1. Para magin maygurang na Kristiyano, ano an dapat tang gibuhon?

 NAPAPANGALAS kita kun gurano karikas magin adulto an sarong aki. An pagtalubong iyan sa pisikal garo baga madalion lang. Minsan siring, an pagtalubo sa espirituwal o an pagigin maygurang na Kristiyano bako nanggad madali. b (1 Cor. 13:11; Heb. 6:1) Para maabot an pasuhan na iyan, kaipuhan na magkaigwa kita nin dayupot na relasyon ki Jehova. Kaipuhan ta man kan saiyang banal na espiritu mantang pinapatalubo an diyosnon na mga kuwalidad, nakakanuod nin praktikal na mga kasanayan, asin nag-aandam para sa maabot na mga responsabilidad.​—Tal. 1:5.

2. Ano an manunudan ta sa Genesis 1:27, asin ano an pag-uulayan ta sa artikulong ini?

² Ginibo ni Jehova an tawo na lalaki asin babayi. (Basahon an Genesis 1:27.) Madali ta nanggad mahiling an pisikal na pagkakalain kan lalaki asin babayi, pero dakul pa an pagkakalain ninda. Halimbawa, linalang ni Jehova an lalaki asin babayi na igwa nin espesipikong mga papel na dapat gibuhon, kaya kaipuhan ninda kan mga kuwalidad asin kasanayan na makakatabang sainda na utubon an saindang kanya-kanyang mga papel. (Gen. 2:18) Sa artikulong ini, pag-uulayan ta kun ano an puwedeng gibuhon kan sarong hoben na sister para magin maygurang na Kristiyana. Sa masunod na artikulo, pag-uulayan ta man kun ano an puwedeng gibuhon kan mga hoben na brother.

3-4. Sain makakakua an hoben na mga sister nin marahay na mga halimbawa na puwede nindang arugon? (Hilingon man an ritrato.)

³ Sa Bibliya may mababasa kita manungod sa dakul na kahanga-hangang babayi na namutan si Jehova asin naglingkod saiya.  (Hilingon sa jw.org an artikulong “Mga Babayi sa Bibliya—Ano an Manunudan Ta Sainda?”) Arog kan sinasabi sa satong temang teksto, sinda “balanse sa paggawi” asin “maimbod sa gabos na bagay.” Apuwera kaiyan, makakahanap man an mga sister sa saindang kongregasyon nin mga halimbawa nin maygurang na Kristiyana na puwede nindang arugon.

⁴ Mga hoben na sister, may midbid daw kamong nagkapirang maygurang na Kristiyana na puwede nindong magin arugan? Obserbaran an saindang magagayon na kuwalidad; dangan pag-isipan kun paano mo man maipapahiling an mga kuwalidad na iyan. Sa masunod na mga parapo, pag-uulayan ta an tulong mahalagang kuwalidad na kaipuhan kan maygurang na mga babayi.

5. Taano ta mahalagang marhay an kapakumbabaan sa sarong maygurang na Kristiyana?

⁵ An kapakumbabaan sarong mahalagang marhay na kuwalidad nin sarong maygurang na Kristiyana. Pag an sarong babayi mapakumbaba, magkakaigwa siya nin marahay na relasyon ki Jehova asin sa iba. (Sant. 4:6) Halimbawa, an sarong babayi na namumutan si Jehova mapakumbabang sinusuportaran an prinsipyo nin pagkapayo na inestablisar kan saiyang Ama sa langit. (1 Cor. 11:3) An prinsipyong iyan igwa nin espesipikong aplikasyon sa kongregasyon asin sa laog kan pamilya. c

6. Ano an manunudan kan hoben na mga sister ki Rebeka manungod sa kapakumbabaan?

⁶ Pag-isipan an halimbawa ni Rebeca. Saro siyang madunong na babayi na sa bilog niyang buhay nakagibo nin pusuan na mga desisyon asin aram niya kun nuarin asin kun paano mahiro. (Gen. 24:58; 27:5-17) Minsan siring, magalang siya asin mapagpasakop. (Gen. 24:17, 18, 65) Kun mapakumbaba mo man na susuportaran an mga areglo ni Jehova, arog ni Rebeca, magigin marahay kang halimbawa sa saimong pamilya asin sa kongregasyon.

