Binasa mo daw na marhay an mga isyu kan An Torrengbantayan sa taon na ini? Kun iyo, hilinga kun masisimbag mo an minasunod na mga hapot:

Anong marahay na halimbawa an ipinapahiling ni Jehova sa kun paano tatrataron an mga babayi?

Tinatratar niya sinda nin daing pagpalain-lain; dai niya mas pinapaburan an mga lalaki kisa sa mga babayi. Dinadangog nin Diyos an mga babayi asin interesado siya sa saindang mga namamatian saka ikinakahadit. Asin pinagkakatiwalaan niya sinda sa paggibo kan saiyang gibuhon.​—w24.01, p. 15-​16.

Paano ta maiaaplikar an Efeso 5:7 na an sabi: “Dai kamo magin mga kahiras ninda”?

Pinapatanidan kita ni apostol Pablo na dai makiiba-iba sa mga tawong magpapadipisil na makapanindugan kita sa mga pamantayan nin Diyos. Kabali diyan bako lang an mga nakakaiba-iba ta nin personal kundi pati man sa social media.​—w24.03, p. 22-​23.

Kaipuhan niyatong mag-ingat sa anong mga klase nin bakong totoong istorya?

Kaipuhan niyatong mag-ingat sa mga istoryang dai man sigurado kun baga totoo hali sa mga amigong may marahay man kutanang intensiyon, sa dai inaasahan na mga email hali sa mga tawong dai ta bisto, asin sa mga apostata na nagsasagin na interesado sa katotoohan.​—w24.04, p. 12.

Ano an aram saka dai ta aram manungod sa kun paano huhukuman ni Jehova si Hading Solomon pati na idtong mga nagadan sa Sodoma saka Gomora asin sa Baha?

Dai kita sigurado kun baga itinalaga na sinda ni Jehova sa daing sagkod na kalaglagan. Pero, aram niyato na aram niya an gabos na detalye asin na may dakula siyang pagkahirak.​—w24.05, p. 3-4.

Paano nakakaasigurar sa sato na si Jehova “an Gapo”? (Deu. 32:4)

Puwede kitang magpaili ki Jehova. Siya maaasahan, pirming inuutob an saiyang mga panuga. Siya masarig, bakong paburubago an saiyang personalidad saka an saiyang mga katuyuhan.​—w24.06, p. 26-​28.

Ano an makakatabang sa saimo na maka-adjust sa bagong kongregasyon?

Magsarig ki Jehova; tatabangan ka niya arog kan ginibo niya sa mga lingkod niya kaidto. Likayan na ikumparar an bago mong kongregasyon sa dati mong kongregasyon. Lubos na makikabtang sa bago mong kongregasyon, asin hinguwahon na magkaigwa nin bagong mga amigo.​—w24.07, p. 26-​28.

Anong mga leksiyon an manunudan ta sa tulong parabula na mababasa sa Mateo kapitulo 25?

Idinuduon kan parabula manungod sa mga karnero asin sa mga kanding an manungod sa kaimbudan. Idinuduon kan parabula manungod sa mapagmansay asin sa mangmang na mga daraga an manungod sa pagigin andam asin alerto. Asin idinuduon kan parabula manungod sa mga talento an kahalagahan kan pagigin mahigos asin maigot.​—w24.09, p. 20-​24.

Gurano kalangkaw an portiko kan templo ni Solomon?

Sa nagkapirang suanoy na manuskrito “120 maniko” an mababasa sa 2 Cronica 3:​4, kaya 53 metros an langkaw kan portiko. Pero sa iba pang masasarigan na mga manuskrito “20 maniko,” kaya siyam na metros an langkaw kaiyan. An sukol na siyam na metro garo baga iyo an tamang-tama sa hibog kan mga lanob kan templo.​—w24.10, p. 31.

An sarong ministeryal na lingkod dapat na “agom nin sarong babayi,” ano an buot sabihon kaiyan? (1 Tim. 3:12)

Nangangahulugan iyan na dapat na kasal siya sa saro lang na babayi asin dai siya dapat naggigibo nin seksuwal na imoralidad. Dugang pa, dai siya dapat magtao nin bakong maninigong atensiyon sa ibang mga babayi.​—w24.11, p. 19.

Taano ta nasabi niyato na an Juan 6:53 bakong sarong arugan na dapat sunudon sa kun paano isasagibo an Pamanggihan kan Kagurangnan?

Sinasambit sa Juan 6:53 na kaipuhan na kakanon an laman ni Jesus asin na inumon an saiyang dugo. Sinabi ni Jesus an mga tataramon na ini kan 32 C.E., sa Galilea, sa mga Judio na dai pa kaidto nagpapahiling nin pagtubod sa saiya. Pero, an Pamanggihan kan Kagurangnan pinunan sarong taon pagkatapos kaiyan sa Jerusalem. Diyan, an kinaulay ni Jesus iyo an mga makakaibanan niyang mamahala sa langit.​—w24.12, p. 10-​11.