1-2. Ano an dapat na magin reaksiyon kan mga magurang kun maghapot an saindang aki manungod sa satong mga tinutubod na basado sa Bibliya?

 DAKUL an mauyon na an pagigin magurang sarong full-time na trabaho. Kun ika sarong magurang na may sadit pang aki, kinokomendaran ka niyamo sa maigot mong paghihinguwa na magkaigwa siya nin makusog na pagtubod. (Deu. 6:​6, 7) Mantang nagdadakula an saimong aki, tibaad magpuon na siyang maghapot nin seryosong mga bagay manungod sa satong mga tinutubod na basado sa Bibliya, kaiba na an mga pamantayan kan Bibliya sa moral.

² Sa inot, tibaad mahadit ka sa mga hapot kan saimong aki. Tibaad maisip mo pa ngani na an paghapot niya kaiyan indikasyon na nagluluya an saiyang pagtubod. Pero an totoo, an nagdadakulang mga aki kaipuhan na maghapot para kumusog an saindang pagtubod. (1 Cor. 13:11) Kaya mayo kang dapat ikahadit. An gabos na sinserong hapot kan saimong aki manungod sa satong mga tinutubod puwede mong mansayon bilang mga oportunidad na matabangan siyang pauswagon an kakayahan niyang mag-isip.

3. Ano an pag-uulayan ta sa artikulong ini?

³ Sa artikulong ini, pag-uulayan ta kun paano matatabangan kan mga magurang an saindang mga aki na (1) kumusog an saindang pagtubod, (2) pahalagahan an mga pamantayan kan Bibliya sa moral, asin (3) idepensa an saindang mga tinutubod. Pag-uulayan man niyato kun taano ta marahay na naghahapot an mga aki asin an pirang aktibidad kan pamilya na puwedeng magbukas nin oportunidad sa mga magurang tanganing ipakipag-ulay an manungod sa satong mga tinutubod bilang Kristiyano.

TABANGAN AN SAIMONG AKI NA KUMUSOG AN SAIYANG PAGTUBOD

4. Ano an mga tibaad maihapot nin sarong aki, asin taano?

⁴ Aram kan Kristiyanong mga magurang na an pagtubod sa Diyos sarong bagay na dai namamana nin sarong aki. Dai ka ipinangaki na  may pagtubod na ki Jehova, asin siring man an saimong aki. Sa paglihis nin panahon, tibaad magpuon nang maghapot an sarong aki nin arog kan: ‘Paano ko man naaraman na may Diyos? Makakapagtiwala daw talaga ako sa sinasabi kan Bibliya?’ An totoo, dinadagka pa ngani kita kan Bibliya na gamiton an satong “kakayahan sa pangangatanusan” asin na “siyertuhon an gabos na bagay.” (Roma 12:1; 1 Tes. 5:21) Pero paano mo matatabangan an saimong aki na kumusog an saiyang pagtubod?

5. Ano an puwedeng gibuhon kan mga magurang para tabangan an saindang aki na kumusog an saiyang pagtubod sa Bibliya? (Roma 12:2)

⁵ Dagkahon an saimong aki na patunayan niya sa saiyang sadiri an katotoohan. (Basahon an Roma 12:2.) Pag naghahapot an saimong aki, aprobetsaran iyan para ipahiling sa saiya kun paano mahahanap an simbag gamit an mga pantabang sa pag-research, arog kan Watch Tower Publications Index asin Giya sa Pag-research Para sa Mga Saksi ni Jehova. Sa Giya sa Pag-research, sa irarom kan temang “An Bibliya,” puwede niyang hilingon an “Ipinasabong nin Diyos” tanganing maghanap nin ebidensiya na an Bibliya bako sana basta sarong marahay na libro na isinurat nin mga tawo. Imbes, iyan “an tataramon nin Diyos.” (1 Tes. 2:13) Halimbawa, puwede niyang i-research an manungod sa suanoy na siyudad nin Nineve sa Asiria. Hinihingako kaidto kan nagkapirang kritiko sa Bibliya na dai man talaga nag-eksister an siyudad nin Nineve. Pero kan dekada nin 1850, nadiskubre an kagabaan kan siyudad na ini, na nagpapatunay na tama an salaysay kan Bibliya. (Sof. 2:​13-15) Para sa impormasyon manungod sa kun paano inutob kan pagkalaglag kan Nineve an propesiya sa Bibliya, puwede niyang hilingon an artikulong “Aram Mo Daw?” sa Nobyembre 2021 na isyu kan An Torrengbantayan. Paagi sa pagkumparar sa mga nanunudan niya sa satong mga publikasyon asin sa mga nanunudan niya sa mga ensayklopedya saka sa iba pang masasarigan na mga reperensiya, urog na magkakaigwa nin dahilan an saimong aki na pakusugon an saiyang pagtubod sa kun ano an sinasabi kan Bibliya.

