarog an mga lalaking iyan.

5. Paano mo mapapatalubo an kakayahan na mag-isip, asin taano ta mahalaga ini? (Salmo 119:9)

⁵ Patalubuon asin ingatan an “kakayahan na mag-isip.” (Tal. 3:21) An saro na may kakayahan na mag-isip pinag-iisipan ngunang marhay an saiyang mga mapagpipilian bago gumibo nin aksiyon. Kaya maghinguwang marhay para magkaigwa ka kan kakayahan na iyan asin padagos iyan na ipahiling. Taano? Dakul sa kinaban na ini nin mga hoben na lalaki na naggigibo nin desisyon base sa sadiri nindang pakasabot o sa saindang emosyon. (Tal. 7:7; 29:11) An media puwede man na makaimpluwensiyang marhay sa saimo. Pero paano ka magkakaigwa kan kakayahan na mag-isip? Magpuon paagi sa pag-aram kan mga prinsipyo sa Bibliya asin pag-isipan kun taano ta kapaki-pakinabang iyan. Dangan magpagiya sa mga prinsipyong iyan para makagibo ka nin mga desisyon na makakapaugma ki Jehova. (Basahon an Salmo 119:9.) Kun magkakaigwa ka kan mahalagang kakayahan na ini, makakatabang na marhay iyan sa saimo na magin sarong maygurang na Kristiyano. (Tal. 2:​11, 12; Heb. 5:14) Pag-isipan kun paano an kakayahan na mag-isip makakatabang sa saimo sa duwang sitwasyon: (1) sa pagtratar sa mga sister asin (2) sa saimong pagbado saka pag-ayos sa sadiri.

6. Paano an kakayahan na mag-isip makakatabang sa sarong hoben na brother na magpahiling nin paggalang sa mga sister?

⁶ An kakayahan na mag-isip matabang sa saimo na magpahiling nin paggalang sa mga babayi. Normal saka mayong sala na magin interesado an sarong hoben na brother sa sarong sister. Minsan siring, an sarong hoben na lalaki na may kakayahan na mag-isip dai masabi, masurat, o magibo nin ano man na magpaparisa nin romantikong interes sa sarong sister apuwera na sana kun seryoso siya na magin kailusyon ini. (1 Tim. 5:​1, 2) Kun nakikipag-date siya sa sarong sister, iingatan niya an  marahay na reputasyon kaini paagi sa dai nuarin man pagsolo na sinda sana apuwera na lang kun may kaibang angay na tsaperon.​—1 Cor. 6:​18.

7. Paano an kakayahan na mag-isip makakatabang sa sarong hoben na brother sa pagpili nin bado asin pag-ayos sa sadiri?

⁷ May saro pang paagi para maipahiling kan sarong hoben na lalaki na mahusay an saiyang kakayahan na mag-isip: an marahay na pagpili nin bado asin pag-ayos sa sadiri. Sa parati, an mga usong istilo nin bado dinisenyo asin ipinapalakop kan mga tawong mayong paggalang ki Jehova o imoral an pamumuhay. An saindang imoral na kaisipan nahihiling sa istilo kan saindang mga bado na yapit o na an mga lalaki itsura nang babayi. Pag nagpipili nin isusulot, an sarong hoben na lalaki na nag-uuswag sa pagigin maygurang na Kristiyano nagpapagiya sa mga prinsipyo kan Bibliya asin sa marahay na mga halimbawa sa kongregasyon. Puwede niyang haputon an saiyang sadiri: ‘An mga pinipili ko daw nagpapahiling na igwa ako nin marahay na kaisipan asin nin konsiderasyon sa iba? Madali daw na mahiling sa pagbado ko na saro akong tunay na lingkod nin Diyos?’ (1 Cor. 10:​31-33; Tito 2:6) An sarong hoben na lalaki na may kakayahan na mag-isip nakukua an respeto bako lang kan saiyang mga kapagtubod kundi pati man kan saiyang Ama sa langit.

