1-2. Ano an dapat na padagos niyatong gibuhon pagkatapos na mabawtismuhan kita? Ipaliwanag.

 GURANO mo kaparating linilinigan an saimong harong? Tibaad bago ka naglipat diyan, lininigan mo iyan na marhay. Pero paano kun pagkatapos kaiyan, dai mo na lamang iyan lininigan? Siguradong madaling matitipon diyan an alpog asin ati. Para magdanay na malinig an saimong harong, kaipuhan na pirmi mong linigan iyan.

² Sa kaagid na paagi, dapat man na padagos niyatong itanos an satong kaisipan asin an satong personalidad. Siyempre, bago kita nagpabawtismo pinagmaigutan niyatong gibuhon an kinakaipuhan na mga pagbabago sa satuyang buhay tanganing “linigon niyato an satuyang mga sadiri sa lambang bagay na nakakaramog sa laman asin espiritu.” (2 Cor. 7:1) Pero ngunyan kaipuhan tang sunudon an sadol ni apostol Pablo na ‘padagos na magbago.’ (Efe. 4:23) Taano ta kaipuhan an padagos na paghihinguwa? Huling an alpog asin an ati kan kinaban na ini puwedeng madaling matipon sa sato. Para malikayan iyan asin para magdanay na malinig sa atubangan ni Jehova, dapat na pirmi niyatong siyasaton an satong pag-iisip, an satong personalidad, asin an satong mga pagmawot.

3. Ano an buot sabihon kan “pagbago kan saindong isip”? (Roma 12:2)

³ Ano an kaipuhan niyatong gibuhon para baguhon an satong isip, an buot sabihon, baguhon an satong paagi nin pag-iisip? (Basahon an Roma 12:2.) An Griegong pananaram na itrinadusir na “pagbago kan saindong isip” puwedeng itradusir na “paghirahay kan saindong isip.” Kun siring, kulang an basta sana paggibo nin  nagkapirang marahay na bagay. Imbes, dapat na siyasaton niyato an satong panglaog na persona asin gumibo kita nin ano man na kinakaipuhan na mga pagbabago para maiuyon niyato sagkod sa pinakaposible an satuyang buhay sa mga pamantayan ni Jehova. Dapat na gibuhon niyato ini, bako sanang sarong beses kundi padagos.

4. Paano niyato malilikayan na moldehon an satong kaisipan kan sistemang ini nin mga bagay?

⁴ Pag perpekto na kita, pirmi na niyatong mapapaugma si Jehova sa gabos na ginigibo ta. Pero sa ngunyan, kaipuhan tang padagos na maghinguwa tanganing mapaugma si Jehova. Risahon an ginibong pagkonektar ni Pablo sa pagbago kan satong isip asin sa pagsabot kan kabutan nin Diyos, arog kan nakarekord sa Roma 12:2. Imbes na tugutan niyato an satong sadiri na moldehon kan sistemang ini nin mga bagay, dapat na siyasaton nguna niyato an satong sadiri para maaraman kun sagkod sain niyato tinutugutan an kaisipan nin Diyos—bako an kaisipan kan kinaban—na makaimpluwensiya sa satong mga pasuhan asin mga desisyon.

5. Paano ta masisiyasat an satong kaisipan manungod sa kaharanihan kan aldaw ni Jehova? (Hilingon an ritrato.)

⁵ Pag-isipan an sarong halimbawa. Gusto ni Jehova na ‘pirmi tang isinasaisip an pag-abot kan aldaw ni Jehova.’ (2 Ped. 3:12) Haputon an sadiri: ‘Ipinapahiling daw kan sakong pamumuhay na nasasabutan ko kun gurano na kita kaharani sa pagtatapos kan sistemang ini nin mga bagay? Ipinapahiling daw kan sakong mga desisyon manungod sa edukasyon asin trabaho na an paglilingkod ki Jehova iyo an pinakamahalagang bagay sa buhay ko? Nagtutubod daw ako na itatao ni Jehova an mga pangangaipo ko asin kan sakong pamilya, o pirmi daw akong naghahadit manungod sa materyal na mga bagay?’ Isip-isipa kun gurano kaugma si Jehova pag nahihiling niya kitang naghihinguwa na mamuhay kauyon kan saiyang kabutan.—Mat. 6:25-27, 33; Fil. 4:12, 13.