6. Paano puwedeng matabangan kan mga magurang an saindang aki na gamiton an saiyang kakayahan na mag-isip? Magtao nin halimbawa. (Hilingon man an ritrato.)

⁶ Tabangan an saimong aki na gamiton an saiyang kakayahan na mag-isip. Dakul nin oportunidad an mga magurang tanganing magkaigwa sinda asin an saindang aki nin interesanteng mga pag-urulay manungod sa Bibliya o sa pagtubod sa Diyos. Puwede nindang magibo ini pag nagpapasyar sa sarong museo, sa sarong hardin na may manlain-lain na tinanom, o sa sarong eksibit sa sangang opisina kan Mga Saksi ni Jehova. Halimbawa, pag nagto-tour sa sarong museo, virtual man o in-person, puwede mong darahon an atensiyon kan saimong aki sa mga pangyayari sa kasaysayan o sa mga artifact na makakapakusog kan saiyang kumbiksiyon na tama an sinasabi kan Bibliya. Aram daw kan saimong aki na an personal na pangaran nin Diyos mahihiling sa sarong 3,000 anyos nang halakbang na gapo na inaapod na Moabite Stone? An orihinal na Moabite  Stone nakadispley sa Louvre Museum sa Paris, France. Igwa man nin replika kan Moabite Stone na nakadispley sa eksibit na “The Bible and the Divine Name” sa World Headquarters kan Mga Saksi ni Jehova sa Warwick, New York. Sinasabi sa Moabite Stone na si Hading Mesa kan Moab nagrebelde tumang sa Israel. Kauyon iyan kan sinasabi kan Bibliya. (2 Ha. 3:​4, 5) Pag nahihiling mismo kan saimong aki an mga ebidensiya na an sinasabi kan Bibliya mapagtitiwalaan asin tama, magigin mas makusog an saiyang pagtubod.​—Ikumparar an 2 Cronica 9:6.

7-8. (a) Ano an manunudan ta sa magagayon na korte o porma na mahihiling niyato sa naturalesa? Magtao nin halimbawa. (Hilingon man an ritrato.) (b) Anong mga hapot an puwedeng makatabang sa saimong aki na kumusog an saiyang pagtubod na igwa nin Kaglalang?

⁷ Dagkahon an saimong aki na isip-isipon an manungod sa interesanteng mga bagay sa naturalesa. Mantang naglalakaw-lakaw kamo sa kabukidan o nagga-garden, darahon an atensiyon kan saimong aki sa interesanteng mga korte o porma na mahihiling sa naturalesa. Taano? Huling an mga korte o pormang ini nagtatao nin ebidensiya na igwa nin sarong intelihente asin madunong na kagdisenyo kaiyan. Halimbawa, an mga korteng pakurikot (spiral) dakul na taon nang pinag-aadalan kan mga siyentista. Ipinaliwanag kan biophysicist na si Nicola Fameli na kun bibilangon mo an mga bagay na pakurikot na mahihiling sa naturalesa, maoobserbaran mo diyan an sarong partikular na serye nin mga numero. An seryeng iyan nin mga numero inaapod na Fibonacci sequence. An mga korteng pakurikot mahihiling sa dakul na bagay, arog kan korte kan nagkapirang galaksiya, kan shell nin nautilus, kan mga dahon nin mga pananom, asin kan tahaw na parte kan burak nin mirasol (sunflower). a