8. Paano makakanuod an sarong hoben na brother na magin maaasahan?

⁸ Magin maaasahan. An sarong maaasahan na hoben na lalaki maigot na ginigibo an gabos niyang responsabilidad. (Luc. 16:10) Pag-isipan an perpektong halimbawa ni Jesus. Dai siya nuarin man nagin iresponsable o daing pakiaram. Imbes, inutob niya an mga asignasyon na itinao saiya ni Jehova, dawa kan nagin masakit iyan para saiya na gibuhon. Namumutan niya an mga tawo​—lalo na an mga disipulo niya​—asin gikan sa buot na itinao niya an saiyang buhay para sa sainda. (Juan 13:1) Arugon si Jesus​—magmaigot na utubon an ano man na asignasyon na itinatao sa saimo. Kun dai ka sigurado kun paano iyan gigibuhon, magin mapakumbaba asin magpatabang sa maygurang na mga brother. Dai makontento na basta lang magibo an iinasignar saimo. (Roma 12:11) Imbes, tapuson an saimong asignasyon, na ginigibo iyan “para ki Jehova, asin bakong para sa mga tawo.” (Col. 3:​23) Siyempre, bako kang perpekto, kaya magin mapakumbaba asin akuon an ano man na nagibo mong sala.​—Tal. 11:2.

9. Taano ta an sarong hoben na brother dapat na makanuod nin praktikal na mga kasanayan?

⁹ Tanganing magin maygurang na Kristiyano, kaipuhan mong makanuod nin praktikal na mga kasanayan. Makakatabang ini sa saimo na magibo an mga responsabilidad sa kongregasyon, magkaigwa nin trabaho para masuportaran an sadiri o an saimong pamilya, asin tanganing magkaigwa nin marahay na relasyon sa iba. Pag-isipan an pira sa mahalagang mga kasanayan na ini.

10-11. Paano makikinabang an sarong hoben na brother asin an kongregasyon kun makakanuod siyang magin mahusay sa pagbasa asin pagsurat? (Salmo 1:​1-3) (Hilingon man an ritrato.)

¹⁰ Magin mahusay sa pagbasa asin pagsurat. Sinasabi kan Bibliya na an sarong tawo na maugma asin mapanggana sa buhay nagtatao nin panahon kada aldaw para magbasa asin maghurop-hurop  kan Tataramon nin Diyos. (Basahon an Salmo 1:​1-3.) Paagi sa pagbasa nin Bibliya aroaldaw, nasasabutan niya an kaisipan ni Jehova, na makakatabang sa saiya na makapag-isip nin malinaw asin magkaigwa nin marahay na pangangatanusan. (Tal. 1:​3, 4) Kaipuhan sa kongregasyon an siring na mga lalaki. Taano?

¹¹ Kaipuhan kan satong mga tugang an may kakayahan na mga lalaki na makakatao nin base sa Bibliyang instruksiyon asin sadol. (Tito 1:9) Kun mahusay kang magbasa asin magsurat, makakapag-andam ka nin nakakapagtukdo asin nakakapakusog sa pagtubod na mga pahayag asin komento. Makakagibo ka man nin kapaki-pakinabang na mga nota mantang nag-aadal ka saka mantang nagdadangog sa mga pahayag sa mga pagtiripon sa kongregasyon, asembleya, asin kumbensiyon. An mga notang ini matabang saimo para mapakusog mo an saimong pagtubod asin mapakusog mo an iba.

12. Ano an makakatabang saimo na magin mahusay sa pakikikomunikar?

¹² Magin mahusay sa pakikikomunikar. An sarong Kristiyano dapat na makanuod na magin mahusay makikomunikar. An saro na mahusay makikomunikar nagdadangog asin sinasabot an iniisip saka namamatian kan iba. (Tal. 20:5) Nababasa niya an tono kan boses kan iba, ekspresyon nin lalawgon, asin hiro-hiro. Dai mo manunudan ini kun dai ka matao nin panahon para makipag-ulay sa iba. Kun pirmi kang naggagamit nin elektronikong mga paagi nin pakikikomunikar, arog kan email asin pag-text, makakapaluya iyan sa kakayahan mo na makipag-ulay sa iba nin personal. Kun siring, gumibo nin mga paagi para personal na makaulay an iba.​—2 Juan 12.