7. Paano maaarog kan mga hoben na sister si Esther sa pagpahiling nin kababaan nin buot?

⁷ An kababaan nin buot saro pang kuwalidad na kaipuhan kan gabos na maygurang na Kristiyano.  Sinasabi kan Bibliya na “an kadunungan yaon sa mga hababa an buot.” (Tal. 11:2) Si Esther sarong babaying hababa an buot asin maimbod na lingkod nin Diyos. Huli sa saiyang kababaan nin buot, nalikayan niya na magin pangahas. Nagdangog siya sa sadol kan saiyang matuang pinsan na si Mardokeo asin sinunod iyan. (Est. 2:10, 20, 22) Maipapahiling mo man an arog kaiyan na kababaan nin buot paagi sa paghagad nin marahay na mga sadol asin pag-aplikar kaiyan.​—Tito 2:3-5.

8. Sigun sa 1 Timoteo 2:9, 10, paano an kababaan nin buot makakatabang sa sarong sister na magin madunong sa pagpili nin bado asin pag-ayos sa sadiri?

⁸ Ipinahiling ni Esther an kababaan nin buot sa iba pang paagi. Siya “magayon asin kaakit-akit”; pero, linikayan niyang makakua nin sobrang atensiyon. (Est. 2:7, 15) Paano makikinabang an sarong Kristiyana sa halimbawa ni Esther? An sarong paagi mababasa sa 1 Timoteo 2:9, 10. (Basahon.) Sinadol ni apostol Pablo an mga Kristiyana na magbado na may kabinian asin tultol na isip. An Griegong mga tataramon na ginamit digdi nagpaparisa na an pagbado kan sarong Kristiyana dapat na magin kagalang-galang asin nagpapahiling nin konsiderasyon sa namamatian o opinyon kan iba. Hinahangaan ta nanggad an satong maygurang na Kristiyanang mga sister sa saindang mabining pagbado!

9. Ano an manunudan ta sa halimbawa ni Abigail?

⁹ An pakamansay saro pang kuwalidad na kaipuhan ipahiling kan gabos na maygurang na Kristiyana. Ano an pakamansay? Iyan marahay na paghusgar—an kakayahan na maaraman kun ano an tama asin sala, dangan pagpili nin madunong na desisyon. Pag-isipan an halimbawa ni Abigail. An saiyang agom naggibo nin salang desisyon na madara nin kapahamakan sa gabos na kairiba niya sa harong. Huminiro tulos si Abigail. An saiyang marahay na paghusgar nakapagligtas nin buhay. (1 Sam. 25:14-23, 32-35) An pakamansay makakatabang man sa sato na mahiling kun nuarin mataram asin kun nuarin masilensiyo. Asin makakatabang man iyan sa sato na magdanay na balanse pag nagpapahiling nin personal na interes sa iba.​—1 Tes. 4:11.

10-11. Paano ka makikinabang asin an iba kun mahusay ka sa pagbasa asin pagsurat? (Hilingon man an ritrato.)

¹⁰ An sarong Kristiyana kaipuhan na makanuod nin praktikal na mga kasanayan. An nagkapirang kasanayan na nanudan nin sarong aking babayi kan siya aki pa padagos niyang mapapakinabangan sa bilog niyang buhay. Pag-isipan an nagkapirang halimbawa.

¹¹ Makanuod na magin mahusay sa pagbasa asin pagsurat. Sa nagkapirang kultura, an pagbasa asin pagsurat dai ibinibilang na mahalagang kasanayan na kaipuhan manudan nin mga babayi. Minsan siring, mahalagang mga kasanayan iyan para sa lambang Kristiyano. d (1 Tim. 4:13) Kaya dai pagtugutan  an ano man na ulang na makapugol saimo na makanuod na magin mahusay sa pagbasa asin pagsurat. Paano ka makikinabang? An siring na mga kasanayan makakatabang saimo na makakua nin trabaho. Mas magigin mahusay kang estudyante asin paratukdo kan Tataramon nin Diyos. Urog sa gabos, mas magigin dayupot ka ki Jehova mantang binabasa mo an saiyang Tataramon asin hinuhurop-hurop iyan.​—Jos. 1:8; 1 Tim. 4:15

12. Paano makakatabang saimo an Talinhaga 31:26 para magin mahusay sa pakikikomunikar?

¹² Makanuod na magin mahusay sa pakikikomunikar. Mahalagang manudan iyan kan mga Kristiyano. Manungod diyan, nagtao sa sato an disipulong si Santiago nin praktikal na konseho. Sinabi niya: “An lambang saro dapat na andam tulos na magdangog, dai tulos nagtataram.” (Sant. 1:19) Pag nagdadangog kang marhay pag nagtataram an iba, nagpapahiling ka nin empatiya o “pakikidamay” sa sainda. (1 Ped. 3:8) Kun dai ka sigurado kun ano an buot sabihon o namamatian nin sarong tawo, magbangon nin angay na mga hapot. Dangan mag-isip nguna bago magtaram. (Tal. 15:28, nota sa ibaba) Haputon an sadiri: ‘An sasabihon ko daw totoo asin nakakapakusog? Iyan daw nagpapahiling nin paggalang asin kabuutan?’ Makanuod sa mga maygurang na sister na nagdadangog na marhay asin mabuot makipag-ulay. (Basahon an Talinhaga 31:26.) Obserbaran kun paano sinda magtaram. Mantang mas nanunudan mo an kasanayan na iyan, mas magkakaigwa ka man nin marahay na relasyon sa iba.