6. Ano an kaipuhan na padagos tang gibuhon?

 ⁶ Kaipuhan na pirmi niyatong siyasaton an satong pag-iisip dangan gibuhon an ano man na kinakaipuhan na mga pagbabago. Sinabi ni Pablo sa mga taga Corinto: “Padagos na baluon kun baga kamo nasa pagtubod; padagos na patunayan kun ano man nanggad kamo.” (2 Cor. 13:5) Para masabi na an saro “nasa pagtubod,” urog pa sa pag-atender sa Kristiyanong mga pagtiripon asin pakikikabtang sa ministeryo sa pana-panahon an kalabot. Kalabot man diyan an satong kaisipan, mga tendensiya, asin mga motibo. Kaya kaipuhan tang padagos na baguhon an satong isip paagi sa pagbasa kan Tataramon nin Diyos, na inaaram kun paano maaarog an pag-iisip niya, dangan ginigibo an ano man na kinakaipuhan para maiuyon an satong sadiri sa kabutan ni Jehova.—1 Cor. 2:14-16.

7. Uyon sa Efeso 4:31,32, ano pa an kaipuhan niyatong gibuhon, asin taano ta tibaad masakit iyan?

⁷ Basahon an Efeso 4:31, 32. Apuwera sa pagbago kan satong pag-iisip, kaipuhan tang “isulot an bagong personalidad.” (Efe. 4:24) Kalabot diyan an paghiro niyato. Kaiba sa paghirong dapat niyatong gibuhon iyo an pagmamaigot na mahali an mga bagay na arog kan grabeng paghinanakit, kaanggutan, asin pagkaungis. Taano ta tibaad masakit na gibuhon iyan? Huling may mga negatibong pag-uugali na hararom nang nakagamot. Halimbawa, sinasabi kan Bibliya na may mga tawo na “madaling maanggot” asin “arangguton.” (Tal. 29:22) An pagkontrol sa nakagamot nang mga ugali posibleng marhay na mangaipo nin padagos na paghihinguwa dawa pagkatapos na mabawtismuhan an saro, arog kan ipinapahiling kan minasunod na eksperyensiya.

8-9. Paano ipinapahiling kan eksperyensiya ni Stephen na kaipuhan tang padagos na halion an lumang personalidad?

⁸ An brother na si Stephen igwa kaidto nin problema sa pagkontrol kan saiyang kaanggutan. “Dawa nabawtismuhan na ako,” an sabi niya, “kinaipuhan kong padagos na pagmaigutan na kontrulon an sakong kaanggutan. Halimbawa, sarong beses mantang naghuhulit ako sa harong-harong, linapag ko an parahabon na nagkua kan radyo sa awto ko. Kan maabutan ko na siya, binutasan niya an radyo dangan nagdulag. Kan iistorya ko sa iba na kaiba ko kun paano ko nabawi an radyo, sarong elder na kaiba sa grupo an naghapot sako, ‘Stephen, ano daw kuta an ginibo mo kun nadakop mo siya?’ Napaisip ako kan hapot na iyan asin napahiro ako na padagos na pagmaigutan na magin mapagpatuninong.” b

⁹ Arog kan ipinapahiling kan eksperyensiya ni Stephen, puwede kitang bigla na sanang makapahiling nin negatibong ugali, dawa pa hinuhuna ta na nahali ta na iyan. Kun mangyari iyan sa saimo, dai ka madisganar asin dai mo pag-isipon na dai mo nagibong magin marahay na Kristiyano. Dawa si apostol Pablo nag-admitir: “Pag gusto kong gibuhon an tama, an maraot an yaon sa sako.” (Roma 7:21-23) An gabos na bakong perpektong Kristiyano igwa nin negatibong mga ugali na nagpapabalik-balik siring sa alpog asin ati na natitipon sa satong harong. Kaipuhan niyatong padagos na magmaigot sa pagpapadanay na malinig. Paano ta magigibo iyan?

10. Paano ta malalabanan an bakong marahay na mga ugali? (1 Juan 5:14, 15)

¹⁰ Ipamibi ki Jehova an manungod sa ugali na nasasakitan kang halion, na nagtitiwala na dadangugon ka niya asin tatabangan. (Basahon an 1 Juan 5:14, 15.) Baga man dai hahalion ni Jehova sa milagrosong paagi an ugaling iyan, puwede ka niyang pakusugon tanganing dai ka magpadaog sa ugaling iyan. (1 Ped. 5:10) Humiro ka kauyon kan saimong mga pamibi paagi sa dai paggibo nin mga bagay na puwedeng makapabalik kan saimong lumang personalidad. Halimbawa, magin maingat manungod sa paghiling  nin mga pelikula asin programa sa telebisyon, o sa pagbasa nin mga istorya na nagtatampok kan mga ugali na pinagmamaigutan mong halion. Asin likayan mo na magparaisip manungod sa salang mga pagmawot.—Fil. 4:8; Col. 3:2.

