1-2. (a) Ano an puwedeng mamatian ta pag hinurop-hurop ta an manungod sa buhay asin ministeryo ni Jesus? (b) Ano an pag-uulayan ta sa artikulong ini?

 PAG nagadanan kita nin mahal sa buhay, talagang napupungaw kita sa tawong iyan! Sa primero, tibaad makulugon para sa satuya pag ginigirumdom ta an mga pangyayari bago magadan an satong mahal sa buhay, lalo na kun nag-agi siya nin grabeng pagsakit bago siya magadan. Pero sa paglihis nin panahon, puwedeng makamati na giraray kita nin kaugmahan pag may naiisip kitang sarong bagay na itinukdo niya sa sato o ginibo niya o sinabi para pakusugon kita o para pangiriton kita.

² Sa kaagid na paagi, namumundo kita pag nababasa ta an manungod sa pagsakit asin kagadanan ni Jesus. Sa panahon nin Memoryal, lalo kitang nagtatao nin panahon para hurop-hurupon an kahalagahan kan saiyang atang na pantubos. (1 Cor. 11:24, 25) Minsan siring, nagkakaigwa kita nin dakulang kaugmahan pag hinuhurop-hurop ta an gabos na bagay na sinabi asin ginibo ni Jesus kan yaon siya digdi sa daga. Napapakusog man kita pag iniisip-isip ta an manungod sa kun ano an ginigibo niya ngunyan asin sa kun ano an gigibuhon niya para sa sato sa maabot na panahon. An paghurop-hurop sa mga bagay na ini asin sa saiyang pagkamuot para sa sato mapahiro sa sato na ipahiling an satong pagpapahalaga sa praktikal na mga paagi, arog kan mahihiling ta sa artikulong ini.

3. Ano an mga dahilan ta para magin mapagpasalamat sa pantubos?

³ Nakakamati kita nin pasasalamat pag hinuhurop-hurop ta an manungod sa buhay asin kagadanan ni Jesus. Sa bilog na ministeryo ni Jesus digdi sa daga, tinukduan niya an mga tawo manungod sa mga bendisyon na itatao kan Kahadian nin Diyos. Pinapahalagahan  tang marhay an mga katotoohan na ini manungod sa Kahadian. Nagpapasalamat kita sa pantubos huling binukasan kaiyan an dalan para magkaigwa kita nin dayupot na pakikipag-amigo ki Jehova asin ki Jesus. An mga nagtutubod ki Jesus igwa man nin paglaom na mabuhay nin daing katapusan asin mahiling giraray an mga nagadan nindang mahal sa buhay. (Juan 5:28, 29; Roma 6:23) Mayo kitang ginibong ano man para magin maninigo sa mga bendisyon na ini; ni mababayadan ta man an Diyos asin an Cristo sa ginibo ninda para sa sato. (Roma 5:8, 20, 21) Pero puwede tang maipahiling sa sainda kun gurano kita nagpapasalamat. Paano?