13. Ano pa an kaipuhan manudan nin sarong hoben na lalaki? (1 Timoteo 5:8) (Hilingon man an ritrato.)

¹³ Makanuod na suportaran an sadiri sa pinansiyal. An sarong maygurang na Kristiyanong lalaki dapat na may kakayahan na suportaran an saiyang sadiri asin an saiyang pamilya. (Basahon an 1 Timoteo 5:8.) Sa nagkapirang nasyon, an mga hoben na lalaki puwedeng makanuod nin sarong kasanayan o trabaho sa saindang ama o sa ibang kapamilya. Sa ibang nasyon man, an sarong hoben na lalaki puwedeng makanuod nin sarong kasanayan o iba pang klase nin trabaho mantang nasa high school. Ano man an sitwasyon, marahay na makanuod nin kasanayan na makakatabang sa saimo na makahanap nin trabaho. (Gibo 18:​2, 3; 20:34; Efe. 4:28) Hinguwahon na mamidbid ka bilang saro na mahigos asin saro na dai binabayaan an trabaho sagkod na dai iyan natatapos. Paagi kaiyan, magkakaigwa ka nin mas dakulang tsansa na makakua nin trabaho asin magdanay diyan. An mga kuwalidad asin kasanayan na napag-ulayan ta mahalaga man para sa sarong Kristiyanong lalaki tanganing magibo niya an maabot na mga asignasyon o responsabilidad. Pag-ulayan ta an pira sa mga iyan.

14. Paano puwedeng mag-andam an sarong hoben na brother para makapaglingkod nin bilog na panahon?

¹⁴ Paglilingkod nin bilog na panahon. Dakul na maygurang na Kristiyano an nagpuon sa bilog na panahon na pagmiministeryo kan sinda hoben pa. An pagpapayunir nakakatabang sa sarong hoben na lalaki na makanuod kun paano makikiiba-iba sa manlain-lain na tawo na iba-iba an personalidad. Nakakatabang man iyan sa saiya na magbadyet asin dai gumastos nin sobra diyan. (Fil. 4:​11-13) An sarong magayon na paagi para punan an bilog na panahon na paglilingkod iyo an pag-auxiliary payunir. Dakul an nag-auxiliary payunir nin pirang panahon, na nakatabang sa sainda na magin handa sa paglaog bilang regular payunir. An pagpapayunir puwedeng magbukas nin pinto para sa iba pang klase nin bilog na panahon na paglilingkod, kaiba na an paglilingkod bilang construction servant o Bethelite.

15-16. Ano an puwedeng gibuhon nin sarong hoben na brother para magin kuwalipikado na maglingkod sa kongregasyon?

¹⁵ Ministeryal na lingkod o elder. An Kristiyanong mga lalaki dapat na magkaigwa nin pasuhan na makuwalipikar na maglingkod sa saindang mga tugang bilang elder sa kongregasyon. Sinasabi kan Bibliya na an mga lalaking naghihinguwang maabot an pribilehiyong ini “nagmamawot . . . nin marahay na gibuhon.” (1 Tim. 3:1) Bago maglingkod bilang elder, an sarong brother dapat na makuwalipikar bilang ministeryal na lingkod. An mga ministeryal na lingkod nagtatabang sa mga elder sa dakul na praktikal na paagi. An mga elder saka mga ministeryal na lingkod parehong mapakumbaba na naglilingkod sa saindang mga tugang asin maigot na nagpapartisipar sa ministeryo. An mga hoben na brother puwedeng makuwalipikar bilang ministeryal na lingkod dawa mayo pa sindang 20 anyos. Asin an sarong kuwalipikadong marhay na ministeryal na lingkod puwede nang nombrahan bilang sarong elder dawa nasa 20 anyos pa sana siya.