11. Ano an puwede tang gibuhon para padagos na maisulot an bagong personalidad?

¹¹ Minsan ngani nahali mo na an lumang personalidad, mahalaga na pauswagon an bagong personalidad. Paano mo magigibo iyan? Gibuhon na pasuhan na arugon si Jehova mantang nanunudan mo an manungod sa saiyang mga kuwalidad. (Efe. 5:1, 2) Halimbawa, pag nagbabasa ka nin sarong pagkasaysay sa Bibliya na itinatampok an pagigin mapagpatawad ni Jehova, haputon an sadiri, ‘Pinapatawad ko daw an iba?’ Pag nababasa mo an manungod sa pagmalasakit ni Jehova sa mga nag-aagi nin kadipisilan, haputon an sadiri, ‘May arog man daw ako kaiyan na pagmalasakit para sa mga kapagtubod na nangangaipo, asin ipinapahiling ko daw iyan paagi sa sakuyang mga gibo?’ Padagos na baguhon an saimong isip paagi sa pagsulot kan bagong personalidad, asin magin mapasensiya sa saimong sadiri mantang ginigibo mo iyan.

12. Paano naeksperyensiyahan ni Stephen an nakakapabagong puwersa kan Bibliya?

¹² Nahiling ni Stephen, na nasambit sa inutan, na luway-luway niyang nagibo na maisulot an bagong personalidad. Sinabi niya: “Puon kan mabawtismuhan ako, napaatubang ako sa nagkapirang sitwasyon na kinaipuhan kong kontrulon an sakong kaanggutan. Nanudan ko na bayaan na lang an mga tawo na nagpupurbar na paangguton ako o na pahupaon na lang an sitwasyon sa ibang mga paagi. Dakul na tawo, kaiba na an sakong agom, an nagtao sako nin komendasyon kun paano ko inatubang an siring na mga sitwasyon. Dawa ako dai makatubod na nagibo ko iyan! Aram kong dai ko magigibo an mga pagbabagong iyan sa personalidad ko na ako sana. Imbes, nagtutubod ako na patunay iyan kan nakakapabagong puwersa kan Bibliya.”

13. Ano an makakatabang sa sato para pauswagon an tamang mga pagmawot? (Galacia 5:16)

¹³ Basahon an Galacia 5:16. Tanganing tabangan kita na magin mapanggana sa satong paghihinguwa na gibuhon an tama, abundang itinatao ni Jehova an saiyang banal na espiritu. Pag pinag-aadalan ta an Tataramon nin Diyos, tinutugutan tang giyahan kita kan espiritung iyan. Nag-aako man kita nin banal na espiritu pag nag-aatender kita sa satong mga pagtiripon. Sa Kristiyanong mga pagtiripon na iyan, makakaibanan ta an mga tugang na, arog ta, nagmamaigot na gibuhon kun ano an tama, asin nakakapakusog iyan. (Heb. 10:24, 25; 13:7) Asin pag udok kitang namimibi ki Jehova asin nakikimahirak sa saiya na tabangan kita sa sarong kaluyahan, itatao niya sa sato an saiyang banal na espiritu para pakusugon kita na padagos na malabanan iyan. Baga man posibleng dai man mahali kan mga aktibidad na iyan an salang mga pagmawot, matatabangan kita kan mga iyan na labanan an tendensiya na isagibo an salang mga kamawutan. Arog kan sinasabi sa Galacia 5:16, an mga naglalakaw sigun sa espiritu ‘dai maisasagibo an ano man na makalaman na pagmawot.’

14. Taano ta mahalaga na padagos na pauswagon an tamang mga pagmawot?

¹⁴ Pag nakaestablisar na kita nin marahay na rutina nin espirituwal na mga aktibidad, mahalagang marhay na papagdanayon niyato an rutinang iyan asin padagos na pauswagon an tamang mga pagmawot. Taano? Huling an saro sa satong mga kaiwal nungkang nagtuturog. An kaiwal na iyan iyo an sugot na gumibo nin sala. Dawa pagkatapos na mabawtismuhan kita tibaad marisa ta na naaakit pa man giraray kita sa mismong mga bagay na dapat tang likayan, kaiba na an pagsugal, pag-abuso sa alkohol, o pornograpiya. (Efe. 5:3, 4) Inadmitir nin sarong hoben na brother: “An saro sa pinakamasakit na bagay na  pinaglalabanan ko iyo an pagkagusto ko sa kapareho kong sekso. Paghuna ko malihis sana idto, pero sagkod ngunyan yaon pa man giraray an pagmating iyan.” Ano an makakatabang sa saimo kun makusugon an salang pagmawot na namamatian mo?