4. Paano ipinahiling ni Maria Magdalena an saiyang pasasalamat sa ginibo ni Jesus para sa saiya? (Hilingon an ritrato.)

⁴ Pag-isipan an halimbawa nin sarong Judiong babayi na si Maria Magdalena. Miserable an kamugtakan niya, pinapasakitan siya nin pitong demonyo. Posibleng namati niya na mayo nang makakatabang sa saiya. Kaya imahinara na sana an pasasalamat niya kan patalingkason siya ni Jesus sa impluwensiya kan mga demonyong idto! An saiyang pasasalamat nagpahiro sa saiya na magin parasunod ni Jesus asin na gamiton an saiyang panahon, kusog, saka mga pagsadiri para suportaran an ministeryo ni Jesus. (Luc. 8:1-3) Dawa ngani nagpapasalamat na marhay si Maria sa ginibo ni Jesus para sa saiya, tibaad dai niya pa nasasabutan na itatao pa sana ni Jesus an saiyang pinakanangungurog na regalo. Itatao niya an saiyang buhay para sa katawuhan, “tanganing an siisay man na nagtutubod sa saiya” magkamit nin buhay na daing katapusan. (Juan 3:16) Pero, ipinahiling ni Maria an saiyang pagpapahalaga ki Jesus paagi sa pagigin maimbod. Mantang nagsasakit si Jesus sa hariging pasakitan, nakatindog si Maria sa may harani, na nagtatao nin emosyonal na suporta sa saiya asin sa iba. (Juan 19:25) Pagkagadan ni Jesus, nagpasiring sa lulubngan si Maria asin an duwa pang babayi na may darang mahamot na mga sangkap para sa pag-andam sa paglubong saiya. (Mar. 16:1, 2) Dakulang balos an nakamtan ni Maria huli sa saiyang kaimbudan. Nagkaigwa siya nin pagkakataon na mahiling asin makaulay an binuhay liwat na si Jesus—sarong pribilehiyo na dai naeksperyensiyahan kan kadaklan sa mga disipulo.—Juan 20:11-18.

5. Paano ta maipapahiling an satong pasasalamat sa gabos na ginibo ni Jehova asin ni Jesus para sa sato?

 ⁵ Maipapahiling ta man an satong pasasalamat sa gabos na ginibo ni Jehova asin ni Jesus para sa sato paagi sa paggamit kan satong panahon, kusog, asin materyal na mga pagsadiri para sa pagpauswag kan gibuhon na pang-Kahadian. Halimbawa, puwede tang hinguwahon na magin andam na magtabang sa pagtugdok asin pagmentenar nin mga edipisyo para sa dalisay na pagsamba.

6. Taano ta masasabi ta na an pantubos sarong regalo sa kada saro sa sato?

⁶ Pag iniisip-isip ta kun gurano kita namumutan ni Jehova asin ni Jesus, napapahiro kita na kamutan man sinda. (1 Juan 4:10, 19) Mas lalo ta pa sindang mamumutan pag iniisip ta na nagadan si Jesus para sa sato bilang indibidwal. Aram nanggad iyan ni apostol Pablo asin ipinahayag niya an saiyang pagpapahalaga kan magsurat siya sa mga taga Galacia, na an sabi: “[An] Aki nin Diyos . . . namuot sa sakuya asin nagtao kan saiyang sadiri para sa sako.” (Gal. 2:20) Huli sa pantubos, nairani ka ni Jehova sa saiya tanganing magin amigo mo siya. (Juan 6:44) Bako daw na nakakaugmang maaraman na may nahiling si Jehova na marahay sa saimo asin na nagbayad siya nin dakulang halaga tanganing maibilang ka niya na saiyang amigo? Bako daw na napapakusog kaiyan an saimong pagkamuot ki Jehova asin ki Jesus? Kaya marahay na haputon ta an satong sadiri, ‘Anong mga bagay an napapahiro akong gibuhon huli sa pagkamuot na iyan?’

7. Arog kan mahihiling sa ritrato, paano ta maipapahiling an satong pagkamuot ki Jehova asin ki Jesus? (2 Corinto 5:14, 15; 6:1, 2)

⁷ An satong pagkamuot sa Diyos asin ki Cristo nagpapahiro sa sato na magpahiling nin pagkamuot sa iba. (Basahon an 2 Corinto 5:14, 15; 6:1, 2.) An sarong paagi na maipapahiling ta an satong pagkamuot iyo an maigot na pakikikabtang sa gibuhon na paghuhulit. Hinuhulitan ta an gabos na nanunumpungan niyato. Dai kita nagpapahiling nin diskriminasyon sa siisay man huli sa saiyang lahi, tribo, kamugtakan sa buhay, o pinag-adalan.  Paagi kaiyan, minahiro kita kauyon kan katuyuhan ni Jehova “na an gabos na klase nin tawo maligtas saka makaabot sa tamang kaaraman mapadapit sa katotoohan.”—1 Tim. 2:4.