⁸ Mantang mas nakakanuod mapadapit sa siyensiya an saimong aki sa eskuwelahan, maaaraman niya na an mga korte o porma nin dakul na bagay nagsusunod sa mga ley nin naturalesa. Halimbawa, an lambang pidaso nin niyebe napoporma kauyon kan geometrikong mga korte na inaapod na fractal. An mga fractal mahihiling man sa iba pang mga bagay sa naturalesa. Pero siisay an naggibo kan mga ley na nagreresulta sa magagayon na mga korteng ini? Siisay an nag-organisar asin maingat na nagdisenyo kan mga bagay na nahihiling ta sa naturalesa? Mantang mas iniisip-isip kan saimong aki an siring na mga hapot, mas posible man na kumusog an saiyang pagtubod na an Diyos an naglalang kan gabos na bagay. (Heb. 3:4) Sa paglihis nin panahon, puwede mong ihapot sa saiya, “Kun linalang kita nin Diyos, bako daw na tama sanang isipon na may itinao man siya satong paggiya sa moral kun paano magigin maugma?” Dangan puwede mong sabihon na an mahalagang paggiyang iyan yaon sa Bibliya.

TABANGAN AN SAIMONG AKI NA PAHALAGAHAN AN MGA PAMANTAYAN KAN BIBLIYA SA MORAL

9. Ano an posibleng dahilan kaya pigkukuwestiyon nin sarong aki an kahalagahan kan mga pamantayan kan Bibliya sa moral?

⁹ Kun pigkukuwestiyon kan saimong aki an kahalagahan kan mga pamantayan kan Bibliya sa  moral, hinguwahon na aramon an dahilan. Talaga daw na dai siya uyon sa mga pamantayan kan Bibliya sa moral, o dai niya lang aram kun paano iyan idedepensa pag nakikipag-ulay sa iba? Arin man diyan, puwede mong tabangan an saimong aki na pahalagahan an mga pamantayan kan Bibliya sa moral paagi sa pag-adal kan librong Mabuhay nin Maugma Sagkod Pa Man! b

10. Paano mo matatabangan an saimong aki na mawuton niyang magkaigwa nin personal na relasyon ki Jehova?

¹⁰ Tabangan an saimong aki na pahalagahan an pagkaigwa nin personal na relasyon ki Jehova. Pag nag-aadal nin Bibliya kaiba an saimong aki, hinguwahon na aramon an sabuot niya paagi sa paggamit nin punto de-vistang mga hapot asin nin mga ilustrasyon na nasa librong Mabuhay nin Maugma Sagkod Pa Man! (Tal. 20:5) Halimbawa, sa leksiyon 8 iinagid si Jehova sa sarong mapagmakulog na amigo na nagtatao sa sato nin mga pagirumdom na makakaprotektar asin makakatabang sa sato. Pagkatapos na pag-ulayan an 1 Juan 5:​3, puwede mong ihapot, “Dahil aram na niyatong si Jehova sarong marahayon na Amigo, ano an dapat na magin pagmansay ta sa mga bagay na ipinapagibo niya sa sato?” Garo baga simple sanang hapot iyan, pero puwede iyan makatabang sa saimong aki na mansayon an mga pagbuot nin Diyos bilang ebidensiya na namumutan Niya kita.​—Isa. 48:​17, 18.

11. Paano mo matatabangan an saimong aki na pahalagahan an mga prinsipyo sa Bibliya? (Talinhaga 2:​10, 11)

¹¹ Pag-ulayan kun paano kita nakikinabang sa pag-aplikar kan mga prinsipyo sa Bibliya. Mantang iriba nindong binabasa an Bibliya o an teksto kan aldaw, pag-ulayan kun paano nakatabang sa saindong pamilya an mga prinsipyo sa Bibliya. Halimbawa, nasasabutan daw kan saimong aki an mga pakinabang kan pagigin mahigos asin onesto? (Heb. 13:18) Tibaad puwede mo man na iduon kun paano an pag-aplikar sa mga prinsipyo sa Bibliya nakakatabang sa sato na magkaigwa nin mas marahay na salud asin magin mas maugma. (Tal. 14:​29, 30) An pakikipag-ulay sa saimong aki manungod sa siring na mga prinsipyo, posibleng marhay na makatabang sa saiya na urog niya pang mapahalagahan an mga sadol kan Bibliya.​—Basahon an Talinhaga 2:​10, 11.

