Nagsurat si apostol Pablo ki Timoteo na kapwa niya magurang sa kongregasyon: “Sa atubangan nin Diyos asin ni Cristo Jesus saka kan mga anghel na pinili, seryoso takang tinutugon na sunudon an mga instruksiyon na ini na mayo nin pinapalain o pinapaburan.”​—1 Tim. 5:21.

Inot, pag-ulayan ta an mga dai puwedeng kaiba sa grupong ini nin mga anghel. Malinaw na bako sinda an mga kabilang sa 144,000. Kan magsurat si Pablo ki Timoteo, dai pa nagpupuon an pagbuhay liwat sa mga linahidan na Kristiyano pasiring sa langit. An mga apostol asin an iba pang linahidan dai pa man kaidto nagigin mga espiritung linalang, kaya dai puwedeng sinda an “mga anghel na pinili.”​—1 Cor. 15:​50-54; 1 Tes. 4:​13-17; 1 Juan 3:2.

Saro pa, an “mga anghel na pinili” dai puwedeng magpanungod sa mga anghel na nagin masinuway kan panahon kan Baha. An mga anghel na idto kuminampi ki Satanas asin nagin mga demonyo, na mga kaiwal ni Jesus. (Gen. 6:2; Luc. 8:​30, 31; 2 Ped. 2:4) Sa maabot na panahon, lalaumon sinda sa kairaruman sa laog nin 1,000 taon asin pagkatapos kaiyan lalaglagon kaiba kan Diyablo.​—Jud. 6; Kap. 20:​1-3, 10.

An “mga anghel na pinili” na sinambit ni Pablo siguradong nanunungod sa mga anghel sa langit na nagsuportar sa “Diyos asin [ki] Cristo Jesus,” na parehong sinambit sa iyo man sanang bersikulo.

Igwa nin rinibong ribo-ribong maimbod na mga anghel. (Heb. 12:​22, 23) Dai niyato pag-isipon na an lambang saro sa sainda igwa nin pararehong asignasyon sa lambang pagkakataon. (Kap. 14:​17, 18) Girumdumon na may pagkakataon kaidto na sarong anghel an inasignaran na puhuon an 185,000 na armadong mga Asiriano. (2 Ha. 19:35) Nagkapirang anghel an tibaad inasignaran na ‘halion sa Kahadian [ni Jesus] an gabos na bagay na nagigin dahilan nin pagkasingkog pati an mga tawo na naggigibo nin karatan.’ (Mat. 13:​39-41) An iba man tibaad asignaran na ‘tiripunon an saiyang mga pinili’ pasiring sa langit. (Mat. 24:31) Asin may mga anghel man na tinawan kan pagbuot na ‘bantayan kita sain man kita magduman.’—Sal. 91:11; Mat. 18:10; ikumparar an Mateo 4:11; Luc. 22:43.

“An piniling mga anghel” na sinambit sa 1 Timoteo 5:21 posibleng marhay na mga anghel na inasignaran nin espesyal na mga gibuhon may koneksiyon sa mga lingkod nin Diyos. Sa konteksto, nagtao si Pablo nin madunong na konseho manungod sa mga elder, na maninigong pahilingan nin paggalang kan kongregasyon. Para man sa mga elder, dapat nindang asikasuhon an saindang mga responsabilidad “na mayo nin pinapalain o pinapaburan” asin dai sinda dapat gumibo nin pabigla-biglang desisyon o paghusgar. An sarong magabat na dahilan kaya sinusunod ninda an ipinasabong na sadol ni Pablo iyo na isinasagibo ninda an saindang paglilingkod “sa atubangan nin Diyos asin ni Cristo Jesus saka kan mga anghel na pinili.” Kaya malinaw na igwa nin mga anghel na tinatawan nin mga asignasyon na may koneksiyon sa kongregasyon, arog kan pagtao nin proteksiyon, pagtabang sa paghuhulit, asin pag-impormar ki Jehova kan mga naoobserbaran ninda.​—Mat. 18:10; Kap. 14:6.