8. Paano ta maipapahiling an satong pagkamuot sa satong mga tugang?

⁸ Pinapatunayan ta man an satong pagkamuot sa Diyos asin ki Cristo paagi sa pagpahiling nin pagkamuot sa satong mga tugang. (1 Juan 4:21) Nagpapahiling kita nin personal na interes sa sainda asin tinatabangan sinda sa panahon na may inaagihan sindang mga pagbalo. Rinaranga ta sinda pag nagadanan sinda nin mahal sa buhay, binibisita ta sinda pag naghihilang sinda, asin ginigibo ta an satong pinakamakakaya para pakusugon sinda pag pinangluluyahan sinda nin buot. (2 Cor. 1:3-7; 1 Tes. 5:11, 14) Padagos ta sindang ipinapamibi, na ginigirumdom na “an pagngayo-ngayo na ginigibo nin sarong matanos igwa nin dakulang epekto.”—Sant. 5:16.

9. Ano an saro pang paagi na maipapahiling ta an pagkamuot sa satong mga tugang?

⁹ Maipapahiling ta man an pagkamuot sa satong mga tugang paagi sa pagmamaigot na mapagdanay an matuninong na relasyon sa sainda. Nagmamaigot kitang arugon an halimbawa ni Jehova sa pagpapatawad. Kun andam ngani si Jehova na itao an saiyang Aki tanganing magadan para sa satong mga kasalan, bako daw na dapat na andam man kita na patawadon an satong mga tugang pag nagkasala sinda sa sato? Habo ta na magin arog kan maraot na uripon na sinambit sa saro sa mga parabula ni Jesus. Pagkatapos na patawadon kan saiyang kagurangnan an saiyang dakulaon na utang, dai nagibo kan uripon na iyan na patawadon an sadit man sanang utang kan kapwa niya uripon. (Mat. 18:23-35) Kun igwa kamo nin dai pagkasinabutan kan saro sa mga kakongregasyon mo, puwede daw na ika an inot na gumibo nin paagi para makipagkatuninungan bago mag-atender sa Memoryal? (Mat. 5:23, 24) An paggibo kaiyan mapahiling kan saimong hararom na pagkamuot ki Jehova asin ki Jesus.

10-11. Paano maipapahiling kan mga elder na namumutan ninda si Jehova asin si Jesus? (1 Pedro 5:1, 2)

¹⁰ Paano maipapahiling kan mga elder na namumutan ninda si Jehova asin si Jesus? An sarong mahalagang paagi iyo an pag-asikaso sa mga pangangaipo kan mga karnero ni Jesus. (Basahon an 1 Pedro 5:1, 2.) Lininaw ni Jesus an puntong iyan ki apostol Pedro. Pagkatapos na nigaran nin tulong beses si Jesus, posibleng marhay na grabe an pagmawot ni Pedro na patunayan na namumutan niya si Jesus. Pagkabuhay liwat ni Jesus, hinapot niya si Pedro: “Simon na aki ni Juan, namumutan mo ako?” Makakasigurado kita na gigibuhon ni Pedro an gabos para patunayan an saiyang pagkamuot sa saiyang Kagurangnan. Sinabi ni Jesus ki Pedro: “Pasturan mo an sakuyang saradit na karnero.” (Juan 21:15-17) Asin sa bilog na buhay ni Pedro, mamumuton niyang inataman an mga karnero kan Kagurangnan, na pinapatunayan na namumutan niya si Jesus.