15. Taano ta nakakapakusog na maaraman na an salang mga pagmawot inaatubang man kan “ibang mga tawo”? (Hilingon an ritrato.)

¹⁵ Mantang linalabanan mo an salang pagmawot na talagang sarong mapandayang kaiwal, girumdumon na dai ka nagsosolo. Sinasabi kan Bibliya: “Ano man na sugot na minaabot sa saindo, napapaatubang man diyan an ibang mga tawo.” (1 Cor. 10:13a) An mga tataramon na iyan isinurat para sa mga lalaki asin babayi na mga Kristiyano na nakaistar sa Corinto. An iba sa sainda dating mga parasambay, mga homoseksuwal, asin mga buratsero. (1 Cor. 6:9-11) Sa hiling mo daw pagkatapos kan saindang bawtismo dai na lamang sinda nagkaigwa nin salang mga pagmawot na kaipuhan na labanan? Bakong arog kaiyan. Totoo, gabos sinda linahidan na mga Kristiyano, pero mga tawo pa man giraray sinda na bakong perpekto. Siguradong kinaipuhan nindang labanan an salang mga pagmawot sa pana-panahon. Dapat na mapakusog kita kaiyan. Taano? Huling ipinapahiling kaiyan na ano man na salang pagmawot na pinaglalabanan mo, pinaglabanan man iyan kan iba. Iyo, makakapagdanay kang “marigon sa pagtubod, mantang aram [mo] na an arog kaiyan na klase nin mga kasakitan inaagihan man kan bilog na kasararuan kan [saimong] mga tugang.”—1 Ped. 5:9.

16. Anong peligro an dapat niyatong likayan, asin taano?

¹⁶ Likayan an peligro na pagkaigwa nin kaisipan na mayo nin makakasabot sa partikular na kadipisilan na inaatubang mo. Huli kaya sa arog kaiyan na kaisipan puwedeng mamatian mo na an saimong sitwasyon mayo nang paglaom asin na mayo ka nang magiginibo para labanan an salang mga pagmawot. Bakong arog kaiyan an sinasabi kan Bibliya. Sinasabi kaiyan: “An Diyos maimbod, asin dai niya tutugutan na mapaatubang  kamo sa sugot na dai nindo makakaya, kundi kasabay kan sugot magibo man siya nin maluluwasan tanganing matagalan nindo iyan.” (1 Cor. 10:13b) Kun siring, dawa makusog an salang pagmawot, makakaya tang labanan iyan. Sa tabang ni Jehova, makakaya tang dai gumibo nin sala.

17. Minsan ngani puwedeng dai ta malilikayan na magkaigwa nin salang mga pagmawot, ano an puwede tang gibuhon?

¹⁷ Pirming girumdumon ini: Bilang sarong bakong perpektong tawo, puwedeng dai mo malilikayan na magkaigwa nin salang mga pagmawot. Pero kun magkaigwa man, magigibo mong isikwal tulos iyan, arog kan ginibo ni Jose kan magdulag tulos siya sa agom ni Potifar. (Gen. 39:12) Dai mo nanggad dapat isagibo an salang mga pagmawot!

18-19. Ano an mga puwede tang ihapot sa satong sadiri mantang nagmamaigot kita na baguhon an satong isip?

¹⁸ Kalabot sa pagbago kan satong isip an padagos na paghihinguwa para iuyon an satong pag-iisip asin mga gibo sa kabutan ni Jehova. Para magibo iyan, pirmi niyatong siyasaton an satong sadiri asin ihapot: ‘An sakuya daw na paghiro nagpapahiling na nasasabutan ko an pagkaapurado kan panahon na kinabubuhayan ta? Nag-uuswag daw ako kun manungod sa pagsulot kan bagong personalidad? Tinutugutan ko daw an espiritu ni Jehova na giyahan an sakong buhay para malabanan ko an tendensiya na isagibo an makalaman na mga pagmawot?’

¹⁹ Mantang sinisiyasat mo an saimong sadiri, hanapon bako an pagigin perpekto, kundi an pag-uswag na nagibo mo. Kun may mahiling ka na kaipuhan na pauswagon, dai ka madisganar. Imbes, sunudon an sadol kan Filipos 3:16: “Ano man an pag-uswag na nagibo na niyato, ipagpadagos ta an paglakaw nin husay sa dalan na iyan.” Pag ginibo mo iyan, makakaasa ka na bebendisyunan ni Jehova an saimong mga paghihinguwa na padagos na baguhon an saimong isip.