1. Pag pinag-uulayan an manungod sa pagtubod ni Abraham, ano an puwede tang ihapot?

 DAWA ngani dakul na tawo an pamilyar ki Abraham, kadaklan sainda dikit lang an aram manungod saiya. Pero ika, dakul an aram mo manungod ki Abraham. Halimbawa, aram mo na inapod siya na “ama kan gabos na may pagtubod.” (Roma 4:11) Minsan siring tibaad maisip mo, ‘Kaya ko daw masundan an halimbawa ni Abraham asin magkaigwa kan klase nin pagtubod na arog kan sa saiya?’ Iyo, makakaya mo.

2. Taano ta mahalaga na pag-adalan an halimbawa ni Abraham? (Santiago 2:​22, 23)

² Para magkaigwa kita kan pagtubod na arog kan ki Abraham, pag-adalan ta an saiyang halimbawa. Sa pagbuot nin Diyos, nagbalyo si Abraham sa harayong lugar, namuhay sa mga tolda sa laog nin mga dekada, asin nagin andam na iatang an saiyang namumutan na aki na si Isaac. Mahihiling sa mga ginibo niyang iyan na makusog an saiyang pagtubod. Huli sa pagtubod asin sa mga ginibo ni Abraham, nakua niya an pag-uyon nin Diyos asin nagin amigo siya ni Jehova. (Basahon an Santiago 2:​22, 23.) Gusto ni Jehova na makamtan ta—na makamtan mo—an arog man kaiyan na mga bendisyon. Huli kaiyan, pinasabngan niya an mga kagsurat kan Bibliya na si Pablo asin Santiago na sambiton an halimbawa ni Abraham. Pag-ulayan ta an saiyang halimbawa na sinambit sa Roma kapitulo 4 asin Santiago kapitulo 2. An duwang kapitulong iyan parehong nagsambit nin mahalagang bagay manungod ki Abraham.

3. Anong teksto sa Bibliya an parehong kinotar ni Pablo asin Santiago?

³ Si Pablo asin Santiago parehong kinotar an Genesis 15:​6, na nagsasabi: “Nagtubod [si Abraham] ki Jehova, asin ibinilang Niya siya na matanos dahil diyan.” Sa panginot, an pagigin matanos  nanunungod sa kamugtakan nin sarong tawo na ibinibilang nin Diyos na kaako-ako, daing sala pa ngani. Makangangalas nanggad na an sarong bakong perpekto asin makasalan na tawo puwedeng ibilang nin Diyos na daing sala! Siguradong gusto mo man na ibilang ka nin Diyos na matanos, asin posible iyan. Para maaraman kun paano, kaipuhan tang masabutan kun taano ta ibinilang nin Diyos si Abraham na matanos.

4. Ano an nakakaulang sa mga tawo para ibilang na matanos?

⁴ Sa surat ni Pablo sa mga taga Roma, sinambit niya na an gabos na tawo makasalan. (Roma 3:23) Kun siring, paano an saro maibibilang na matanos o daing sala, asin sa siring makamtan an pag-uyon nin Diyos? Para tabangan an gabos na sinserong Kristiyano na masimbag an hapot na iyan, ginamit ni Pablo si Abraham bilang halimbawa.

5. Ano an nagin basehan ni Jehova para ibilang si Abraham na matanos? (Roma 4:​2-4)

⁵ Inapod ni Jehova si Abraham na matanos kan siya nag-iistar sa daga nin Canaan. Taano ta ibinilang ni Jehova si Abraham na matanos? Huli daw ta perpektong nasunod ni Abraham an Katugunan ni Moises? Siyertong bako. (Roma 4:13) An Katugunan na iyan itinao sa nasyon nin Israel labing 400 na taon pagkatapos na apudon nin Diyos si Abraham na matanos. Kun siring, ano an nagin basehan nin Diyos para ibilang si Abraham na matanos? Sa Saiyang daing kapantay na kabuutan, inapod ni Jehova si Abraham na matanos huli sa saiyang pagtubod.​—Basahon an Roma 4:​2-4.