¹¹ Mga elder, sa panahon nin Memoryal, paano nindo maipapahiling na an mga tataramon ni Jesus ki Pedro mahalaga man sa saindo? Puwede mong maipahiling kun gurano mo namumutan si Jehova asin si Jesus paagi sa regular na pagsagibo nin pagpapastor asin paghihinguwang marhay na tabangan an mga inaktibo na bumalik ki Jehova. (Ezek. 34:11, 12) Puwede mo man pakusugon an mga tinutukduan sa Bibliya asin an mga baguhan na nag-atender sa Memoryal, na ginigibo an gabos na makakaya mo para mamati kan potensiyal na mga disipulong ini na maugma ta sindang inaako.

12. Taano ta an paghurop-hurop sa mga sinabi ni Jesus kan banggi bago siya magadan nagtatao sa sato nin kusog nin buot? (Juan 16:32, 33)

¹² Kan banggi bago magadan si Jesus, sinabi niya sa saiyang mga disipulo: “Sa kinaban magkakaigwa kamo nin kasakitan, alagad kusugan nindo an saindong buot! Dinaog ko an kinaban.”  (Basahon an Juan 16:32, 33.) Ano an nakatabang ki Jesus na atubangon nin may kusog nin buot an saiyang mga kaiwal asin na magdanay na maimbod sagkod sa kagadanan? Nagsarig siya ki Jehova. Huling aram ni Jesus na mapapaatubang an saiyang mga parasunod sa kaparehong mga pagbalo, hinagad niya ki Jehova na bantayan sinda. (Juan 17:11) Taano ta nagtatao ini sa sato nin kusog nin buot? Huling mas makusog si Jehova kisa sa siisay man na kaiwal niyato. (1 Juan 4:4) Nahihiling ni Jehova an gabos. Kumbinsido kita na kun masarig kita ki Jehova, mapapangganahan ta an satong mga ikinakatakot asin magkakaigwa kita nin kusog nin buot.

13. Paano nagpahiling nin kusog nin buot si Jose na taga Arimatea?

¹³ Pag-isipan an halimbawa ni Jose na taga Arimatea. Iginagalang siyang marhay kan mga Judio. Miyembro siya kan Sanhedrin, an Judiong korte suprema. Pero durante kan ministeryo ni Jesus sa daga, dai nagpahiling si Jose nin kusog nin buot. Sinabi ni Juan na siya “sarong disipulo ni Jesus pero patago dahil sa takot niya sa mga Judio.” (Juan 19:38) Dawa ngani interesado si Jose sa mensahe kan Kahadian, itinago niya sa iba na nagtutubod siya ki Jesus. Daing duda na natakot siya na mawara an paggalang sa saiya kan mga tawo sa komunidad. Ano man an dahilan, sinasabi sa sato kan Bibliya na pagkagadan ni Jesus, sa katapos-tapusi “nagkusog-buot [si Jose na] magduman ki Pilato, asin hinagad niya an hawak ni Jesus.” (Mar. 15:42, 43) Ngunyan dai na itinago ni Jose an saiyang pagigin disipulo ni Jesus.

14. Ano an dapat mong gibuhon kun nadadaog ka nin pagkatakot sa tawo?

¹⁴ Namati mo na man daw an pagkatakot sa tawo arog ni Jose? Sa eskuwelahan man o sa trabaho, may pagkakataon daw na nasusupog kang ipabisto an saimong sadiri bilang saro sa mga Saksi ni Jehova? Nag-aalangan ka daw na magin sarong parahayag o na magpabawtismo huling nahahadit ka sa puwedeng isipon saimo kan iba? Dai pagtugutan an siring na mga pagmati na pugulan ka na gibuhon kun ano an aram mong tama. Udok kang mamibi ki Jehova. Hagadon mo saiya na magkaigwa ka nin kusog nin buot para magibo mo an saiyang kabutan. Mantang nahihiling mong sinisimbag ni Jehova an saimong mga pamibi, magigin mas makusog ka asin urog kang magkakaigwa nin kusog nin buot.—Isa. 41:10, 13.