¹⁶ Paano ka makukuwalipikar sa mga responsabilidad na ini? Mayo man nin pormula. Minsan siring, an kinakaipuhan na mga kuwalipikasyon gabos nakabase sa Bibliya asin sa pagkamuot ki Jehova, sa saimong pamilya, asin sa kongregasyon. (1 Tim. 3:​1-​13; Tito 1:​6-9; 1 Ped. 5:​2, 3) Pagmaigutan na masabutan an lambang kuwalipikasyon. Mamibi ki Jehova na tabangan kang maabot an mga kuwalipikasyon na iyan. c

17. Paano puwedeng mag-andam an sarong hoben na brother para magin sarong agom na lalaki asin payo nin pamilya? (Hilingon man an ritrato.)

¹⁷ Agom na lalaki asin payo nin pamilya. Arog kan sinabi ni Jesus, may nagkapirang maygurang na Kristiyanong lalaki na nagdanay na daing agom. (Mat. 19:12) Minsan siring, kun magdesisyon  kang mag-agom, magkakaigwa ka nin dagdag na responsabilidad bilang sarong agom asin payo nin pamilya. (1 Cor. 11:3) Inaasahan ni Jehova sa sarong agom na lalaki na mamumutan niya an saiyang agom asin itatao an pisikal, emosyonal, asin espirituwal na mga pangangaipo kaini. (Efe. 5:​28, 29) An mga kuwalidad asin kasanayan na pinag-ulayan ta sa artikulong ini, arog kan pagpatalubo kan kakayahan na mag-isip, pagpahiling nin paggalang sa mga babayi, asin pagigin maaasahan, makakatabang saimo para magin mahusay na agom na lalaki. Magigin andam kang marhay para magibo an responsabilidad mo bilang sarong agom na lalaki asin payo nin pamilya.

18. Paano puwedeng mag-andam an sarong hoben na brother para magin sarong ama?

¹⁸ Ama. Pag may agom ka na, puwede kang magin ama. Ano an manunudan mo ki Jehova sa pagigin sarong marahay na ama? Dakul kang manunudan. (Efe. 6:4) Hayagan na sinabi ni Jehova sa saiyang Aki, si Jesus, na namumutan asin inuuyunan niya ini. (Mat. 3:​17) Kun ika magin sarong ama, siguraduhon na pirmi mong naipapamati sa saimong mga aki na namumutan mo sinda. Pirmi sindang komendaran sa marahay na mga bagay na ginigibo ninda. An mga ama na inaarog an halimbawa ni Jehova tinatabangan an saindang mga aki na magin maygurang na Kristiyanong lalaki asin babayi. Puwede ka nang mag-andam ngunyan para sa responsabilidad na ini paagi sa mamumuton na pag-ataman sa iba sa laog kan saindong pamilya saka kongregasyon. Asin makanuod na ipahayag an saimong pagkamuot asin pag-apresyar sa sainda. (Juan 15:9) Makakatabang ini saimo na magibo an posibleng magin mga responsabilidad mo sa maabot bilang sarong agom na lalaki asin ama. Asin sa ngunyan pa sana, magigin kapaki-pakinabang ka na ki Jehova, sa saimong pamilya, asin sa kongregasyon.

19-20. Ano an makakatabang sa mga hoben na brother para magin maygurang na mga Kristiyanong lalaki? (Hilingon an ritrato sa cover.)

¹⁹ Mga hoben na brother, dai kamo awtomatikong magigin sarong maygurang na Kristiyano. Kaipuhan nindong pumili nin marahay na mga arugan, patalubuon an kakayahan na mag-isip, magin maaasahan, makanuod nin praktikal na mga kasanayan sa buhay, asin magin andam para sa maabot na mga responsabilidad.

²⁰ Pag iniisip-isip an mga bagay na kaipuhan mong gibuhon, tibaad mamati mo kun minsan na garo baga masakiton iyan. Pero makakaya mo iyan. Tandaan na gustong-gusto kang tabangan ni Jehova. (Isa. 41:​10, 13) Siyempre, tatabangan ka man kan mga tugang sa kongregasyon. Pag saro ka nang maygurang na Kristiyano, magigin maugma asin nakakakontento an saimong buhay. Namumutan niyamo kamo mga hoben na brother! Lugod na abunda kamong bendisyunan ni Jehova mantang hinihinguwa nindo ngunyan na magin maygurang na mga Kristiyano.​—Tal. 22:4.