6. Paano ni Jehova maibibilang na matanos an sarong parakasala?

⁶ Ipinaliwanag pa ni Pablo na pag an saro magtubod sa Diyos, “ibibilang siyang matanos huli sa pagtubod niya.” (Roma 4:5) Sinabi pa ni Pablo: “Siring kan sinabi man ni David kan magtaram siya mapadapit sa kaugmahan kan tawo na ibinibilang nin Diyos na matanos na dai pinagbabasaran an mga gibo kan tawong iyan: ‘Maugma an mga pinatawad sa saindang maraot na mga gibo asin tinahuban an mga kasalan; maugma an tawo na an kasalan dai na nanggad gigirumdumon ni Jehova.’” (Roma 4:​6-8; Sal. 32:​1, 2) Pinapatawad nin Diyos o tinatahuban an mga kasalan kan mga nagtutubod sa saiya. Lubos niya sindang pinapatawad asin dai na ginigirumdom an saindang mga kasalan. Ibinibilang niya an siring na mga indibidwal bilang daing sala asin matanos huli sa saindang pagtubod.

7. Taano ta ibinilang na matanos an maimbod na mga parasamba?

⁷ Dawa ngani ibinilang na matanos, si Abraham, David, asin iba pang maimbod na mga parasamba nin Diyos bako pa man giraray perpekto asin nagkakasala. Pero huli sa saindang pagtubod, ibinilang sinda nin Diyos na daing sala, lalo na kun ikukumparar sa mga dai nagtutubod sa saiya. (Efe. 2:12) Arog kan lininaw ni Pablo sa saiyang surat, mahalagang marhay an pagtubod para magkaigwa nin personal na relasyon sa Diyos. Nagin totoo iyan ki Abraham asin David, asin puwede man iyan magin totoo sa sato.

8-9. Ano an salang kongklusyon kan nagkapirang indibidwal sa mga isinurat ni Pablo asin Santiago, asin taano?

⁸ Sa laog nin dakul na siglo, an koneksiyon kan pagtubod asin mga gibo mainit na pinagdedebatehan kan Kakristiyanuhan. May mga klerigo na nagtutukdo na an kaipuhan mo sanang gibuhon para maligtas iyo na magtubod sa kagurangnan na Jesu-Cristo. Tibaad nadangog mo na sindang magsabi, “Akuon mo si Jesus sa buhay mo asin maliligtas ka.” Tibaad kotaron pa ngani kan mga klerigo an sinabi ni Pablo na an saro “ibinibilang nin Diyos na matanos na dai pinagbabasaran an  mga gibo kan tawong iyan.” (Roma 4:6) Alagad sinasabi man kan iba na puwede mong “mailigtas an saimong sadiri” paagi sa pagbisita sa mga lugar na ibinibilang kan simbahan na banal asin paagi sa paggibo nin marahay. Tibaad kotaron pa ngani ninda an Santiago 2:24: “An sarong tawo ipinapahayag na matanos paagi sa mga gibo asin bakong paagi sa pagtubod sana.”

⁹ Huli sa mga paniniwalang iyan, nagkongklusyon an nagkapirang iskolar sa Bibliya na si Pablo asin Santiago bakong magkauyon kun manungod sa pagtubod asin mga gibo. Tibaad para sa mga Klerigo, nagtutubod si Pablo na an sarong tawo ibinibilang na matanos paagi sa pagtubod bako dahil sa mga gibo, mantang si Santiago man nagtutukdo na mahalaga an mga gibo tanganing makamtan an pag-uyon nin Diyos. Siring kaini an pagkasabi diyan nin sarong propesor nin teolohiya: “Dai nasabutan ni Santiago an rason ni Pablo sa pag-insistir [na tanganing ibilang na matanos], pagtubod sana an kaipuhan asin dai na kaipuhan nin mga gibo.” Pero an isinurat ni Pablo asin Santiago parehong ipinasabong sa sainda ni Jehova. (2 Tim. 3:16) Kaya siguradong may simpleng paagi para mahiling na magkauyon an saindang mga sinabi. Iyo igwa—paagi sa pagkonsiderar kan konteksto kan saindang mga isinurat.

