Binasa mo daw na marhay an mga isyu kan An Torrengbantayan sa taon na ini? Kun iyo, hilinga kun masisimbag mo an minasunod na mga hapot:

Ano an kalabot sa “pagbago kan saindong isip”? (Roma 12:2)

Urog pa iyan sa paggibo nin marahay na mga bagay. Kaiba diyan an pagsiyasat niyato sa satong panglaog na pagkatawo asin paggibo nin mga pagbabago para maiuyon niyato an satuyang buhay, sagkod sa pinakaposible, sa mga pamantayan nin Diyos.​—w23.01, p. 8-9.

Paano kita magigin balanse mantang binabantayan an mga nangyayari sa kinaban?

Interesado kita na mahiling kun paano inuutob kan mga pangyayari sa kinaban an mga propesiya sa Bibliya. Imbes na magbana-bana o gumibo nin mga espekulasyon, na puwedeng magkawsa nin pagkabaranga, marahay na ibasar niyato an satong pag-uulay sa ipinublikar kan organisasyon ni Jehova. (1 Cor. 1:10)—w23.02, p. 16.

Ano an pagkakalain kan bawtismo ki Jesus asin kan bawtismo kan saiyang mga parasunod?

Bakong arog niyato, dai kaipuhan ni Jesus na idusay ki Jehova an sadiri niya huling namundag siya sa nasyon na dusay sa Diyos. Perpekto asin mayong kasalan si Jesus. Dai niya kaipuhan na magsulsol.​—w23.03, p. 5.

Paano ta matatabangan an iba na makakomento sa mga pagtiripon?

Puwede tang pagdanayon na haralipot sana an satong mga komento tanganing makapartisipar man an iba. Puwede man niyatong likayan na magsambit nin dakulon na punto. Paagi kaiyan, magkakaigwa nin oportunidad an iba na komentuhan an ibang punto.​—w23.04, p. 23.

Ano an pinapanungdan kan “Dalan nin Kabanalan” na sinambit sa Isaias 35:8?

An inot na pinapanungdan kan piguratibong mayor na tinampong iyan iyo an ruta kan mga Judio haling Babilonya pasiring sa sadiri nindang lugar. Kumusta man sa modernong panahon? Sa mga siglo bago 1919, nagibo na an mga preparasyon, asin kaiba diyan an pagtradusir asin pag-imprenta kan mga Bibliya. An banwaan nin Diyos padagos na naglalakaw sa “Dalan nin Kabanalan” pasiring sa espirituwal na paraiso, na naggigiya pasiring sa mga bendisyon kan Kahadian.​—w23.05, p. 15-19.

An Talinhaga kapitulo 9 nagtatao nin sadol base sa anong duwang piguratibong babayi?

Mababasa sa Talinhaga an manungod sa “mangmang na babayi” na an kaaabtan kan imbitasyon iyo an “Lubungan” asin an manungod sa “tunay na kadunungan,” na pinersonipikar bilang sarong babayi, na an imbitasyon minagiya pasiring sa “dalan nin pakasabot” asin sa buhay. (Tal. 9:1, 6, 13, 18)—w23.06, p. 22-24.

Paano an kapakumbabaan asin pagigin rasonable nin Diyos mahihiling sa pakikipag-ulay niya ki Lot?

Ininstruksiyunan ni Jehova si Lot na magdulag sa Sodoma pasiring sa kabukidan. Kan makimahirak si Lot na sa Zoar na lang siya mapaili, tinugutan siya nin Diyos.​—w23.07, p. 21.

Ano an puwedeng gibuhon nin sarong agom na babayi kun an agom niya naghihiling nin pornograpiya?

Dapat tandaan kan agom na babayi na bako siya an dapat basulon. Dapat siyang magpokus sa relasyon niya sa Diyos asin hurop-hurupon an mga pagkasaysay sa Bibliya manungod sa mga babaying nakamati nin sobrang kahaditan pero nag-ako nin karangahan hali sa Diyos. Puwede niyang tabangan an agom niya na malikayan an mga sitwasyon na dakula an posibilidad na masugutan ini.​—w23.08, p. 14-17.

Pag kinukuwestiyon an satong pagtubod, paano an pakasabot puwedeng makatabang sato na magin mahuyo?

Puwede tang mansayon an hapot o an pagkuwestiyon na iyan bilang sarong paagi para maaraman kun ano an nasa isip o sabuot nin sarong tawo. Sa siring, mas magigin nasa kamugtakan kita na magsimbag sa mahuyong paagi.​—w23.09, p. 17.

Ano an manunudan ta ki Maria manungod sa paghihinguwang pakusugon an sadiri?

Kan maaraman ni Maria na magigin ina siya kan Mesiyas, nag-ako siya nin kusog hali sa iba. Si Gabriel asin si Elizabeth nagtao ki Maria nin pampakusog hali sa Kasuratan. Makakakua man kita nin pampakusog hali sa mga tugang.​—w23.10, p. 15.

Paano puwedeng simbagon ni Jehova an satong mga pamibi?

Nanunuga siya na dadangugon niya an satong mga pamibi asin kinokonsiderar niya kun kauyon iyan kan saiyang katuyuhan. (Jer. 29:12) Puwede niyang simbagon an parehong pamibi sa magkalain na paagi, pero siguradong pirmi niya kitang tatabangan.​—w23.11, p. 21-22.

Sinambit na sa Roma 5:2 an manungod sa “paglaom,” kaya taano ta sinambit giraray iyan sa bersikulo 4?

Pag an sarong tawo makadangog kan maugmang bareta, puwede siyang magkaigwa nin paglaom na mabuhay sa sarong paraisong daga. Pero mantang nag-aagi siya nin mga kasakitan, tinatagalan an mga iyan, asin namamati an pag-uyon nin Diyos, an saiyang paglaom posibleng marhay na mas kumusog asin magin mas totoong-totoo iyan sa saiya.​—w23.12, p. 12-13.