13. Paano ka makakanuod kan mga gibuhon sa harong? (Hilingon man an ritrato.)

¹³ Makanuod nin mga gibuhon sa harong. Sa dakul na lugar, mga babayi an naggigibo kan kadaklan na mga gibuhon sa harong. Si Mama mo o an ibang may kakayahan na sister puwedeng makatabang saimo na manudan an kinakaipuhan na mga kasanayan. Sinabi kan sister na si Cindy: “An saro sa pinakamagayon na regalo sa sako ni Mama iyo an pagtukdo sako na an pagigin mahigos sa trabaho nagtatao nin kaugmahan. An makanuod nin mga kasanayan na arog kan pagluto, paglinig, pagtahi, asin pamamakal nakatabang sa sako na maasikaso an sadiri ko asin mas makapaglingkod ki Jehova. Tinukduan man ako ni Mama kun paano magigin mapag-istimar. Kaya nakatabang iyan sa sakuya na mamidbid an marahayon na mga tugang na puwede kong magin arugan.” (Tal. 31:15, 21, 22) An mahigos, mapag-istimar na babayi na tatao kan mga gibuhon sa harong, sarong bendisyon sa saiyang pamilya asin sa kongregasyon.​—Tal. 31:13, 17, 27; Gibo 16:15.

14. Ano an manunudan mo sa eksperyensiya ni Crystal, asin ano an dapat na magin panginot saimo?

¹⁴ Makanuod na suportaran an sadiri. Sarong mahalagang pasuhan para sa gabos na maygurang na Kristiyano na makanuod kun paano susuportaran an saindang sadiri asin magin kontento sa kun ano an igwa sinda. (Fil. 4:11) Sinabi kan sister na si Crystal: “Inenkaminar ako kan mga magurang ko na pumili nin kurso sa hayskul na makakatabang sako na makanuod nin praktikal na mga kasanayan. Sinabihan ako ni Papa na kumua nin accounting subject na talagang nakatabang na marhay sako.” Apuwera sa mga kasanayan na kaipuhan  para makahanap nin trabaho, hinguwahon man na makanuod kun paano magbadyet asin sunudon iyan. (Tal. 31:16, 18) Padagos na magpokus sa saimong espirituwal na mga pasuhan paagi sa dai pagkaigwa nin dai kinakaipuhan na utang asin pagigin kontento sa simpleng pamumuhay.​—1 Tim. 6:8.

15-16. Taano ta mahalagang marhay an mga sister na daing agom? (Marcos 10:29, 30)

¹⁵ Pag napatalubo mo an espirituwal na mga kuwalidad asin mahalagang mga kasanayan, mas magigin andam ka para sa maabot na mga responsabilidad. Pag-isipan an pirang halimbawa.

¹⁶ Puwede ka na dai nguna mag-agom. Kauyon kan sinabi ni Jesus, may mga babayi na pinili na dai mag-agom dawa ngani dinidisganar sa kultura ninda an pagigin daing agom. (Mat. 19:10-12) An iba tibaad nagdanay na daing agom huli sa manlain-lain na dahilan. Makakasigurado ka na dai minemenos ni Jehova asin ni Jesus an mga Kristiyanang daing agom. Sa bilog na kinaban, an mga sister na daing agom marahayon na impluwensiya sa kongregasyon. Huli sa saindang pagkamuot asin sinserong interes sa iba, an mga Kristiyanang ini nagigin espirituwal na mga tugang na babayi asin espirituwal na ina para sa dakul.​—Basahon an Marcos 10:29, 30; 1 Tim. 5:2.