15. Pakatapos na magpahiling si Jesus sa saiyang mga disipulo, napahiro sinda kan saindang kaugmahan na gibuhon an ano? (Lucas 24:52, 53)

¹⁵ Mamunduon na marhay an mga disipulo kan magadan si Jesus. Imahinara na yaon ka sa saindang sitwasyon. Dai sana sinda nawaran nin namumutan na amigo kundi namati man ninda na nawara man an linalauman ninda. (Luc. 24:17-21)  Pero kan magpahiling si Jesus sa sainda, nagtao siya nin panahon para tabangan sinda na masabutan an saiyang papel sa pag-utob kan propesiya sa Bibliya. Tinawan niya man sinda nin mahalagang gibuhon. (Luc. 24:26, 27, 45-48) Pakalihis nin 40 aldaw kan magsakat si Jesus sa langit, an kamunduan kan mga disipulo naribayan nin dakulang kaugmahan. Ugmahon na marhay sinda huling aram ninda na an saindang Kagurangnan buhay asin andam na tabangan sindang utubon an pagbuot na itinao sa sainda. An saindang kaugmahan nagpahiro sa sainda na umawon si Jehova nin daing pundo.—Basahon an Lucas 24:52, 53; Gibo 5:42.

16. Paano ta maaarog an mga disipulo ni Jesus?

¹⁶ Paano ta maaarog an mga disipulo ni Jesus? Puwede kitang magkaigwa nin kaugmahan sa pagsamba ki Jehova bako sana sa panahon nin Memoryal kundi sa bilog na taon. Nangangaipo ini na dapat niyatong inuton sa satong buhay an Kahadian nin Diyos. Halimbawa, dakul an nag-adjust kan saindang iskedyul sa trabaho tanganing makikabtang sa ministeryo, makapag-atender sa mga pagtiripon, asin magkaigwa nin regular na pampamilyang pagsamba. May nagkapira na nagdesisyon pa ngani na dai na magkaigwa nin materyal na mga pagsadiri na minamansay kan iba na kaipuhan tanganing magin mas kapaki-pakinabang sinda sa kongregasyon o tanganing makapaglingkod sinda kun sain dakul pang parahayag kan Kahadian an kaipuhan. Dawa ngani kaipuhan ta nin pakatagal tanganing padagos na makapaglingkod ki Jehova, nanunuga siya na abunda niya kitang bebendisyunan kun iinuton ta sa satong buhay an intereses kan Kahadian.—Tal. 10:22; Mat. 6:32, 33.

17. Ano an determinado mong gibuhon sa panahon na ini nin Memoryal? (Hilingon an ritrato.)

¹⁷ Hinahalat-halat ta na an pagselebrar kan Memoryal sa Martes, Abril 4. Pero dai na kaipuhan na halaton pa an aldaw na iyan para hurop-hurupon an manungod sa buhay asin kagadanan ni Jesus saka an pagkamuot na ipinahiling niya asin ni Jehova para sa sato. Aprobetsaran an lambang oportunidad na gibuhon iyan sa panahon nin Memoryal. Halimbawa, magtagama nin panahon na basahon asin hurop-hurupon an mga pangyayari na sinumaryo sa tsart na “Huring Semana kan Buhay ni Jesus Digdi sa Daga,” na nasa Apendise B12 kan Bagong Kinaban na Traduksiyon. Mantang ginigibo mo iyan, maghanap nin mga teksto sa Bibliya na makakatabang sa saimo na magin urog na mapagpasalamat, na mas mapakusog an saimong pagkamuot, na magin mas makusog an buot, asin na magkaigwa nin urog na kaugmahan. Dangan, mag-isip nin espesipikong mga paagi na maipapahiling mo an saimong udok sa pusong pasasalamat. Makakasigurado ka na papahalagahan na marhay ni Jesus an gabos na ginigibo mo para girumdumon siya sa panahon na ini nin Memoryal.—Kap. 2:19.