10. Anong “mga gibo” an panginot nang pinapanungdan ni Pablo? (Roma 3:​21, 28) (Hilingon man an ritrato.)

¹⁰ Anong “mga gibo” an sinasabi ni Pablo sa Roma 3 asin 4? Sa panginot an pinapanungdan niya iyo an “mga gibong hinahagad nin katugunan,” an katugunan ni Moises na itinao sa Bukid nin Sinai. (Basahon an Roma 3:​21, 28.) Minalataw na kan panahon ni Pablo may nagkapirang mga Kristiyanong Judio na nasasakitan akuon na an Katugunan ni Moises asin an mga gibo na hinahagad kan katugunan na iyan hinali na. Kaya ginamit ni Pablo an halimbawa ni Abraham para patunayan na an pagigin matanos sa atubangan  nin Diyos bakong resulta kan “mga gibong hinahagad nin katugunan.” Imbes, huli iyan sa pagtubod. Nakakapakusog na maaraman iyan huling nagtatao iyan sa sato nin kumpiyansa na puwede kitang magkaigwa nin marahay na kamugtakan sa atubangan nin Diyos. Nangangahulugan iyan na puwede tang patalubuon an pagtubod sa Diyos asin ki Cristo, na puwedeng magresulta sa pag-uyon nin Diyos.

11. Anong klaseng “mga gibo” an pinapanungdan ni Santiago?

¹¹ Sa ibong na lado, an “mga gibo” na ipinaliwanag sa Santiago kapitulo 2 bako an “mga gibong hinahagad nin katugunan” na sinambit ni Pablo. An pinapanungdan ni Santiago iyo an mga gibo, o mga aktibidad, na ginigibo nin mga Kristiyano sa aroaldaw. Maririsa sa siring na mga gibo kun baga an sarong Kristiyano igwa nin tunay na pagtubod sa Diyos o mayo. Pag-isipan an duwang halimbawa na ginamit ni Santiago.

12. Paano ipinaliwanag ni Santiago an koneksiyon kan pagtubod asin mga gibo? (Hilingon man an ritrato.)

¹² Sa inot na halimbawa, sinambit ni Santiago na kaipuhan kan mga Kristiyano na dai magpalain-lain sa pagtrato sa iba. Para ipaliwanag an puntong ini, sinambit niya an manungod sa sarong lalaki na mabuot na trinatar an sarong mayaman na tawo pero dai nagin mabuot sa sarong pobre. Sinabi ni Santiago na an siring na tawo tibaad naghihingako na igwa siya nin pagtubod pero nahihiling daw iyan sa gibo niya? (Sant. 2:​1-5, 9) Sa ikaduwang halimbawa, sinambit ni Santiago an sarong tawo na may nahiling na ‘sarong tugang na lalaki o babayi na mayo nin maisulot o kakanon’ pero dai niya ini tinabangan sa praktikal na paagi. Dawa pa an sarong iyan maghingako na igwa siyang pagtubod, dai iyan nahihiling sa saiyang mga gibo; kaya, mayo man sanang saysay iyan. Arog kan isinurat ni Santiago, “an pagtubod, kun iyan sana asin mayong mga gibo, gadan.”​—Sant. 2:​14-17.

13. Paano ni Santiago iinilustrar an punto niya manungod sa pagtubod na may kaibang gibo? (Santiago 2:​25, 26)

 ¹³ Sinambit ni Santiago si Rahab bilang sarong magayon na halimbawa nin pagtubod na may kaibang gibo. (Basahon an Santiago 2:​25, 26.) Nadangog niya an manungod ki Jehova asin nahiling niya na sinusuportaran Niya an mga Israelita. (Jos. 2:​9-11) Ipinahiling niya an saiyang pagtubod paagi sa saiyang mga gibo—prinotektaran niya an duwang espiyang Israelita kan mameligro an mga ini. Bilang resulta, an bakong Israelitang babaying ini, dawa bakong perpekto, ibinilang na matanos arog ni Abraham. Idinuduon kan halimbawang ipinahiling ni Rahab an kahalagahan kan pagkaigwa nin pagtubod na may kaibang mga gibo.