17. Paano makakapag-andam ngunyan an sarong hoben na sister para makalaog sa bilog na panahon na paglilingkod?

¹⁷ Puwede kang magin sarong bilog na panahon na lingkod. Dakulaon an nagigibo kan mga Kristiyana sa pambilog na kinaban na gibuhon na paghuhulit. (Sal. 68:11) Puwede ka daw na magplano na ngunyan na lumaog sa bilog na panahon na ministeryo? Puwede kang maglingkod bilang sarong payunir, construction volunteer, o Bethelite. Ipamibi an saimong pasuhan. Makipag-ulay sa iba na nakaabot na kan arog kaiyan na pasuhan, asin aramon kun ano an puwede mong gibuhon para makuwalipikar. Dangan gumibo nin realistikong plano. Pag naabot mo an pasuhan mo, magigin bukas sa saimo an dakul na nakakaugmang oportunidad sa paglilingkod ki Jehova.

18. Taano ta dapat na pilion na marhay kan sarong sister an magigin agom niya? (Hilingon man an ritrato.)

¹⁸ Puwede mong pilion na mag-agom. An mga kuwalidad asin kasanayan na napag-ulayan ta makakatabang saimo na magin sarong may kakayahan na agom na babayi. Siyempre, kun nag-iisip kang mag-agom, dapat na pilion mong marhay an magigin agom mo. Saro iyan sa pinakamahalagang desisyon na gigibuhon mo. Tandaan, kakaipuhanon mong magpasakop sa pagkapayo kan lalaking maaagom mo. (Roma 7:2; Efe. 5:23, 33) Kaya haputon an sadiri: ‘Siya daw sarong maygurang  na Kristiyano? Panginot daw sa buhay niya an espirituwal na mga bagay? Madunong daw an mga desisyon na ginigibo niya? Inaako niya daw an nagigibo niyang sala? Iginagalang niya daw an mga babayi? Igwa daw siya nin mga kinakaipuhan na kasanayan para masuportaran ako sa espirituwal, materyal, asin emosyonal? Mahusay daw niyang nagigibo an saiyang mga responsabilidad? Halimbawa, ano an mga asignasyon niya sa kongregasyon asin paano niya iyan ginigibo?’ (Luc. 16:10; 1 Tim. 5:8) Siyempre, kun gusto mong makahanap nin marahay na magigin agom na lalaki, kaipuhan mo man na maghinguwa para magin sarong marahay na agom na babayi.

19. Taano ta sarong onra an pagigin sarong “katuwang”?

¹⁹ Sinasabi kan Bibliya na an sarong marahay na agom na babayi sarong “katuwang” asin “kaiba-iba” kan saiyang agom. (Gen. 2:18) Mapangmenos daw na deskripsiyon iyan? Bako! Sarong onra ngani iyan para sa agom na babayi. Sa katunayan, parating ilinaladawan kan Bibliya si Jehova bilang katuwang o sarong “paratabang.” (Sal. 54:4; Heb. 13:6) An agom na babayi nagigin sarong tunay na katuwang kan saiyang agom pag sinusuportaran niya ini asin tinatabangan ini sa pag-implementar kan mga desisyon para sa saindang pamilya. Asin huling namumutan niya si Jehova, naghihinguwa siya para matabangan an saiyang agom na magkaigwa nin marahay na reputasyon. (Tal. 31:11, 12; 1 Tim. 3:11) Puwede mong pag-andaman an posibleng magin responsabilidad mong ini sa maabot paagi sa pagpakusog kan pagkamuot mo ki Jehova asin paagi sa pagigin sarong katuwang sa saindong pamilya asin sa kongregasyon.

20. Ano an puwedeng magin epekto kan sarong marahay na ina sa saiyang pamilya?

²⁰ Puwede kang magin sarong ina. Pag may agom ka na, puwede kamong magkaigwa nin mga aki. (Sal. 127:3) Kaya sarong kadunungan na mag-andam. An mga kuwalidad asin kasanayan na napag-ulayan ta sa artikulong ini makakatabang saimo kun ika mag-agom na asin magin sarong ina. An saimong pagkamuot, kabuutan, asin pagpapasensiya makakatabang na magin maugma an saindong pamilya asin mamamatian kan saindong mga aki na sinda ligtas asin namumutan.​—Tal. 24:3.

21. Ano an namamati ta para sa satong mga sister, asin taano? (Hilingon an ritrato sa cover.)

²¹ Namumutan mi kamo mga sister sa gabos na ginigibo nindo para ki Jehova asin sa mga lingkod niya. (Heb. 6:10) Nagmamaigot kamo tanganing mapatalubo an espirituwal na mga kuwalidad, tanganing makanuod nin mga kasanayan na makakatabang saindo asin sa iba, asin tanganing makapag-andam na marhay sa posibleng magin mga responsabilidad nindo. Mahalagang marhay kamo sa organisasyon ni Jehova!