12. Paano tinatabangan nin sarong ama an saiyang aki na masabutan an praktikal na halaga kan mga prinsipyo sa Bibliya?

¹² Si Steve, na sarong ama na nakaistar sa France, iinistorya kun paano niya asin kan saiyang agom tinatabangan an saindang tin-edyer na aking lalaking si Ethan na masabutan na pagkamuot an nasa likod kan mga pagbuot ni Jehova. Sinabi ni Steve: “Hinahapot mi siya nin arog kan, ‘Taano ta hinahagad sa sato ni Jehova na igalang ta an prinsipyong ini?’ Paano kaini ipinapahiling na namumutan niya kita? Ano an puwedeng mangyari kun dai mo iaaplikar an prinsipyong iyan?’” An mga arog kaining mga pag-uulay nakatabang ki Ethan na magin mga pamantayan na man niya an mga pamantayan ni Jehova sa moral. Sinabi pa ni Steve: “An pasuhan mi iyo na tabangan si Ethan na masabutan na an kadunungan na nasa Bibliya nakakalabing marhay kisa sa kadunungan nin tawo.”

13. Paano puwedeng sanayon kan mga magurang an saindang aki na iaplikar an mga prinsipyo sa Bibliya? Magtao nin halimbawa.

¹³ Sanayon an saimong aki na iaplikar an mga prinsipyo sa Bibliya. Puwede mong magibo iyan, halimbawa, pag naasignaran an saimong aki na magbasa nin sarong libro bilang proyekto sa eskuwelahan. An mga karakter sa libro tibaad magtao kan impresyon na angay na arugon an saindang imoral na mga gibo o pagigin bayolente. Puwede mong dagkahon an saimong aki na isip-isipon kun baga kauyon kan mga prinsipyo sa Bibliya an paggawi kan mga karakter na iyan. (Tal. 22:​24, 25; 1 Cor. 15:33; Fil. 4:8) Puwede iyan na makatabang sa saiya na makapagpatotoo sa saiyang titser asin mga kaklase pag pinag-uulayan na sa klase an proyekto.

 IANDAM AN SAIMONG AKI NA IDEPENSA AN SAIYANG MGA TINUTUBOD

14. Anong tema an puwedeng magin dahilan na makamati nin takot an sarong hoben na Kristiyano, asin taano?

¹⁴ May mga pagkakataon na tibaad mayong kumpiyansa an mga hoben na Kristiyano na idepensa an saindang mga tinutubod. Tibaad makamati sinda nin takot pag pinag-uulayan sa klase an teoriya nin ebolusyon. Taano? Huling tibaad ipresentar kan saindang titser an ebolusyon sa paaging garo baga establisadong katotoohan na iyan. Kun saro kang magurang, paano mo matatabangan an saimong aki na magkaigwa kan kumpiyansa na manindugan sa saiyang mga tinutubod?

15. Ano an puwedeng makatabang sa sarong hoben na Kristiyano na mas magkaigwa nin kumpiyansa sa saiyang mga tinutubod?

¹⁵ Tabangan an saimong aki na mas magkaigwa nin kumpiyansa sa saiyang mga tinutubod. Dai dapat ikasupog kan saimong aki na aram niya an katotoohan manungod sa paglalang. (2 Tim. 1:8) Taano man? An totoo dakul man na siyentista an naniniwala na an buhay dai lang basta nag-eksister o nagkataon sana. May nahihiling sindang ebidensiya na igwa nin intelihenteng kaggibo kan komplikadong pagkadisenyo kan mga bagay na may buhay. Bilang resulta, dai ninda inaako an teoriya nin ebolusyon na itinutukdo sa dakul na eskuwelahan sa manlain-lain na parte kan kinaban. Mapapakusog kan saimong aki an saiyang pagtubod paagi sa paghurop-hurop kan mga dahilan kaya nakumbinsir an ibang mga tugang na magtubod na linalang an buhay. c

16. Paano matatabangan kan mga magurang an saindang aki na idepensa an saiyang pagtubod na igwa nin Kaglalang? (1 Pedro 3:15) (Hilingon man an ritrato.)