14. Paano magkauyon an mga isinurat ni Pablo asin Santiago?

¹⁴ An duwang kagsurat kan Bibliya na si Pablo asin Santiago nagpapaliwanag sana kan manungod sa pagtubod asin mga gibo sa magkalain na anggulo. Sinasabi ni Pablo sa Judiong mga Kristiyano na dai nanggad ninda makakamtan an pag-uyon ni Jehova kun paagi sana sa pagsunod sa Katugunan ni Moises. Idinuduon man ni Santiago na kaipuhan kan gabos na Kristiyano na magpahiling nin pagtubod paagi sa paggibo nin marahay sa iba.

15. Ano an nagkapirang paagi na puwede tang maipahiling an pagtubod paagi sa satong mga gibo? (Hilingon man an mga ritrato.)

¹⁵ Dai sinasabi ni Jehova na kun gusto tang ibilang na matanos dapat tang gibuhon an mismong ginibo ni Abraham. Sa katunayan, dakul nin paagi para maipahiling ta an satong pagtubod paagi sa satong mga gibo. Puwede tang i-welcome an mga baguhan sa kongregasyon, tabangan an mga tugang na talagang nangangaipo, asin gumibo nin marahay sa satong mga kapamilya—mga bagay na inuuyunan asin binebendisyunan nin  Diyos. (Roma 15:7; 1 Tim. 5:​4, 8; 1 Juan 3:18) An lalo nang marahayon na gibo na nagpapatunay kan satong pagtubod iyo an satong maigot na paghiras kan maugmang bareta sa iba. (1 Tim. 4:16) Gabos kita puwedeng makapahiling paagi kan satong mga gibo na igwa kita nin pagtubod na magkakatotoo an mga panuga ni Jehova asin na an saiyang mga pamamaagi iyo an pinakamarahay. Asin kun gigibuhon ta iyan, makakasigurado nanggad kita na ibibilang kita nin Diyos na matanos asin aapudon na saiyang mga amigo.

16. Paano an paglaom ni Abraham konektado sa saiyang pagtubod?

¹⁶ Itinatampok kan Roma kapitulo 4 an saro pang mahalagang leksiyon na puwede tang manudan ki Abraham: an kahalagahan kan paglaom. Nanuga si Jehova na paagi ki Abraham bebendisyunan an “dakul na nasyon.” Imahinara na sana an magayunon na paglaom na hinahalat-halat ni Abraham! (Gen. 12:3; 15:5; 17:4; Roma 4:17) Alagad, dawa kan 100 anyos na si Abraham asin 90 anyos man si Sara, dai pa man giraray sinda nagkakaaki arog kan ipinanuga sa sainda. Sa pagmansay nin tawo garo baga imposible na magkaaki pa si Abraham asin Sara. Dakulang pagbalo iyan para ki Abraham. “Pero base sa paglaom, nagtubod siya na siya an magigin ama nin dakul na nasyon.” (Roma 4:​18, 19) Asin iyo man nanggad, nagkatotoo an paglaom na iyan. Namundag si Isaac, an haloy nang hinahalat-halat ni Abraham na aking lalaki.​—Roma 4:​20-22.

17. Taano ta masasabi ta na puwede kitang ibilang na matanos bilang mga amigo nin Diyos?

¹⁷ Puwede tang makamtan an pag-uyon nin Diyos asin ibilang na matanos bilang mga amigo nin Diyos, arog ni Abraham. Sa katunayan, idinuon iyan ni Pablo kan isurat niya: “An mga tataramon na ‘ibinilang siya na matanos’ dai isinurat para sana [ki Abraham], kundi para man sa sato, na ibibilang na matanos, huli ta nagtutubod kita sa Saiya na nagbangon ki Jesus.” (Roma 4:​23, 24) Arog ni Abraham, kaipuhan tang magkaigwa nin pagtubod asin mga gibo pati na nin paglaom. Ipinadagos ni Pablo an pagpaliwanag manungod sa satong paglaom sa Roma kapitulo 5, na pag-uulayan ta sa sunod na artikulo.