¹⁶ Iandam an saimong aki na idepensa an saiyang pagtubod na igwa nin Kaglalang. (Basahon an 1 Pedro 3:15.) Tibaad mahiling mong kapaki-pakinabang kun magkaibanan nindong pag-uulayan an mga artikulo sa jw.org sa seryeng “Tanong ng mga Kabataan—Paglalang o Ebolusyon?” Dangan puwede nindong pag-ulayan an paagi nin pagpaliwanag na sa hiling kan aki mo iyo an pinakanakakakumbinsir na paagi para tabangan an iba na masabutan an katotoohan manungod sa Kaglalang. Ipagirumdom sa saiya na dai niya man kaipuhan makiargumento sa saiyang mga kaeskuwela. Dagkahon siyang gumamit nin simpleng lohika asin pangangatanusan kun igwa sa saindang gustong pag-ulayan iyan. Halimbawa, tibaad sabihon kan kaeskuwela mo: “Naniniwala sana ako sa kun ano an nahihiling ko. An Diyos dai ko pa lamang nahiling.” Puwedeng isimbag nin sarong hoben na Kristiyano: “Imahinara na naglalakaw-lakaw ka sa kadlagan na harayo sa ano man na aktibidad nin tawo dangan nakahiling ka nin sarong bubon na puwedeng pagsakduhan. Ano an iisipon mo? Kun  an pagkaigwa diyan nin sarong bubon nagpapahiling nin malinaw na ebidensiya na igwa nin intelihenteng persona na naggibo kaiyan, paano pa kaya an uniberso?”

17. Paano puwedeng dagkahon kan mga magurang an saindang aki na maghanap nin mga oportunidad na ihiras sa iba an katotoohan sa Bibliya? Iilustrar.

¹⁷ Dagkahon an saimong aki na maghanap nin mga oportunidad na ihiras sa iba an katotoohan sa Bibliya. (Roma 10:10) An saiyang paghihinguwa na ipakipag-ulay sa iba an saiyang pagtubod puwedeng iagid sa paghihinguwang kaipuhan na gibuhon nin saro tanganing makanuod na magtugtog nin sarong instrumento sa musika. Sa primero, mga simpleng kanta sana nguna an pinapraktis niyang tugtugon. Sa paglihis nin panahon, nagigin mas madali na sa saiya an pagtugtog nin musika. Sa kaagid na paagi, an sarong hoben na Kristiyano tibaad sa primero maggamit nguna nin simpleng pamamaagi pag ihinihiras sa iba an saiyang pagtubod. Halimbawa, puwede niyang haputon an kaeskuwela niya: “Aram mo daw na sa parati inaarog kan mga inhenyero an mga disenyo na hali sa naturalesa? May ipapahiling ako saimong interesanteng video.” Pagkatapos ipahiling an sarong video hali sa seryeng May Nagdisenyo Daw Kaini?, puwedeng sabihon kan saimong aki: “Kun an sarong siyentista inuumaw para sa sarong disenyo na dati nang yaon sa naturalesa, siisay an maninigong umawon para sa orihinal na disenyo?” An siring na simpleng pamamaagi puwedeng makapukaw kan interes nin sarong hoben asin gustuhon niyang urog pang makanuod.

PADAGOS NA TABANGAN AN SAIMONG AKI NA PAKUSUGON AN SAIYANG PAGTUBOD

18. Paano padagos na matatabangan kan mga magurang an saindang aki na kumusog an saindang pagtubod sa Diyos?

¹⁸ Nabubuhay kita sa kinaban na an kadaklan na tawo mayong pagtubod ki Jehova. (2 Ped. 3:3) Kun siring, mga magurang, mantang pinag-aadalan nindo an Bibliya kaiba kan saindong aki, dagkahon siya na maghanap asin magsiyasat nin iba pang mga tema na makakatabang sa saiya na urog pang igalang an Tataramon nin Diyos asin an saiyang mga pamantayan sa moral. Tabangan siyang gamiton an saiyang kakayahan na mag-isip paagi sa pagpalataw nin makangangalas na mga aspekto na mahihiling sa mga linalang ni Jehova. Tabangan man siya na masabutan an makangangalas na mga propesiya sa Bibliya na nautob na. Asin urog sa gabos, mamibi kaiba kan saindong aki asin ipamibi siya. Kun gigibuhon nindo iyan, makakasigurado kamo na babalusan ni Jehova an saindong mga paghihinguwa na tabangan an saindong aki na kumusog an saiyang pagtubod.​—2 Cron. 15:7.